قاریشقالار اولکه سی

قاریشقالار اولکه سی

کوچوره ن:اکبرسعادت
بیر گون گلن، بیر گون گدر.
طبیعت اولماز قایداسیز!
بیر قوش یادا سن.
گلن گئدر یوخدو سونون!
هانی یولو گئدن لرین.
گدن گئتدی لاپ خبرسیز!
سونسوز اولماق هاردان گلدی.
کیمدی دئدی اینسان سونسوز!؟
آنا دیلیمیز:بیری وار ایدی، بیری یوخ ایدی. بیری آز ایدی، بیری چوخ ایدی. بیری آج ایدی، بیری توخ ایدی. لیملی آدیندا بیر قاریشقالار اولکه سی وار ایدی. لیملی اولکه سینده بویوز قاریشقالارلا یاغیز قاریشقالار بیر یئرده یاشاییردیلار. لیملی اولکه سینی بویوز قاریشقالارین سئچکینلری یونه تمَکده ایدیلر. مین ایل یاغیز قاریشقالار لیملی اولکه سینی یونه تمیشدیلر. یاغیز قاریشقالار لیملی اولکه سینی یونه تدیکلری زامان بویوز قاریشقالارین یاشام بیچیمینه توخونمامیشدیلار. اونلار اوز دیللرینده دانیشیر، اوز دیللرینده شرقیلر سویله ییر، اوز موسیقیلری ایله رقص ائدیردیلر. آنجاق نئجه اولموشدوسا، یونه تیم ال دییشدیره رک، بویوز قاریشقالارین الینه کئچمیشدی. بویوز قاریشقالار یونه تیمی اله کئچیردیکدن سونرا یاغیز قاریشقالارا اوزگو دیرلری یاساقلادیلار. بویوزلار یاغیزلارین شهرلرینی سومورور، اوز شهرلرینه داشیییردیلار. یاغیز قاریشقالارین آنبارلاری قیشین سرت گونلرینده بوش قالدیغیندان بویوز قاریشقالارین خیدمتچیلرینه چئوریلیردیلر. زامان کئچدیکجه اوز دیللرینی اونودوب بویوزلارین دیلینده دانیشیردیلار. یاغیز قاریشقالار گئجه- گوندوز بویوز قاریشقالارین آنبارینا تاخیل داشیییردیلار. هم ده سورکلی اولاراق اویغون اولمایان سوزلرله آشاغیلانیردیلار. یاغیز قاریشقالارین دوشونجه و داورانیشلاری گئت- گئده بویوزلاشیردی.
یاغیزلارین ایچینده اوغلو ایله بیر یئرده یاشایان بیر آنا وار ایدی. آنا یاغیزین اولگن آدیندا بیر اوغلو وار ایدی. آنا یاغیز اوغلو اولگنی ده یانینا آلیب یووادان چیخیب یئم داشیماغا گئدردی. آنجاق آنا قاریشقا چوخ سسسیز ایدی. کیمسه ایله دانیشمادان اوغلونا گوز- قولاق اولاراق، یاغیز قاریشقالارلا بیر یئرده بویوزلارین آنبارینا آرپا- بوغدا، یا دا باشقا یئیه جک داشییاردی. یاغیز قاریشقالار یورولدوقلاریندا بویوزلارین سالدیریلارینا اوغراردیلار. بویوزلار یورغون یاغیزلاری یورولمادان چالیشماغا زورلاردیلار. بویوزلارین تاخیل آنبارلاری دولوب-داشاردی. بیر گون یانیندا بالاجا اولگنله آنا یاغیز یوک داشیماقدا ایدی. بالاجا اولگن ایلک کز اولاراق اوزرینه بیر بوغدا پارچاسی آلمیش آناسی ایله بیر یئرده یووایا دوغرو گئدیردی. قاریشقالار اولکه سی لیملی نین آرخاسیندا قجل آدیندا بیر اوچوروم وار ایدی. قجل اوچوروموندان کئچرکن اولگنین آیاقلاری سوروشدو. آنا یاغیز اوزرینده کی یوکونو بوراخیب اوغلو اولگنین یاردیمینا قوشدو. اولگنی بوینونا آلیب اوچورومدان کئچمه سینه یاردیمچی اولدو. لیملی نین آرخاسینداکی قجل اوچورومونو کئچدیکدن سونرا یاغیز آنا اوغلو اولگنی قاریشقالار یولونا بوراخدی. بو زامان بویوز قاریشقالاردان اوچو آنا یاغیزین اوزرینه گلیب »هانی سنین یوکون؟« دئیه باغیردیلار. آنا یاغیز »اوغلوم اولگن، قجل اوچوروموندان دئوریلمک اوزره ایدی. یوکومو بوراخیب اونا یاردیم ائتمک زوروندا قالدیم« دئدی. بویوز قاریشقالار آنا قاریشقانین اوستونه باغیراراق »خرچه!« دئییب آشاغیلادیلار. «خرچه» ان آشاغیلاییجی سویوش ایدی. آنا یاغیز باشینی آشاغی سالدی. هئچ بیر سوز سویله مه دی. بیردن گوزلری اوغلو اولگنه ساتاشدی. اولگن ایلک کز ایدی آناسی نین آشاغیلاندیغینی گوروردو. اوزرینده کی یوکو یئره بوراخیب بویوز قاریشقالارا قارشی یورویرَک «سیز ندن منیم آنامین اوستونه باغیردینیز، آشاغیلادینیز؟» دئدی.
بویوزلاردان بیری: سنین آنان تنبلین بیریدیر. بوتون قاریشقالار یوک داشیماقدا ایکن، سنین آنان باشی بوش دولاشماقدادیر اورتالیقدا، هانی بونون یوکو
اولگن: آنجاق آنام اوچورومدان کئچمک اوچون منه یاردیمچی اولدو. او، اولماسایدی، من قجل اوچوروموندان دره یه یووارلاناجاقدیم. ایکینجی بویوز: باخ بالاجا یاغیز، سنین دره یه یووارلانیب- یووارلانماماغی نین هئچ بیر اونمی یوخدور. اونملی اولان آنبارلاری یئمکله دولدورماقدیر.
اولگن: سیزین اوچون اونمسیز اولا بیلر. آنجاق منیم ساغلیغیم آنام اوچون چوخ اونملیدیر. نه یین اونملی اولوب-اولمایاجاغینی یاغیزلارا سیزمی بللی ائدیرسینیز؟ آنا یاغیز: اوغلوم اولگن، گل گئدک… اوچونجو بویوز: دور بیر. بالاجا یاغیز، سن باشیندان، بویوندان بویوک سوزلر دانیشیرسان. البتته کی، نه یین اونملی اولوب-اولمادیغینی بیز بللی ائدیریک.
اولگن: سیز بللی ائده بیلمزسینیز. سیزین بو داورانیشینیز سایقیسیزلیقدیر. بیرینجی بویوز: ایندی سنه گوستره ریک سایقیسیزلیغین نه اولدوغونو.
آنا یاغیز سسینی یوکسلده رک: اولگن، گل گئدک، یئتر آرتیق، – اوزونو بویوزلارا توتوب و سانکی یالوارارجاسینا- او، بیر چوجوقدور. نه لر اولدوغونو بیلمیر. ایکینجی بویوز: نه لر اولدوغونو بیلمیرسه، آنلاداریق بیلر.
آنا یاغیز اوغلونو آرخاسیندا گیزلتمه یه چالیشاراق «بالاما توخونمایین!» دئدی.
اوچونجو بویوز الینده کی چیرتدیق کؤتویو سوپا ایله آنا یاغیزین تپه سینه بیر ضربه ائندیردی. آنا یاغیزین باشیندان قان فیشقیردی. بدنی تیترمه یه باشلادی. اولگن آناسینی توتماق ایسترکن، بویوزلار اللرینده کی چیرتدیق کوتویو سوپالاری ایله اونا دا سالدیردیلار. اولگنله آناسینی آجیماسیزجا دؤیوب اوزاقلاشدیلار. اولگنین بدنی یارالانمیشدی. آنجاق آغری حیسس ائتمیردی. گؤزلری نین اؤنونده آناسی نین دؤیولوب آشاغیلانماسینی ایچینه سیندیره بیلمیردی. اولگن چوخ آشاغیلانمیشدی. او آن اولوب یئره گیرمک ایسته ییردی. آناسی نین اوزونه آخمیش قانی سیلدی. هئچ بیر شئی سویله میردی. آناسی دا سوسقون ایدی. لیملی نین باتیسیندا قاراوول تپه سی نین آرخاسیندا گونش باتماق اوزره ایدی. آنا-بالا آشاغیلانمیش روح حاللاری ایله یئرین آلتینداکی یووالارینا دوغرو سوسقونجا یورودولر.

نوشته شده توسط admin در دوشنبه, ۲۸ تیر ۱۳۹۵ ساعت ۶:۱۳ ق.ظ

دیدگاه


هفت + 9 =