طواف و طواف نمازی
حاضرلایان: معصومه اسدی
طواف— حج و یا عمره واختی کعبه‌نین اطرافینا ساعت عقربی‌نین عکسی استقامتینده دؤوره وورماق. عمره، حج و هابئله “نسا” طوافلاری زمانی کعبه‌نین اطرافیندا یئددی دفعه دولانماق (“شوط”) واجب‌دیر. طواف، قصد قربت نیتی ایله یئرینه یئتیریلمه‌لی‌دیر. طواف، حجرالاسود قارشی‌سیندان باشلاما‌لی و کعبه طواف ائدن شخصین سول طرفینده اولما‌لی‌دیر.
حجرالاسود چاتدیقدا بیر “شوط” ساییلیر و بو ایش یئددی دفعه تکرار ائدیلمه‌لی و یئددی دؤوره‌دن سونرا بیر “طواف” عملی سونا چاتیر. واجب طوافدا طهارتلی اولماق، اونون قبول اولماسی اوچون واجب شرط، مستحب طوافدا ایسه فضیلت شرطی ساییلیر. طواف ائدن شخص کعبه‌دن فاصله‌ده اولماما‌لی‌دیر. اما جمعیت ازدحامی حالیندا اوندان اوزاقلاشماغا مجبور اولدوقدا، امکان اولدوقجا کعبه‌دن فاصله‌سیز حالدا طواف ائتمک لازم‌دیر.
واجب طواف دوره‌لری بیر-بیری‌نین آردینجا و آردیجیل شکیلده اولما‌لی‌دیر. آما بیر شخص معین بیر عذرلو سبب اوزون‌دن طواف اسناسیندا دؤردونجو دوره‌دن سونرا اوندان خارج اولارسا سونرا‌دان کسدیگی یئردن (بئشینجی دوره‌دن) طوافا باشلاییب اونو سونا چاتدیرا بیلر. دؤردونجو دوره‌دن قاباق طوافی ساخلادیقدا ایسه، اونون طوافی باطل ساییلیر.
لاکن دؤردونجو دوره‌دن قاباق و یاخود سونرا ناماز فضیلتینه نایل اولماق اوچون طوافی ساخلایارسا، اونون طوافی دوزگون ساییلیر و سونرا ساخلادیغی هر هانسی بیر یئردن اونو داوام ائتدیره بیلر. مستحب اولان طوافی اونون هر بیر دوره‌سینده ساخلاییب سونرا‌دان داوام ائتدیرمک اولار. واجب اولان طوافی آزاجیق استراحت ائتمک کیمی قیسا مدتلی حاللاردا ساخلاماق اونون آردیجیل اولماسینا هئچ بیر زیان وورمور و بونون هئچ بیر عیبی یوخدور. طواف ائدرکن “هجر اسماعیل”ین اطرافیندا دا، دولانماق لازم‌دیر. بئله کی، طواف ائدرکن “هجر اسماعیل” مکانی طواف یئری‌نین داخلینده اولما‌لی‌دیر. “هجر اسماعیل”ین اطرافیندا طواف ائتمه‌ییب، اونون ایچری‌سینه داخل اولدوقدا، طواف کسیلیر و او یئردن قاییدا‌راق یئنی‌دن طوافی داوام ائتدیرمک لازم‌دیر. مسجدالحرامین یوخاری مرتبه‌لرینده [کعبه اطرافینا] طواف ائتمک کفایت ائدیجی ساییلمیر. طواف ائدن شخص سهواً طواف دوره‌لرینی آز انجام وئردیکده، انجام وئرمه¬دیگی دوره بیر یا ایکی یاخود دا اوچ دوره اولارسا، درحال اونلاری یئرینه یئتیرمه‌لی‌دیر.
لاکن اونلارین سایی اوچدن چوخ اولوب و انجام وئردیگی دوره‌لر ایله یاددان چیخاردیغی دوره‌لر آراسیندا چوخ فاصله دوشدوکده اونون طوافی باطل ساییلیر و طواف عملینی یئنی‌دن یئرینه یئتیرمه‌لی‌دیر. اگر اونلار آراسیندا فاصله چوخ اولماسا، درحال یاددان چیخاردیغی دؤوره‌لری انجام وئرمه‌لی‌دیر. بیر دؤره¬نی کامل شکیلده انجام وئرمدیکده ده، وظیفه‌سی بوجوردور. طواف ائدن شخص، سهواً یئددی دوره‌دن سونرا طواف نیتی ایله طوافی داوام ائتدیریب، “عراقی” رکنه چاتمازدان قاباق بونو خاطرلایارسا، طوافی دایاندیرما‌لی‌دیر و اونون طوافی دوزگون ساییلیر.
لاکن “عراقی” رکندن اؤتدوکدن سونرا بونو خاطرلاسا، طوافینی داوام ائتدیره‌رک بیر داها یئددی دوره‌دن عبارت کامل بیر طوافی انجام وئرمه‌لی و داها سونرا ایکی رکعت طواف نامازینی قیلما‌لی‌دیر. واختیندان سونرا طوافین دوزگون اولوب-اولماماسی باره‌ده ائدیلن شکه اهمیت وئریلمه-مه‌لی‌دیر. واختی سونا چاتمازدان قاباق شک ائتدیکده ایسه، اونو دوزگون شکیلده انجام وئرمک لازم‌دیر. طواف عملی [یئددی دوره] سونا چاتدیقدان سونرا طوافین شرطلرینه رعایت ائدیب-ائتمه¬مه‌سی باره‌ده شک ائدن شخص اؤز شکینه اهمیت وئرمه¬مه‌لی‌دیر. واجب طوافی انجام وئررکن – هر بیر دوره‌ده – اونون سایی باره‌ده قارشی¬یا چیخان شک، طوافین باطل اولماسینا سبب اولور. بئله اولان حالدا طوافی ساخلایا‌راق، اونو یئنی‌دن باشلاماق لازم‌دیر. واجب طوافین یئددینجی دؤوره‌سیندن سونرا آخیرینجی دؤوره‌نین یئددینجی و یا سککیزینجی دوره اولماسیندا شک ائتدیکده، اونا اهمیت وئریلمه¬مه‌لی و بو طواف دوزگون ساییلیر. طواف ائدرکن اونون دوره‌سی‌نین آلتینجی و یا یئددینجی دوره اولدوغو باره‌ده شک ائدیلدیکده، طواف باطل ساییلیر. مستحب طوافی انجام وئررکن اونون ساییندا شک ائتدیکده، سایین چوخونو قبول ائتمه‌لی و بونونلا دا، طواف دوزگون ساییلیر. طواف سونا چاتدیقدان سونرا “ابراهیم مقامی” آرخاسیندا ایکی رکعت طواف نامازی قیلماق واجب‌دیر. طواف نامازی طواف نامازی – ۲ رکعت‌دیر و صبح نامازی کیمی قیلینیر.
کعبه¬نی ۷ دفعه طواف ائدندن سونرا قیلینیر. مستحبدیر کی، فاتحه سوره‌سیندن سونرا بیرینجی رکعتده کافرون سوره‌سی، ایکینجی رکعتده ایسه اخلاص سوره‌سی اوخونسون. جمعیتین ازدحامی حالیندا ممکن اولان طرزده “ابراهیم مقامی” آرخاسیندا ناماز قیلماق لازم‌دیر. مستحب اولان طوافین نامازینی مسجدالحرامین هر بیر یئرینده قیلماق کفایت ائدیر. طواف نامازینی اونودوب اونو قیلمادیغینی سی اسناسیندا خاطرلایان شخص، سی عملینی دایاندیریب طواف نامازینی یئرینه یئتیرمه‌لی و نامازی یئرینه یئتیردیکدن سونرا قاییدا‌راق سی عملینی دایاندیردیغی یئردن داوام ائتدیرمه‌لی‌دیر. طواف نامازینی قیلمادیغینی سی عملیندن سونرا خاطرلایان شخص، درحال اونو یئرینه یئتیرمه‌لی‌دیر. طواف نامازینی قیلمادیغینی مکه شهریندن خارج اولدوقدان سونرا خاطرلایان شخص اوچون مکه‌یه قاییتماق چتین اولدوقدا ممکن اولان هر بیر یئرده اونو یئرینه یئتیرمه‌لی‌دیر. طواف نامازی‌نین قرائتی (اوخونوشو) سایر نامازلار کیمی امکان داخلینده دوزگون اوخونولما‌لی و باشقا نامازلاری قیلدیغی اوخونوشا کفایتلنمه‌لی‌دیر و اونون بو باره‌ده آیری بیر شخصی نایب سئچمگه احتیاج یوخدور.
نوشته شده توسط admin در دوشنبه, ۲۲ مهر ۱۳۹۲ ساعت ۵:۲۲ ق.ظ
