صمد بهرنگی
چئویرنی گونتای گنجالپ
گئجهلر آی سویا دوشدوگو زامان یاتدیقلاری داشین آلتیندان چیخیب آیلا دانیشماق، اونونلا آرخاداش اولماق ایستردی. آنجاق هر دفعه ده آناسی مانع اولاردی. قاراجا بالیق آیین یانینا گئدیب دئدی: “اسنلیکلر (سلام عوضینه) آی گؤزل آی.” آی دئدی: “اسنلیکلر قاراجا بالیق. سن هارا بورا هارا!؟” قاراجا بالیق دئدی: “دونیانی گزمگه چیخمیشام.” آی دئدی: “دونیا چوخ بؤیوکدور.
بوتون دونیانی گزه بیلمزسن.” قاراجا بالیق دئدی: “اولسون. باشاردیغیم قدر گزهجگم.” آی دئدی: “گون دوغانا قدر سنین یانیندا قالماق ایستردیم. آنجاق قارشیدان قارا بولود گلیر. منیم اؤنومو کسیب ایشیغیمین قارشیسینی آلاجاق.” قاراجا بالیق دئدی: “سئوگیلی آی، من سنی چوخ سئویرم. سنین ایشیغینین وورغونویام.” آی دئدی: “سئوگیلی قاراجا بالیق، منیم ایشیغیم یوخدور. من ایشیغی گونشدن آلیب یئره گؤندریرم. سن هئچ بیلیرسنمی کی، انسانلار اوچوب گلیب منیم اوزریمه قونماق ایسته¬ییرلر؟” بالیق دئدی: “اولا بیلمز، بو مومکون دگیل.” آی دئدی: “چتین ایشدیر، آنجاق انسانلار ایسته¬دیکلری هر شئیی…” آی سؤزونو بیتیره بیلمهدی.
قارا بولود آیین اوزرینه سریلدی. هر یئر قارانلیق اولدو. قاراجا بالیق یئنه ده یالنیز قالدی. بیر نئچه دقیقه قارانلیغی و سسسیزلیگی دینلهدی، سونرا دا بیر داشین آلتینا گیریب یوخویا دالدی. سحر ائرکن یوخودان قالخارکن باشینین اوستونده پیچیلداشان بیر نئچه کیچیک بالیق گؤردو. بالیقلار قاراجا بالیغین یوخودان اویانماسینی گؤردوکلری آن بیر آغیزلا سؤیلهدیلر: “گون آیدین، قاراجا بالیق.” قاراجا بالیق اونلاری تانیمیشدی دئدی: “گون آیدین! سانکی منیمله یول یولداشی اولماق قرارینا گلمیشسینیز، دگیلمی؟” بالیقجیقلاردان بیری دئدی: “هه، آنجاق هله ده قورخوروق.” بیر باشقاسی دئدی: “بالیق اودان قوشون قورخوسو بیزی ترک ائتمیر.” قاراجا بالیق دئدی: “سیز چوخ فیکیرلشیرسینیز. گئجه گوندوز اوتوروب سادهجه فیکیرلشمک دوغرو دگیلدیر. یولا دوشدوکدن سونرا قورخو حسیمیز یوخ اولاجاق.” حرکت ائتمک، یولا دوشمک ایسته¬ییردیلر کی، اطرافداکی سولار قالخدی و باشلارینین اوستونو بیر قارا اؤرتو اؤرتدو. هر یئر قاپ-قارانلیق اولدو. قاچیش یولو قالمادی قاراجا بالیق آنلادی کی، بالیق اودان قوشون تلهسینه کیسهسینه دوشموشلر. قاراجا بالیق دئدی: “دوستلار بیز بالیق اودان قوشون تلهسینه دوشدوک. آنجاق قاچیش یولو تام اولاراق قاپانمامیشدیر.” کیچیک بالیقلار آغلاماغا سیزلاماغا باشلادیلار. بیریسی دئدی: “یازیق اولدوق. قاچیش یولوموز قاپاندی. قاراجا بالیق گوناهکار سنسن. سن بیزی یولدان چیخاردین.” بیر باشقاسی سؤیلهدی: “ایندی بالیق اودان قوش بیزیم هامیمیزی اوداجاق. یازیق اولدوق. ایشیمیز بیتدی.” بیردن قورخونج گولوش سسلری هر طرفی ساردی. بو سس بالیق اودان قوشون گورولتولو گولوشلرینین سسی ایدی. بالیق اودان قوش قورخونج گولوشلرینه قاریشمیش سؤزلرله دئدی: “نه قدر دادلیجا بالیقلاردیر بونلار…هاهاها…هاهاها… یازیق بالیقجیقلار. سیزین حالینیزا اوره¬گیم یانیر.
سیزی هئچ اوداسیم گلمیر … هاهاها…” کیچیک بالیقلار یالوارماغا باشلادیلار: “ای بؤیوک وارلیق بیز سیزین تعریفینیزی چوخ اؤنجهلر ائشیتمیشیک. اگر لطف ائدیب دیمدیگینیزی بیر آزجیق آرالاسایدینیز بیز بوردان چیخیب و عؤمروموزون سونونا قدر ده سیزه دعا ائدردیک.” بالیق اودان دئدی: “من سیزی هله اودمایاجاغام. هله قارنیم توخدور. قارنیما باخسانیز گؤررسینیز. سیزی بیر آزدان یئیهجگم.” کیچیک بالیقلار بالیق اودانین معدهسینه باخیب خیلی اؤلموش بالیق گؤروب، قورخودان زاغ-زاغ تیتره¬مگه باشلادیلار. کیچیک بالیقلار دئدیلر: “ای اولو وارلیق، ای دنیزلرین شاهی، بیز بیر ایش گؤرمه¬میشیک. بیزیم هئچ بیر سوچوموز یوخدور. بیزی یولدان چیخاران بو قاراجا بالیق اولدو.” قاراجا بالیق دئدی: “قورخاقلار! ائله بیلیرسینیز بو غدار بالیق اودان سیزین بو عاجزانه یالواریشلارینیزا رحم می ائدهجک؟” کیچیک بالیقلار دئدیلر: “سن هئچ نه دانیشدیغینین فرقینده¬سن می؟ ایندی گؤرهجکسن کی، نئجه ده چوخ حؤرمتلی بالیق اودان جنابلاری بیزی آزاد ائدیب، سنی ایسه معدهسینه طرف یولا سالاجاق.” بالیق اودان دئدی: “هه ائلهدیییی. من سیزی باغیشلایا بیلرم. آنجاق بیر شرطیم وار.
آردی وار…
نوشته شده توسط admin در دوشنبه, ۰۸ اردیبهشت ۱۳۹۳ ساعت ۱:۰۹ ب.ظ