- آراز آذربایجان – روزنامه خبری آذربایجان غربی - http://www.araznews.ir -
سیندیریلان یازی تخته
Posted By admin On تیر ۴, ۱۳۹۳ @ ۳:۵۳ ق.ظ In آنادیلیمیز | No Comments
صمد چایلی
»تختهسیاه« فیلمینی گؤرهنکیمی، اورهییم سئودا کؤنوللو اؤیرهتمنلره قوشولدو. منیمده یازی تخته گؤتوروب، اوزاق کندلره گئتمهییم گلدی. اؤزوم اؤزومه، اوجقار بیر کند اولایدی قویون قوزو اوتاران اوشاقلار، خرمنه ییغیشایدی منده اونلارا درس اؤیرهدئیدیم، سؤیلهدیم. ائله بو آنلار خیال قوشوم اوچوشا گلیب، منی فیلمده اولان یئرلره تای بیر یئر آپاریب، اؤتن خاطرهلریمین بیرین گؤز اؤنومده دیرچلتدی.
چاغیریش بئلهایدی:- »اوزاق کندلره، معلم لازمدیر. او کندلره گئتمک ایستهین اؤیرهتمنلر سحر اداره حیهطینده اولارسالار، یئی دوشر.«چاغریشی ائشیدیب اونا جواب وئرهن معلملرین سایی، اللی نفر اولدو. اونلار اداره حیهطینده بیر یئره ییغیشیب، مسئولون سؤزلرینه قولاق وئردیلر. او دئدی:»چاغریشدا سؤیلهدیگیمیزکیمی، اوزاق دوشن کندلرده یاشایان اوشاقلار، معلمسیزدیرلر. کندلره گئدیب اورانین چتینلیکلرینه دؤزمک هر کیمسهنین ایشی دهگیلدیر. اونا گؤرهده یئنیدن فیکیرلشمهیی سیزدن، خواهش ائدیریم.« مسئولون سون سؤزلری، حیهطدهکی معلملری قوردان – قوردانا سالدی. بیری دئدی: »اورهییم یوخسول اوشاقلارا درس دئمکدن اؤتور، اسیر.« اوبیری سویلهدی: »اؤیرهتمن اؤزونو پولا ساتمامالیدیر. اوزاق کند اوشاقلاریدا بیزیم بالالاریمیزدیرلار. بیز او یئرلره گئدیب کند اوشاقلارینا درس دئمهلییک.« اوچونجو معلم دئدی: »منجه، بورایا توپلاشان معلملرین اورهیی، اؤیرهتمک عشقیایله دولودور. لاکن، اونودا بیلمهلییککی، کؤنولده اولان سئوگی، گؤردویوموز عملایله، بیرگه دهگیلدیر. دنیا گؤرموش انسان دئمیشکن، ایستک هارا؟ ایش و عمل هارا؟«دانیشیقلار قورتاراندان سونرا، معلملر آرا پیچها پیچلار باشلانیب، او هئیندهده مسئول اوجا سسله دیله گلدی. او دئدی: »فیکیرلرین ائلهییب یولا دوشمک ایستهینلر، حیهطین اوباشینداکی آنبارین قاباغینا گئدهرسهلر، ممنون اولارایق.« مسئولو دینلهین اللی معلمین هامیسی آنبارین قاباغیندا آلای دوزدولر. اونلار بیر به بیر یازی تختهلرین آلیب، یئرلرینده سسیز- سمیرسیز دایاندیلار. سونرا آنبار مسئولو آلتی- یئتدی مترلیک بیر کندیریده هر اؤیرهتمنه تحویل وئریب، اونلارا تاپشیریقلار تاپشیردی. او دئدی: »حؤرمتلی معلملر! کندیرلرایله یازی تختهلری کؤرهییزه باغلایاندان سونرا، یولا دوشون، لطفاً. دئمهلییمکی، بو سایاق یول یئریمک، اؤزهل یئریشدیر. اونا گؤرهده، هم یوخوشدا، همده ائنیشده، یازی تختهلرین بیر- بیرینه توققوشماسین، گؤزلمهلیسیز. اونلارین توققوشماسی، اولدوقجا سیزی سینسیدهبیلر. سؤزلریمین سونوندا، سیزه اوغورلو یوللار آرزولاییرام.«کورهیینه یازیتخته آلان اللی اؤیرهتمن، آز زماندا ادارهایله داغ اتهگی یوللاری یورویوب، بیر آرخاشدا دایانماق ایستهدیلر. هله چوخ دینجلمهمیشدن اللی معلمین یاریدان چوخو، یورولدوق دئیه، کندیرلری آچیب یازی تختهلری یئره قویدولار. لاکن اوبیری معلملر سارسیلماز ایستکایله، بیز یولوموزا داوام وئرهجهییک، سؤیلهدیلر.داغلارین دولای یوللارین، اؤز کورهکلریندهکی یازی تختهلرله چیخان معلملر، چتینلیکلره اوغراشسالاردا، آنجاق گؤرمهلی گؤرکملر یارالدا بیلیردیلر. اونلارا آرخادان باخان بیر کیمسه، هئچ بیرینین باشین گؤره بیلمیردی. کورهکلرینده یازی تخته اولان معلملر والای وورا- وورا یال- یاماجلاری تؤیوشه-تؤیوشه اؤتوردولر. اونلار پنگوئن قوشلاریکیمی، او ال- بو اله سوزوب، دهنیزه چاتماق ایستهییردیلر. بونلارا باخمایاراق، هر بیر یازی تختهلی اؤیرهتمنین دیلهیی، کنده چاتیب، اورداکی اوشاقلارا درس اؤیرهتمک آرزوسوایدی. اونلارین هامیسی اؤیرهتمک، اؤیرهتمک، یئنه اؤیرهتمک شعاریایله یولا دوشموشایدیلر.یول اوزونو بیر- بیریایله دانیشیق آپاران یازی تختهلی معلملر، هردن قارلی- بورانلی گدیک لره، هردهن چینقیللی- داشلی دؤشلره، هردنده چال- چامورلو جیغیرلارا توش گلیردیلر. اونلاری سارسیلدا بیلمهین هئچبیر گرگین لیک اؤنلریندهکی آماج یوللارین قارانلیقلارا بورگهلییه بیلمیردی. اؤیرهتمنلرین اورهیینده، سؤنوک بیلمز سئوگی، اونلارین فیکیرلرینه ایشیق ساچیب، بوتون چتینلیکلری آرادان قالدیریب، کئچیلمز کئچیدلری هامار یولا، آشیلماز گدیکلری ایسه دوزهنلیگه چئویریردی.هله اورتاق یوللارین بویو سونا چاتمامیش، اؤیرهتمنلرین بیری دئدی: »تئز- گئج یول آیریملاری قارشیمیزا چیخاجاقدیر. بیریمیز بیر جیغیرا، اوبیریمیز آیری جیغیرا دوشوب اؤز سئچدیگیمیز کنده گئدهرلی اولاجاغیق. منجه، بئله آیریلیقلار اؤز یئرینده گؤزهلدیر. اونا گؤرهکی گؤرهجهییمیز ایشین گرهگلیسیدیر.«بو سؤزلره دایاق اولسون دئیه، اوبیری اؤیرهتمن دئدی: »من گئدهن کند، بیر درهنین لاپ تیر یئریندهدیر. سن گئدهن کند ایسه اوجا بیر داغین دؤشونده تیکیلمیشدیر. اوبیرینینده کندی، داشقین بیر چایین قیراغیندادیر. بو آیریلیقلارا باخمایاراق، هئچ بیریمیزین یازی تخته یئری، دائمی بیر یئر دئییلدیر. اونلارین یئری بیرگون خرمن اوستو، اوبیریگون بولاق باشی، بیرگونده چای قِیراقلارینین قومسال یئرلرینین بیر بوجاغیدیر.«اوچونجو معلمده اؤز بیلدیکلرین دوستلارینا سؤیلهدی: »بیزیم سئوگیمیز، اوشاقلارین یازدیغی سؤزلرله گوله دولور. یازی تخته اوسته یازیلان معنالی بیر سؤز، ایستکلریمیزین چوخونو یئرینه یئتیریر. بونلارلا بئله، اوزاق کندلره گئدهن معلملرین هامیسی بئینیندهکیلری دیللرینه گتیرهن انسان دئییللر. اونلارین نئچهسی اؤیرهتمنلره قاریشیب، معلمچیلیک یوخ آل- وئرچیلیک فیکریندهدیرلر.« معلملر دانیشا – دانیشا یول اوستهکی آیریجلارین بیرینده، ساغ جیغیرلارین ایشکه یولونا یؤنهلن بیر- ایکی معلم، یاواشجادان یول آییردیلار. اونلار هوندور بیر قایانین آراخاسیندا دالدالانانکیمی، کنده گئتمک یئرینه، کیچیک بیر کؤهوله سیغینا بیلدیلر. اوبیری اؤیرهتمنلر هله کندلرینه ساری یول دؤیمهکدهایدیلرکی، کؤهول سککیلریندن تاققاتاق سسی چئورهنی بورودو. سیندیریلان یازی تختهلرین بیری، یاناجاق یئرینده آلوولانیب، هله سرین بیر هاوادا تیترهتمه توتوب اوشوین معلملری قیزدیردی. سویوغو حسّ ائدن معلملرین دیشلری، بیر- بیرینه دهیه-دهیه ایچهریلرینهده اوشوتمهیه سالدیلار. اونلار کؤهولده اوتورسالاردا، محلّه بنگاهلاری یادلارینا دوشدو. قارداش دئیهنده دوداقلاری بوزولدو باجی دئیهنده گؤزلریندهن یاش الندی، سونرادا اللریندهکی مدادیدا، آغ گچیده یئره تونازلاییب بوتون معلملری، یازیب یارالدانلاری قارقیش ائلهییب، یامان- یوغوزا توتدولار. اونلارین بیری، حاق سؤزده دئیهبیلدی. او باغیرا- باغیرا دئدی: بوگون ائلهبیر یئنیدن دوغولموشام. بابا من هارا، مداد دفتر هارا؟ بو سؤزلردن سونرا اوبیری یازی تختهده، اورهیی کؤورهلمیش معلم الیایله بؤلوم- بؤلوم اولوب بیر میوه ساندیغینا چئوریلدی. اوستو اؤرتولو بو ساندیق، میوهدن سونرا آیری شئیلرده ساخلایا بیلردی. اوندان ساوایی، اونون بوش یا دولو اولماسی، کیمسهیه بللنمیردی. سون چاغلار کندلرده کلاس قوروب سیخینتی چکن اوشاقلارا درس اؤیرهدن معلملر بیر ییغینجاق قوردولار. او توپلومدا اؤیرهتمنلرین بیری دئدی: »هر ایشده بیلان اؤزهللیکله مالی بیلان چیخاریب، گؤروب گؤرمهین ایشلری ات- داش ائلهمک، گرهکلی بیر موضوعدور. بیلدیگیمیزکیمی، بیزیم ساییمیز باشلانیشدان قورتاریشا دوغرو گلدکجه، آزالدی. دئمک بودا دوغال بیر مسألهدیر. ایلک آددیمدا آیریلانلار، اؤز ایستکلری اوزره آیدین- آشکار آیریلماق قرارینا گلدیلر- لاکن، یول اوسته یاواشجا اکیلیب یازی تختهلرین باشینا اویون آچانلار، اؤز ایچهریلرین دیشاری قویدولار. دوزدور، بیز سایی باخیمیندان گئت- گئده آزالدیق. اما، ایچ و نئچهلیک باخیمیندان زنگینلشدیک.« اوبیری معلملرین بیری، اؤز ایشیندن نئجه سئوینجک دوشمهسین اوزه چکرک دئدی: »منیم یاشاییش یوللاریمین اؤنملیسی، گلدیگیمیز بوگونکی یوللاردیر. اوزاق کند اوشاقلارینا درس دئمک، منی آرتیق سئویندیریر. یازی تخته اوسته آغ گچایله یازی یازان یوخسول بیر اوشاق، اورهییمی سئوینجه بو ویور. اؤز دانیشیقلاریایله دور تؤکن کندلی اؤیرهنجی، یولوما ایشیق ساچیر. دوشونجهسیایله گول- چیچک بئجرهن اوخوجو، منی قیزیلگوللو بیر باغ ایچره دولاندیریب، شنلیگه چولقاییر. بیزیمکیمی اؤیرتمنلر، بئله بیر اوشاقلاری یوخاری چکرک، سئوینیب اؤز معنوی پایلاریمیزی منیمسهییریک. دوغروداندا بئله معلمچیلیگه عشق اولسون.
Article printed from آراز آذربایجان – روزنامه خبری آذربایجان غربی: http://www.araznews.ir
URL to article: http://www.araznews.ir/%d8%b3%d9%8a%d9%86%d8%af%d9%8a%d8%b1%d9%8a%d9%84%d8%a7%d9%86-%d9%8a%d8%a7%d8%b2%d9%8a-%d8%aa%d8%ae%d8%aa%d9%87/
Click here to print.
Copyright © 2013 آراز آذربایجان - روزنامه خبری آذربایجان غربی. All rights reserved.