سونامی
علیرضا ذیحق
سون بولوم
آنادیلیمیز: مینا گئتدی آدام بویوندا اولان آینانین قاباغینا. سیرقاسینی قولاغیندان چیخارتدی و دئدی: معلوم دی سنله چوخ راحات ایدی.پروانه دئدی: احتیاجی یوخ ایدی او، او سؤزلری دئیه، بیز گؤروردوق.
– آما سن دئدین سنله دانیشیبدی
نرگیز دئدی: من کی سیزی هم مه شه شاد و شن گؤروردوم. سیز آداملار قوجالدیقجا فیکر ائدیرسیز هر زادی اودوزوبسوز. حتتا خوش آنلاریزدا سس کووسوزدور. خالا! آلبومونو من گؤردوم . . . چین اؤلکه سی . . . ونیز . . . ایتالیا . . .. هم مه شه گولوش دوداقیندادی. مگر اولارمی آدام هم مه شه ادا چیخارتمیش اولا. او دا سیز؟
تر بولاغ کیمی مینانین اوز گؤزوندن یاغیردی. سیله جک له اوزونو قورولادی و دئدی: قادینلار چوخ تئز یالنیز قالیرلار.
نرگیز دئدی: کیشی لرده چوخ تئز اؤلورلر. کوروش عمی نی من چوخ ایستردیم. بئینین ده بؤیوک دوشونجه لر وار ایدی. سئوه ردی کی داغا گئتسین. بیر دؤوره انقلابی ایدی. آما سیز هئش واخت اونونلا داغا گئتمزدیز.
مینا دئدی: هر زامان کی کیشی لر انقلابی اولماق دالیجا گئده رلر، یقین بیل کی ایسترلر بیر پارا سورون لاری بویونلاریندان آتسینلار. من دؤولت مأمورویْدوم، اودا قورخوردی ائوین و اوشاقلارین بیر پارا مسئولیت لرین بوینونا آلا. . . اوشاق، آرواد و کیشی نین دی. کیشی هامیسینی تاپشیریر آروادا. سورا گئدیر اؤز ایسته دیک لری نین دالیجا. قادینلار قالیرلار و اوشاقلار. هی یو هی پیشیر، هی نیگران قال . . . بیر عؤمور . . .
پروانه دئدی: من گؤروردوم کی کوروش ائوین توزون آلیب یاردیم ائده ردی.
مینا دئدی: یئته ر داها . . . هر زادی ویریردی بیر بیرینه سورا توزون آلیردی. او قدر اوکیشی ندیر، چه گورادان آجیغیم گلیردی کی شکلین ده ویرمیشدی دووارا . . . بو کیشی نین منفی انرژی سی واردی . . . داها او دؤوره لر قورتولوب کی بیری گئدیردی چه گورا اولوردی . . . قورتولوبدی. بیر سیرالار اوتوروب دونیانین سرنوشتینه طرح تؤکورلر. قالان آداملار دا قاریشقا کیمی دیلر. قاریشقالاری گؤروبسن ییغیشارلار قاب یویان سینکین دؤوره سینه و بیر دقیقه سو تؤکرکن گئده رلر قویویا . . . دونیا بو جور اولوبدی.
سورا اوزون توتوب پروانه یه دئدی: سن ده یاخشی دی هئش زاد یازمایاسان. سنین تایلاریندیلار کی الکی کاغاذ قره لی ییرلر. بو کاغاذ قره له مه یین بیر اوزو قره له مه یی نن هئش فرقی یوخدی.
مینا مانتوسونا ساری گئتدی. مانتوسونو گئییب الوداع دئمه میش یولا دوشدو.
نرگیز الکتریک سوپورگه نین سیمینی ییغیشدیردی و دئدی: نه بیر پیس دوشونجه دی کی آدامی قاریشقایا اوخشاداسان کی قویویا گئدیر.پروانه دئدی: هم مه شه تَوَقّوعو چوخ ایدی و حساس ایدی. بو سؤزلری بو گونه جان منه دئمه میشدی. اولارمی یعنی؟ اوتوز ایل بیری نن یاشایاسان . . . حتمن اؤزو اونا اؤز چئویریبدی. اورتا اوکول دا بیرینه بَتَر عاشیق اولموشدی. هله او ماجرانین دالیجادیر. دالیندا توتدو اما تاپانمادی. قادینلار بو جور عشقه ایلی شیرلر. کیشی لر یاددان چیخاردارلار آما قادینلار ایلیشدیلر ال چکمزلر. منیم باجیم او گیر وئره ن لردن ایدی. اصلن قویو، قاریشقا و بو جور شئی لره فیکیرلشمه. بو قدر آدام بیر بیرلری ایله یاشاییرلار . کوروش بیله سینه ن چوخ یولا گلیردی آما ا و چوخ ناز ائدیردی … دئییر منله دوز دئییل دین ، اوّل دئمه لی یم کی کوروش منه بیر سؤز دئمه میشدی سونرادا ، بوتون آداملارین بیر سیر لاری اولار . اصلن سیر سیز آدام …هَمَن سیرلاردیلار کی آدامی عشق کیمی قورخویا و چابالاماغا سالیرلار.
نرگیز دئدی: مامان ! سیر، یالانلا فرق ائده ر.
پروانه الکتریک سوپورگه نی قویدو آنبارا و دئدی: منجه چوخ فرق ائتمز.
نرگیز گئتدی دوندوروجونون کنارینا. بؤیوک بیر آلما گؤتوردی. آلمانی دیشله یه رک دئدی: شاید ده سورون لاری چوخ جیدّی ایدی. شاید ده خالا دوز دئییه، آداملارین چوخ نقشی یوخدور. گاهدان قاریشقالار کیمی بؤیوک سونامی لره قوربان گئدیرلر. آلمانین چؤپونو آتدی قاب یویان سینکه. گؤزو دوشدو نارین قاریشقالارا کی قارپیز قابیغی نین دؤوره سینه ییغیشمیشدیلار. دقتله اونلارا باخدی. اونلارین دا گؤره سن می اینسانلار کیمی حیس لری واردی؟ شاید ده بو آن بیله لرینه اؤزه ل بیر لحظه دی و بیر – بیر لری له دانیشیرلار، بحث ائدیرلر و فیکر ائدیلر کی بیر غنیمت صاحیبی اولوبلار و اوندا بیردن بیره او ائده بیلر بیر سونامی کیمی یا اتم بمبی کیمی باشلارینا یاغا. شیرین سویون آچدی. و قاریشقالارین هامیسی تئزلیک له یومورلانیب گئتدیلر قویویا.
موبلون اوستونده اؤتوردو و نظرینه ائله گلدی کی برک بیر ایشیق اوز گؤزونه توخونور. هالین پرده سی نی کی ییغیشمیشدی، آچدی. سالون آز چواخ قارانلیق اولموشدی. دیل دوداغی نین آلتیندا دئدی: دوغرودان کی ژاپونون سونامی سی چوخ رحمسیز ایدی !
نوشته شده توسط admin در چهارشنبه, ۲۰ تیر ۱۳۹۷ ساعت ۱۲:۲۰ ب.ظ
