سن من و داریخمالار
کوچوره ن:اکبرسعادت
آی چیخمازسا
نئجه بزه‌نه‌جک بو گئجه؟
سسین آی ایشیغینا جالانمیش آی چیخمازسا
تامارزی قالاجاق سسینه گئجه‌م.
آنادیلیمیز: گئچمیشلره دالیرام، بو دونیادا اولمادیغیمی سانیرام. دوشونورم و سونرا قالدیرملاری آیاقلاماقلا یوللانیرام. ائله بیل اوزومو ایتیردییم کوچه لر ساری گئدیر آیاقلاریم. آیاقلاریمین ایزین آیاقلایا – آیاقلایا سورونورم کوچه- کوچه.دالیمجا بیر انیلتی گلیر، الینی بوغازینا توتاراق.
قونشوموزون بالاجا قیزی داها بویویوب و گوزل لشیب، قوجالیب اونو مارال آناسی.بویوک جادایا یئتیریرم.جادا بویودوکده داریخمالاریم دیله گلیر، دانیشدیریری دیلکلریمی.دانیشیرام دیلکلریمله و سونرا بیر من قالیرام بیرده داریخمالاریم.قیش اولسایدی، قار قالسایدی آیاق ایزلرینین آردیندا آیاق ایزلریمده قالاردا قالدیرملاردا.
اوندا دوناردی اللریمیز بیر- بیریمیزه چاتینجا.هوفلاماق یالنیز قیشدا سئوگی سوزودور، اونون ایچین قیش اولسایدی!یاز چیچکلریله تانیلار و سن لئچک یینله. زئیوه چیمن لیینی خاطیرلاییرام، سن آستا گلیب لئچه یینی اوزومه آتیب قاچدیینی..
آدینی سسله‌ییرم باخ…کیمسه ائشیتمه‌سین بیلمه‌سین، تانیماسین دئیه اوره‌ییمده چاغیردیم. بیلمیرم نئجه و هاردان ایش یئریمده چالیشیرکن بئتون، دمیر و قالیبلر آراسیندان ایچیمه دامیردین. هه بیلیرم، بیر شئی‌لر اولوب، باخ او موبیلیمی گتیر منه. بودو دوز الیمه آلان کیمی مئساژین گلدی.
“قادیر سنی داریخیرام…” ائئئئ داریخما جانیم. خوشبخت گونلریمیز اولاجاق هله. بیرده دئمه ها ائله بئله‌دی، منی دویدوغون زامان دامیرسان منه. باش قالدیریرسان بوتون چئوره‌مه و نهایت دیز چؤکورم سنه. بویور جانیم خانیم، بوراسی سنیندی، کیمسه‌یه وئرمم. یعنی سنین اولان شئی‌لری من باغیشلایا بیلمه‌رم.
دئییرم سئویرم سنی. “یوخ ایسته‌میرم، دوستوم اول و قال” دئییرسن و قالیرام خوشبخت سحرلری قوجاقلاماغا من. باخ بویون یئنه یوخونو قاچاق سالدین بیزدن، قورخما من سنی قاچیردان دئییلم. بو آرتیق چوخ کلاسیک بیر داورانیشدی-آما اؤز آرامیزدی بعضن بتر ایشدی ها. ایندی بونو دئدیم شر-خاطالیغی یئنه توتاجاق.
آمان بو سون بئشیکلر الیندن. یوخومدا منی قاچیردیردین دئییر. آخی قاداسی منه نه، بو سنین یوخوندو آخی. بو یوخونو سن اؤلچوب-بیچمیشسن جانیم. هئچ گؤر منیم یوخولاریم ائله‌دیمی؟ هن! قاچیرام پئشینده من. آدینی سسله‌ییرم هارداسان به سن؟ ائله گولومسه‌ییرسن لاپ او بالاجا ساریشین اوشاق کیمی. نه شیرین گولوشون وارمیش سنین.
بونو ایلک یوخودا بیلدیم. یوخوما دا گلدین توتوق وئرمیرسن کی. من آریقلایان دئییلدیم ائ یوخولاریمدا پئشینجه قاچماقدان بیر آز آریقلادیم ائله. دایان جانیم بو زمیلر ساری‌دی. یولوخار آرامیزا بو ساریلیق. پاییز دوشر گولوم. سولار، سولاریق.
“من نه قدر تیکرار ائله ییم هئچ زاد بیلمیرم! نچه دونه تیکرار ائله ییم هئچ کیم هئچ زاد بیلمیر، چون بیر کس بیر زاد بیلسیدی بوراکیمی بوتون بیلمه لی لری هامییا دئیردیلر، هامی اینسانلاردا سیررلریندن آگاه اولاردیلار.
بیز یارانیشدان، دونیانین سیرلریندن فیکریمیزه گلنلری بیلیریک.” موریس مترلینگ ایستمه‌دیکلریمیز یا دا سئومه‌دیگیمیز دوروملار و قوشوللار، اونلارا دوشونه‌رک چاغیردیغیمیز و اوز دوشونجه‌میزله یاراتدیغیمیز کالبدلاردیرلار. اونلار اوز- اوزلوکلرینده، روحلاری اولمادیقلاری اوچون یاشامیمیزا گیریب بیزی اینجیده بیلمزلر. آنجاق بیز اونلارا دوشوننده اونلارا گوره دانیشاندا بو جانسیز صورتلره جان باغیشلاییب یاشام بخش ائدیر، افعی ایلان کیمی اوز جانیمیزا سالیریق.
دئمک اوره‌ییمیز و دوشونجه‌میزدن موغایات اولمالی‌ییق کی، یارادیجی گوجلری ایله افعیلر عقربلر، اودلار، جهنملر یارادیب اوزوموزو اونلارین توزاغینا سالیب اسیر ائتمه‌یک. اونلارین یئرینه، گوزللیک، یئنیلیک، سئوینج و سئوگی یاراتمالی‌ییق کی، اوزوموز ده داد آلاق یاشامدان چئوره‌میزده‌کیلر ده.
انسان حیاتیندا دوغوم شادلیقلار یاراتدیغى حالدا اولوم حسرت و غم دوغورور.انسان ایکى یوللا دونیادان گئدیر: بیرى یاتدیغى یئرده? یاتاق ایچینده یاشین چوخلوغوندان یا ساغالماز ناخوشلوقدان وجودون سارسیلماسى و اولگونلشمه سى ایله? ایکینجیسى آیاق اوسته? وجودوندا حیات چاغلادیغى و یاشاماغا یارادیغى حالدا اولور.
بو ایکینجى یوللا اولنلرین ایچینده تصادفه اوغراماق کیمى گوزله نیلمز اولوملر اولدوغو کیمى? بو حیاتا گوز یومانلارین چوخونو? دین? حق? خلق و وطن یولوندا جانیندان کئچن شهیدلر تشکیل ائدیر. دوغماق حالیندا دونیادان گئدن آنالار و صغیر اوشاقلاردا بو شهیدلر سیراسیندا اولورلار۰ اینانجیلارا گوره شهیدلر باغیشلانمیش اولور? اونلار سئوال¬ سورغوسوز بهشته گئدیر و کربلا شهیدلرى و اولیالارین حمایه سى آلتیندا یئر توتورلار.دین ? حق? خلق و وطن یولوندا شهید اولانلارین تورپاغا تاپشیریلما و عزا مراسیمى ائل مراسمینه چئوریلیر. بونلارین جنازه سینى ائل یولا سالیر و عزاسینى ائل ساخلاییر.
گنج‌لیک واقت‌لاری یولداش‌لار بول واقت‌لاری بوش، هر دره‌دن ماراقلی گلن چوخلو سوزلری اولور. یولداش‌لاری بیربیر ده‌ییشیب، بیر چوخ یئنی یولداش‌لارا دا واقت قالمیر. یاشلاندیقجا یولداش‌لارین سایی آزالیر. تانیش اولدوق‌لاریندان بیر نئچه‌سی قالیر. ائولندیک‌ده ائولی‌لیک دوزه‌نیندن آسیلی اولاراق سایلاری داها دا آزالیر.
بو بیر گئنل دورم‌دیر. هر بیر دورومدا اولان کیمسه‌لر آز-چوخ بئله دوروم‌لارلا اوزله‌شیرلر. فیکیر آدام‌لاریندا گئنل‌لیک‌ده بئله اولور. تکجه فرقلی اولان، بیر فیکیره باغلی کیمسه‌لرله یاش‌لارینا باخمایاراق بیر باغ قورماق دیر. باغلانتی فیکیر اولور.
آمما ائله فیکیر آدام‌لارینین ایچینده ده، یاش اوزل‌لیک‌لری یاشاییر. گنج‌لر گنج‌لیک چاغ‌لاری کیمی داها ایلگی‌لنمیرلر. اونلار دا ایلگی‌لنسه‌لر اونلاردا اولان هیجان آدامدا اولمور. هیجان‌لی‌لارلا بیر یئره دوشدوکده هیجانی قالدیرماق دا چتین اولور.
بو اوزدن ایلگی‌لندی‌ییمیز کیمسه‌لر داها آزالیر.
واقت داریسقال‌لیغیندان دا نئچه نفر ایلگی‌له‌نه بیلدی‌ییمیزدن بیرلرینی سئچیریک. اونلارین واقتی اولا، سنین واقتین اولا، بونلاری بیربیرینین اوستونه سالماق داها چتین اولور.
یاشاییش داریخدیریجی اولان واقت‌لار زورگلن واقت‌لار، دردیمیزی باشا دوشوب اوزونده ساخلایان بیرینی آختاریریق.سوزوموزو بیرینه دئین آختاریریق.بیری ایله دردله‌شن آختاریریق.اوتورورسان دردله‌شیرسن بوشالیرسان. بیر دیللی دانیشیرسان، بیلمیرسن واقت هاردان گلدی گئتدی. تاپدیغین ادام سوز ساخلایان اولماسا، باشیوا درد آچیب‌سان دئمک. سوز ساخلایان اولاندا بیر داها قاییدیرسان. دونه‌لرله قاییدیرسان. آلیشیرسان. هم قولاق‌لارا آلیشیرسان، هم آغیزلارا. یوردلاریندان سورگون دوشن‌لر دردله‌شن یئری سورگون دوشموش یئرلرده آختاریرلار. گلیرسن گئدیرسن. گونلر آیلار، ایل‌لر کئچیر، دونن‌میرسن. گلدی‌یین واقت‌لار اوزووو گوره بیله‌جک یولداش‌لار آختاریرسان. گئدیرسن یانینا. گورورسن سندن سونرا سورگون دوشن بیر چوخ‌لاری اوردادیرلار. یونگول‌له‌شیرسن. بیرداها اولماغا جان آتیرسان.زنگ آچیلیر بیر خبر گلیر اینانمیرسان.
کاه قالیرسان، بیرداها سوروشورسان. ائله بیلیرسن یوخودو. حایات دایانیر دئیه‌سن. نه آغلایا بیلیرسن، نه دینه بیلیرسن. ال‌لر تئلفونو توتمور. بیر داها زنگ آچیرسان، هارداسیز هارداسان. بئله بیر سوز اولماز. دونیاداکی خوشلوغووو ایتیریب‌سن، کیمسه‌سیزله‌ییب‌سن. باشقالارینا زنگ آچیرسان، اینانمادیغین سوزو دئینمیرسن، تکجه دئییرسن ائله‌بیل بیر شئی‌لر اولوب. ایستیرسن هر نه یالان اولا. دونیا اوندان بیر گون قاباقدان دایانا، گئدیب گوره‌سن، بیر عومورلوک دایاناسان.
خبری هر کس دوغرولاییب کیمسه‌سیزلی‌ییمیزی دوغرولویوب. نئچه گون بوغازین دولوب-بوشالاندان سونرا بیر داها قاییدیرسن ایلک ائشیت‌دی‌یین چاغ‌لارا. نه دینه بیلیرسن، نه آغلایا بیلیرسن. ال‌لر، گوزلر، سوزلر خبری دوغرولایانمیرلار. چون خسته لیک ، درد یارا،قان، جان وئرمک ، دار و قارانلیق قبری گورموشوک و آغلاماق و سیزیلتی سسینی ائشیتمیشیک ، اولاری اؤلومون نشانه لری سانمیشیق .آیا اولوم بیر اسکلتدیر کی بیزدن قالیر یا بیر بدندیر کی اوندا قوردلار ترپه شیر؟
بونلار بیر سانماقلاردیرلار کی بیزیم ذهنیمیزی یولدان چیخاردیر . او شئی لر کی منی تعریف و مشخص ائله ییر و کاراکتر باغیشلاییر اوزون ایللرین عکسلری ، اطلاعاتی، خاطره لری، تجربه لری و چئشیدلی دویغولاری دیرلار کی بئینیمیزین میلیاردلار عصب سلوللاریندا ییغیشیب .او شئی کی بیزه کاراکتر باغیشلاییر و بیز اوزوموزدن تانیشلیق تاپیریق، بیزیم بئینیمیزدیر.
بیز واریق تا او زامانا تک کی بئینیمیزین نئچه میلیارد عصب سلوللاری بیزیم اولماغیمیزی بیزه اعلام ائله ییر.بونلاری یازماق تکجه دردلشمک دیر . سیزده یازین. ان آزیندان اوره ییمیز بوشالسین شیشمه سین. بیلیرم داها اونملی دردلر وار، چورک دردی، پول دردی، ساغلیق سورونلاری، ائو، ماشین، ازدواج، ایش، و… منده یاشاییرام بونلاری . آنجاق انسان ملّتینی دارقین گورونجه داریخیر. هردن بیر سئوینسک، گولسک بلکه داها راحات سورونلاری چوزمک اولار. یاشاماق اوچون اومود لازیم دیر، سئوینج لازیم دیر.سیزی سئویرم چونکو منیم یاشاماق بهانه م منیم ملتیم دیر..
نوشته شده توسط admin در چهارشنبه, ۰۴ مرداد ۱۳۹۶ ساعت ۵:۲۷ ق.ظ
یاشاماق اوچون اومود لازیم دی …