سنین آدین مانقورد دئییل سن ژولآمانسان
سوسن نوادهرضی
آنادیلیمیز: بیر زامانلار آورآسیانین »ساری اؤزیه« چؤلونده فرقلی ائللر یاشاردی. بو ائللردن بیری ده تورک »نایمان« ائلی ایدی. نایمانلارین ژوان- ژوان آدلی دوشمانلاری واریدی. ژوان- ژوانلار بیرینی اسیر آلدیقلاریندا اونو چؤله آپاریب، باشینی تهکدن قیرخیب، سونرا بیر دَوهنین باشینی کسیب، دوهنین بوینونون دریسیندن (دوهنین دریسینین لاپ برک یئری بوراسی دیر) بیر نئچه پارچالار آییریب، فوریتله اسیرین باشینا یاپیشدیریب محکم باغلارمیشلار. سونرا اسیرلرین الینی- آیاغینی برک باغلاییب، یاندیران گونشین آلتیندا اؤتوررمیشلر قالسینلار. بیر سوره سونرا اونلارین توکلری اوزاناردی اما اوزانماغا یئر تاپمایینجا قاییدیب تدریج ایله اسیرین بئینینه سوخولارمیش. جوانلارین چوخو بو ایشکنجهیه دؤزه بیلمهییب، اؤلرمیشلر. آما قالانلار توکلرین حافظه سلوللارینا توخانماسیندان دولایی بوتون کئچمیش خاطیرهلرینی ایتیررمیشلر آنجاق اونلارین ساواشما باشاریلار و مهارتلری قالارمیش. اونلارجا اسیردن هامیسی اؤلوب سادهجه بیر اسیر قالیب »مانقورد« اولدوغونا گؤره، دئمک بیر »مانقورد«ون دهیری بیر قولدان اون قات چوخ اولارمیش بو اوزدن بیری بیرینین مانقوردونو اؤلدورسهیدی، چوخ آغیر جریمه اؤدهمهلی اولاردی.
بیر گون یاشلی »نایمان آنا«-نین اوغلو، »ژول آمان« آدیندا بیر گنج، ژوان- ژوانلار الی ایله اؤلدورولن آتاسینین انتقامینی آلماق اوچون، نایمان قبیلهسینین باشقا ایگیدلری ایله بیرلیکده ژوان- ژوانلارا هجوم ائدیب، قهرمانجا دؤیوشدوکدن سونرا اونلارا اسیر دوشدو. ژوان- ژوانلار اونو مانقورد ائتدیب، سورولرینه چوبان ائتدیلر.»نایمان آنا« اوغلونو قورتارماق اوچون ژوان- ژوانلارین بؤلگهسینه گئدیب، اوغلونو سورویه چوبانلیق ائدرکن گؤرور. اوغلونا یاخینلاشیب آدینی سوروشور. اوغلو : “آدیم مانقورد دور” دئیه جواب وئریر. آنا، نیسگیللر ایچینده اومودسوزجاسینا اونا آتا- آناسیندان، ائلیندن- اوباسیندان سوروشور. گنج اوغلان بیر تک جوابی اولور اونا وئرمهیه: “من مانقوردام!” آنا چالیشیر گنج اؤولادینین حافظهسینی اونا قایتارسین، دئییر: “سنین آدیین ژول آماندی، ائشیدیرسنمی؟ سن ژول آمانسان. آتاوین آدی دا دؤننبای دیر. آتاوی خاطیرلاییرسانمی؟ سن کیچیکایکن او سنه آتیجیلیق اؤیرهدردی. من ده آنانام سنین، منیم اوغلومسان. سن نایمان قبیلهسیندنسن، آنلادینمی؟ سن نایمانسان…
او، مانقورد، تام سایمازلیقلا آناسینی دینلهییر. سانکی بو سؤزلر هئچ اونو ایلگیلندیرمزمیش کیمی…
نایمان آنا بیر داها جان آتیر اوغلونون بللهیینی (حافظهسینی) اونا گئری قایتارسین، یالواراراق دئییر:
-آدیوی خاطیرلا… باخ گؤر آدیین نهدیر؟ مگر بیلمیرسن آتان دؤننبایدیر؟ سنین آدین مانقورد دئییل، سن ژولآمانسان. نایمانلارین بؤیوک کؤچو زامانی سن دونیایا گلدین. بو اوزدن ده آدینی ژولآمان قویدوق. سن دونیایا گلدیکده، بیز اوچ گونه کیمی دایاندیردیق کؤچوموزو.
نایمان آنا اوغلونو دویغولاندیریب، اوشاقلیقلارینی اونا آنیمساتسین دئیه، اونا نغمه، لایلا و بایاتی اوخودو، آنجاق بونلار هئچ ده ائتکیلمهدی گنج اوغلانی. ائله بو واخت ژولآمانین اربابی تاپیلیب گلدی. نایمان آنا اونون قورخوسوندان گئدیب گیزلندی. ارباب ژولآماندان سوروشدو:
-او قاری سنه نه دئییردی؟
ژولآمان دئدی:
-دئییر من سنین آنانام.
ارباب دئدی:
-سنین آنان یوخدو. سنین هئچکیمسن یوخدو. باشا دوشدون؟ بیر ده او قاری یانینا گلسه، اونو اوخلا وور اؤلسون!
ارباب “تیر حؤکمو” وئرندن سونرا اوزاقلاشیب اؤز ایشینین دالیسینجا گئتدی.
نایمان آنا اربابیین گئتدیگین گؤرجک پوسدوغو یئردن چیخیب، ایستیر بیر داها گنج اوغلونون تاریخی، عایلهوی و ائلینه گؤره حافظهسینی ایشه سالسین بو اوزدن گلیب اونا یاخینلاشیر. آما ژولآمان، نایمان آنانی گؤرونجه، هئچ آجیمادان (ترحم ائتمهدن) اربابیندان کور اطاعت اوزوندن اربابینین بویوروغوندان اطاعت ائدیب، آناسینین اورهیینی نیشان آلدی و اونو میندیگی دَوهنن اوستوندن یئره سرهلهدی. نایمان آنانین جانسیز بدنی، سونرالار «آنا بیت» آدلانان مزارلیقدا تورپاغا گؤمولور.
قیزییل قلم یایدیغی معلومات اساسیندا آرازآذربایجان راپورونا گوره ، اونون مانقورد اوغلو، آناسینین مزاری اوسته بیله گلمیر. آخی او اؤزونو آناسیز- آتاسیز، اصل نسبسیز سانیردی.
EMAIL.agazadeh1@gmail.com
نوشته شده توسط admin در دوشنبه, ۱۱ دی ۱۳۹۶ ساعت ۷:۰۹ ق.ظ