سنه مین لر جان فدا

علیرضا ذیحق
آنادیلیمیز: بو گونلر یوخوما چوخ گلیردی .آییلماق ایسته مه سم تئز یوخودان آییلیردیم . .
یادیما دوشوردو کی دئییردی:” بیرگون اولاجاق فقط یوخودا منی گؤره جک سیز” . سؤز آنامدان گئدیر. اون بئش ایل کئچیردی . بو ایللرده چوخ شئی لر دَییشیلمیشدی .
اوشاقلار بؤیرکن هره بیر سرنیویشته صاحیب اولموشدو .
آتام دا ائوله نیب اؤزونه تزه بیر یووا قورموشدو .
ایندی ۸۶ یاشی وار ایدی و داها او ساغلام لیغی قالمامیشدی . آما چتین گونلر او گونلر اید یکی گئدیب اونون کئفین سوروشوردوم .
او ائو کی هر بیر بوجاغیندا آنامین خاطیره سی وار ایدی داها بیله مه بوم بوش ایدی . سانکی او گئتدیک دن سونرا او ائو ده روح لار یاشاییردی .
آنام دان اون ایل قاباق قارداشیم سعید اؤلموشدو . هم ده بیر پارا قوهوم تانیش لار کی بیزه قوناق گلر دیلر .
ایندی داها اؤزلریندن خبر یوخ ایدی و تکجه خاطیره لری جانلانیردی . ا خاطیره لرین فیکریمه جومدوغو آن دا ائوده اولان سس کوی ده آدامی گرچک لره باغلیردی .
آتامین قولاقلاری آغیر ائشیدیردی و گرک اوجادان دانیشاردین و گیلایه لری کی آز گئدیب گلیر سیز و غافییل کی آنانین یئرینده بیرینی گؤرمک هئچ ده آسان دئییل دی .
البته بو دویغو نو مومکون ایدی باشقا قارداشلار یا باجی لار داشا مایاردیلار آما منده بئله بیر اینجه و اینجیده ن حیس اویانیردی . ایللر کئچدیک جه آنامین ایتگی سی هئچ ده اونودولموردی . او گئده ندن بیزیم عائیله باغلانتی لاریمیز دا سوست لش میشدی . قارداش، قارداش سهل دی آتا میزین دا باشینا بؤرک قویموشدو .
اونون کی بازار دا ماغازاسی وار ایدی بیر نقشه نن اونون الیندن چیخارتمیشدی .
دئمک کی بو ایشی نن نه تک آتامیزا خیانت ائتمیشدی بلکه بوتون ورثه نین باشینا بؤرک قویموشدو .
قارداش لارین بیری ده کی آز چوخ درده دَیَن ایدی آروادی نین فئعلینه اویوب باجی قارداش دان اوزاق گزیردی . باجی لار دا هره سی بیر دیار دا اَر ده یدیلر و سس لری چیخمیردی .
سعید ده گنج لیک ده خسته له نیب ابدی حیاتا گؤز یومموشدو .
آما بو دئدیک لریمین هامیسی دئییل . اوشاق ایدیم آلتی یئددی یاشیم وارایدی . آنام بازارا گئده نده آغلایاراق دوشه ردیم دالیجا .
دئیه ردیم ویر اما آپار . سعادتی تکجه آنامین حوضوروندا حیس ائدیردیم .حتتا اونون منی ادب ائله مک اوچون کؤتک وورماسی دا جانیمی اینجیتمیردی . ایللر اؤتدوکجه بؤیوردوک تاکی آیاغی میز کوچه بازارا آچیلدی و بیرگون سعید ایتدی .
گئجه اولدو گلیب چیخمادی و آنام اؤزونو دؤیوب ساچلارین پریشان ائده رک بو ائودن او ائوه بو محله دن او محله یه خبر سالدی.
آما اوندان خبر چیخمادی . خبری پولیسه چاتدیرماق ایستیردیلر کی قو نشو لارین اوغلانلاریندان بیری بیر خبر وئردی . اودا بو کی سعیدی ناهاردان سورا سیناما دا گؤروب دی . آنامین اوره یینده بیر قیغیلجیم آتشی یاناراق آتامی دا گؤتوروب گئتدیلر سینامایا .
سیناما سالونی قارانلیق اولسادا چیراغ سالاندان یاردیم دیله ییب کیچیک یاشلی اوشاقلاری آختاردیلار .
تاکی جمعیتین ایچینده گؤزلری سعیده ساتاشدی کی شیرین یوخونون ایچینده ایدی .
اونو ائله اوجور یوخولو ماشینا میندیریب گتیردیلر ائوه و او آییلیماق ایسته رکن آنام وار گوجو ایله اونون اوزوندن بیر سیلله ویریب سریلدی یئره .
سونرا ندن تئز قوجاغینا آلیب باسدی باغرینا و دئدی :
” سنه مین لر جان فدا .
ووروم نئیله ییم وورماییم نئیله ییم ! ” بو ماجرانین اوستون دن ۵۰?? ایل اؤتسه ده گؤردویوم یوخولاردان بیری قاتما قاریشیق یادیما گلسه ده آنامین بیر سؤزو چوخ جانلی اولاراق قولاغیمدا سسله نیردی و اودا بو سؤزلر ایدی :
“سنه مین لر جان فدا . قبیر اوستومه گلمیرسن گلمه لااقل من یوخونا گلنده ده تئز آییلما !”