ساراسیز،خان چوبانین دردی چوخالدی

ساراسیز،خان چوبانین دردی چوخالدی

اکبر سعادت
اوزاق زامانلاردا آذربایجانین موغان شهرینده،بیر ار،سلطان آدلی و بیر آرواد گلنار آدلی یاشاییردیلار.اونلارین بو دونیاده بیر غصه لری واریدی بویوک.درد و مصیبت اونلارین اوستونه کولگه سالمیشدی.
اونلار نئچه ایل سونسوز و اوشاق سیز قالمیشدیلار.بو درد گلنار و سلطانین اوره گین یامان سیخیردی.اوشاق سسی ائشیده نده،آه چکیب آغلیردیلار.بیر گون گلنار یوخودا گوردی بیر آتلی بونا ساری گلدی آتدان دوشدو بونا بیر دسته گول وئردی.
دئدی بو تئزلیقدابویلی اولاجاقسان.گلنار یوخودان آتیلدی،سلطانا دئدی:بیزیم اوشاقیمیز اولاجاق.
سلطان چوخ خوشحال اولوب و شکر ائله دی.ساعتلار،گونلر،آیلار گئچدیتا گلنار بیر اوشاق دونیایه گتیردی.اوشاق نه اوشاق؛قارا ساچلی جیران باخیشلی آی پارچاسی.تانری سنی خوش جمالا یئتیرمیش.سنی گوره ن عاشیق عقلین ایتیرمیش ملک لری درمیش گویدن گتیرمیش.حیف کی دریبلر بنوشه نی.
داخی اونلارین بو غصه سی ده گئتدی.طایف،دوستلار گلنارین باشینا ییغیشیب.اوشاقی الدن اله وئریبلر.سللطان دئدی وقت یئتیشیب تا بو اوشاقا بیر آد قویوب.بیر آد کی ائل ایچینده او آددان اولماسین.
عزیزیم دادی وار
یارین شیرین دادی وار
یوز مارال آراسیندا
سارانین آدی وار
سلطان دئدی تاپدیم؛قیزین آدین سارا قویاق…هامی بیندیلر.
گلنار سارانین اوزون اؤپدو..باشلادی لای لای دئمه یه…:
داغلارین لالاسینا
گوزلرین قاراسینا
آنالار قوربان اولسون
اوز کورپه بالاسینا
نئچه ایل لر گئچدی.تا بیر گون سلطان ائوه گلیب گوردی خسته لیق گلناری ایاقدان سالیب.رنگی سارالیب.نفسدن دوشوب.گلنار سلطانا دئدی:منیم مهربان اریم:داخی من بو خسته لیقدان ایاقا دورمویوب.قلبیم ده طاقت یوخدو قورخورام سارا ینیم قالا..
سلطان پوزولدو دئدی:بو نه سؤزلردی دئییسن،آز اوره گیمی داغلا.سارا ایاق دورتوردی و دانیشیردی.گلنار خسته لیقدا قالمیشدی.دیزلرینده قوت یوخویدی.
تا بیر گون ساطانا دئدی:عزیز اریم سلطان من اولوره مداخی سیزلری گورمیجاقام.منیم آخر دم ده وصیتیم بودور کی:سارانی اوزوندن آییرما.من اولنن سونرا اولینمک فیکرینه دوشمه.
سارایا هم آنا هم اتا اؤل.سارانی داغلارا داشلارا تانیش ائت.اره وئرسن آدی سانلی شجاعتلی جوانا وئر.
دلی کونول مندن سنه امانت
دئمه بو دونیاده قالیم،یاخشی دیر…
منیم قبریمی اراز کناریندا قاز و اوردا قویلا.قبریمین اوستونده یاز کی” حسرت چکن گلنار”.بونلاری دییب گوزلرین یومدو و روحو بدنن چیخدی.
سلطان؛گلنار اولنن سونرا سارایا هم آنا اولوب اونی بویودوب.سارا ۱۳ بهاری گوروب.خمار گوزلری قارا ساچلاری غنچه دوداقلاری هر گوره نی حیران ائدیردی.
چ.خلار ایسته دیلر سارایا ار اولسون لار.اما سلطان راضی اولموردی و دییردی سارانین اری گره ک شجاعتلی و قورخمویان بیر اینسان اولسون.
بیر گون سارا چشمه دن سو آپاراندا ،باشی اوستونده بیر جوان چوبان گوردو.بو گونه جاق بئله بیر جوان گورمه میشدی چوبان سارایا دئدی:مرحبا سلطان کی بئله بیر آی پارچاسی بسلییب.آلاه گانارا رحمت ائله سین.
سارا بیر سوز دئمییب،یولا دوشدو.قلبی چیرپینیب،فیکری اونو چولقالییب ائوه گلدی.سلطان سارانی او حالدا گوروب دئدی قیزیم سنه نه الوب بئله پریشان سان؟
سارا دئدی آتا من بیر اوغلان گوردوم کی قوزلاری و قویونلاری چشمه نین کناریندا ساخلییب منه چوخ باخدی و سنه تحسین ائدیردی.گلنارا رحمت اوخوردو.
سلطان بیر فیکره گئدیب دئدی:او حیدر آدلی کیشینین اوغلو آدی خان چوبان دی.غیرتلی و شجاعتلی بیر اوغلاندی.
سن اونو یاخشی تانیمیرسان.قیزیم منه ده گوروم اونا گئت مک ایسته ییرسن.سارا دئدی آتا من بیلمیرم.
آنجاق مصلحت سنین دیر.قیزیم،سن راضی اولسان،منده راضیام.سلطان دئدی:
ایچیب عشقین بولاغیندان
گزیر مجنون سراغیندان
تر غنچه نین بو داغیندان
اوزور بویلانا بویلانا
سارانین کبینی خان چوبانا کئسیلدی.اونلار آداخلی اولدولار.هر سحر خان چوبان قویونلاری داغا آپاراندا،سارانی دا داغا آپاریب،آغاج کولگه سینده ایکی آداخلی نی سسیله قوزولارین ماه مسینه قولاق وئریب خان چوبان بئله سؤیلردی:
یازین باخچاسیندا اوچ گل آچیب
آغ گل،قیرمیزی گل،بیرده ساری گل
هر اوچوده بی بیریندن اؤیمه لی
آغ گل،قیرمیزی گل،بیرده ساری گل
بیر گون خان چوبان سارایا دئدی:عزیزیم من قویونلاری یایلاقا آپاراجاقام.بیراز صبر ائله سن من قاییدیب و توی توتاریق.
سارا دئدی من چوخ قورخورام.اوره گیم سیخیلر.آنجاق تئز گه.توی اولماسا دا المویوب اما سنی گوزلوره م.خان چوبان دئدی:سارا سن منیم اوره گیمین بندی سن.مجبور اولماسایدیم یایلاقا گئتمزدیم.
خان چوبان و سارا آیریلیب.سارا موغانا قاییدیب اما اوره گی چوبانین یانیندا قالدی.
بیر گون سارا سو کناریندا اوترموشدو،گوزو بیر نئچه آتلیا دوشدو.آتلارین قاباغیندا بیر کیشی کی اونون اوزونده شمشیر یاراسی واریدی.آدی حاکیمیدی.دئدی آی قیز آدین نه دیر؟سارا جواب وئرمه دی
حاکم قیشقیریب دئدی:نیه جواب وئرمیسن؟؟سارا باشماقلارین الینه آلیب ائوه طرف قاچدی…..
حاکم فرصت وئرمه دی اونو دوتدو.سارا قیشقیریب آتاسی سسینی ائشیدیب سارایا طرف گلدی.حاکم سارانین آتاسین گوروب دئدی:بو سنین قیزین دیر؟بله منیم دیر…آدی سارا دی
حاکم دئدی:من ایسته ییرم سندن بو قیزی آلام نه دییرسن؟سلطان دئدی منیم قیزیم خان چوبانا آداخلی دیر
حاکم دئدی حیف دییل سارانی چوبانا وئره ن!!!؟؟
سلطان دئدی منیم اوچون چوبان یا حاکم اولماق فرق ائت مز..آنجاق اینسان اولسون لار.
حاکم دئدی سن بو قیزی وئر منه،هر نه ایسته سن سنه وئره رم.سلطان دئدی هئچ نه ایسته میرم..قیزیمی بوراخ.حاکم دستور وئردی تا سارانی دوتوب قولارینی باغلاسینلار و اوزونن آپارسین.بولوتلار ایلدریملار سسله نیب،یاغیش باشلادی یاغماغا..سارانی آتاسیندان آییردیلار…سلطان دئدی حاکم سن بو ظلمدن گئچ..!!
حاکم دئدی یاغیش یاغیر یول باغلانار…چکیل کنارا
آراز نعره چکیردی سئل آراز اطرافینا یول آچمیشدی..سلطان دئدی آی حاکم دستور وئر سارانین قولاریننان طنابلاری آچسینلار تا سارانی باغریما باسیب و وداع ائدیم…سارانین قولاریننان طنابلاری آچدیلار.
سلطان سارانین باشین قویدو سینه سینه سارانین قولاینا بیر نئچه سؤز دئدی…
سارانین دوداقلاری گل غنچه تک آچیلدی.حاکم خیال ائتدی کی سارا راضی اولدو…دئدی داریخما قاییدان دییل.
سلطان بیر حاکیمه باخیب بیر سارایا،سارانی اتدی آرازا…دئدی آراز دورت بالامی سنه امانت تاپشیردیم.آراز سارانی قوجاقلییب اوزونن آپاردی.حاکم و آتدیلار گیج و مبهوت قالدیلار..بو نه ایشیدی…بو نه اویوندو….نئجه اولار کی بیر اتا اؤز قیزین چایا آتیب سونرا قاییدا؟؟!!
سلطان دئدی بیزیم شرفیمیز و غیرتیمیز اذن وئرمز سنین تک ظالم حاکیمه باش اگیب و هر جور ظلم ائله مگه راغب ائده ک.اونی بیل کی قیزمین انتقامین سنده ن آلاجاقام..
بو غصه لی خبر خان چوبانین قولاقینا چاتدی.گوزلری یاشینان دولدو.
بیر قیسسا فیکره گئتدی حاکیمی یادینا سالدی.بیلدی او ظالیم حاکیم آتاسین اولدوروب…اوزونو یئتیریب آرازین کنارینا و سلطانی گوروب آغلاشدیلار.سلطان دئدی من آتام حیدرین و سارانین انتقامین ظالیم حاکمدن آلاجاقام…بونلاری دییب یولا دوشدو تا حاکیمه چاتسین.نئچه گوندن سونرا حاکمین ائوین آختاریب تاپدی.
گئجه زامانی اوزون یئتیریب حاکمین اوطاثینا.گوردو حاکیم مست بیر طرفه دوشوب.
یاخینا گئدیب دئدی حاکم منی تانیرسان؟؟؟
حاکم دئدی سن کیمسن ؟سنه کیم اجازه نی وئریب تا بورا گله سن؟
دئدی من خان چوبانام حیدر کیشینین اوغلویام…حاکم دئدی کی حیدر نئچه ایل دیر اولوب….خان چوبان دئدی :اونو بیلیرم کی سنین الینده اولوب.گلمیشم آتامین و سارامین انتقامین آلام.
حاکم ایسته دی که خان چوبانا طرف گلسین!خان چوبان مهلت وئرمییب اونون سینه سیندن ووروب کنارا چکدی..دئدی سنین آلین قانا باتیب و بو قان گره ک آلینسین.ارزویون اولومه حاضیر ائت.
حاکم یالواردی دئدی سن منی اولدورمه من سنه بیر آت بیر چووال قیزیل وئریب یولا سالام
خان چوبان دئدی :سنین قانین گره ک توکولسون بونو دیییب حاکمین بوغازین بوروب دامارلارین قیردی دئدی سن منیم آتامین بوینون بوروب دامارلارین قیریبسان.
خان چوبان ظالم حاکمی اولدوروب آرازا طرف قاییتدی و سؤیله دی :سارا راحت یات انتقامی آلدیم..
خان چوبان هر گون صبح آچیلاندا آرازین کناریندا اوتوروب گوزلرین آرازا تیکیب بئله دییردی:
گئجه گوندوز واخت بی واخت اغلارام
چشمیم یاشی جیحون اولور سئل له نیر
یاز موسیمی بلبل دیل دیل ائده نده
باغ باغچالار نرگیزله نیر گل له نیر
قاییتماق ایسته مز گوزوم کوزه لده ن
تایغیمی آرتیران دردیمی تزه له دن
ائل لره ده قایدا دیر اوزی ازه له دن
گوزل لرین شاماماسی اله نیر
هیجران دردی خان چوبانین ایاقدان سالدی..
سلطان دئدی داخی من سارادان سونرا اوزومه عومور بیلمیرم..
سلطان خان چوبانی باغرینا باسیب دئدی اوغلوم سارادان داخی گوز اوت …سارا قاییدان دییل.یاخشی بودور سارانی یاددان چیخارداسان.
خان چوبانی اینتظار ایاقدان سالمیشدی..او ائله بیلیردی کی سارا بیر گون قاییداجاق…توی توتاجاقلار…نیله مک…اینتظار چوخ چتیندی..
آرازسارانی آلاندان سونرا نعره چکدیردی ایسته ییردی خان چوبان دا آپارسین.
خان چوبان سویا باخیب سارانین شکلین سودا گوروب…صبرین الدن وئردی اوزون سویا آتدی…خان اراز اونو دا آپاردی…
اوندان سونرا هئچ کس بیلمه دی کی خان چوبان هارا گئتدی…نئجه گئتدی… قایناق:آذربایجان خالق داستانلاری

نوشته شده توسط admin در یکشنبه, ۲۳ شهریور ۱۳۹۳ ساعت ۳:۵۱ ق.ظ

دیدگاه


9 × هفت =