حاضیرلایان:اکبر سعادت
آنادیلیمیز:موبارک گئجه لرین بیرینده بؤیوک زردوشتون روحو رؤیامدا موسافیریم اولدو. اؤزو ده تک دئییلدی، صحابه لری ایله بیرلیکده. بیر طرفینده افلاطون اؤز نورلو سیماسی ایله و نورو تبلیغ ائدن یئنی افلاطونچولارلا بیرلیکده. دیگر طرفده ایسه گاه مئفیستوفئل (رنسانس دونه می آوروپا میتولوژی سنین لیدر شئیطان لاریندان بیری)، گاه دا نیچه قییافه سینده گؤرونن ناهموار بیر کؤلگه. هردن ده منه ائله گلیردی کی، بو کؤلگه ائله منیم (بیزیم) اؤز کؤلگم(یز)دیر: اوزریمیزه دوشن نورون درجه سی آرتدیقجا، کؤلگه میز ده بؤیویوردو. و بیز نورو قویوب کؤلگه میزله اوغراشیردیق. زردوشت چوخ غضبلی و زهملی ایدی. “سیز اؤزونوزو چوخدان ایتیرمیسینیز و اؤز حیاتینیزدان داها چوخ، کؤلگه نین حیاتی ایله یاشاییرسینیز. آرتیق ایکی دفعه منیم سیزه میراث قویدوغوم ایرث اوغورلانیب، سیز گؤز یومموسونوز. ایندی اوچونجو دفعه یه داها دؤزه بیلمیرم، – دئدی. بؤیوک هؤرموزو اهریمنه برابر توتدوغونوزا گؤره گوجسوز دوشدونوز، طالع سیزه یار اولمادی و ماکئدونییالی ایسکندر سیزدن ضعیف اولا-اولا سیزه اوستون گلدی. اؤز موعلیمی ارسطونون تؤوصییه سی ایله منیم سیزه میراث قویدوغوم ان دیرلی ثروتی – اوئستانی گیزلینجه اولاراق اؤز شهرینه – ایسکندرییه یه آپارتدیردی. ایزی ایتیرمک اوچون یئرده قالان نوسخه نی یاندیرتدی. مین ایللر سونرا ایسکندرین بیزدن گؤتوردویو و ایسکندرییه ده یئنیدن، باشقا آد آلتیندا ایشیق اوزو گؤرن تعلیملری (هئرمئتیزم، قنوستیسیزم) سیز ده سانکی یئنی بیر شئی کیمی، اونلارین خیدمتی کیمی قبول ائتدینیز. ایندی منیم اؤز وطنیمده فیکیرلریم تحریف اولونور، علئیه ایمه هذیانلار یازیلیر. آدیمدان سوی-ایستیفاده ائدیلمه سینه، ایدئیالاریمین ترسینه چئوریلمه سینه، اونلارین اوغورلانیب قرب دیرلری کیمی تقدیم اولونماسینا گؤز یومدوغونوز بس دئییل، اهریمنین نیچه قیلیغیندا یئنیدن ظهورونا و حتّی اونون هذیانلاری نین تبلیغ ائدیلمه سینه ده گؤز یومورسونوز. سن ای صلاح الدین ایوبی نین آدینی داشییان اینسان! او واخت سنین اجدادین توحیدی – ایبراهیم دینینی – ایسلام دینینی خاچپرستلرین یوروشوندن، بؤیوک عیسانین دینینی تحریف ائدنلرین تجاووزوندن قورودو. … مگر سنده او بؤیوک قودرتدن، عظمتلی نوردان بیر ذره، یا علامت قالماییبمی کی، حاقی قوروماق اوچون هئچ اولماسا بیر آددیم آتاسان!؟ ” دئدیم کی، مگر قارانلیغا، کؤلگه یه قارشی ووروشماق آساندیرمی؟ آخی، من ائله بؤیوک وئرگی و یا نور صاحیبی دئییلم… بو چتین ایش اوچون یا اولو اجدادلاریمیزین قیلینجی، یا پئیغمبرین نورو گرک دئییلمی؟ سنین اؤزونو ده تکتانریچیلیقدان آییریب بوتپرست ائلان ائدیبلر و سنین اؤز نورون اؤزونه کؤلگه سالیر، آتشین اؤزونو یاندیریر. ایندی سن بیزه نه کؤمک ائده بیلرسن کی؟! دئدی: “بیل و آگاه اول کی، من هئچ واخت بوتپرست اولمامیشام، شرین تمثیلچیسی اولان اهریمنی ده هئچ واخت آللاه سوییه سینه قالدیرمامیشام. منیم ترننوم ائتدیگیم تانری – خئیر آللاهیدیر. آخی، خئیرین، حاقین، گؤزللیگین تک آللاها مخصوص اولدوغونو سیز موسلمانلار دا قبول ائدیرسینیز. منیم دینیم ده حنیف دیندیر.” بو آرادا او، گؤزلریمه ابراهیم (ع) سیماسیندا گؤروندو. او دئدی کی، “اصلینده همیشه واحید بیر دین اولوب و بوتون پئیغمبرلر اینسانلارا واحید آللاهدان موژده گتیریبلر. ساده جه اینسان اؤولادی وحیی دیرلندیره بیلمه یه نده، گاه کؤلگه نین، قارانلیغین واهیمه سینه، گاه دا اودون، آتشین پاریلتیسینا سجده ائدیبدیر. پئیغمبرلرین گتیردیگی نورو قویوب، ناری (اودو) سئچیبلر. ایندی سن کؤلگه ایله ووروشماغین چتینلیگیندن دانیشیرسان. بلی، او یئرینی دییشیر، سیماسینی دییشیر، کیچیلیر، بؤیویور و بعضاً هئیبتلی اولور. آما اونوتما کی، کؤلگه ائله بیزیم کؤلگه میزدیر و نورون سایه سینده یارانیر. آللاه تعالی سنه ده او نوردان پای وئریب. ساده جه اولاراق سن گرک اوزونو همیشه نورا طرف توتاسان، اوندا کؤلگه آرخاندا قالاجاق و سنین اوچون قورخوسو اولمایاجاق. آما نورا آرخا چئویرسن، اؤز کؤلگن همیشه قارشینی کسه جک”. بو سؤزلر منه تانیش گلدی. آگوستین و جبران دا واختیله بئله دئمیشدیلر. یادیما باشقا بیر حکایت ده دوشدو. وولقا بویوندا یاشایان ایزئرگیل قاری نین ناغیللاریندان بیری نین قهرمانی – دانکو اؤز قلبینی یاندیریب اونون ایشیغی ایله اینسانلارا یول آچیر. ایبلیسلیگین تیمثالی اولان “فوق الانسان”، قادینین قارتاللا ازدواجیندان دوغولموش، اؤزونو هامیدان اوستون توتان غدار لاررا ایسه بو ناغیلین دانکویا عکس قطب اولان باشقا بیر پئرسوناژیدیر. خئیر و شرین وحدتی! آلووون نور ساچماق و یاندیریب یاخماق خیصلتی! ایندی هؤرموز یاددان چیخمیش، اهریمن داها یاشارلی اولموشدور. نیچه نین “فوق الانسان”ی دا دانکونو یوخ، لاررانی خاطیرلادیر، فاوستی یوخ، مئفیستوفئلی، عاریفلری یوخ، ایبلیسلری خاطیرلادیر. بس نیچه نینایدئاللارینی یایماغا چالیشانلار کیملردیر؟ ایندی اؤز قلبی نین آتشی ایله باشقالارینا ایشیق ساچانلارا راست گلمه سه ک ده، افقانیستاندا، پاکیستاندا، عیراقدا هر گون باشقالارینی دا اودا یاخماق اوچون اؤزونو اودا یاخانلارین “قهرمانلیقلارینی” ائشیدیریک.
نور نارا چئوریلیر. “فوق الانسانلار” ایشیق یوخ، اود ساچیرلار. و دوشوندوم کی، زردوشتو ناراحات ائدن یقین اینسانلارین آتشه موناسیبتده عونوانی سهو سالمالاری اولموشدور. نیچه بیر یانا قالسین، ایندی جاویدین ایبلیسی ده آز قالا موثبت قهرمان، “فوق الانسان” کیمی تقدیم اولونورسا، اوندا اؤزونو ایبلیسه تسلیم ائتمیش اینسانلار گونو-گوندن آرتمازمی؟ ایبلیسدن یاپیشانلارین حیات حریصلیگی گوجله نیرسه و ایلاهی ایدئالا دوغرو گئدنلر جیسمانی اؤلومو اؤزلرینه همدم ائدیرلرسه، زامان کیمین خئیرینه ایشله ییر؟ بو دونیادا آرتانلار کیمدیر، آزالانلار کیم؟ اصلینده حقیقی بؤیوک اینام صاحیبلری نین عؤمرو بویو حاقا قوووشماغا جان آتان، “اناالحق” زیروه سینه یوکسلن شخصلر اوچون جیسمانی اؤلوم ائله بؤیوک بیر فاجیعه دئییل. ساغلیغیندا ترکی-دونیا اولانلار دونیانی ترک ائتمکله هئچ نه ایتیرمیرلر. ایتیرن – یئرده قالانلاردیر کی، اونلارین نفسلری نین ایشیقلانماسی نامینه یازیلا بیله جک یئنی-یئنی اثرلردن محروم اولورلار. آللاه درگاهینا گئدنلر، ابدی حاقا قوووشانلار اؤلوم شربتینی بیر مئی کیمی باشلارینا چکیرلر. مولوی پئیغمبره ایستیناداً دئییر: “اؤلمزدن اول اؤلمک لازیمدیر”. باشقا بیر بئیتده مولوی حلاجین”منیم حیاتیم – اؤلومومده، اؤلوموم حیاتیمدادیر” سؤزلرینی میثال گتیریر. تصادوفی دئییلدیر کی، منصور حلاج “منم حق” دئدیگی گوندن فانی دونیانی ترک ائتمه یه اؤزو سعی گؤسترمیشدیر. منصور حلاج هله ۹۱۳-جو ایلدن – اؤزونده حقی بولدوقدان سونرا باغداد اهلینه موراجیعت ائده رک “ای موسلمانلار، منی اؤلدورمکله منه یاخشیلیق ائدرسینیز”، – دئییرمیش. سونرا اوزونو آللاها توتوب دئییرمیش: “بو آداملارین گوناهلارینا گؤره منی جزالاندیر”. بونا گؤره ده منصور حلاجی بعضاً موسلمانلارین عیساسی آدلاندیریرلار.