خوشبخت اولماغا چالیشاق
اکبر سعادت
بیر نفر اهل وفا مین بی‌وفادن یاخشیدیر
بیر صداقت اهلی مین اهل ریادن یاخشیدی
آنا دیلیمیز:خوشبخت اولماق نه دیر.نئجه خوشبخت اولا بیله ریک؟هرکسین بیر پارا شخصی نظرلری اولا بیلر.اما اصلینده ان یاخشی جواب بو سوال لارا گوره بودور کی:اینسان هر زامان آرزیلارینا ال تاپاندا،اوزونو خوشبخت بیلیر. چوخلاری خوشبخت‌چیلییی گونده‌لیک مسئله‌لرده راحات اولماق ایله یاشاما گویول وئرمکده بیلیرلر.و تکجه اوزو اوچون چالیشیرلار. بیزیم اونلارین دوز یا یانلیش (غلط) دوشوندوک‌لری ایله ایشیمیز یوخدور. بیز، هر کیمسه فیکر ائدیرسه خوشبخت دیر، لاپ آزی (حداقل) یاخشی دویغوسو (احساسی) اولاجاق‌‌دیر و هئچ کیم یوخدور خوشبخت چیلیگی راحاتجا اله گتیرسین.بونلاری دئمه دن سوز بودور کی،بیر میلت اوزوی هم ائلیه بیلر خوشبخت چیلییی اله گتیرسین و یا هم ده کی اوز جاهلیتینده قالسین و گونو گوندن یازیقلاشسین.
اما سوز بوردادی کی بیر عده بو جاهلییت ده یاشماقدان بئله فیکر ائدیرلر کی چوخ بیلیرلر .و بیر عده بئلنجی بیر فیکیرلرده کی” الله روزی رسان دیر” یاشاییرلار.
بیر کیمسه نئچه ایل ایشله‌ییب گلیرینی ییغیب، اوزو ایله عاییله سینه ائو یوخسا آپارتمان آلا بیلیرسه، اوندان ائوی آلاندان سونرا، سیز خوشبخت سیز ؟ سوروسونو سوروشساق، چوخ احتمال ایله من خوشبختم جاوابینی وئره‌جک. سببی ده اونون نئچه ایل چالیشیب، زحمت چکیب، خرج‌لرینی آزالدیب، اوز، ایسته یینه یئتیردیکدن سونرا، اوندا خوشبخت چیلیک دویغوسونون یارانماسیدیر.ائله همن بو آدام لارین اولادلاری دا بو طریقت ده یولو ادامه وئریب و اونلار دا خوشبخت اولاجاقلار.ایندی فرض ائدک بیرینین وارلی آتاسی واردیر و آتا سینا من ائو آلماق ایسته‌ییرم دئسین. آتاسی ایسه (نیز) چتینلییه دوشمه‌دن اونا بیر ائو آلا، آرخایین اولون؛ او کیمسه ائو صاحابی اولماقدان موطلق یاخشی دویغوسو اولمایاجاق. بو شخص چتینلیک چکیب، دایانمادان چالیشیب، زورا دوشمه‌دن، ائو آلدیغی اوچون خوشبخت‌چیلیک دویغوسونو الده ائده بیلمز. ایشله‌مکده اولان لذت، راحاتچیلیقدا اولماز.اینسان هر حالدا گرک صاباحینا فیکیرلشه.صاباحینا چالیشمایان اینسان؛چتین لیک گورمه ین اینسان هئچ واخت حیاتین شیرین دادین،دادمایاجاق. نه یاخشی که بیز بونلاری ایندی دن اوز اوشاقلاریمیزا اویره ده ک.دئمک اولار بیر اوشاق بویوک بیر گنج اولوب اوزو چالیشاندا پولون قدرینی بیلیر آما آتاسی خرجینی وئره‌نه کیمی هئچ بیلمیر بو پول نجور قازانیلیر! اوندادی بیلیر آتاسی یوخسا آناسی نه زحمت ایله سؤزلر ائشیدیب زحمت چکیب اوشاق بؤیودوبدور.هر کیمسه هدفینه یئتیرمک یوللاریندا زحمت چکیب، ایشده اولان چتینلیکلری ساهمانلاسا، ان یاخشی آرزیسینا یئتیردیکده، بو خوشبخت چیلیک دویغوسونو بیله جک، و یقین له دئیه جک: »من موتلویام«.
بونا تای بیر ناغیل وار کی:بیر گون دونیانین بیر گوشه سینده بیر کند واریدی کی دورد دووره کندلره گوره چوخ گورکملی و امکاناتی یئرلردن ساییلیردی. مردومو سایغیلی، آشیقلاری وارلی و صنعتکاری ساییلی ایدیر. زامانلار کئچدی و بو مردم یالنیز اوزلرینه فیکیر ائتدیلر. وارلیلار گون به گون وارلیلاندی و کاسیبلار گون به گون کاسیبلاشدی. بنالار اوجالدی و البیسه لر گوزللشدی. آمما سوز اوردا دیر کی آشاغی محله لر باتدیغجا باتیردیلار. چون کی نئچه جرگه واریدی کی ال بیر اولموشدو و قارینلارین دولدوردوغجا، حریصلشیردیلر. یوخاری محله اوشاغی ایله آشاغی محله اوشاغینین دیلی و لهجه سیده دئییشیردی و دونیالار فاصیله آچیردی.بنالار و ائولرین ایچی گوزللشیردیر ولی کند ائله همن گئچمیش کندیدیر. دورد دووره کندلر آبادلاندی آمما بو کند گئت به گئت باتیردی. کدخدا، دوقتور، آل وئرچی و مردوم مدرنلشدیکجه شهر اسکیلیردی. بیری آت مینیردی بیری آجیندان آددیملایا بیلمیردی هله گوزه لی، بو سوزلری دانیشانلاردا ازیلیردی.اومید هامیدان اوزولوب.
کنده گلن بیر باخیردی گوروردو کی کند همن کند، آمما مردوم یوخ… کوچن کوچدو قالان یاندی. ایشسیزلیق، هنرسیزلیک، آجلیق. آمما کندین او باشی، ائله بیل بو کنددن دئییل دیر.
آیری ایش، آیری دیل، آیری آرزی، آیری یاشام و آیری دونیا.کنده فیکیرله شن یوخودو، او باشدا جیبلرین دولدورماغا و بو باشدا قارنین دویدورماغا مشغولدولار.
آمماائله بیل مردوم جاهیلیدی. آمما دئییردیلر چوخ بیلیرییک و داها بیلمک ایسته میریک.
ائله بیل مردوم وارلییدی. آمما دئییردیلر یوخسولوق.ائله بیل مردوم یوخسولودور. آمما دئییردیلر توخوق اوتانجدان.
ایندی بیزیم عصیرده تاسف کی هر کس اوزو اوچون چالیشمادادی.یوخ بو خوشبخت چیلییین یولو دگیل.بیز عینی حالدا اوز وطنداشلاریمیزا مسئولیتیمیز وار.اوشاقلاریمیزا حیاتین دوز یولون اویره تمک ان بویوک وظیفه میزدیر.
انشاالله یاخشی تربیت‌لر ایله اوشاقلار دا بویوک‌لرده هرنه‌یین قدرینی زامانیندا بیلیب نئجه خوشبخت اولدوقلارینی باشا دوشوب حیات‌دان لذت آپاریب سون منزل‌لرینه ده خوشبخت‌چیلیک له کوچسونلر.
نوشته شده توسط admin در دوشنبه, ۰۷ اردیبهشت ۱۳۹۴ ساعت ۴:۴۰ ق.ظ
