خان ننه م…

حاضیرلایان:اکبرسعادت
آنادیلیمیز:من بیر فینجان چای ایچنجن آنام ساموواریمیزین ایچینده بیشیردیگی ایکی یومورتانی سویوب سلیقه ایله لاواشا بوکدو، آخشامکی سؤزلرینی بیر ده تکرار ائله دی، اوسته لیک تزه تاپشیریقلار دا وئردی:
- اوتانیب ائلمه آجان کیمی گئت اوتور باغلارین بیرینده، چؤرگینی یه. دسمالی ائله آچ کی، دوز تؤکولمه سین. دوزو کاغیذا بوکموشم، یومورتانی دوزسوز یئمه، گلنده ماشینلا گل. آغاج آلتیندان کئچنده باشینی اَی آشاغی. بیلسم کی، بازارین سویوندان ایچمیسن، ائوه گلمه. سوسوزلاسان، گئت چایچی دوکانینا چای ایچ. بیر ده او چایی هئچ ایچمه سه ن یاخشیدیر. ایندی دویونجا ایچ (آنام قندداندا قندین قورتارماغینا باخمادان، فینجانی ایکینجی دفعه آغزیناجان دولدوردو)، گلنده ده چاییمیز حاضیر اولاجاق. اوتوروب آنا-بالا دویونجا ایچریک… *** «بو نه پول ایدی؟ بونو نه اوچون بیزه وئریردیلر؟ گاه آرتیردی، گاه آزالیردی، ایندی ایسه تامامیله کسیلدی… سنه قوربان اولوم، آی دده، سن هارداسان، آی دده؟» من بالاجا شهرین دار کوچه لری ایله هارا گئتدیگیمی بیلمه دن گئدیردیم، نه حاقدا دوشوندویومو بیلمه دن دوشونوردوم: «- فامیلییان ندیر، بالا؟ – سلیموو. – داها آتان سنه پول وئرمیه جک. – کیم؟ – دئییرم، بؤیوک کیشی اولموسان، پولو اؤزون قازانمالیسان. داها آتانلا آلیش-وئریشین قورتاردی». دوغرودانمی بو پوللاری منه آتام وئریردی؟ دوغرودانمی بیر واخت منیم ده آتام اولموشدو؟ – سنه قوربان اولوم، آی دده، سن هارداسان، آی دده؟ منه ائله گلیردی کی، آتام ائله بو گون، اونجا دقیقه اول اؤلموشدور. گؤزومون قاباغیندا اؤلموشدور: «داها آتان سنه پول وئرمیه جک». قیجی داییدا اورک یوخدومو؟ او نه اوچون بو سؤزلری بئله ساکیت دئدی. آخی، من قند، چای، ات آلمالییدیم. بیردن-بیره گؤزلریم یاشاردی، اورگیم دولدو. ننه مین توتون کیسه سی یادیما دوشدو. من نه اوچون ایندییجن او کیسه نی دولدورمامیشدیم؟ پولومو یوخ ایدی؟ ننه مین اؤلوموندن سونرا نه قدر پوللار گلیب گئتمیشدی. یوخ، ایش پولدا دئییلدی. من آتامین قاییدیب گله جگینه اینانمیردیم. گؤره سن، نییه اینانمیردیم؟.. آتامین یوخلوغو هر شئیدن بیلینیردی: آنامین ارسیزلیگیندن، منیم یئتیملیگیمدن، ننه مین توتون کیسه سیندن، دامیمیزین قاباغینداکی اوچوقدان… گؤرونور، آتام اولموشدو. او، وار ایدی. هر یئرده آتامین یئری گؤرونوردو. من هارا گئتدیگیمی بیلمه دن شهردن اوزاقلاشیب، کند یولونا چیخمیشدیم. ائوه می گئدیردیم؟ بس آناما نه جاواب وئره جکدیم. نئجه دئیه جکدیم کی، داها بیزه پول وئرمیرلر؟ بو پولون حسابینا بیز نئچه ایللر یاشامیشدیق… ائویمیزه چؤرک آلمیشدیق، ننه مه توتون آلمیشدیق… بو پول منیم آدیما یازیلمیشدی. اونو منه وئریردیلر. من ده بو پولا اؤزومه دفتر، قلم، کیتاب آلیردیم. من آتانین نه اولدوغونو بیلمه دن، اون ایل آتا پولو ایله اوخوموشدوم. … گئدیردیم، هارا گئتدیگیمی بیلمیردیم. بیردن دایاندیم. یوخودان آییلان آداملار کیمی گؤزلریمی اوووشدورا-اوووشدورا قارشیمداکی ایکی مرتبه لی بینایا باخدیم. «اجتیماعی تأمینات شؤعبه سی». آخی من نه اوچون تزه دن بورایا قاییتمیشدیم؟ قیجی دایی منی بوردا گؤرسیدی، نه دئیردی؟ قاچماق لازیم ایدی. من قاچیردیم… *** نه سالام وئردیم، نه ده پاپاغیمی چیخارتدیم. اوسته لیک، چؤرک یئمه گینه ده باخمادیم.
بیرباش اونون یانینا گیردیم. شعبه نین مودورو بونا گؤره اصلا اینجیمه دی. ساکیتجه منه یئر گؤستردی. – بویور، اوغول، اَیلش، – دئدی. – من ایشله مک ایسته ییرم. – عجب ائله ییرسن. مودور آیاغا دوروب الیمی سیخدی. – دئمه لی، سیزین منه گؤره ایش… – بیزیم شعبه ده »بایئووی« اوغلانلار اوچون همیشه ایش وار. من سئوینجیمدن دوروب قاچماق ایسته ییردیم. – هانسی کنددنسن بالا! – سؤیودلودنم. – کیمین اوغلوسان؟ – سلیمه نین. منیم بو سؤزومدن سونرا اولجه مودورون دوداغی قاچدی، سونرا یاواش-یاواش نه دوشوندوسه، برکدن گولمه یه باشلادی. – دئمه لی، سلیمه نین اوغلوسان، وای سنی!.. مودور پرت اولدوغومو گؤروب، تئز جیدیلشدی: – اینجیمه، اوغول، اونا گولورم، – دئدی، – یادیما بیر آیری شئی دوشدو. مودورون نییه گولدویونو من بیردن باشا دوشدوم. کیمین اوغلو اولدوغومو سوروشاندا من گرک آتامین آدینی دئییدیم. ائله بیل کی، مودورده منیم اورگیمدن کئچه نی بیلدی. – بالا، سوروشاندا کی، کیمین اوغلوسان، آتانین آدینی دئیرلر. – آخی، – دئدیم، – سیز منیم آتامی تانیمیرسینیز. آتام عسگر گئدیب… اؤلوب. – اؤلوب؟.. مودور گؤزلرینی منه زیلله دی. ائله بیل کی، منی ایندیجه گؤروردو. ائله بیل کی، منیمله ظارافات ائلمگینه پئشمان اولموشدو. من اؤزومو ایتیردیم. سونرا منه ائله گلدی کی، مودور نه ایسه سوروشماق ایسته ییر، آنجاق اورک ائله میر. بونا گؤره ده، وضعیتدن چیخماق اوچون لاپ برکدن: – نجفین اوغلویام! – دئدیم و مودورون اوزونه باخدیم. – هانسی نجفین؟ اولمایا بننا نجفین اوغلوسان؟ – بلی… بو سؤزدن سونرا مودورون صیفتی داها دا جیدیلشدی، پاپیروسونو یاندیریب، اوتاقدا گزینمه یه باشلادی. – من سنین آتانی یاخشی تانیییرام، بالا. عوضسیز آدام ایدی! من نه ائده جگیمی بیلمیردیم. دوروب گئدیممی؟ نئجه گئدیم؟ آنامین یانینا نه اوزله گئدیم؟ نهایت، وار گوجومو توپلاییب، بایاقدان منی دوشوندورن شئیی دئمک ایسته دیم: – سیزده قاباقجادان… دالیسینی دئیه بیلمه دیم. گؤرونور، مودور هئچ بو سؤزلری ده ائشیتمه میشدی.
من اونون فیکیرلی اولدوغوندان ایستیفاده ائله دیم: – شعبه ده ایشلمه میشدن یوز مانات آوانس آلماق اولارمی؟ ماعاش آلاندا چیخارلار، – دئدیم و قورخا-قورخا مودورون اوزونه باخدیم. او منیم سؤزلریمی ائشیتمه میشدی. نه یاخشی کی، ائشیتمه میشدی!.. – دئمه لی، نجفین اوغلوسان؟ – هه. – بو شعبه نی سنین آتان تیکیب، اوغول!.. او، میزین اوستونده کی قلمی گؤتوروب یئنه ده یئرینه توللادی. – گئتمک اولارمی؟ – دئدیم. – صاباح گلیممی؟ مودور فیکیرلی-فیکیرلی: – هه، اولار، گئت، – دئدی. گئتمک ایستمه دن یاواش-یاواش قاپییا طرف آددیملادیم. منه ائله گلیردی کی، بو ساعات مودور منی گئری چاغیراجاق. بئله ده اولدو. من قاپییا چاتمامیش دالیمجا سسلندی: – هارا گئدیرسن؟ دئیه سن، بیر آیری سؤزون ده واردی… گرک کی، پول ایسته ییردین… بیردن-بیره جسارتلندیم. – هه، آوانس ایسته ییرم، – دئدیم. – یوز مانات اولسا بسدیر. ائویمیزه شئی-شوی آلمالییام. ائله بیلیردیم کی، مودور مونشی نی چاغیراجاق، عریضه یازیلاجاق. من بو یوز ماناتی آلینجا یوز یئره قاچمالی اولاجام. آنجاق بئله اولمادی. مودورون جیبیندن یوز مانات پول چیخاریب وئرمگی ایله منیم بازارا قاچماغیم بیر اولدو. مودورون او بیری سؤزلرینی من شعبه نین حَیَطینده ائشیتدیم. – سککیزده بوردا اول! کریمین شاگیردی اولاجاقسان. سککیز یوز مانات پول آلاجاقسان. یاریم ساعاتین ایچینده یوز ماناتین هامیسینی خرجله دیم. سونرا ائوه قاییدیردیم. سئوینجیمدن نه ائده جگیمی بیلمیردیم. قاچیردیم، توللانیردیم، فیشتیریق چالیردیم… شعبه نین یانیندان کئچنده، ایستر-ایسته مز دایاندیم: بو هوندور، بو بؤیوک بینانی دوغرودانمی منیم آتام تیکمیشدی؟ بینایا باخا-باخا ائله بیل بیرینجی دفعه آتامی گؤردوم. کؤورلدیم. سونرا خلوتجه کندین یولوندا سئوینجیمدن هؤنکور-هؤنکور آغلادیم… عؤمرومده بیرینجی دفعه ایدی کی، من آتام اوچون آغلاییردیم.
کندیمیزین قبیریستانلیغینا چاتاندا آرتیق قاش قارالمیشدی. ناخیر گلمیشدی. اینکلر، بوزوولار ملشیردی. عؤمرومده ایلک دفعه قبیریستانلیغی قورخمادان کئچدیم، ننه مین باشداشی نین اوستونه بیر خط ده چکدیم: «ننه، – دئدیم، – ایشه گیرمیشم. ائشیدیرسنمی، ننه، ایشه گیرمیشم…» بو ساعات ائوه چاتاجاقدیم. قاپینی آچیب کیشی کیمی ایچری گیره جکدیم. اتی صاندیغین اوستونه قویاجاقدیم. آنام باخیب گؤره جکدی کی، بیر کیلو دئییل، چوخدور. او، اولجه حیرصلنه جکدی. سونرا من هر شئیی دانیشاجاقدیم. آنام سئوینه جکدی. آنجاق بئله اولمادی.
من کوچه میزه چاتان کیمی آنامی یولون باشیندا گؤردوم. او دایانیب منی گؤزله ییردی. – ایندییجن هاردا قالمیشدین، – دئدی. توربانی الیمدن آلدی… … سونرا بیز ائویمیزده ایدیک. چیراغیمیز یانیردی. ساموواریمیز قاینامیشدی. آنام هر ایکیمیزه چای تؤکدو. من آنامین توربانی نه واخت آچاجاغینی گؤزله ییردیم.
ایندیجه آنام حئیرتلنه جکدی. »اتی نییه چوخ آلمیسان؟« – دئیه جکدی. – ائوین ییخیلسین، بالا، بو ندیر؟.. بو نه توتوندور؟.. من هؤولناک گئری دؤنوب، توربایا باخدیم. قند توتونه، توتون لوبیایا، لوبیا اته قاریشمیشدی. خجالتیمدن نه ائده جگیمی بیلمه دیم. بوتون سئوینجیم بیر آنداجا آلت-اوست اولدو. آنام گؤزلرینی هله ده منیم اوزومه زیلله میشدی. – بو نه توتوندور، بالا؟ بونو سنه کیم وئریبدیر؟ من دینمه دیم. آنام دا دینمه دی. ائویمیزده تام ساکیتلیک ایدی. اوزاقدا کیمسه، نسه اوخویوردو. آی پنجره میزدن ایچری دوشموشدو. آنام منه باخیردی، من تاخچامیزداکی توتون کیسه سینه

نوشته شده توسط admin در دوشنبه, ۱۹ آبان ۱۳۹۳ ساعت ۷:۴۱ ق.ظ

• ۰ نظر
• 1272 بازدید
•    تویت
•  چاپ