حضرت نوحون داستانی

علیرضا ذیحق
“آدم”اؤلدوک دن اون گون سونرا، نوح دونیایا گؤز آچدی و ۸۵۰ یاشی وار ایدی کی ادریس نبی دن سورا پیغمبرلی یه مبعوث اولوب اینسانلاری عدالته، صاف لیغا، صداقته، دوزگون لویه و گؤرونمز بیرجه تانری نین وارلیغینا اوره ک دن ایمان گتیرمه یه دعوت ائتدی.
نوح ” ون چاغیریشی، گوناهلار باتاقیندا لذت لی عؤمور سوره ن کافیر خلقه آغیر و چتین گله رک او قَدَر او حضرتی دؤیوب وورولار کی دفعه لرجه هوسدان گئدیب قولاقلاریندان قان آچیلدی. بو اوزدن نوح اؤز سویونو و طایفاسینی قارقی یاراق قیرخ ایله جان آرواد ـ‌کیشی لر عقیم اولوب تکجه بیر ائولاد دا او ائل ده دوغولمور. آنجاق یئنه او خلق، عیبرت آلماییب آز بیر عده دن باشقا کیمسه اونا و اونون رسالتی نه اینانماییر.
نوح سانکی دوشونجه لی اینسانلارلا یوخ بلکه داش قافالی جانلی لارلا قارشی قارشی یا ایدی که هَوَس و شهوت اونلارین گؤزونو کور ائدیب تانری نین معجزه لرله دولو یارانیشینی گؤرموردولر.
“‌نوح ” کی هر گون اونون یارالی قامتینه خلق ألی ایله یئنی بیر یارا وورولوردی بیر گون جانا گلیب أللرینی گؤیه قالدیراراق تکجه آللاهی یادا سالیب چوخ دهشتلی بیر قارقیش ائده رکن تانری دان اینسانلارین بوغولماغین و یئر اوزوندن کؤک لری نین کسیلمه سین ایسته دی.
بو آن تانری نین ۱۲ مین ملاکه سی هامیسی بیردن دیله گلیب بو قرار دان و از گئچمه سین ایسته دیلر و نوح ملک لره دئدی:
” اونلارا ۳۰۰ ایل داها ما جال وئریرم کی بلکه دوز یولا قاییدیب چیرکین و اوتانج وئره ن عمل لردن ، رذالت دن و “زنا”دن چکینه لر.”
” نوح ” ون وئردی یی وعده سی سونا چاتدی آمما اونون ائلی اوباسی، دوغرویولو سئچمه دن یئنه سوچ ایشله دیر. “نوح”ون صبری کسیله رک بیرگون تانری نین درگاهینا دوعا ائتدی و آللاهدان ایسته یی بئله اولدو:
“‌بو جماعت کی من گؤروره م هئچ واخت دوز یولو سئچمه ییب یئنه ده مظلوم لارین آهی اوجادی. گرک دیرکی کؤنول لرینده آللاه سئوگی سی اولمایان بوتون بنده لره تاریخ بویو عیبرت اولسون دئیه اونلارا بؤیوک بیر درس وئره ن سن!”
اولو تانری نوحا وحی ائده رک اوننان عظمت لی و چئشیدلی اؤزل لیک لر داشی یان بیر گمی نین دوزه تمه سینی ایسته دی. نوح که باشاریلی بیر نجار ایدی ۲۰۰ تامام بو گمی اوزه رینده اصحاب لاری نان بیر لیک ده چالیشاراق، او گمی اؤز اوجالیقی، بؤیوک لویو، و انی بویو ایله عقله سیغمایان حشمت لی بیر گمی اولدو. او اؤلکه ده هامی نوحو دلی دیوانه بیلیب قورولوق دا و دنیزدن چوخ اوزاق لیق دا بئله نکی بیر گمی نی ایزله یه رک حئیران لیقا جوموب گولمه یه باشلیردیلار.
تانری نین بیلیک لی و چوخ سایقیلی ملاکه سی جبرئیل، بیر گون نوحا گمی حاققیندا گؤستریش لر وئره رکن دئدی:
“سنین دوعا لارین کی قارقیش لارلا دولو ایدی آللاه درگاهیندا مستجاب اولوب تئزلیک له تانری نین قهری و غضبی یئر اوزونو اؤزکامینا آلاجاق.”
گونلر اؤتدوک ده بیر گون آللاه تعالادان نوحا وحی اولوندی کی دونیاده هر نه جانلی واردیر اونلاردان بیر اَرکک و بیر دیشی بورایا ساری گله رک، اونلاری عزیز بیر قوناق کیمی قارشیلاییب گمی ده یئر وئره رسن .
هئچ جانلی نین او بیری جانلی یا ضرری کئچمه یه جک و ییرتیجی حئیوانلاردا قوزو کیمی اوت ایله و سوت ایله بسله نه جک لر.
نوحون خانیمی ” عموره ” و ائولادلاری سام، حام و یافث و هابئله نوحون قیز گلین لری بیر پارا ایمانلی اصحاب لارلا بیر لیک ده نوحون یاردیمی له بوتون گمی یه ساری گلن جانلی لاری قارشیلایاراق اونلارا گمی ده مناسیب یئرلر حاضیرلاییرلار.
گون اوگون اولدوکی موعود واختی چاتدی و »عموره« چؤره‌ک یاپاراق تندیردن سو فیشقیرارکن نوحی سسله دی و نوح، تئزلیک له خانیمینی، ائولادلارینی و اصحابینی باشیناییغاراق گئدیب گمی ده اوتوروب دؤزمه یه باشلادی.
بو آن دا گونش توتولدو وگوندوز اولاراق یئر اوزونو قارانلیق بوغدو و بولوت لار شاخاراق ایلدیریم لار گورولدادی.
دایانمادان قیرخ گون گور یاغیش یاغیب یئرده هرنه بولاق، چای و دنیز وارسادا دالغالانیب جوشاگلدی. بوتون یئر اوزونده کی وارلیق لار جانلارینی ألدن وئره رک نوحون گمی سی داغلاری آشان سئل و توفان لارا دایاناراق، یئر اوزو بیر دنیزه چئوریلدی کی او دنیزین یوکسک لی یی بولاتلارا چاتدی و گمی ده بولاتلار ایچینده گؤرونمز اولدو.گمی نی توفانلی دالغالار سو اوزون ده اؤز جایناغیینا آلارکن، قیر خینجی گون سونا چاتاراق آللاه تعالانین اَمری نن تورپاق لار سولاردان بیر قیسمینی اؤز جایناغینا چکمک له یاشاییش ایچون یئنی دن قورو تورپاقلار ووجودا گلدی. بئله لیک نوحون گمی سی نوروز بایرامیندا دوز باهارین باشلانیشی لا “‌موصل” ده کی “جودی” داغی نین باشیندا لنگر سالدی.
نوح و اونون عائیله سی ایله اصحابی کی هامیسی ۸۰ نفر ایدیلر گمی دن چیخیب گونشی و تورپاقی گؤره رک بوتون حئیوانلاری و قوشلاری دا گمی دن چیخارتدیلار کی هره اؤز جیفتی نن تورپاقا آیاق باسیب یئنی یاشام لاری ایچون چئشیدلی یول لارا دوشدولر. نوح و اصحابی او منطقه ده ” نمانین ” آدلی بیر شهرین تملین قویوب مدنیت و حیات، یئنی دن یئر اوزونده او شَهَردن باشلاندی.
آمما ایبلیس، شیطانلیغا دوام ائدیب نوحون گؤزونه گؤروشه رک دئدی:
” سن فیکر ائتمه کی دا بوننان سونرا یئر اوزونده هئچ بیر سوچ و جینایت ایش لن مه یه جک و خلق ائله هامیسی تانری نین سایقی لی بنده لری اولاجاق لار. حسد، طاماح، غضب، قضاوت و هَوَس بیر توزاق لاردیلارکی من اونلارینان یئنه اینسانلاری یول دان چیخارداجاغام.”
نوح بو آن دا ” لا اله الا لله ” نیداسینی دیله گتیره رک ایبلیسین جانینا لرزه دوشوب قورخونج واهیمه لر ایچره قویوب قاچدی.
نوح حضرت لری ۲۵۰۰ ایل عؤمور سوره رک ۹۵۰ ایل پیغمبر لیک دن سونرا، تانری نین سیفاریشی له بوتون ایلاهی بیلیک لرینی اوغلو ” سام ” اوچون ودیعه قویوب گله جک ده »هود« آدلی بیر پیغمبرین گلدی یینی خلقه موژده وئردی.
نوح بیرجه تانری یا ایللر بویو عیبادت ائدیب خلقی عشقه، محبته، عدالته و معنوی اینانج لارا دعوت ائده رک بیر گون گونش لن دیقی حالدا اؤلوم مله یی عزرائیل له گؤروشدوک ده آنلادی کی اؤلوم واختی چاتیب دیر. عزرائیل دن بیرجه آن مؤهلت ایسته دی کی بیر آددیم آتاراق کؤلگه یه ساری گئدیب روحونو تسلیم ائده. آللاهین ایذنی له اؤلوم مله یی بیر آنلیق اونا فورصت وئره رکن نوح دان سوروشور :”بو اوزون عؤمرون نئجه گئچدی؟” نوح ایسه جواب دا: “گونش دن کولگه یه آددیم آتماق دان قیسا ؟” دئیه‌رک جان وئردی.