- آراز آذربایجان – روزنامه خبری آذربایجان غربی - http://www.araznews.ir -

تووبه ائدن تولکونون ناغیلی

Posted By admin On اردیبهشت ۲۱, ۱۳۹۴ @ ۵:۰۴ ق.ظ In آنادیلیمیز | No Comments

آنا دیلیمیز: بیر گون بیر تولکی اوقَدَر قوجالمش ایدی کی اؤزونه هئچ نه یئمک چون تاپا بیلمیردی و شیکارا قووه سی قالمامش دی! ناچار قالیب شهره گئتمک عزمیله اولدوقو یئریندن چیخدی. ائله کی شهره یئتیشدی، بیردن جماعت های سادیلار کی: تولکی!… تولکی!…
اونی قووالاماقا باشلادیلار! تولکی جانین گوتوروب، قاچماقا باشلادی! چوخ چتین لیک له آدملارین الیندن جان قوتاریب، داملارین بیرینه چیخدی، بودامدان او داما… بیر یئرده فرش ایپی رنگلییه نین توکانینین باجاسیندان دوم بلم دوز دوشدو تییانین ایچینه کی دولی ایدی داغ رنگلی سو ایله!
چوخ اللشندن صونرا آنجاق تییاندان چیخیب همن باجادان اوزون ائشیگه سالدی!
تامام بدنی رنگ توتموش ایدی! شهره گلمک دن پئشمان اولوب کندین یولون توتوب تازادان، اولدوقو یئره قایتدی!
بیر خوروز ائولرین بیرینین دووارینین اوستونده دوروب باخیردی گوردی تولکی قارداش ساللانا ساللانا گلیر، آما نه گلیر! بدنی باشدان باشا الوان! تولکی یاخیلاش جک، خروس سسلندی: تولکی بو نه ایشدی!… نه فیکیر وار باشیندا؟!
تولکی دئدی: من دونن گئجه بیر آز ناماز قیلیب اؤز گوردوگوم ایشلردن توبه ائتدیم!… اؤز اؤزومه فیکیرلشدیم گوردوم من قاباقلاردا نه پیس ایشلر صاحبی ایدیم! من خالقین خورز- تویوقون توتاردیم باشلارین اؤزردیم! من داها توبه ائتدیم! داها گوردوگوم پیس ایشلره قایتمییه جاغام!
من دوز تووبه ائدن دن صونرا آلله طرفیندن بو رنگلی گئییم منه وئریلدی، ایندی ده گئدیرم آللهین بیتینین زیارتینه، بیر دفه پاکلانیب قایدام!تولکونون سوزلری خوروزدا ائله اثر ائتدی کی بیر آز فیکیره گئدندن سونرا دئدی: والله تولکی قارداش، من ده دالا باخاندا اوز ایشلریمدن اوتانیرام!… من خالقین تویوقلارینا چوخ کژ باخمیشام، چوخ جوجه لرین باشینا چالیب، قاباقلاریندان دنه لرین قاپمیشام!… یئرده اولان سوخولجانلارین جانلارین آلمیشام و اؤزومه روزی قرار وئرمیشم!…
تولکی فرصتی غنیمت ساییب، خوروزا دئدی: هر حاللی، من عزمیمی جزم ائتمیشم کی آللهین بیتینه گئدیب، دوز بیر تووبه ایله قایدام، سن ده اگر ماییل اولسان، بیسم الله!
خروز دا تولکی ایله یولداش اولوب، دالیجا دوشدی! یولدا یئتیشدیلر بیر یئره کی سودا بیر نئچه اوردک اؤزمگه مشغول ایدلر! خوروز ایله تولکونو بیرلیک ده گورنده، اوردکلرین بیری دئدی: هه… تولکی گئنه نه فیکیر باشیندا وار؟! نه دن اؤزونو بزمیش سن؟! نه فیلیر خیال باشیندا وار؟اوندا قاباق خوروز جواب وئردی، اوردکه دئدی: بو داها سیز گوردوگونوز تولکو دگیل؟… دوز توبه ائدیب داها تویوخ – خوروزلارین باشلارین اؤزمه سین!… اینیدی ده گئدیریک آللهین بیتینین زیارتینه! ایستریر سینیز سیز ده گلیین!
اوردکلر ده توولانیب، تولکو ایله خوروزون دالیجا دوشدولر!
بیر روایته گؤره، یولدا ککلیکلره یئتیشدیلر و اونلاریله دانشدیلار و ایسته دیلر کی اونلاری دا اوزلرینه قوشوب مککییه گئتسینلر، آمما ککلیکلر گول یئمه ییب، گولوب گوگه قالخدیلار، آما بیر بوببو گول یئییب، اونلارا قوشولدو!
القصه! ها بوردا ها اوردا، آخشام الوردو! بو موقعده بیر ماغارایا یئتیشدیلر! تولکی دئدی: گئجه یئتیشیر! من بئله مصلحت گوروره م کی گیرک بو ماغارادا گئجه نی سوواق صاباح هاوا ایشقلاناندا، یولا دوشک!خوروز، اوردک و بوببی توبه کار تولکونون سوزونه باخیب، ماغارایا گیردیلر!ائله کی بیر آز گئچدی، تولکو نون قارنینین قاررا قورر و چوخالدی، گوردی داها دوزه بیلمز کی بوندان آرتیق قارنی بوش قالسین! یوزون چئویریب خوروزا دئدی: خوروز!جاواب وئردی: نه دی جناب تولکو؟!دئدی: سن نه چون منه توهین ائتدین، اوندا کی منی بو رنگلی قبا ده گوردون؟! دئدین: نه حوققا ماشا بزمیسن؟!
خوروز دئدی: من بیلمیردیم کی سن تووبه ائدیبسن! آمما بیلندن سونرا داها سنه نعوذ بالله اهانت ائتمه میشم!
تولکی دئدی: هر حاللی سنین گوناهین چوخدور گرک من سنی یییه م!
خوروز دئدی: آخی منیم گوناهیم نه دیر!… آلله دان قورخ!
تولکی دئدی: سنین گوناهین نه دیر؟! سن کؤپک اوغلو گئجه یاری سی بانلییب، خالقی یوخودان ائدیرسن بیر! خالقین ناموسونا کژ باهیرسان ایکی! جوجه لرین باشینا دگوب، دیمدیک لریندن دنه نی آلیرسان اوچ! یازیق سوخولجانلارین جانین آلیرسان دؤرد… گئنه گوناهلارینی ساییم!
بیردن یوگوروب، خوروزون باشین بدنیندن آییردی! صونررا یوزون چئوریب اوردکه دئدی: آمما سن!… سنین گوناهین خوروزدان آز دگیل!… سن سویو لیللندیریردین، قویموردون خالق دورو سو ایچسین! سن دئ گوروم هئچ سهراب سپهرینین «آب را گل نکنید» شعرین اوخومامیشدین؟!نیشخند اوردکین ده بوینون اؤزوب آتدی بیر طرفه! نوبه بوببی یه یئتدی! بوببونی دانلییب دئدی: سن بیر کوپک اوغلوسان کی تایین یوخدور! بوببی دئدی: آخی نییه؟!…
تولکی دئدی: کس سسینی!… هئله دانشیردا! اوندا کی حضرت سلیمان سوسوزلوقوندان یانیردی، سن گئتمیش دین سبا اؤلکسینده بیلقیس ایله خوش گوذرانلیق ائدیردین! سنه من نئجه رحم ائدیم!یوگوروب، اونودا توتدی ایسته دی کی اؤلدور سون، آمما بوبی دئدی: من حضرت سلیمانین یاپ یاخین اولان قوشلاریندان ایدیم، حضرت سلیمان باشیمدا اولان تاجی اؤز الیله باشیما قویوب! اینانمیرسان، منه مهلت وئر گئدیم نئچه تویوخ خوروز گتیریم منیم دئدیکلریمی حاخلاسینلار!
تولکی اؤز اؤزونه دئدی: یاخشی دیر من بوببونی بوشلیییم گئتسین بیر نئچه تویوخ – خوروز گتیرسین، اونلاری دا گیره سالیم!
بوببونی بوشلادی، بوبی اوچوب، چؤله چیخدی. گوردی نئچه سواره الرینده فانوس گلیر لر! اؤزون اونلارا یئتیردی، دئدی: نه آختاریر سینیز؟
سواره لر دئدیلر: شاهین قیزی ناخوش اولوب، طبیب لر دئییب لر کی بو قیز یاخشی اولماقدان خاطیره گرک بیر دووشانین بئینین، بیر ده تولکونون جییه رین یئسین! دووشان بئینی اله گتیرمیشیک، آمما هئله تولکی تاپا بیلمه میشیک!
بوببی دئدی: گلین کی سیزین ایسته دیگینیز منیم یانیمدا دیر!
اونلاری دلیجا سالیب، ماغارایا گتیردی! بوببی سوار لاردان قاباق ماغارایا گیریب تولکییه دئدی: سن منه یاخشی لیق ائدیب منی بوشلادین، من ده سنه ایستیرم بیر یاخشلیق ائدیم! نئچه نفر گلیب تولکو جییه ری آختاریر لار!
تولکو بونو ائشیدنده ایسته دی کی قاچسین، آمما شاهین اوغلو بیر اوخ قویوب کامانا تولکونون بؤیرونه چالدی!
بئله لیک له حیله کار تولکونون عومرو آخیره چاتدی، تا بیلینسین کی دونیادا هر کیم حیله حوققا ائتسه اوزونه قایدار و قویونو هر کیم هر نقدر دَرین قازسا اؤزونو ترکین ده گورر!


Article printed from آراز آذربایجان – روزنامه خبری آذربایجان غربی: http://www.araznews.ir

URL to article: http://www.araznews.ir/%d8%aa%d9%88%d9%88%d8%a8%d9%87-%d8%a7%d8%a6%d8%af%d9%86-%d8%aa%d9%88%d9%84%da%a9%d9%88%d9%86%d9%88%d9%86-%d9%86%d8%a7%d8%ba%d9%8a%d9%84%d9%8a/

Copyright © 2013 آراز آذربایجان - روزنامه خبری آذربایجان غربی. All rights reserved.