تانینمیش شاعر حاجی زکی اسلام

تانینمیش شاعر حاجی زکی اسلام

اکبر حمیدی علیار
زکی اسلام اوغلو یوسف¬اوف، ۱۹۳۹-نجو ایل آذربایجانین قدیم بؤلگه¬لریندن اولان گؤیچه ماحالیندا جیل کندینده، ضیالی عائیله-سینده آنادان اولموشدور. آتاسی اسلام معلم، اونون دوغولدوغوندان آز سونرا قاییتمایاجاغی ایکینجی دونیا محاربه¬سینه گئتدی.
آتا حسرتی ایله یازیلان طالع اونون دوشونجه و حیاتیندا، سونرالارسا یارادیجیلیغیندا سیلینمز ایز بوراخدی. زکی اسلام ۱۹۵۷-نجی ایلده باسارکئچر رایونونون شیش¬قایا کندینده اورتا مکتبینی بیتیردی.
۱۹۷۳-نجو ایلده گنجه دولت پئداقوژی انستیتونو، ۱۹۷۹-نجو گنجه کند تصرفاتی انستیتونو بیتیردی. او اوزون مدت مختلف وظیفه¬لرده و رهبر ایشلرده چالیشمیش¬دیر.
اونون گؤردویو ماراقلی و آلقیشا لایق ایشلردن بیری شورالار حکومتی زامانیندا، گیزلیجه اسلام تقویمینی چاپ ائدیب یاییملاماسی ایدی. او ایندی¬لیکده ده هر ایل ۲۰۰۰ نوسخه اسلام تقویمی، اؤز شخصی حسابینا چاپ ائدیر، پایلاییر. زکی اسلام ۱۹۸۸-نجی ایلدن باکی شهرینه کؤچموشدور.
اونون نه تکجه مغنی¬لر و عاشیقلار طرفیندن بلکه دین¬خادملری طرفیندن ده عینی درجه¬ده قارشیلانان شعرلری ، هله کتابلاری چاپ ائدیلمه¬میشدن دیللر ازبری اولموشدور.
زکی اسلامی سئودیرن عمده کیفیتلردن بیری اونون پوئزیاسی¬نین معنویته بله¬نمه¬سی¬دیر.
اونو اسلام شاعر آدلاندیرساق بئله یانیلمامیشیق. دین اوزه¬رینده هله ساوئت قاداغاسی موجود اولدوغو ایللرده بئله یازمیشدیر:
من عاغلیم کسندن، گؤزوم گؤرندن
الله و محمد، علی دئمیشم
اون¬ایکی اماما، حضرت عباسا
اوز توتوب خدایا “بلی” دئمیشم.
اونون “اسلام” تخلصونو ائشیدن هر بیر کیمسه طبیعی کی بو تخلصون اسلام دینی ایله باغلی اولدوغونو دوشونور، حتی اونون آتاسی اسلام کیشینی تانییانلار بیله بیرآنلیق آتاسی¬نین اسلام اولدوغونو اونودورلار.
او اسلام دونیاسی¬نین بوتون مقدس شهرلرینه سفر ائدیب زیارتگاهلاری زیارت ائتمیش اصیل معنادا بیر مؤمن کیمی یاشاییر.
اونون شعرلرینی اوخودوقدا بو شعاری اوزه چیخیر: آللها عبادت، وطنه محبت، آتا-آنایا حؤرمت!
او بیر انسان¬سئور، وطن¬پرور شاعردیر، تانری سئوگیسی باشدا اولماقلا بوتون سئوگی¬لر اونون شعرینده دالغالانیر. صمیمی¬لیک، ساده¬لیک و درین اینانج تفکرو زکی اسلامین بوتون اثرلرینی احاطه ائدیر.
حاجی زکی اسلامین بوگونه قده¬ر چوخلو کتابلاری ایشیق اوزو گؤروب او جمله¬دن:
“گؤیچه نین تونقالی سینه مده”،
۱۹۹۵
“الیم تانری اته¬یینده” ،۱۹۹۵
“زیارتگاهلاریم منیم”،۱۹۹۶، باکو و ۱۹۹۷،ایران “دونیا نورا بله¬ندی”،۱۹۹۸
“مکتوبلار-جاوابلار، یئنی شعرلر” ،۲۰۰۱
“سئچیلمیش اثرلر”، ۲۰۰۵
“قتل مرهب، فتح خیبر علی¬دی” و …
کتابلاری حاقدا اؤنملی بو کی زکی اسلام – کتابلاریمدان، بیرینی ده اولسون، ساتمامیشام، هامیسینی الله یولوندا امام احسانی کیمی پایلامیشام- یازیر!
محمد (ص)
یئددی قات گؤیلرده حاق ملاکه¬لر
حیران قالدی کمالینا ، محمد.
آی خجالت چکدی، گونش باش اه¬یدی
بارک الله جمالینا، محمد.
سن نوردان یاراندین، دونیا گردشی
دوز وئریب قیمتین یارادان کیشی
آدمین گوناهی، نوحون سهو ایشی
باغیشلاندی هر حالینا، محمد.
نبی¬لر نبی¬سی، عالمین سرّی
گونو گون اورتادان قایتاران گئری
الله¬ین ساغ الی، معراجین شیری
جواب وئردی سؤالینا، محمد.
اؤزون یوخسان، ساییلیرسان مقدس
قوربان اوچون من حاضیرام، آپار کس
جان شیریندی، ائیله¬مرم بیرجه سس
قبول اولسا آمالینا، محمد.
قدرتیندن قدرتینه یاراندیم
آلله- و محمد، علینی آندیم
بختیم دئدی، زکی اسلام، اویاندیم
شوکور اولسون جلالینا، محمد.
بیزیمکی¬دی
آ قاچقین، دیدرگین قارداشیم، باجیم
او چمن، او چیچک، گول بیزیمکی¬دی.
او داغلار، دره¬لر، یاشیل مئشه¬لر
او لوقمان بولاقلار، چؤل بیزیمکی¬دی.
دیواری نم، انسانی غم چورودر
بئله گئتسک بیزی بو درد اریدر
قیزیل¬قوش اووونو اوباشدان گودر
گودمه¬لی¬ییک، گودک گل، بیزیمکی¬دی.
اورکدن بیر اولاق، کین¬سیز بیرله¬شک
غیرته ال آتاق، دیدک-دیدیشک
آتا-بابا یوردوموزدا اه¬یله¬شک
وئدی، اولوخانلی، ائل بیزیمکی¬دی.
بسدی دؤزوموموز، بسدی صبریمیز
یوخدو قبرستانلار، یوخدو قبریمیز
قاراباغ، زنگه¬زور، دره¬لزیمیز
گؤیچه بیزیمکی¬دی، گؤل بیزیمکی¬دی.
غربی آذربایجان، بورچالی هریان
منیم بابامیندی همده داغیستان
زکی اسلام، کیم ال چکر تورپاقدان
کولونگ بیزیمکی¬دی، بئل بیزیمکی¬دی.
قایناقلار:
زکی اسلام سئچیلمیش اثرلری، ۲۰۰۵، باکی
مکتوبلار-جاوابلار، یئنی شعرلر، ۲۰۰۱، باکی
شاعرله دانیشیق،۲۰۰۹، باکی (دانیشیق آپاران: ا.ح.علیار)

نوشته شده توسط admin در شنبه, ۱۹ بهمن ۱۳۹۲ ساعت ۹:۴۷ ق.ظ

دیدگاه


4 − = هیچ