تار
اکبرسعادت
آنا دیلیمیز: شهره گلدیگیم هئچ ایکی ایل ده دئییل. شوکور آللاها، اؤزومه گؤره قازانمیشام. بالاجا دوکانیم دا وار. بیر قدر ده پول توپلامیشام. آللاه قویسا، بو گون ـ صاباح ائو ده آلارام.
آتام دئییردی کی، شهرده یاشاماق، ایشلهمک چتیندی. اورا بیزیم کند دئییل. باکیدا هر جور آدام وار. همیشه آییق ـ ساییق اول. واللاه، باکی بیزیم کنددن ده ساکیت یئر ایمیش. هئچ بیزیم کنددهکی، دلهدوزلر بورادا یوخدو.
ـ قارداش اوغلو، اولار، بو تاری بیر ـ ایکی ساعاتلیغا یانینا قویوم؟ ـ اللی ـ اللی بئش یاشیندا اوزوندن مئهریبانلیق یاغان بیر کیشی گولالدینی شیرین خیالدان آییردی ـ خستهخانایا گئدیرم قارداشیم آغیر خستهلهنیب. اونا باش چکیب گلیرم.
ـ نییه اولمور، عمی، آرخایین اولون. وئرین منه قویوم گؤز قاباغینا. نه واخت گلسهنیز، گؤتوره بیلرسینیز.گولالدین تاری آلیب پیشتاختانین آرخاسینداکی ماسانین اوستونه قویدو.
گولالدینین دوکانی شهرین مرکزینده یئرلشدیگیندن تئز ـ تئز بورا اجنبیلر ده گلیرلر. بو گون دوکانا بیر آذربایجانلییلا گؤرکمیندن اینگیلیسلی یه اوخشایان بیر نفر شخصین گیرمهسی ده اونو تعجوبلندیرمهدی. اینگیلیسلی حئیرانلیقلا تاری گؤستریب نهسه دئدی:
ترجومهچی:ـ جناب کارل تارلا ماراقلانیر. مشهور بیزنئسمندی. دونیانین هر یئرینده ایری موسسیسهلری وار. بیزیم موسیقینین وورغونودور.گولالدین:ـ بویورون، باخین دئیهرک تاری اینگیلیسه اوزاتدی.
اینگیلیسلی تاری الینه آلیب او اوزه، بو اوزه چئویردی. سیملرینی دینقیلداتدی، پردهلرینه ال گزدیردی، آشیقلارینا بارماغی ایله توخونوب اؤز دیلینده نهسه دئدی:
ـ جناب کارل تاری آلماق ایستهییر ترجومهچی اوزونو گولالدینه چئویردی.
گولالدین:ـ تار ساتلیق دئییل، امانتدیر.
صاحیبی ایندی گلیب آپاراجاق.
ترجومهچی تارین امانت اولدوغونو اینگیلیسلی یه باشا سالدی. اینگیلیسلی نهسه دئدی و ترجومهچی اجنبینین تارا ایکی یوز دوللار وئرمک ایستهدیگینی سؤیلهدی.
ـ دئدیم، ساتا بیلمهرم، امانتدیر. بلکه، بئش یوز دوللار؟ ـ اینگیلیسلی ترجومهچی واسیطهسیله ساتیجی ایله دییالوگو داوام ائتدی.ـ تاری قایتارین منه، ساتمیرام، والسلام!
ـ مین دوللار وئریرم.ـ ساتمایاجاغام.ـ ایکی مین دوللار.
ترجومهچی آز قالا یالواراراق:ـ ائلاوغلو گؤرورم یاخشی اوغلانسان. جناب کارل دا سنین اعتیبارینا حئیران قالیب. شهرده چوخلو تار گؤرسه ده قلبینه بو تار یاتیب. لاپ سنه دؤرد مین دوللار دا وئرر. تاری سات بیزه. آل بو مین دولاری بئی کیمی، اوچ مین دوللاری دا گونون آخیرینا کیمی گتیرهجگم.
او، الیندهکی اوچ دنه یوزلوک دوللاری گولالدینین اووجونا باسدی. خئییرلی اولسون.موشتریلر دوکاندان چیخسالاردا گولالدین یئرینده دونوب قالمیشدی. او، نهیه گؤره راضیلیق وئردی؟ بیردن نه ایسه قیمتلی بیر شئی تاپمیش کیمی قیشقیردی:ـ تاپدیم! اعلا!بیر آز کئچمیش تارین صاحیبی قاییتدی:ـ آللاه کؤمگین اولسون. تاری وئر گئدیم.ـ عمی، تاری ساتین منه ده، نه قدر ایستهسهنیز پول وئرهرم گولالدین دئدی.
ـ بالا، موسیقی آلتلری ماغازاسیندا کئفین ایستهین قدر تار وار. گئت، اونلاردان هانسینی ایستهسن آل. بونو ایسه ساتماییرام، آتامین یادیگاریدیر.
بیر آز اول گولالدینه اینگیلیسلی نئجه دیل تؤکوردوسه، ایندی گولالدین تار صاحیبینی ائله یولا گتیرمک ایستهییردی. چوخ چک ـ چئویردن سونرا گولالدین ایستگینه چاتدی. ایکی مین دوللارا راضیلاشدیلار. کارلدان آلدیغی مین دوللاری اؤزونون ییغیب توپلادیغی مین دوللارین اوستونه قویوب وئردی تار صاحیبینه.
یامان سئوینیردی. بیر نئچه ساعاتا ایکی مین دوللار دوشوردو قاباغا. بیر آزدان ترجومهچی پولو گتیرهجک. دوغرودان دا آدامینکی گتیرنده گتیرر.
آما گولالدین بیلمیردی کی، اونونکو گتیرمهییب. اوچ نفر فیریلداقچی کنددن گلمیش اوغلانی آلداداراق آیلارلا زحمت چکیب قازاندیغی مین دوللاری الیندن آلیب.آخشام دوشوردو. گولالدین صبیرسیزلیکله ترجومهچینین گلمهسینی گؤزلهییردی.
نوشته شده توسط admin در چهارشنبه, ۰۶ مرداد ۱۳۹۵ ساعت ۴:۲۷ ق.ظ