- آراز آذربایجان – روزنامه خبری آذربایجان غربی - http://www.araznews.ir -
بیز نه قدر کتاب اوخوروق
Posted By admin On دی ۲۹, ۱۳۹۹ @ ۱۱:۱۲ ق.ظ In آنادیلیمیز | No Comments
آنادیلیمیز: کولتور اولوشومونون ان الوئریشلی آراجی کتابدیر. دوغوردان بیز نه قدر کتاب اوخویوروق؟ هئچ بیز، کتاب اوخویوروق مو؟!
“آمئریکادا سوروشورلار کی، ایندی هانسی کتابی اوخویورسان؟ آوروپا و ژاپونیا-دا تلهسیرلر ان سون کتابلار باسیندان چیخسین دا اوخوسونلار. تورکیهده دئییرلر کی، کیتاب اوخویورسان می؟! آذربایجاندا ایسه، بئله سؤال وئریرلر ، عؤمرونده کتاب الینه آلمیسان می؟! و تأسفله بیزلرده درس کتابیندان باشقا کتابین مؤوجود اولدوسوندان خبرسیز اولانلارین ساییسی اوتانیلاجاق قدر چوخدور.
بیز اوخوموروق. گنجلریمیز اوخومور، اوخومالیدیرلار!
سورون یالنیزجا مادی وضعیتده دئییل، اوخویان، کتابخانادا دا اولسا، اوخویار. آلا دا بیلمهسه، کرایه ائدیب اوخویار. انسانلاریمیزین اوخوماغا ماراغی یوخدور. وضعیت بو قدر آیدیندیر. گونوموزون گنجلری هئچ کتاب اوخومورلار. بونون بیر چوخ سببی وار. کامپیوتر اویونلاری و اینترنت بیر چوخ واخت آلیر. تلویزیون باشقا طرفدن ایچیر واختی. اس ام اس- لره آیریلان واختی دا بو لیستهیه آرتیرساق، گئری قالان واخت آنجاق یاتماغا چاتار.
بیزلرده کتابا حؤرمت قالماییب آرتیق. آما کتابسیز دا هئچ یئره واریلماز.
اوخوما (مطالعه) انسانا، توپلوما و گئت- گئده دونیایا و ائورهنه نهلر قازاندیرار؟ بو سؤالین جوابی آراشدیریلارسا، شبههسیز اوخومانین اؤنوندهکی انگللر قالدیریلاجاق و اوخوماغا ایلگی آرتاجاقدیر.اوخوما انسانین سؤز وارلیغینی گلیشدیرر. هر کیمسه سؤز وارلیغی قدر اؤزونو ایفاده ائدر و سؤز وارلیغی قدر اوخودوقلارینی آنلایا بیلر.
اوخوما انسانین عمومی کولتورونو آرتیرار. عمومی کولتور ایسه حیاتیمیزی آسانلاشدیرار. کولتورلو توپلوملار عمومی کولتورو یوکسک اولان فردلردن اولوشور. کولتورلو توپلوملار انرژیلرینی دواملی اولاراق فایدالی، گؤزل و بیلیمسل چالیشمالارا خرجلرلر.
اوخوما، انسانا قاوراما (ادراک)، یوروملاما (تفسیر)، فرقلی یؤنلردن باخما، خیال قورما، یئنی انسانلار و فیکیرلر و مکانلار تانیماغی و س… باشاریلاری قازاندیرار.
اوخوما، انسانلار آراسیندا ایلیشگیلری آرتیرماقدادیر. اوخومانین انسانا قازاندیردیقلاریندان بیری ده ائستئتیک بیلینجین اولوشماسی دیر. دیلین و ادبیاتین گؤزللیکلرینی و زنگینلیکلرینی گؤرن، اونا چاتان و اونو دادان بیر انسان حیاتا و ائورهنه داها ائستئتیک آچیدان باخاجاق. مطالعه آلیشقانلیغی، اوزون موددتده قازانیلان بیر ائدینیم (دست آورد) دیر. بوندان علاوه ایز بوراخان اوخوجو ماهیتینه چاتماق دا اولدوقجا چتیندیر.
بیزیم اؤلکه کیتاب اوخومادا بیر چوخ آفریقا اؤلکهلرینین گئریسینده قالمیش دورومدادیر. ژاپونیادا توپلومون یوزده ۱۴- و، آمئریکادا یوزده۱۲ سی، آوروپادا یوزده ۲۱ ی دوزهنلی اولاراق کیتاب اوخورکن بیزلرده نئچه اون مین نفرده بیر کیشی کتاب اوخویور مو گورهسن؟
بیز نه قدر کتاب اوخوروق؟ گونده نئچه ساعات؟ دوشوندوکلریمیزی بیان ائتمهیه، ایناندیقلاریمیزی ساوونماق اوچون یالنیزجا ائشیتدیکلریمیزه کفایتلنیریک می یوخسا مطالعه ده می ائدیریک او مؤوضوعلاردا؟ گوندهکی بوش واختلاریمیزین یوزده نئچهسینی یارارلی کئچیریریک؟ اوخوماماغیمیز اوچون نهدنیمیز می وار یوخسا توجیه و بهانهیه سیغینیریق؟… دوشوندوروجو سؤاللاردیر. بلکه ده بیر آز دوروخسونورساق، سکوتدان باشقا جوابیمیز اولمیاجاقدیر؛ سانجی جینسیندن بیر سکوت، اهمال کارلیغیمیزدان دوغان آغری.
کتاب ایله نامانوس اولماق دردی، توپلوموموزدا غوغا ائدیر.
Article printed from آراز آذربایجان – روزنامه خبری آذربایجان غربی: http://www.araznews.ir
URL to article: http://www.araznews.ir/%d8%a8%d9%8a%d8%b2-%d9%86%d9%87-%d9%82%d8%af%d8%b1-%da%a9%d8%aa%d8%a7%d8%a8-%d8%a7%d9%88%d8%ae%d9%88%d8%b1%d9%88%d9%82/
Click here to print.
Copyright © 2013 آراز آذربایجان - روزنامه خبری آذربایجان غربی. All rights reserved.