بیزه آیدینلاشماق لازیم دیر
اکبرسعادت
چکدیک،چکیریک، بیز کی یوز ایل دن بری حسرت
دوندردی قارانیقلارا گوندوزلری حسرت
صابیر دئدی “بیر غیرت اولور آغلایان اینسان”
تاریخ ده زبون ائتدی عمل سیزلری حسرت
آنا دیلیمیز:آیدین فیکیرلر ، تحقیقلر آراشدیرمالار، علمی باخیملار، اجتماعی باخیشلار هر بیر ملتین فرهنگینه باغلیدیر.کی هربیر رسام، آشیق،شاعیر،موسیقیچی ، یازیچی و…اوز اثرلرینده آچیقلاسین ساده دیلده آیدین لاشدیرسین ، یرسیز حرکتلری اوزلرینده ن قیراقدا قویسون . یاشاماق اوچون، حیات سورمه ک اوچون موفق فرهنگلرین دالیسیجاق گئده ک.،دوشونه ک ، وبیله ک. بس ایناناق کی کوکلی قالماق ایچون بوتون دنیا تاریخینده ،یاشایشیندا حرکت یاراتماق ایچون آیدینلاشماق، ساده لشمک ،اوخوماق وصداقتیله اینسانلیق واینسانلیغا قیمت وئرمک لازیمدیر.ملتلری بوتون طبقاطی فاصله لریله دوشونمک ، بیلمک لازیمدیر.میثال ایچون آجیلا ،شیرینی تامسینماق گرکدیر، آنجاق نه شوشه یا بانکا دالیسیندان…
بوتون بونلاردا هئچ ده “اونلار” گوناهکار دئییل، هر شئیده بیز اوزوموز گوناهکاریق! واخت وار ایدی جینقیریمیزی دا چیخاردا بیلمیردیک. ایندی آرتیق”سامیزدات” یازیب- اوخویوروق، اینستیتوتلارین دهلیزلرینه ییغیشیب اوره‌ییمیزی بوشالدیریق: “گور نه اویوندان چیخیرلار، گور بیزی هارا سوروکله‌ییرلر؟سونوموز چاتیب، معنوی اولوم آرتیق بیزی یاخالاییب و فیزیکی اولوم ده قاپیمیزین آغزینی کسیبدیر: اوزوموزو ده، اولاد- اوشاغیمیزی دا کوله دؤندرمه یه حاضیردیر، بیزسه، اوّلکی کیمی هورکک- هورکک قیمیشیر، دوداق آلتی میزیلدانیریق: “نئجه مانع اولا بیلریک؟ بیزده او زور هانی؟”. آداملیغیمیزی او درجه‌ده ایتیرمیشیک کی، بوتون پرنسیپلری، معنویاتیمیزی، آتا- بابالاریمیزین بوتون ائله دیکلرینی، نوه لریمیزین ائلیه بیله‌جکلرینین هامیسینی بیر قارین چوره یه قوربان وئریریک- بیزده نه قطعیت، نه غرور، نه ده اورک یانغیسی قالیب. بیز بوتون بشریتین آخیرینه چیخا بیله‌جک آتم اولوموندن و اوچونجو دونیا ساواشیندان دا قورخموروق (بلکه دلمه دئشیکده یئر تاپیب گیزلنه بیلدیک)آنجاق بیزیم اؤلکه ده هئچ واخت هئچ کس یئنیدن سئچیلمیر! غربده آداملار تعطیللر، اعتراض گوسترمه لر کئچیریرلر، آنجاق بیز او قدر باشیقاپازلی اولموشوق کی، بئله شئیلردن قورخوروق: نئجه یعنی ایشدن بویون قاچیراسان، نئجه یعنی کوچه لره توکوله سن؟ مصیبتلرله دولو سون عصر روس تاریخینین دونه- دونه سیناقدان چیخاردیغی فلاکتلی (اوسته لیک، حقیقتا ده بیزه خدمت ائلمه ین) یوللارلا گئتمک لازم دئییل! بیزه آنجاق اوتوروب گوزلمک می قالیر؟ بیردن نسه اوز- اوزونه باش وئردی؟… لاکین هئچ اولماسا، اونون ان یارالی یئریندن (یالاندان!) قاچمایاجاغیق سا، یالان هئچ واخت اوز- اوزونه بیزدن ال چکمیه‌جک. زوراکیلیق آداملارین دینج حیاتینا سوخولاندا لووغا- لووغا، قیمیزی قیرمیزی بایراق قالدیریر “من زوراکیلیغام! داغیلین، چکیلین- ازه‌رم!”. آنجاق زوراکیلیق تئز قوجالیر، او، اوزونه اوزون مدت گوونه بیلمیر، اوزونو یاشاتماقدان، یاخشی گورونمکدن، گوزه کول اوفورمکدن اوترو ال اوستو یالانی کومه یه چاغیریر. چونکی زوراکیلیق یالاندان باشقا هئچ نه یین آرخاسیندا گیزلنه بیلمیر، یالان سا یالنیز زورون حسابینا یاشاییر. زوراکیلیق بیزه قارشی چوخ واخت آچیق هجوما کئچمیر. او بیزدن یالنیز یالانا بویون ایمه یی، هر گون اونا شریک چیخماغی ایسته‌ییر- کوله نین بوتون صداقتی ده ائله بوندادیر.
یالان سوزو نه جماعات آراسیندا، نه شخصی صحبتلرده، نه تبلیغاتچی، معلم، تربیه چی، نه ده تئاتر آکتورو کیمی نه اوزوندن دئسین، نه کاغیذ اوخوسون.
البته، بیز یالاندان اوزاقلاشماغین واجب شرط و امکانلاری نین هئچ ده هامیسینی سادالامادیق. تمیزلنمه یه باشلایان- باخیشلاری آیدینلاشیب دورولان هر کس باشقا امکانلاری آسانجا سئچه بیلر. بلی، ایلک واختلار چتین اولاجاق. کیمسه بیر مدت ایشدن قوولاجاق. دوغرو- دوزگون یاشاماق ایسته ین جوانلارین حیاتی ایلک واختلار لاپ غلیظ‌لشه‌جک، آخی اونلارین اوخویوب جواب آرادیقلاری درسلیکلر یالانلا دولودور- اونلاری دا اله‌ییب سئچمک گرکدیر. آما ناموسلو اولماق ایسته‌ین، هئچ بیر واخت حتی قورخوسوز- هورکوسوز تکنیکی علم لرده بیله حقیقته و یا یالانا، معنوی مستقل لیگه و یا معنوی نؤکرچیلیگه طرف آددیم آتارکن سادالادیغیم شرطلری پوزماسا، اوزونو آلدادا بیلمز. اوز روحونو قوروماغا تپری چاتمایان آدام قوی قاباقجیل باخیشلاری ایله اویونمه‌سین، آکادمیک و یا خالق آرتیستی، امکدار خادم و یا ژنرال اولماسی ایله لووغالانماسین، قوی اوز اوزونه بئله‌جه ده دئسین: من قویونام و قورخاغام تکی قارنیم توخ، باشیم سلامت اولسون. بوتون مقاومت یوللارینین ان ساده سی اولان بو یول بیزیم اوچون آسان کئچمه یه‌جک. آنجاق اوزونو یاندیرماقدان و آجلیق کئچیرمکدن ده آغیر اولمایاجاق: آلو بدنینی سارمایاجاق، ایستی گوزلرینی قارسالامایاجاق و عایله ن اوچون هئچ اولماسا قارا چورک، ایچمه لی سو تاپیلاجاق. بیزیم خیانت ائتدیگیمیز، آلداتدیغیمیز بویوک آوروپا خالقی- چک لر، سلوواک‌لار لیاقتلی اورک گزدیرن آرخاسیز- کومکسیز سینه نی تانک قاباغینا وئرمک اورنه یینی گوسترمه دی می؟ دئییرسینیز چتین یولدور؟ چتین یولدور. آنجاق مومکون یوللارین ان آسانی دیر. جان اوچون چتین اولسا دا، روح اوچون یگانه یول دور. چتین یولدور، آنجاق آرتیق بیزده آداملار وار کی (حتی بئله آداملار اونلارجادیر)، نئچه ایللردیر بو شرطلره عمل ا ئله ییر، یولون چتین لیگینه قاتلاشیر، حقیقت‌له نفس آلیرلار. و بئله لیکله بو یوللا بیز بیرینجی گئتمیریک، گئدنلره قوشولوروق! سیرالاریمیز نه قدر مهربان و سیخ اولسا، یولوموز او قدر آسان و قیسا اولار. بیز مینلرجه اولساق، هئچ بیریمیزه هئچ نه ائلیه بیلمیه‌جکلر. اون مینلرجه اولساق، اولکه نی(ایرانیمیز) تانینماز درجه ده ده ییشه بیلریک! قورخاقلیق ائله‌سک، اوندا کیمینسه بیزه آمان وئرمه‌دیگیندن گیلئی‌لنمه یک- اوزوموزه آمان وئرمه‌ین ائله بیز اوزوموزوک.
نوشته شده توسط admin در دوشنبه, ۰۲ آذر ۱۳۹۴ ساعت ۶:۱۱ ق.ظ
