آنادیلیمیز:گئجه نین سون چاغلارایدی . سحرین شفقی یاواش- یاواش قارانلیغین بوخجاسین بورکوردو. یئر اوزره سی گئتدیکجه ایشیق لانیردی . پنجره نین دومان باسمیش شوشه سینی بارماقلاریملا سیلیب ائشییه باخدیم. هاوانین چم لیغی بوداقلارین اوستونده شئح مونجوغو یاراتمشیدی . بیر آز گؤزلریمی یوخارئیا قالدیردیم. حیاط دیواری نین قیرناسیندان، ذیروه سی قارلی داغا گؤزوم ساتاشدی.
گون یاواش یاواش ایشیغینی یئر اوزه رینه ساچیردی . داغین چئوره سینده کی گؤیون اوزو سویوقدان قیزارمیش اوشاق اوزوکیمی آل – قیرمیزی اولموشدو . گئت به گئت گونون شفقی داغین آرخاسیندان یئر اوزه رینه یاییلیردی ، بیر نئچه ساهات یئنی ایل تحویلینه قالمامیشدی یعنی ۱۳۹۶- جی ایله. قولاغیم سس ده ایدی .
آخی ائله اوگئجه یوخودا گؤرموشدوم . بیر آغ آتا مینیب، آغ- آبباق پالتار اگنینده ، قارا رنگ لی یان قیلیجی شاپکا باشیندا منه قارشی گلیردی . سانیردیم گرچک دی . سئوینجدن گؤزلریمین گؤز یاشلاری دامجی دامجی یاناقلاریمدان آخیردی و دوداقلاریمین قیراغیندان دئمه یاسدیغین اوزه رینه تؤکولوردو.
بیر آن یوخودان آییلدیم. گؤزلریمی سیلیب دیواردان آسیلان ساهاتا باخدیم. گئجه نین بیر یاریسین گؤستریردی . سحر واختینا ائله قالمامیشدی. یاتابیلمه دیم . اوتوردوم دیزلریمی قوجاقلادیم. گؤزلریم دیوارداکی شکیلین گؤزلرینه ساتاشدی. سانکی اونون داگؤزلری منیم گؤزلریمه باخیردی. نیسگیل لی بیر باخیش.
باخیشلاریندا بیر دونیا معنا قالانمیشدی و گؤردویوم یوخونو بیر داها خاطیرلادیم ، اوره ییم دیلیمدن قاباق دیله گلیب سیزلئیا ، سیزلئیا سؤیله ییردی هارداسان ؟ ندن منی یالنیز بوراخیب گئتدین؟ من سندن دویمادان، نه تئزمندن دویدون ؟ مه یه قرار دئییلدی منه دایاق اولاسان ؟ الیمدن یاپیشیب، ییخیلماقدان قورویاسان؟ اولمایا فلک سندن دویموشدو؟…
آرزیلاریم بیر بیر گؤزومون اؤنوندن صفه دوزولوب رژه گئدیردیلر. کیرپیک لریم گؤزلری مین دامجی لارینی سیخیب یاناقلاریمدان بیلک لریمین اوزه رینه آخدیریردی . کئچن گونلریم یادیما دوشدو. ان اوشاقلیق خاطیره لریم. ائله بیل ائله دونن ایدی. بالاجا ائویمیزین قاپیسی دؤیونن زامان، گؤزله مه دن، قاپی یا ساری قوش گئدیردیم. قاپینی آچارکن اوزوم ساتاشیردی سئوگی ایله دولو اولان گؤزلرینه ، اؤزومو آتیردیم اونون مهربان قوجاغینا.
گولر اوزله یورولموش قول لارینی منیم بوینوما حلقه ائدیردی باغرینا باسیردی. سویوق دوداقلاری لا یاناقلاریمدا اوپوش چیچه یی اکیردی . آتالیق دویغوسو ائله بیله ایمیش. بیلیرسیز! بو دویغونو دریندن حیس ائدیب آنلئییردیم . آی آللاه دونیانین ان سئویملی آتاسی ائله منیم آتام ایدی . هئی …. اوگونلر نه تئز کئچدی ، گئتدی.
من بؤیودوکجه آتام دا یاشلانیردی. زمانه نین قات – قات آغیرلیغی گوجلو قول – بیلک لی آتامین بئلین بورکموشدو. زمانه نین آغیر دردی و گرگین دورومو آتامین ساچلارینی قیش قاری کیمی آغارتمیشدی . سانکی بو آغاریلمیش ساچلار اونون هیجران نغمه سینی سسلندیریردی .
گونلر، آیلار کئچیردی، ایللر بیتیردی آتامین اللری نین اوستونده کی دری لرگون به گون قیریشیردی ، دری نین آلتینداکی یاشیل دامارلار گؤزه چارپیردی . اللری نین ایچی ده قابار باغلاییب دریسی قات – قات بیر بیریندن آیریلانیردی و بوندان دولایی هر گون قئوریشیردی،کاسیب لیق بئلینی بورکموشدو و قیافه سی یاشین دان داها ایره لی گؤرسه نیردی.
بیرگون ، بیرگون پاییزین ایلک آیی نین ایلک گونلرینده اورتا مکتب دن ائوه ساری قاییدیردیم . کوچه یه گیرن زامان بیر آن شوبهه لی منظره یه گؤزوم ساتاشدی. گؤردوم کوچه نین ائنی – اوزونو، قوهوم – قونشوی لا دولودور . ایلاهی ندن بیر بئله جماعت بیزیم کوچه یه یئغئشیبلار؟ اولمایا…. یوخ دیلیم لال…. آمما ائله بیل بو جماعت بیزیم ائویمیزین قاپیسینا توپلاشیب لار. اوره ییم اوزولدو… آی آللاهیم نه اوز وئریب ؟ نه اولوب ؟ اولمایا خسته آتاما بیر زاد اولوب؟ آخی اؤتن گئجه آتامین ساغلام دورومو یاخشی دئییلدی…
آنام خسته آتاما، قند شربتی حاضیرلاییب وئرمیشدی… آتامین رنگی سارالمیشدی و دردین گوجلوغونودن باغیریردی . آتامین حزین حزین سسینه یوخودان آییلدیم. گؤردوم آنامین بیر قولو آتامین باشینین آلتیندا و بیر قولویلا اونا شربت ایچیردیر. آتامین بئحال گؤزلری منه ساتاشدی. قیزیم نیگران اولما ! منیم هئچ نه ییم دئییل. گئت یئرینده یات. صاباح مدرسه ن بئواختا قالار دییه ر کن منی موتلو ائدیردی . بیلمیردیم آتامین خسته لیغی ندن دیر؟ آمما نییه دوقتور دئمیشدی، اونون اوره ک خسته لیغی وارایدی . آمما آخی اونون پاک اوره یی ندن خسته لنه؟ بیلمیردیم باشیمدا چیخمیردی . آخی یاشیمدا اوقدر دئییلدی کی دوقتور دئدی یینی آنلئیام. سونرالار آنام دان سوردوم و بیلدیم کی آتامین سرطان خسته لیغی واریمیش. کاسیب لیغین اوزو قارا اولسون. پولسوزلوق آدامین باشینا نه لر کی گتیرمیر .پولوموز اولمادان، آتام خسته لیغی نین قارشی سیندا داوام گتیرمه دن دونیاسین دئییشمیشدی.نه ایسه قاپی نین اؤنونده دوردوم ایچه ری گیره بیلمدیم یعنی ان دوغروسوآیاقلاریمدا طاقت قالمامیشدی. آنام تورپاقلاری باشینا چؤووررکن ای وای ائویم یئخیلدی آللاه باشیما کول اولدو دئییردی. عزالی آنام یانیق یانیق آغلاییردی. گؤزلری منه ساتاشارکن داهادا آرتیق دویغولاندی ، سسینی قالدیردی ….
چانتام الیمدن اوزولوب یئره دوشدو…. بیر بوز قندیلی کیمی یئریمده دؤندوم، بئینیم ایشدن دوشدو. اوره ییم چیرپینماقدان دایاندی قوللاریم سینیق بوداق کیمی چینیمدن آسلاندی . دیلیم توتولدو… یازیق اولان منم آللاه؟ ائوی ییخیلان منم آللاه؟ آتام الیمدن گئتدی ….؟او خسته آتام … او گولر اوزلو آتام …. اللری قابارباغلمیش آتام …
آنام منه قارشی گلیب منی باغرینا باسدی آتان الیمیزدن گئتدی قیزیم دئدی . اومودوموز کسیلدی! آنامین گؤز یاشلاری مدرسه دونومو ایسلادیردی . ایکی قولومو آنامین بوینونا حلقه لندیردیم گؤزلریم سانکی یاز بولودو اولموشدو . آنام آغلارکن اوخشاییردی ، من ده یانیق یانیق آغلاییردیم . اینانا بیلمیردیم … آتاجان قوربانین اولایدیم . آتاجان قاباریلمیش اللرینه قوربان اولایدیم …. گؤزلری نین قوربان اولایدیم . یارالی ، خسته اوره یی یین قوربانی اولایدیم . ندن بیزی یالنیز بوراخدین گئتدین ؟ ندنسه منی آغلار قویدون گئتدین ؟ نئجه آتاسیز دؤزوم؟ نئجه آتاسیز عؤمرومو سوروم ؟ کاش سنین یئرینه من اؤله ایدیم ….
بو حال دا قونشو- قوهوم لار، آتامی قارا پتویا بورویوب ، قاپیدا ساخلانمیش آمبولانسا ساری آپاریردیلار. اؤزومو آنامدان اوزدوم آتامین جنازه سی نین آرخاسی جا قاچدیم. هارا آپاریرسیز؟ من حله آتامدان دویمامیشام ! من ده آتام لا گئدیرم دئدیم. قوهوم – قونشو منی آتامین روح سوز بدنیندن آییردیلار . اونلاری آندا وئردیم ، قویون لااقل بیر دفه یالنیز بیر دفه گولر اوزلو آتامین چؤهره سینه باخیم و دوداقلاریندان اؤپوم…
دوداقلاریمی قویدوم سویوق دوداقلاری نین اوستونه، اللریمی آغاریلمیش ساچلاری نا چکیب سولموش یاناقلاریندان اؤپوب ، حزین حزین آغلادیم . گؤزومون دامجیلاری آتامین اوزونو ایسلاتدی . بو منیم سون گؤروشوم اویدو. بیلیردیم بوندان بری آتام قات – قات تورپاقلارین آلتیندا یاتیب ، دینجه له جک و من گؤره بیلمه یه جم.
اؤپدوم ، یاناقلاریندان ، گؤزلریندن و قیریشمیش آنلیندان اوپوردوم ، آغلاییردیم. قوهوملار قوللاریمدان توتوب قیراغا چکدیلر. اینانمیردیم . سانکی بیر یوخواویدو، بیر خیال بیر رؤیا . آمما نئچه گوندن سونرا بیلدیم کی گرچک ایدی . آتامین اؤلومو دوغرویموش هه یه . من آتاسیز قالدیم. آتاسیزلیق نئجه سؤیله ییم دهشتلی بیر درد .
آتاسیزلیق ، یالنیزلیق دیر. آتاسیزلیق ، دیرک سیزلیق ، دایاق سیزلیق. آتا یعنی سئوگی، آتا یعنی ایستک ، آتا یعنی قیزین دایاغی ، آتا یعنی قیزین دیره یی . آخی او منیم گوجلو دیره ییم ایدی. نه منیم ، ائله آنامین دا.
هیجران اودو تام وجودومو آلیشدیردی . هیجران دردی یامان درددی . چاره سیز بیر درد جان یاندیریجی بیر اولای . آمما حه له ده اینانا بیلمیرم کی آتام منی ترک ائدیب دی . ائله یئنه ده قولاغیم سس ده . ائله دئییرم آتام قاپینی دؤیوب بیرده ائوه دؤنه جک دیر . آتامین یورقون حاللی آمما گولر اوزولو چؤهره سینی بیرداها گؤره جه یه م . منی یئنه ده باغرینا باسیب اؤپه جک دیر. دویغولارینی تام وجودوم لا حیسّ ائده جه یم… هئی … آمما بونلار هامیسی خیالدیر کاش گرچک له شردی …
هر ایلین سونوندا و یئنی ایل تحویل اولاندان سونرا اوره ییم چیرپینیر، آنامدان گیزلین گئدیرم اؤز اوتاغیمدا دیزلریمی قوجاق لاییب آتامین دیواردان آسیلان شکلینه باخیب خیسین خیسین آغلاییرام، اؤز اؤزومه دئیرم نه اولاردی منیم آتام دا کناریمیزدا اولاردی ، آخی نوروز بایرامی یاخینلاشیر منی ده آپاراردی بازارا بایرام پایی آلاردی . بیلیرسیزمی ائله بو چاغ لاردا آتاملا بیرلیکده گئدردیک بازارا ایکی جوت قیرمیزی بالاجا بالیق آلیب سالاردیک تونگه و …
ایل تحویلیندن سونرادا بایرامین ایلک گونونده منی باغرینا باسیب بایراملیق وئرردی … آمما ایندی نه … ؟
ثانیه لر هر بیریسی منه بیر ایل گلیر. ایندی ایسه هر زمانان ایل بایرامی گلیر، اوره ییم دؤیونور، سیخیلیر، داریخیر ، ازیلیر… ندنسه بایرامین داخی منه معناسی یوخدور . یاز فصلی هر زامان منه پاییزدیر. آخی بیلیرسیز آتامی سون بهاردا الدن وئردیم . خزان یئلی آتامین عؤمرونو الیندن آلدی . ان دوغروسو منیم الیمدن آلدی.
ایللر بو اولایدان گئچیب آمما هله گؤزلریم یئنه ده قاپی نین اؤنون ده دیر .
هر آن قاپی نین سسینی اؤزلویرم و آتامین گلمه سی نی گؤزلویرم.ایندی ده گؤزوم قاپینین آرخاسیندادیر بیلیرم کی بیرنئچه ساهات دان سونرا، ایل ته زه له نه جک دیر.
گؤزوم گؤزونو گؤزله ییر، آتاجان هارداسان گل … کؤنلو سینیق قیزین یولونو گؤزله ییر… آتاجان هارداسان گل… هیجران آتشی کؤنلومو آلیشدیردی هارداسان گل آتاجان… هاردا سان گل ….