- آراز آذربایجان – روزنامه خبری آذربایجان غربی - http://www.araznews.ir -
بیری واریمیش بیری یوخ ایمیش
Posted By admin On فروردین ۱۹, ۱۳۹۸ @ ۱۱:۰۷ ق.ظ In آنادیلیمیز | No Comments
محمد سرافراز قراملکی
“ آنادیلیمیز: بیری واریمیش – بیری یوخ ایمیش. آللاه دان سونرا کیمسه یوخ ایمیش. بیر بالاجا اوغلان واریدی، بو بالاجا اوغلان چوخ شولوغ ایدی، هر گون اوشاقلارینان ساواشیب بیر نئچه شیکایتچیسی اولاردی. او آناسینی چوخ اینجیدردی، تازا یئددی یاشینا گیرمیشدی؛ آناسی اوخولا یازدیردی.
او، اوخولا اؤنم وئرمهییردی. آناسی، هر گون الیندن یاپیشیب اوخولا آپاریردی. آما او شولوق اوشاغین آناسی اوخولون قاپیسیندان چیخار- چیخماز، او دا اوخولون دوواریندان آشیب قونشولارین دام – دوواریندا شیللاق آتاردی.”
گؤزلریمیآچیرام. بؤیوک ننهمین سسی گلیر، آمما اؤزو یوخدی. اونون خینالی ساچلارینی باش بارماغیما دولاییرام. بیلیرم گینه اؤزوندن بیر ناغیل قوشوب دئیهجک؛ سوندا دا ” اصول الدین نئچه دانادی ” سوروشاجاق. منده هر گئجهکی کیمییوخولو گؤزلریمییوموب آتدا – بوتدا دئیهجم. گینه او، یوموشاق اللرینی توز – توپراقلی باشیما چکیب منی باغرینا باساراق اؤزو باشدان سایاجاق. باشا چاتینجا اوزومو اونون ایستی باغرینا باسیب شیرین – شیرین یوخلویاجاغام. یوخولاریما سویوق یئل اسیرسه ده اونون ایستی اللرینی یاناقلاریما قویاجاغام. گئجه یاریسی یئریمه ایشهسم ده او، آنامدان گیزلی، بدنیمییویاندان سونرا، گینه اونون ایستی قوجاغیندا یوخولاریمین آردینی گؤرهجهیم.
یاتاغیمدان دوروب اوتورورام؛ باشیم گیجللنیر و دیواردان یاپیشیب آیاغا قالخیرام؛ پنجرهنین هئرهسینده اوتوروب بیر سیگار آلیشدیریرام. ایچیمه چکدیگیم سیگارین توستوسو نمهاردا قالیر. آنجاق بیر آزی بورنومدان ائیشیگه چیخیب، پنجرهدن یاییلان آی ایشیغیندا بورراغانا دوشهرک، اژدها کیمیآغزینی آچیب منی اودماق ایستهییر. گؤزلریم قارالیب. اطرافیمییاخشی گؤره بیلمیرم. سیگار قوخوسو اورهگیمیداها دا بولاندیریر. سیگاری هر گئجهکی کیمی، پنجرهنین قیراغیندا سؤندوروب، گینه یاتاغیمدا اوزانیرام؛ ساغ بؤیروم اوسته، سول بؤیروم اوسته، اوزوم اوسته، هر حالدا یاتیرام اولمور. “دئیهسن ال چکن دئییل بو اورک بولانماسی” اؤز – اؤزومه دئییرم.
سانکی چاتینین اوزون دیرهکلری، پردیلریایله بیرلیکده آغزیمدان چیخماق ایستهییرلر؛ یئردن سیچراییب باشیمیبیر پلاستیک قارا کیسهیه سوخورام، قارنیمدا هر نه وار بوشالیر، الکل قوخوسو کؤهنه مواد پیلاستیکین آجی قوخوسونا قاریشیر، بو قوخونو یالنیز آجی چاینین قیراغیندا دویماق اولار. دوم – دورو آخیب جوشان سو یئرینه شهرین پساب سولاری بوغلایاراق بیرجهلیک قابلاری اؤزو ایله گتیریر؛ بیر نئچه نفر ده هرهسی اللرینده بیر چووال اونلاری ییغماق حالیندا ساواشاراق بیری – بیریلرینه یامان – یووز دئییرلر. سودا اوزن تورلو – تورلو بالیقلارین یئرینه پوخ- پوسور؛ اورهگیم گئنه بولانیر. باشیمینایلوندان چیخاردیب آغزینی دوگونلهییب بیر طرفه بوراخیرام. آغزیمین دؤورهسینی یورقانین قیراغی ایله سیلیرم، تورشا – شیرین بیر داد دیلیمین اوجونو جیزیر. چیراغی یاندیردیغیمدا، ایشیغی گؤزلریمیقاماشدیریر. چیراغی سؤندوروب دووارا سؤیکهنه – سؤیکهنه مستراحا ساری گئدیرم. اوز- گؤزومه سو ووروب آغزیمییایخالاییرام. دئیهسن بیر آز هوشوم باشیما گلیر. مستراحین پنجرهسیندن؛ تیر چراغینین ایشیغی گوزگویه دوشور؛ بیر جوت قان چاناغینا دؤنموش گؤز منه باخیر.
ایواندا گؤی اوزونه باخاراق عادت اوزوندن گینه بیر سیگار آلیشدیریرام. سیگار باشیمیآغریتسادا خوشوما گلیر. درین بیر نفس وروبهاوایا بوراخدیغیمدا پارلاق اولدوزلار چنه بورونورلر. گئجه قوشونون سسی، گئجهنین سکوتونو سیندیرسادا؛ بؤیوک ننهمین ناغیللاری کیمیمنه لای – لای دئییر.
کاغاذ واراغلارین هرهسینی بیر طرفه سوخوب یاتاغیما قاییدیرام ؛ نظریمه گلیر گؤی اوزونده اولدوزلار چن ایچینده بوغولاراق آی ایشیغیندان یاردیم ایستهییرلر. آی ایشیغی پنجرهدن ایچری گئچیب یورقانیمین اوستونه سریلهرک آغیرلیق ائلهییر. یورغانی باشیما چکیب گؤزلریمییومورام اولدوزلارینهامیسینی قارانلیغا بوراخیرام .
بؤیوک ننهم گؤز آلتی منه باخاراق بیر الینده ماققاب بیر الینده ایسه گوزگو اوزونده کی تکه توک آغ توکلری چکیر؛ قاش – قاباغی یئر ایله گئدن ننه سانکی بو گئجه ناغیل دئمک ایستهمیر، آمما من هر گوندن بتر ناغیل دینلهمک ایستهییرم.
“ناغیل دینلهمک ایستهییرسن؟” ننهم سوروشدو. “هن” دئدیم. گوزگونو اوزومه توتوب ” باخ اؤزوه ” دئدی. گوزگونون اوستونه اوتورموش تری سیلنده بارماقلاریمین تر ایزیندن اؤزومو گؤرورکن دیسکینیب دوروقسولاندیم. گؤزلریم چوخورا دوشوب؛ ساچلاریم سارماشیق تک پیتلاشیب؛ اوزومون توکلری اوزانمیش ایدی. بو قیافه ایله دوز دلی مورادا اوخشاییردیم؛ فقط بیر چووالیم اکسیک ایدی کی دوروب دوشم کوچهلره کؤی – کؤهنه پالتار ییغام. هر زامان دلی مورادی گؤرنده بیر آن دوروقسانیب اونا باخاراق دریندن آه چکیب یازیقلیغیم گلردی؛ ایندی گوزگوده کی باخان دلی، بیر هئیکل کیمیکیپریک چالمادان منه باخیردی.
Article printed from آراز آذربایجان – روزنامه خبری آذربایجان غربی: http://www.araznews.ir
URL to article: http://www.araznews.ir/%d8%a8%d9%8a%d8%b1%d9%8a-%d9%88%d8%a7%d8%b1%d9%8a%d9%85%d9%8a%d8%b4-%d8%a8%d9%8a%d8%b1%d9%8a-%d9%8a%d9%88%d8%ae-%d8%a7%d9%8a%d9%85%d9%8a%d8%b4/
Click here to print.
Copyright © 2013 آراز آذربایجان - روزنامه خبری آذربایجان غربی. All rights reserved.