بو بیریلری آمما کاس دئییللر
محمد صبحدل
آنا دیلیمیز:سونراخدجه ننه‌م بیر دنه شام آلدی. بیلمیرم بیر دنه شام آلدی، یا بیر دنه شام آلا بیلدی. آلدی قوجاغینا منی. اوشاق دئییلدیم، آمما پوک اویدوم یونگول اویدوم.
قارنیم دا ائله اوولدن شیشکین ایدی. دؤشلریم‌سه نارین. سنین دردین خوش دور. بللی دئییل. سس سالمایینجا لال اولدوغونو، کیمسه بیلمیر. یانی کی اندامین سازدیر. منیم کیمی دؤشون آلتدا سوموکلرین اوزه چیخمیر. باخ بیر، بندلرینه کیمی بللی‌دیر سوموکلریم. قارنیمین شیشی ده بیتیره بیلمیر اونلاری. سن اوشاقسان آمما اندامین ساز دیر. عاددی سن. گؤزه‌ل سن. هه! گؤزه‌ل سن.
نه دئییردیم؟! هه! خدجه ننه م بیر دنه شام آلدی. منی آلدی قوجاغینا. اون اوچ یاشیم واریدی، آمما پوک اویدوم؛ لاپ سیسقا. آلدی قوجاغینا منی. قارا چادراسینی چکدی اوزومه. آخشام آلاقارانلیغی یولا دوشدوک. هلم سن یوخودون. یانی کولثوم بویلویدو سنی. اوندا حیطین گیره‌جه‌یینده سولمازگیلین اوتاقلاریندا اوتوروردوز. یول اوستو چادرا دالیندان قارا کؤلگه‌لر، کئچیردیلر. من‌سه قارایا بورونموشدوم. هیچقیرغیمی چیخارمیردیم، یانی چیخارا بیلمیردیم. گاهدان سالاملاییب اؤتن ده وار ایدی. سالاملایانلار قادین سسلی ایدیلر. آرواددان-گلیندن. آخی خدجه ننه‌م ائله او زاماندان بزکچی ایدی. دهلیزیمیزی گؤروبسن می؟ گل گؤستریم سنه. قورخما بوگون هامی یاسدادی. حوسئینینین یاسی‌دیر. تانیمیرسان، کؤوثرین اری. یوخاری دربند ده اوتورورلار. الینی وئر منه. گل پیلله‌لردن اوسته چیخاق. اولمادی. گل قوجاغیما. ننه‌م دئییر: »آغیر زاد گؤتورمه!« آمما سن کی آغیر دئییلسن. بئش یاشین وار هامیسی. دهلیزیمیزده گؤزه‌ل زادلار گؤستره جم سنه. آینا وار، عطیر وار، جوره به جوره، گؤزه‌ل-گؤزه‌ل شئی‌لر. آمما هئچ کیمین خبری اولماسین گرک. بیلیرسن کی خدجه ننه‌م منی دهلیزه قویماز. دئییر موشتریلر گؤرر، اییره‌نر. آمما سن کی هئچ کیمه دئمزسن، یانی دئیه ده بیلمزسن. بوگون ده کی، یاس گونودو. هامی یاسدادی؛ کولثوم ده، خدجه ننه م ده، سولمازین ننه‌سی ده، کیشی‌لرده. الینی وئر منه دهلیزین هرنه‌یینی گؤستره‌جه‌یم سنه. بو تابلونو منصور داییم یازمیش. موقاووا اوسته‌دیر. آمما گؤرورسن نه گؤزه‌ل خططی وار. ایکی یاش مندن بؤیوک دور. ساوادلی دیر. هرنه یی بیلیر. دیپلوم آلیبدیر. منه ده اؤزو اؤیره‌دیب اوخویام. باخ بیر یازیب»آ-را-یش-گا-ه«، یانی خدجه ننه‌مین آراییشگاهی. من درس اوخویا بیلمزدیم. آخی اوشاقلار قویمازدیلار. قوللاریمین، آیاقلاریمین نازیکلییین، رنگیمین قارالیغین،قارنیمین شیشینی مسخره‌یه توتاردیلار. سنین دردین خوش دور.
سس سالمایینجا لال اولدوغونو، کیمسه بیلمیر. منصور داییم اؤزو اؤیره‌تدی، اوخویام. گل ایچری قورخما. باخ بو آینالاری خدجه ننه‌م آلمیش. نه اینکی اوولدن اولا ها یوخ، بونلاری تزه آلیبدیر. بیلدیر. دئییردی: قاباقکی لار کاسلانیب. موشتری اوزونو گؤره بیلمیر. بالاجالاری وئردی منه. ایکی دنه. کاس دیر، آمما هئچ دن یاخشی دیر. ایسته ییرسن بیرین وئریم سنه؟ بو بیری‌لر آمما، کاس دئییللر. دوپ-دورو. هردن ننه‌م گلین بزه‌یه‌نده. گیزلینجه باخمیشام. گلین‌لرین اوزونه ساپ سالیر، ماککاج ایله قاشلارینی آلیر، باخ بیر بئله‌سی، اوزلرینه بونلاردان یاخیر. ائله گؤزه‌ل ائله ییر کی گل گؤره سن. آمما منیم باخماغیمی گؤرنده قاپینی اؤرتور. دئییب کی ایشله‌یه‌نده باخمایام گرک، گلینلر به‌یه‌نمیرلر. گلین اولماق چوخ یاخشی‌دیر. آداما گؤزه‌ل-گؤزه‌ل پالتارلار گئییندیریرلر، آغاپپاغی توردان. گؤزه‌ل-گؤزه‌ل بزک ائله‌ییرلر. منده بئله قالمایاجاغام. منصور داییم تزه ایشه گئدیر. دئییر عمل اولسام دوزه‌له‌جه‌یم. دوزه‌لسم داها ننه‌م دهلیزی اوزومه باغلامییاجاق. منده بزه‌نه‌جه‌یم. گلین اولاجاغام. اریمی ده چوخ سئوه‌جه‌یم. هن! نه‌دی؟ گولورسن؟ گول. اریمه ده دئیه‌جه‌یم: پول ییغیب سنی عمل ائلییه‌ک بلکه سنده دانیشاسان. بونلارا ده‌یمه‌گینن میداد دیلار. یاغلی میداد، شام کیمی. ده‌یمه دئدیم، ننه‌م گلر بیلر ها. اه ه ح سؤز قانمیرسان کی. ائله کولثوم بویلو اولاندا دا دئییردی کی دیش دورموردون. شولوغویدون. هئی تپیکه باسیردین کولثومو. ائله یاخشی ائله‌ییردین ده. منیم ده زوروم چاتسایدی دویون-قارین، اوز-گؤزونو جیرماقلاردیم. شام یاندیرمازدیم خدجه ننه‌م کیمی، دؤشه نردیم اوز-گؤزونه. کولثوم دؤرد یاش مندن بؤیوک ایدی. تزه گلین گلمیشدی اوندا. هردن اری اولمایاندا گلردی حیطده قوناق-باجی اویناردیق. اوندا هلم سنی بویلو دا دئییلدی. هئچ-هئچ یوخودون. ننه‌م دئیه‌ردی:«گوناه دی کولثوم! دولاشما اوشاغا» کولثوم ده: «اوشاق دئییل یئکه آرواددی»- دئیه منه باخاردی. ننه‌منن دئییشردیلر. بیر آرخا گئتمزدی سولاری. ائله بیل کولثومون تویوندا خوش بزه‌مه‌میشدی ننه‌م بیله‌سین. کولثوم آیری آراییشگاه دئسه‌ده اری «یوخ!» دئمیشدی. آجیقلی ایدیلار آمما من‌نن یاخشی اوینوردوق. سونرا سنی بویلو اولدو. قارنی منیم کی کیمی شیشدی. نم-کیم دئمیشدی من‌نن اویناماسین. اوینامادی دا. حیرصیم توتموشدو. دئدیم کولثوم گل اوینایاق اوشاغینی اذییت ائله‌مه‌رم. اوتاقدان دیل چیخارتدی منه. حیرصیم چیخدی. دئدیم قوی قارنینا ده‌ییم. اذیت ائله‌مه‌رم بیله‌سینی. دئدی :»یئری گئت دلی‌نین بیری دلی» من کی دلی دئییلدیم. گئتمه دیم. ننه‌م دئدی:« دولاشما اوشاغا! گوناهدی. کولثوم آغیز- بورنون اه‌یدی. من اؤزومو یئره چیرپدیم. آغزیم داشا ده‌یدی قانادی. آنام کولثومو قارقیشلادی. کولثوم دیل چیخارتدی. آغزیم قانامیشدی دینمه‌دیم، دینه‌نمه‌دیم. دئدیم:» کولثوم قوی قارنینا ده‌ییم «. کولثوم دیل چیخارتدی. آنام موشتری‌لری ایچری آپاریردی. گلین آپاراجاقدیلار. کولثوم حیرصلی ایدی. چیغیردی:« نه دوشمانلیغین وار جاماعاتینان بزکچی خدجه! قرا گونلوک توکانی آچیبسان؟». خدجه ننه‌م دینمه‌دی.
«چیخارت او جین بالاسینی گؤرسونلر. نه گیزله‌دیرسن!؟«ننه‌م دهلیزین حیطه آچیلان قاپیسینی اؤرتدو. کولثوم دئدی :»ایسته‌میرسن به‌یه‌م قارنیما ال ده‌یه‌سن؟« دئدیم :»قویمورسان کی! ائله ایجه‌شیرسن منه«.
سن اوندا کولثومون قارنیندا ایدین. هردن ده دویونجاق تپیک چکیردین کولثومه. یانی اؤزو دئییردی. دئدی: »قویارام«. الیمدن توتدو. آپاردی دهلیزه ساری. موشتریلر ایچری ده‌ایدیلر. کولثوم قاپینی آچدی. »بودور او گیزلتدیین آی-پارا؟ منیم ده قارنیمدا شیش بونونکوندادا. منیم‌کینده اوشاق. بونونکوندا آللاه بیلیر نه.« خدجه‌ننه‌م کولثومون اوستونه یویوردو. کولثوم قاچدی.خدجه ننه‌م منی باغرینا باسدی. خوشوما گلدی. موشتری‌لردن بیری ننه‌می دیله توتدو:» اوره‌یینه آلما« ننه‌م قارقیشلادی.سونرا بیردنه شام آلدی. من سنی قوجاغیما آلان کیمی، آلدی قوجاغینا منی. گئتدیک سئیید حمزه اوجاغینا. قوجاقدا اولماق خوشوما گلیردی. شامی یاندیریب ایچری گیردیک. ننه‌م سؤیکندی ضریحه. چیینی تیتره ییردی. یوخوم آپاردی.سونرا سن دوغولدون. اوول‌لر کیمسه لال اولدوغونو بیلمیردی. سونرا داکی اوتاقینیزی ده‌ییشدیز. بونلارا ده‌یمه دئدیم! ننه‌م بیلسه گلمیشم دهلیزه، سنی ده گتیرمیشم، اینجییه‌ر. داوا ائلر. منصور داییم دئییر دوکتورلا دانیشیب، منی عمل ائلییه‌جک‌لر. دوکتورو گؤروبسن می؟ دوم-آغ گئیینیر گلینلر کیمی. ننه‌مین ده گؤزلری یاشاریر آمما بیلمیر کی من اؤلمه‌یه‌جه‌یم. ساغالاجاغام. سونرا دهلیزه گله بیله‌جه‌یم. بزه‌نه‌جه‌یم. گلین اولاجاغام. اریمی ده چوخ سئوه‌جه‌یم. اریمه ده دئیه‌جه‌یم: پول ییغیب سنی عمل ائلییه‌ک بلکه سن ده دانیشاسان.
نوشته شده توسط admin در چهارشنبه, ۰۴ شهریور ۱۳۹۴ ساعت ۴:۳۹ ق.ظ
