بو ایل ده قورتاردی
حاضیرلایان:اکبرسعادت
نه ملاکم، نه تجارم، نه خان مردم آزارم
متاعیم شعر دور آنجاق اونون دا یوخ خریداری
دیلیم تورکی، سوزیم ساده، اوزوم صهبایه دلداده
منیم تک شاعیرین البت، اولار کاساد بازاری
آنا دیلیمیز:کئچن ایل بولگه، دورمادان بیر بورولقانا بورونموشدو. بورولقانین نئجه، هاچان دوراجاغینی دئمک اولمور. دونیادا یئنی‌لیک صنعتدن، توپلوما، توپلوم‌لاردان دوولت‌له‌ره، دوولت‌لردن اولترا گوج‌له‌ره هیزلا سوروردو. اوزایا اوزاندیغی‌نی بیلمیرم. بلکه چوخدان اوزانیب منیم خبریم یوخدور.
۱۳۹۵جی گونش ایلی ده ۱۳۹۴-جی ایله تای چالیشدیم بالاجا اولموش اولسا دا، الیم چاتان واقت‌لار بیر سوزلر حاضیرلایام و یا یازام. ،(نه من، بلکه بوتون دوستلاریمیز آراز آذربایجان درگی سینده اولان لار…محترم مدیر مسئولوموز آقای ابراهیم آقازاده،خانم خاوه،خانم شکری،و بوتون عزیزلریم) بئله بیر یازمالارا چوخلارینین سوزلری واردیر. دئییلن سوزلره باخمایاراق یازماین دالیسین توتدوم. دوزون سوروشساز بیرینین خوشو گلیب-گلمه‌دیـیی اوچون یازمیردیم. ایسته‌دیـییم سونوجا چاتدیم. یازمادیغینیز واقت، هئچ کیمین سیزیله ایشی اولمایاجاق، بیر ایش گورمه‌دیـیینیز واقت هئچ کیمین سیزیله ایشی اولمایاجاق. بلکه بیر-ایکی یازیدا سیزه ال چالالار، آنجاق بیر ایشی سوره‌لی گوردویونوزده ال چالمالار کوببایا چونه‌جک‌دیر. بلکه بو طبیعه‌تین طبیعه‌تی اولا. بئله بیر دورومدان قورتولماغا، سوزلری ائشیدیب، یاخشی یئرلرینی ده‌یرلندیریب، به‌یه‌نمه‌دیـییمیز یئرلرینی نظره آلاراق، اؤز ایشیمیزین دالیسین توتمالی‌ییق. باشقالارینین باشقا گوروش‌لری وارسا، اورتایا قویمالی‌دیرلار. گوروش‌لر توپلاندیق‌دا ایچیندن اورتا بیر گوروشه چاتماق اولار. بئله بیر چالیشمالار، اینسانی گوندمده ساخلاییر. گوندمده اولماغین ایکی اوزو واردیر، بیرینجی‌سی ده‌رینله‌شمه‌یین قارشی‌سین آلیر. یولدان کئچن هر بیر خبر، سس، فیکیر بئینی قاتیر. ایکینجی‌سی گونجل‌لشدیریر(اولوملو اوزو). بوتون یولداشلارا بیر اؤنری واریمدی، یازماقدان قورخماسین‌لار. یازماقدان قورخان‌لار هئچ واقت یازانمایاجاق‌لار. دانیشماقدان قورخان‌لار، قورخدوق‌لاری واقتا دک دانیشانمایاجاق‌لار. هر بیر یازیدا، دانیشیق‌دا یئترسیزلیک‌لر اولار. گرک چالیشاق بو یئترسیزلیک‌لری آزالدیب، آرادان گوتورک. یئترسیزلیک یارانار دئیه یازیب، دانیشماقدان قورخمامالی‌ییق. گلین بایرامدا ائولریمیزله بیرلیکده قورخولاریمیزی دا توکه‌ک.
بیلمیرم، هر بیر قیشین چیلله سیندن سونرا بیر یاز اولار یوخسا یوخ. گوردویوموز دوغادا هر ایلی دورد یئره بولدویوموزده، ایلین سون فصلی قیش آدیلا باشلانیر. قیش بیر زامانلار قاتی اولماغینا باخمایاراق، ایندی یازکیمی اولور. بیز گوردویوموز بیزدن اؤنجَکیلر، قیشلارین نئجه چتین قیش اولدوقلاریندان دانیشیردیلار. اونلار دا اوزلریندن اونجکیلردن ائشیتمیشدیلر. بیزدن سونراکیلار بیزدن قیشا گوره سوروشدوقدا، گوردوکلریمیزله ائشیتدیکلریمیزی دئمیینه اینانیرام. ائشیدنلرین بوینونا دیر اینانیب-اینانمادیقلاری.
بایرام آیینا گلدیکده، قیش قیش اولور اولسون-اولمور اولماسین، بایرام آیی بایرام آیی دیر. دوغا دوغور بایرام اولور. بایرام، دوغانین بایراملیغیندان چیخیب، اینسانلارین بایرامینا چئوریلیر. بایرامدان بایراملار دوغولور.اینسانلار یاشادیقجا بایراملار یاشاییر. اینسانین اصلی بایرامی دیلین دوغولماغیمیش. دیل دوغولماسایدی، دوغا دوغاردی. آنجاق بایرام دوغولمازدی بیزیم اینسانلارا. هر دوغولان بیر جانلینین یازی اولور، قیشی اولور. قیشدان سونرا بایرام آیی اولور. دیلی جانلی وارلیق توتدوغوموزدا، قیشی-یازی اولمالی دیر. سون یوز ایل، بیزیم یئرین دیلی اولان تورک دیلینه قیش فصلی اولموش. چیلله سینه دولموش، کولَیه باسیلمیش. آنجاق اولمه میش. بایرام آیینی گوزلویور، یاز اولسون دئیه، یئنه جانلانسین دئیه.
سوزوم بئله لیر کی:ایل بایرامی یازین گلمه سینی موشتولوق وئریر و اوزوینن ائولره، اوره کلره شادلیق گئتیریر. آمما وطنیمیزین بوگونکو ایقتصادی دوروموندا میلتیمیزین چوخونا بئله بیر شادلیق معنا تاپا بیلمیر. یالنیز اوره کلری سیخینتی، حسرت و نیسگیل ایله دولدورور.معجز آذربایجانین قدرتلی و گورکملی طنز یازاری ایدی کی یوز نئچه ایل بوندان اول بوتون شعر لرینده او زامانین ایجتماعی وضعیندن و خالقین جهالتیندن تنقید ائدیب. خانلارین و پوللولارین ظولمو و یوخسول عائله لرین پیس وضعیتده یاشاییشلاری اونون شعرلرینین اساسی و اونملی موضوع سودور. او جامعه نین طبقه اختلافینی بو ایکی بیت ده کامیل حالدا شرح وئریب. یوخاری دا قید ائتدیگیم بیت لر ده او زامانین جامعه سینی گوستریر کی ایکی طبقه دن تشکیل تاپیب دیر. بیر طرف، خان لار، ملاک لار و تاجیرلر کی جامعه نین رفاه لی و پوللو و ظالیم اقلیت طبقه سی، او بیری طرف ده کی جامعه نین اکثریت یوخسول طبقه سی کی شاعیر اوزو بو طبقه نین نماینده سی دیر.
دوستلار:آذربایجان هر لحاظ دان بویوک بحران ایچینده دیر. بو بحران گیدرک گنیشلیر، بونا گوره آذربایجان قیسا مدت ده بویوک سورونلارلا قارشی قارشیا قالاجاق. آذربایجان جوانلاری ایشسیزدیر، بئکار دیر، بحران ایچنده سیاسی و اجتماعی مسئله لری واردیر. اگر تئزلیکله بیر چاره تاپیلماسا باشقا مسئله لر ده اورتیا چیخاجاقدیر. جوانلار چالیشلرین دیله گتیرمک اوچون آزاد تریبون ایستییر. توتماق، ورماق، زندان، بهتان، افترا و اصیلسیز بیانات ورماق، مسئله نی داها دا چتینلشتیریر.
راحت و خطرسیز یول آذربایجان میلتینین یولونو آچماق و اولارین ایستکلرینه قولاق آسماق دیر. آذربایجان میلتی اوز اوزونو اداره ائتمک اوچون بوتون فاکتورلارا صاحیبدیر. بونون یانیندا آذربایجان میلتی ایران دا یاشیان باشقا میلتلرله دوسلوق و قارداشلیق ایچینده بیر آرادا یاشاماق ایستیر، بو استقامت ده بوتون خلقلرین حق و حقوقونا سایغیلیدیر، اونا گوره ده اوز حق وحقوقونا سایغی و حرمت ایستیر.
بایرام گونلری تامام گوزه لیگینن؛ یوخسول عائله لره بیر نیسگیللی زاماندیر و تاسف کی ایندی ایراندا بو طبقه اکثریت دیلر! معجز بو نیسگیلی، بو حسرتی و بو دردی اگر چه طنز صورتینده، آمما نه گوزل سویله ییبدیر! بیر حالدا کی بیز مونترالدا یاشایان ایرانلی لار، ایراندان اوزاق توشمک اوچون، بو دردین آجیسینی آنلیا بیلمیریک.
سون سوز:
اینسانا قالان، نئجه یاشماق دیر. نئجه یاشاماق ایسه، دوروموندان آسیلی اولور. هر نه دورومدا اولور اولسون، یئنه، بیر بالاجا نئجه یاشاماق سئچیمی اونا قالیر. یاشاماغی سئچدی‌یی سورج عؤمروندن سوووشور.
عومرونون بیر قیسمی‌نی، حالسیز‌لیق‌لا اوغراشان‌لارا، یاشام طرزی سئچیمی قالمیر. ایسته‌مه‌دیـیی واقت، یاشام طرزینین سئچیمی سونوج‌لانمادان حایات بیتیر. گئری‌یه قالان سئچیمی اولمایان بیرلری‌نین خاطیره‌لری قالیر دئمک ایستیردیم کی قالمیر. تکجه سئچیم‌لری‌نی بللندیرن‌لرین خاطیره‌لری قالیر. دوغولماق‌لاری‌لا اولمک‌لرینی بللندیرن‌مه‌سه‌لر ده، نئجه یاشادیق‌لارینی بللندیریرلر، نئچه ایل یاشادیق‌لارینا باخمایاراق!یئنی ایل قوتلو اولسون….
نوشته شده توسط admin در پنجشنبه, ۲۶ اسفند ۱۳۹۵ ساعت ۸:۱۴ ق.ظ
