- آراز آذربایجان – روزنامه خبری آذربایجان غربی - http://www.araznews.ir -

بو ائوین چیراغی یانماز اولوب بو گئجه

Posted By admin On خرداد ۱۷, ۱۳۹۶ @ ۴:۵۰ ق.ظ In آنادیلیمیز | No Comments

سیدرضا حسینی مرند
آنادیلیمیز: ائوین تئلفونو دؤنه‌لرله زنگ چالیر. زنگین سسی بیر آن دایانیب یئنیدن یوکسه‌لیر. آنجاق کیمسه جواب وئرمیر. بو قوجا آرواد‌هاردا قالیب؟ اولمایا یوخو درمانلاری یئنه اونو آغیر یوخویا باتیریب؟ اولمایا یئنه تئلفون خطی حیطده‌کی سیمدن قیریلیب اونو تئلفونسوز بوراخیب. اولا بیلمز بو سس‌هاردان باغیریر بس؟ دئمک اولماز قاپیدا قونشولارلا قونوشا بیلر! قاپینین اؤنونده بیر یئر آلتی سالاراق توخونما توخویور. قونشولاردا ایستر-ایسته‌مز باشینا توپلاشارلار. چانتاسیندان بیر مین تومنلیک چیخاریب قونشو اوشاغینا دئییر گئت‌هامییا آیین-اویون آل گتیر. قونشو اوشاغی‌ایسه: آخی آی آبا بونا نه وئررلر کی؟
آبا: نیه بالا اون مین تومن دی‌ها؟– : یوخ آبا بو تکجه مین تومندیر!
– : ویییییی…من دئدیم به اون میندی…
– : بالاجا چانتانی بیر داها اویان بویان ائله‌ییب بیر اون مین تومنلیک وئریر اوشاغا.
– : وار یوخوم بوایدی، قالانین گتیر ساباح چؤره‌ک‌ آلاجاغام.
کوچه ده اوتورماق چاغی اؤتوشوب. گون باتیب، قاش قارالیب. اولا بیلر کوچه‌نین باشیندا اولان مسجیده گئتسین. گئدیب، قاییتماسیدا اونون یئریشیایله بو چاغادک چکر. نه بیلیم اوشاقلارینین ائوینه‌ده گئده بیلر. هردن بو ایش باشینا وورار. آنجاق سون زامانلاردا گئت-گلینین چتین اولدوغوندان بو ایشی آزاراق ائدیر. هردن داریخما جانینی سیخاندا قونشولارین ائوینه گئدیر. تئلفون دورمادان زنگ چالیر. سسی ائوی آلیب باشینا. تئلفون دالیسیندا بو اوزدن گئتمه‌ین آدام کیمدیر؟ کسین اوشاقلاریندان بیریدیر. بو بیر آنادان نیگاران اوشاغین زنگیدیر. اؤزگه‌سینه نه گره‌کیر بئله دیره‌نیش؟ بو جوابسیز تئلفونون ندنینی بیلمک اوچون ایندیجه اوشاقلارین ماشینی قاپینین اؤنونده دایانار.
-: آی آبا تئلفونا نیه جواب وئرمیرسن، اؤلودوک نیگارانچیلیقدان…!
آبا توخونما الینده چاشقین باخیشلا- : آی بالا‌هانی؟ بو من، بو دا تئلفون!‌هانی آخی؟
-: یئنه سودان، چایدان تؤکموسن اوستونه، ایشدن سالیبسان دا اونو.
سایمازیانا باشینی توخونما توخومایا قاتیب دئییر- :یوخ آبا جانی، سحردن اؤزومده هئچ کسی توتا بیلمیرم.
بو زنگین سسی، بو زنگین اییه‌سی اوزدن گئدهسی دئییل. آردی کسیلمه‌دن بو ائوین نومره‌سینی توتور. جانیم اؤرپه‌شیر بو دهشتلی سسدن. سانکی قارانلیق بیر اوچورمدان قالخاراق، ائوین تاوانیندا گزیشیب، سونوندا بیتیر. سانکی آبا بئینیمده توخونما توخویور. دویون-دویون دویونله‌ییر بئینیمی. توخونما میلینی بئینمیه سوخاراق بئینیمین ایپلرینی هؤرور. توخویوب-توخویوب منی دار آغاجیندان آسلاییر. آبا جانی داها بوغولدوم. داها یئتر…
قارانلیق دوشورسه‌ده بو ائوین چیراقلاری یاناسی دئییل. ایلک دئدییم کیمی‌هانچی یوخو درمانی آبانی درین یوخویا آپاریب. یوخسا بو آرواد نامازسیز باش یاستیغا قویمازدی. اوتوروب دورماغی چتین اولورسادا بیر صندلده نامازینی قیلاردی. ندن آخی بو ائوین چیراغی بئله یانماز اولوب بو گئجه. حیطده‌کی اَریک آغاجی یاز یئلی‌ایله اَسینیر. بو ایل ایلک دؤنه آغاج چاققالا گتیریب. آبا اونلاری گؤزلری اوسته ساخلاییر. یاپراقلار آی ایشیغیندا پیر-پیر پیریلداییر…
اَه…داها یورولدوم بوش –بوشونا یازماقدان. بوش بوغازلیغا گوجوم قالماییب. تئلفونون سَسینی کَسیرم. داها یئتر بو اویونبازلیق.داها یئتر بو اویونبازلیق. داها یئتر ظارافات ائتدیین. ندن زنگ ائله‌ییرسن او ائوه. الیمده‌کی موبایل یورولدو بو ایشدن. کوچه‌لرده گزیشیب تکرار، تکرار .۰۴۱۴۲۲۳۹۷?? نومره سینی ندن توتورسان. قینامایین منیم بو دلیلییمی. بیر نوه ندن بویوک آناسینا زنگ ائله‌یر؟ ایسته‌ییرم تکجه بیر داهادا دئسین: قاداسی نئجه‌سن، گیلم قوربانین اولوم…
نه یازیق آرتیق بیر هفته اؤنجه اونو قبریستانلیقدا باسدیرمیشیق…


Article printed from آراز آذربایجان – روزنامه خبری آذربایجان غربی: http://www.araznews.ir

URL to article: http://www.araznews.ir/%d8%a8%d9%88-%d8%a7%d8%a6%d9%88%d9%8a%d9%86-%da%86%d9%8a%d8%b1%d8%a7%d8%ba%d9%8a-%d9%8a%d8%a7%d9%86%d9%85%d8%a7%d8%b2-%d8%a7%d9%88%d9%84%d9%88%d8%a8-%d8%a8%d9%88-%da%af%d8%a6%d8%ac%d9%87/

Copyright © 2013 آراز آذربایجان - روزنامه خبری آذربایجان غربی. All rights reserved.