بایرام دب لری
حاضیرلایان:اکبرسعادت
آنا دیلیمیز:شال ایسته دیم من ده، ائوده آغلادیم، بیر شال آلیب تئز بئلیمه باغلادیم قولامگیله قاچدیم، شالی ساللادیم، فاطما خالا منه جوراب باغلادی، خان ننه می یادا سالیب آغلادی.
باهار هله قدیم زاماندان سئوگی، خئییر برکت آیی اولوب. هامی بو آیدا آرزو نیت ائدیب،اونا گوره ده باهارا باخیب همین ایلین برکتلی اولاجاغینی تخمین ائدیب بابالاریمیز. نووروز بایرامی بوتون دونیا تورکلرینی بیر-بیرینه باغلایان بیر آتشدیر،هئچ سؤنمه دن ایللرجه یانیر. یاز باشقا فصیللر کیمی گلیشینی اولجه دن خبر وئرمیر. آستاجا گلیر هر اوجاغا،اوز یاشیل اؤرپگینی هیسس ائتدیرمه دن سالیر طبیعته. اینسانلاردا روح یوکسکلیگی یارادیر،سئوینج بخش ائدیر،سئومک سئویلمک ایستگی آشیب داشیر. بیر کیشی ائودن چیخارکن سادجه، او گون ائده جگی ایشلری، بیر قادین ایسه، سحر اویاناندا او گونو نئجه گوزل ائده بیله جگی حاقیندا دوشونور.
بلکه بونا گوره باهار فسلینی قادینا قیزا بنزه دیرلر،چونکی حیاتیمیزی گوزللشدیریر باهار. نیشانلی قیزلار:بایراملیق عادته گوره ، نووروز آخشامی نیشانلی قیزلارین آدینا اوغلان ائوی طرفیندن گتیریلن بایرام سووقاتی ساچاقلی تیرمه شاللا اورتولموش خونچالار ، زرلی بوخچالار یان – یانا دوزولور. سووقات ایپک پارچا ، باش یایلیغی کلاغایی ، زینت اشیالاری ، موختلیف ” بایرام یئمیشی ” قیرمیزی آلما ، رنگبرنگ یومورتا یئددی نوع شیرنیات و س عیبارت اولور..
قدیم‌لر داملاردا بیر بالاجا پنجره‌یه بنزر قاپی(دربچه) اولاردی، اورادان هم ایشیق گلردی همی‌ده ائوین توستوسو چیخاردی. اونا گوره آداخلی اوغلانلار آخرچرشنبه آخشامی اود یاندیرما مراسمی قورتاراندان سونرا آخشام چاغی، قاش قارالاندا، اوز نیشانلی‌سینین ائولرینین دامینا چیخار، او باجادان بیر شال (برَک)کی قاباقجادان اوز نیشانلیسی توخویوب و اوغلانا وئریبدیر، ائوین اورتاسینا ساللایار. قیز و قیزین آناسی‌دا بیلرلر، بو شال او آداخلی اوغلانین شالیدیر. او آن دا هر نه، اوغلانا چرشنبه‌لیک وئرمه‌لی دیرلر، او شالا باغلایارلار، اوغلان شالی داما چکر و شئیلری گوتورر گئدر.دئمه‌لی‌یم‌کی چوخ اوغلانلار نیشانلی اولمادان قاباق، سئودیگی قیزین اوزونو تکجه گوروب دانیشا بیلمه‌دیگینه گوره و اوندان بیر هن آلماغا امکان اولمادیقدا، بو شاللاری او باجادان‌ساللایاردیلارکی، قیزین اوزوندن و آناسیندان‌‌‌دا راضی‌لیق آلسینلار. هر حالدا شال صاحبی معلوم اولمالی‌ایدی.
آداخلی اولمایان اوغلانلار سئودیگی قیزین ائوینه شال ساللایاندا، قیزلار نظرلرینی بئله سؤزلرله بیان ائدردیلر.
دیگر خالق بایراملاریندا اولدوغو کیمی نووروز بایرامیندا دا آلنینا ، آیاقلارینا خینا (هنا) قویولموش ،بوینونا قیرمیزی پارچا سارینمیش زینقیروو آسیلمیش توغلو ،قوچ دا آپاریلیر. گلنلر بو عزیز بایرام موناسیبتیله گوزایدینلیغی وئررلر بیر – بیرینی تبریک ائدرلر ، ائل آلقیشلارینا اوز توتارلار:بایرامینیز موبارک نئچه – نئچه بئله بایراملارا چاتاسینیز! عومرونوز – گونونوز باهار عطیرلی اولسون اوزونوزه خئییرلی ،نورلو صاباحلار آچیلسین ، دئیرلر. ائو گورم نووروز بایرامی گونلرینده تزه ائوه کوچنلری تبریکه گئدرلر . یئنی ائو تیکنلر جهد ائدیرلر کی ، نووروز بایرامینا یاخین کوچوب اورادا یئرلشسینلر . ایناما گوره یئنی ایلین تزه ائوده قارشیلانماسی عاییلهیه اوغور، خوشبختلیک گتیرر قوهوم – عقربا دوستلار -یاخینلار تزه ائوه کوچنلری هدیهلر و بایرام سووقاتلارییلا تبریکه گلیر ،ائو صاحیبینه جانساغلیغی ،خئییر – برکت ،خوش گونلر آرزولاییرلار. سونبول خونچاسی نووروز آخشامیندا یاشلی اولانلارین ائوینه آپاریلان پای خونچادا نووروز بایرامی سوفره سی اوچون حاضیرلانمیش نعمتلر ،گویردیلمیش سمه نی ،عاییله عوضولری نین سایی قدر شام ، سمه نی اولماقلا برابر بیر قورو بوغدا سونبولو ده اولور . بو سونبول ائوه برکت ، آرتیم پایی اولاراق گتیریلیر.
سمنی پیشیرمه ک:ایلین سون گونلرینه یاخینلاشدیقی زمان آذربایجان خانیملارنین بیرلیکده سمنی پیشیرلر. اسکی دونملردن بری بیرچوخ عنعنه و رسیملرله بیرلیکده بوگونه گلیب چاتان مینلرجه دب دن بیر اولان سمنی پیشیرمه دبی چوخ قدیم بیر تاریخه و رسم دایانیر.تورکلرین ان اسکی بایرامی اولان و بیر چوخ خلقه تقدیم ائتدیکلری نوروز بایرامینین باش تاجی و ان اونملی سیمگه لریندن بیرسی سایلان سمنی پیشیرمک دبی تورکلر آراسیندا اوزلیکله آذربایجان خلقنین گوزل و ماراقلی دبلرندن دیر. “هفت البویود”ون ایکینجی هفته سنین سون گونلرینده ائو خانیملاری بوغدا بئچردمگه باشلارلار.بیر نئچه مجمه ای ایچینه بوغدا توکوب سواردیقدان سونرا اوستونه بیر نازیک اورتویله باسدیریب چنجره کناریندا گون دوشن یئره قویارلار.بیرنئچه گوندن سونرا بوغدالار باشلارلار “چیرتداماق”و بالا-بالا آغرماقا باشلارلار.بو زمان بوغدالارین اوستوندن نازیک اورتونو گوتوروب بیر –ایکی گون ده ساخلارلار.بوزماندان سونرا بوغدالاری گوتورب ازدیکدن سونرا بیر توربادان سولارنی چکمه گه باشلارلار بیر نئچه دفعه بوایشی گوروب بوتون بوغدالارین سولارینی آلارلار.سونرا بوتون بوغدا سولارنی قازانا توکوب قیسیقلی اوددا پیشیرلر.سمنی قازانی قایناماقا گلن زمان اونون اوستون چکیب بیر جانماز،تسبح،آینا،قرآن سفره سی آچیب قازانی اوز باشینا بوراخیرلارو هامی اوزانی ترک ائلیر.بئله اینانج واردیر کی سمنی قایناقا گلن زمان حضرت فاطمه (س)گلیب سومنی نین دادین و شیرینلیقین اونا وئرر.سومنی پیشدیکدن سونرا اونو پایلاماقا باشلارلار.سمنی قازانینا “قابیقلی بادام”دا سالینار و اینانج بئله دیر کی بوبادامیلاری هرکس پول کیسه سینه قویورسا پولو برکت تاپیب آرتار. آذربایجانلیلاراوچون چوخ تانیش اولان سمنی ماهنی سی؛ ان گوزه ل دویغولار و احساسلارالا بیرلیکده ؛سمنی نین نه قدر آذربایجانلی لار اوچون اونم داشدیگیمی گوستریر.
گؤی بئجرتمک : ائلین اولوب-گئدن‌لری ده بایرامدان پایلارینی آلارلار. ایلین آخیر جوما آخشامی، یاددا قالان گئدن‌لری خاطیرلاماق اوچون، قبیر اوست‌لرینه گئدیلیب، فاتیحه اوخونوب، خاطیرلانارلار. بایرامین اول گونو اولولری اولان‌لار گئدیلیب باش ساغلیغی وئریرلر. قارا بایرام‌لاری چیخمایان‌‌لارا قارا بایرام توتورلار. هر کس ته‌زه پالتارین گئییب، قوناق‌لیغا گئدر. شال ایسته دیم من ده، ائوده آغلادیم، بیر شال آلیب تئز بئلیمه باغلادیم، قولامگیله قاچدیم شالی ساللادیم، فاطما خالا منه جوراب باغلادی خان ننه می یادا سالیب آغلادی.
نوشته شده توسط admin در شنبه, ۱۵ اسفند ۱۳۹۴ ساعت ۳:۵۳ ب.ظ
یازقیلار چوخ گوزه ل و چوخدا فایدالی. بو یازگیلاری یازان اللر وار اولسون. سولدوزدان
یاشاسین شاهین بئی