بابالئیسان ایله ورقا
گئجه – گوندوز آستاناندا – درینده اؤزون یئتیش امدادیما یا ربیم مشکل ایشلر چتین دگیل الینده اؤزون یئتیش امدادیما یا ربیم صدق ایله چاغیررام شاه حیدری حسینی، قاسمی، بیر ده اکبری عباس کیمی علمداری – سروری اؤزون یئتیش امدادیما یا ربیم من ورقانین قوللارینی باغلارلار اودلو گرزو باشیم اوسته توولارلار
قاباقلاییب قیل کؤرپوده ساخلارلار اؤزون یئتیش امدایما یا ربیم .
بو سؤزلری دئیه – دئیه گلیب چاتدی ائولرینه وسایلی حاضر ائدیب گئتسین. آناسی چاغیردی:” اوغلوم !هارا گئدیرسن؟”
دئدی: آناجان !بیر اوزاق سفره گئدیرم دئدی: اوغلوم !اوستادین بیلیر؟
ورقا یالاندان دئدی:بلی، آنا، بیلیر. آمّا آناسی سسلندی :اوغلوم !نهیه گئدیرسن؟ هاچان گلهجکسن؟ دئدی:آنا !قولاق آس! بوگون بیر جماعت گؤردوم کلامالله الیندهدیر
دیللرینده آللاه آدی باخ بسمالله الیندهدیر
یار بوینوما قویدو منّت لعللره وئردی قیمت یئددی سقر – سگگیز جنّت کلیدی شاه الیندهدیر
قیل نامازین ذکرین ائله بیر آللاهین شوکرون ائله گئتمگیمین فکرین ائله گلمک آللاه الیندهدیر.
ورقا دوشدو دوغرو راها
اوز چئویرر قبلهگاها
شوکور اولسون او درگاها
یار شیروانشاه الیندهدیر.
ورقا وسایلین گؤتوروب آناسیدان وداعلاشیب تبریزدن چیخیب شیروانا یولا دوشدو. منزل به منزل طی منازل بیر مدت یول گئدندن سونرا قاباقدا یول ایکی اولدو. ورقا باخدی هم آجدیر هم سوسوزدور همده یولو تانیمیر. بئله باخاندا گؤردو یولون اوست طرفینده بیر چوبان داوارین یاتیردیب اوجاغین قوروب. قدیمدن دئییبلر آجیخدین چوبانا، یورولدون سروانا. اودور کی ورقا یولدان آرالانیب چوبانا ساری گئتدی چوبان بیر زامان گؤردو بیر آتلی گلیر بیر یئکه چوماقدا الیندهدیر. اؤز – اؤزونه دئدی: بو حتماً گلیر داواری منیم الیمدن آلا. چوبانیندا چوماغی وار ایدی چوبان چوماغین گؤتوروب اوزولدو ورقانین اوستونه. ورقا گؤردو چوبان گلیر بونو وورا سسلندی چوبان قارداش! من آجام سوسوزام، یولو دا تانیمیرام سنه پناه گتیرمیشم. چوبان دئدی: اگر منه پناه گتیریبسن بس او الیندهکی چوماق نهدیر؟
ورقا گؤردو بو چوبان سازدان بیر شئی بیلمیر دئدی: چوبان قارداش! بونون آدی همدمدیر من له دانیشار چوبان دئدی: قارداش او دا چؤرهک یئیهر؟ ورقا گولدو سازی ائندیریب سیملرین کؤکلهدی یاواش – یاواش سازی دیللندیردی سونرا دا اوزون چوبانا توتوب بئله دئدی :
باشینا دولانیم گول اوزلو چوبان بو یوللارین هانکیسینا واراییم ؟
دولانیم باشینا من آلیم قادان بو یوللارین هانکیسینا واراییم ؟
چوبان دئدی: ایندی بیلدیم سن آشیقسان چوخدا گؤزل اوخویورسان گنهده واریندیرمی بو سؤزلردن؟ ورقا دئدی: قارداش! بیر قولاق آس. آلدی دوباره: باهار اولسا آرتار چایلارین بهری قیزیل گوله بنزر یاریمین تهری سندن خبر آلیم چؤل شیروان شهری بو یوللارین هانکیسینا واراییم ؟
چوبان دئدی: مگر آشیق، سن جانیندان دویوبسان شیروانا گئدیرسن؟ گئتمه! ورقا دئدی: یازیق ورقا باخ فلگین قهرینه تمام ایشلریمیز دوشدو تهرینه نابلدم چؤل شیروانین شهرینه بو یوللارین هانکیسینا واراییم ؟
چوبان دئدی : آشیق ! من دئییرم شیروان شهرینه گئتمه، واللاه بو یوللارین ایکیسیده شیروانا گئدر بیری داغ یولودور بیری باغ یولودور. ایندی کی سن گئدیرسن شیروانا باغ یولون گئتمه چون پریزادین باغی یول اوستهدیر. سنی گؤرمک همین توتاجاق او بیری آشیقلاریندا قانینا باعث اولاجاقسان آما داغ یولو ایله گئدیرسن گئت ایشینی انجام وئرندن سونرا تئز قاییدیب گلرسن و او دا سنی گؤرمز. ورقا سوروشدو چوبان تمام احوالاتی اولدن آخرا ورقایا نقل ائلهدی. ورقا ائله آللاهدان بونو ایستیردی اونون آختاردیغی ائله بو ایدی. اودور کی چوباندان آیریلیب سوردو باغ یولونا. ورقا یولو قاتیب قاباغینا گلمکده اولسون سیزه خبر وئریم شیروان ائلیندن .
شیروان شاهینین بیر قیزی وار پریزاد آدیندا آشیقلارین دوشمنیدیر. اونون بیر وزیری ده وار مریساخان آدیندا مریساخان ۴۰ آتلی ایله چیخیب شهرین اطرافینا اووچولوغا، یوللاری دوشدو ورقا اولان سمته. گلیب، گلیب شهره بیر آز قالان بونلار قاباق – قارشی گلدیلر. مریساخان الی سازلی بیر جاوان آشیق گؤرن کیمی سسلندی: اوغلوم! هارا گئدیرسن؟ جواب وئردی: قوربان! بو شهره گئدیرم .
مریساخان دئدی: اوغلوم، گئتمه گل ائله بورادان قاییت .
ورقا دئدی: آغا نیه؟ دئدی: اوغلوم سنین بو گئتمکده زیانین وار…
ورقا قبول ائلهمهدی. مریساخان اوزون توتوب ورقایا گؤرهک نه دئییر؟ و ورقا اونا نه جواب وئریر؟ مریسا: بیر سؤزوم وار سنه آلا گؤز جاوان زیانیندیر بو مکانا گئدیرسن یاندیرارلار اود سالارلار جانینا زیانیندیر بو مکانا گئدیرسن ورقا :
دولانیم باشینا گول اوزلو آغا
بیر سیرریم وار بو مکانا گئدیرم انشاللاه بو یئرده قالمام آوارا
بیر سیرریم وار بو مکانا گئدیرم مریسا:
عبث یئره ائیلهمیسن خیالی گتیردین باشینا سن قالماقالی چکرسن الیندن جنگ – جدالی زیانیندیر بو مکانا گئدیرسن ورقا :
بیر گؤزل سئومیشم آدی پریخان نامهده یازیبدیر دورما گل شیروان عکسینده گؤندریب نشان بو نشان بیر سیرریم وار بو مکانا گئدیرم مریساخان گؤردو بو اوغلان گئدهجک آما قوْی سوروشوم بو کیمدیر؟ اوستادی کیمدیر؟
مریساخان دئیهر دیء نهدیر آدین ؟
کیملره یئتیشر اصل نژادین ؟
هارادیر مسکنین کیمدیر اوستادین؟ زیانیندیر بو مکانا گئدیرسن ورقا :
لئیساندیر اوستادیم ورقادیر آدیم شاهلار شاهی اؤزو وئرر مرادیم اصلیم ایرانلیدیر تبریز بنیادیم بیر سیرریم وار بو مکانا گئدیرم .
بابا لئیسان آدی مریساخانین قولاغینا دگن کیمی بونون کیم اولدوغونو بیلدی چونکی بابا لئیسانین آدی هر یاندا توپ گوللهسی کیمی سسلنمیشدی .
مریساخان دئدی : ایندی بیلدیم نهدن اؤترو گلیبسن، آداملاریمدان بیرین سنه قوشورام سنی آپارسین منیم باغیما سن اوردا قال تا من سفردن قاییداندان سونرا اؤزوم سنی پریزاد ایله دئییشدیریم .
مریساخان ورقایا بیر نفر قوشدو دئدی بونو آپار منیم باغیما دیء من گلینجه بونا یاخشی یئتیشسینلر همین آدام ورقانی گتیریب دوز مریساخانین باغینا. باغبانا تاپشیردی کی خان دئییر من گلینجه بونا قوللوق ائله. بونو دئییب قاییتدی باغبان ورقایا یئمک – ایچمک وئردی دئدی اوغلوم باغدا دولان آنجاق هر یانا گئتسن گنهده گل بورایا. ورقا باغدا دولانماغا چیخدی. باغ نه باغ ! بهشتین بیر گوشهسی آدام بو خیاواندان او خیاوانا کئچنده یولون ایتیریر. ورقا دولانا – دولانا گلیب چاتدی چار حوضون باشینا. الین – اوزون یویوب بیر قیزیل گولون دیبینده اوتوردو. ورقانی یوخو آپاردی. ورقا بورادا یاتماقدا اولسون سیزه خبر وئریم گولستاندان، مریساخانین بیر قیزی وار گولستان آدلی، گولستان قیرخ کنیز – دایه باشیندا گلیب دولانماغا گلیب گلیب باغین اورتاسیندا اولان ساختمانین یانینا یئتیشیرلر ساختماندان بیر آز آرالی همین چارحوضدور. گولستان دئدی : قیزلار! سیز گئدین ایچری من بیر ال – اوزومو یویوم گلیم. گولستان ال – اوزون یوماغا گلدی حوضون باشینا ال – اوزون یودو قاییداندا گؤزو ساتاشدی قیزیل گولون یانیندا یاتان جاوانا. جاوان نه جاوان ! ائله بیل آی پارچاسیدیر. آدام دئییر یئمهییم.
ایچمهییم بونا باخیم گولستان بونو گؤررکن دوز گلدی ورقانین باشی اوسته ایندی ایستیر اونو اویادا آما اونو نه جور اویاداجاق بونا معطلدیر گولستان گؤردو اگر چاغیرسام قیزلار ائشیدرلر اوغلان دا دیسکینر، قورخار اودور کی دئدی قوْی نارین – نارین شعر ایله اویادیم گولستان بونا فیکیرلشیب یاسمن تئللریندن آییریب آلدی گؤرهک ورقایا نه دئییر ؟
نوشته شده توسط admin در دوشنبه, ۲۹ مهر ۱۳۹۲ ساعت ۱۲:۴۲ ب.ظ