کمال عبدالله‌
آنادیلیمیز:. گویله یئر، داغلا دنیز، آغاجلا چای، انسانلار -قادینلار، کیشیلر، بالاجا اوشاقلار، کورپه‌لر، قوجالار، قاریلار، ائولر، بینالار، یوللار، تارلالار، مئشه‌لر، بولاقلار، ایتلر، پیشیکلر، آتلار، قویونلار، اوکوزلر جامیشلار. . . هر شئی بیر-بیری‌نین ایچینده ایدی، هر شئی سانکی بیرنفسه دئییلمیش محتشم بیر سوزه چئوریلمیشدی.
بو سوز اولدن وار ایدی، اولین ده اولینده وار ایدی، ساده‌جه، اونو گورمک، دویماق، هنیرتیسینی، ائشیتمک‌هامی‌یا هر زامان قسمت اولموردو. او سوز آنلاشیلمازدان تدریجاً آنلاشیلانا چئوریلن موسیقی کیمی‌دوغولوردو. او وار ایدی، اونو هئچ کیم ائشیتمیردی.
سامیر غریبلی یوخونو حیات کیمی‌یاشاییردی. اونون ایندییه قدر گوزلری سانکی قاپالی ایدی، ایندی-ایندی گورمه‌یه باشلامیشدی و گوردوکلرینی اوزوندن باشقا دا کیمسه گوسترمک ایسته‌ییردی. »باخ، دقتله باخ، بودور سنه دئمک ایسته‌دیکلریم، گورورسن او بوتوو یوخ دئییل، وار. سن بونو گورورسن؟ بس دئییردین سئومیرم سنی؟! ایندی ایناندین؟!«
یوخودا گوردوکلری اول گوردوکلریندن چوخ فرقلی ایدی. اما فرق نده ایدی -بونو درک ائده بیلمیردی. بونو سوزه گتیرمک، سویله‌مک آسان دئییلدی. بلکه هئچ ممکن دئییلدی.‌هارداسا بئینی‌نین درینلیینده او حس ائدیردی کی، ایندی گوردوکلری‌نین رنگی یوخدور. رنگ آنجاق بیردن چوخ اولان ندسه موجود اولا بیلر. ایکینجی اولماسا رنگلر مختلفلشمز، باشقا اولان نَیینسه اوستونو اورته بیلمز. یوخودا دا ایکینجی یوخ ایدی، هر شئی بیرین، واحدین ایچینده ایدی. ایکینجیسیز دنیا وارمیش. وارمیش. اولمایا بیلمزدی. اما بونا اینانانلار یوخدو.
جمیله ده یوخو گوروردو. او، یوخوسوندا گوروردو کی، عومور-گون یولداشی سامیر فضادا فیرلانا-فیرلانا اوندان اوزاقلاشیر، ایکیلشیر، حتی اوچلشیر، دوردلشیر. . . »بو قدر سامیر منیم نَییمه گرکدیر؟! منه بیری بسدیر. بونلارین آخی بیری منیم سامیریمدیر، او بیریلر منیمکی دئییل.‌هانسیدی او؟!‌هانسیدی منیم سامیریم؟! منی سئون، منی دنیالار قدر سئون سامیریم‌هانسیدیر؟« بو سواللارین آراسیندا جمیله عمللی-باشلی چاشیب قالمیشدی.
یوخولار ائله اونا گوره یوخودور کی، سحریسی گون اونودولماغا محکومدولار. گئجه گلدی و یئنه ده همن »سئویرم-سئومیرم« صحبتی یاتاقدا باشلامادیمی، باشلادی.
اوجسوز-بوجاقسیز فضادا ایسه بیر-بیری‌نین ایچینده ان مختلف ماهیتلر اوچور، بیرلشیر، آیریلیر، یئنه بیرلشیر، بیر محتشم واحد عمله گتیریردیلر. البته‌‌ کی، سامیرلرین‌هامیسی بو اوچان واحدین ایچینده ایدیلر. بیریندن باشقا. بو سامیر اوز ائوینین مطبخینده اوتوروب سحر یئمه‌یینی یئییردی و جمیله‌نین دمله‌دیی چایی گوزله‌یه-گوزله‌یه گئجه گوردویو یوخونی جدی-جهدله یادینا سالماغا چالیشیردی.