ایشیق
حاضیرلایان:اکبرسعادت
آنا دیلیمیز: ساعات ۱۲دن اویانا کئچمیشدی . بیر یاندان هاوانین ایستی سی او بیر یاندان دا اود وورولان تگرلرین توستوسو آدامی لاپ قیزیشدیریردی . آیدین برک یورولموشدو آما یئنه ده دورمادان شعار وئریب تگر اودلاییردی . بو گون بیر بانک دا اودلامیشدیلار . بوتون بازارین توکانلاری باغلی ایدی . خیاواندا هئچ بیر ماشین گل ـ گئت ائله میردی . گوز ایشله دییی قدر آدام ایدی کی اللرینی یومروق ائدیب باغیرا ـ باغیرا شعار وئریردیلر .
سربازلار او ساعاتا کیمی نئچه دفعه گویه گولـله آتیب میلتی قورخوتماق ایسته میشدیلر . آنجاق میلت دورمادان شعار وئریردی .
داها هئچ کیم گولـله سسیندن قورخوب قاچمیردی . مسلسللرین سسی میلتی قورخوتماسایدی دا آنجاق بیر نئچه افسرین سربازلار آراسیندا اویان بویانا قاچیب اونلارین قولاغینا پیچیلدالاشمالاری بیر حادثه دن خبر وئریردی .
او گون سحردن حاج میر سلیم ده اوردا ایدی . عباسینی چیخاردیب گنج لرله برابر میلتین قاباغیندا یئریییردی . تگر اودلامادا اونلارا یاردیم ائدیردی . بو آیدینا چوخ خوش گلیردی . اورکدن سئودییی کیشی ایندی اونونلا برابر تظاهراتدا وار ایدی و اونا یاردیم ائدیردی .
نظامی ماشینلار آستا ـ آستا میلته ساری گلمه یه باشلامیشدیلار و اونلارین دالیندا سنگر توتان سربازلاردا ماشینلارلا برابر قاباغا سورونودولر . بو مشکوک ایشلر حاج میر سلیمی داهادا آرتیق نگران ائدیردی . نهایت حاج میر سلیم له بیر نئچه آغ ساققال کیشی بیر یئره ییغیشیب نه ائده جکلرینی فیکیرلشمه یه باشلادیلار .
اونلارین بیر یئره ییغیشماقلاریندان نئچه دقیقه اؤتوشمه میشدی کی بیردن گولـله یاغیشی میلتین اوستونه یاغماغا باشلادی . گولـله سسی ایله الله اکبر سسی بیر ـ بیرینه قاریشمیشدی . بازار آغزی قان آغلاییردی . آمبولانسلارین آژیری یارالانانلارین قیشقیرتیسی و ملتین شعار سسی گویلری درده سالمیشدی . بیر آنین ایچینده یوزلر جاوان شهید اولدو یارالی لار میلتین اللری اوستده آمبولانسلارا ساری آخیردیلار . آیدین بیر دووارین گوشه سینده اوزونه یئر تاپیب اورا سیغینمیشدی اما حاج میر سلیم هله ده قاباقلاردا ایدی . تگرلردن قالخان قارا توستو هردن اونو آیدینین گوزوندن آلیردی . آیدین یامان دیسکینمیشدی . بیلمیردی نه ائتمه لی دی . بیر دفعه ده یئل قارا توستولری آیدین لا حاج میر سلیمین آراسینی کسدی . همن آن نئچه گولـله نین آتیلماسی بیر کیشینین الله اکبر سسینه قاریشدی . اونون توتقون هابئله یانیقلی سسی آیدینین قولاغینا چوخ تانیش گلدی . بیر نئچه آندان قارا توستولر یاتاندان سونرا آیدین گوزونون قاباغیندا گوردویو منظره دن قورویوب بیر یئرده قالدی .
حاج میر سلیم یئره دوشموشدو . یئرده آخان قان حاج میر سلیمین یارالانماسیندان حکایت ائدیر دی . آیدین لاپ گیجه لمیشدی . بیلمیردی نه ائله سین . بیر آز فیکیرلشدی . بونو چوخ یاخشی بیلیردی کی اگر یئریندن دورسا حتماً اونا ساری گولـله آتاجاقلار . آنجاق حاجی نی دا تک قویا بیلمیردی . بیر آن دا بوتون یاشادیقلاری گوزونون قاباغیندان گلیب گئچدی . آتاسی آناسی ، باجیسی ، ایشله ین زامانلاری ، منبر باشیندا حاجی نین سؤزلرینه قولاق آسماسی و گونون باتماسی …
باجی سینی مدرسه یه یازدیرمالی ایدی . ائولرینده چورکده قورتولموشدو . نئچه مدت ایدی ایش سیز قالمیشدی . مسلسللرین نریلتیسی اونو اوزونه گتیردی . حاجی هله ییخیلدیغی یئرده قالمیشدی . بو صحنه یه دوزمه ین غیرتلی آیدین بیردن آیاغا قالخیب حاج میر سلیمه ساری یورومه یه باشلادی . هامی گوردوکلرینه مات قالدیلار . بوتون سربازلارین مسلسللری اونا ساری باخسایدیلار دا آنجاق هئچ کیمین بارماغیندا ماشانی باسماغا گوج یوخ ایدی.آیدین اوزونو حاجی یا چاتدیریب اونو یئریندن ترپتمک ایسته دی . هئچ کیم قورخوسوندان یاخینا گلنمیردی آما آیدین دئیه سن بونلاری گورموردی . او یالنیز حاج میر سلیمی اورادان چیخارتماق ایسته ییردی .
نه قدر گوجو وار ایدی ایشه سالدی کی حاجی نی دالیسینا آلسین . حاجی دانیشا بیلمیردی . هوشدان گئتمیشدی . ائله همن آن ایکی گولـله نین آتیلماسی بیر داها میلتی حئیرته سالدی . آیدین حاج میر سلیمین اوستونه دوشموشدو و اوره ییندن جوشان قان حاج میرسلیمین قانینا قاریشیب آسفالت اوسته سوزولمه یه باشلادی . اوزاقدان بیر افسر سئوینه سئوینه اوز یاراتدیغی منظره یه باخیردی …
آیدینین آناسی چوخ نیگاران ایدی . گئجه ۱۲ ایدی آما هله آیدین ائوه گلمه میشدی . باجیسی پنجره دالیسیندان اوزون کوچه لرینه گوز تیکمیشدی . یای اولسایدی دا هاوا یامان توتقون ایدی . بیر سرین یئل آغاجلارین یارپاقلارینی اوینادیردی . گویده ایکی اولدوز پارلاییردی و دامدا بیر گویرچین گون باتاندان گئجه یاریسینا قدر سس سیزجه اوتورموشدو …۱۳۵۷ نجی ایلین انقلابینا گلینجه، هئچ کسین خیالینا گله بیلمزدی که شاهلیق رژیمی بو ساده‌لیکده آرادان قالدیریلا، شوکورلر اولسون کی زمانین و مکانین ال وئریشلی شرطلری باعث اولدو کی ایران انقلابی ۵۰ ایللیک بوغونتولو شرایطه، خصوصیله ملتلرین قدغن اولان دیللرینه سون قویولدور و بوتون ایران خلقلری اوز دوغما آنادیللرینده یازیب، اوخوماق امکانینا نائل اولدولار. حال حاضرده او گونلرین شاد و هیجانلی فضاسینی جانلاندیرماق چوخ چتین دیر.نظره بئله گلیردی کی او گونلرده ایران شهرلری نین و کندلری‌نین هابئله اوبالاری نین جمعیت ساییسی چوخالمیشدی. ائل – اوبا هیجانلی سئوینجیندن قاناد آچاراق اوچماق ایسته ییرلردی . دئمک انقلابین سسی بوتون هر شئیی تحت الشعاده قرار وئرمیشدی، نظره بئله گلیردی کی سووزلولک کتابلاریندان غم، کدر، غصه، قورخو و اوره‌ک دویونتوسو سوزلرینی چیخارتمیشلاردی. هر شئی گوزه‌ل و سئوینجله قارشیلانیردی.
گوزه گورونمه‌ین شکیلده آزادلیق قوشو قانادلارینی اولدوغو کیمی آچاراق ایران آدلی بویوک و ۴ فصل اولکه‌نین اوستونه گرمیشدی۱ سانکی۲ ائل- اوبامیمیک۳ حرکتلری ایله جوشموش، غیرتلی هیجانلاری ایله، پولاد تک یومروقلاری ایله دئییردیلر: ای جان سیخان قارابولودلار، دوغما دیاریمیزی ترک ائدین. بیزیم تاریخ بویو بئلنچی هیجانلی صحنه‌لری عملده گورمه‌میشدی، اونا گوره که زمان، مکان هابئله یئر- گوی شادلیقدا غرق اولاراق آزادلیق عطری ساچیردی. ائل – اوبا وطن اوغروندا مبارزه آپاران شهیدلره قان وئرمک ایچون اوزون صفلرده نوبته دوروردولار، جامعه ده اینام، مسلک، نژاد سیاست و دیل آیریلیغی گوزه دگمیردی. قوجالی جوانلی، کیشیلی- قادینلی هر کس وطنین قورتولوشونا جان آتیردی.
توپراق وطن انساندان ، و انسان اجبارا توپراق وطندن آیریلارسادا ، وجدان وطن ، فرهنگ وطن ،آداب و روسوم وطن همیشه قوجامان داغلار کیمی یئرینده تیتره مز دایانماقدادر.
نوشته شده توسط admin در چهارشنبه, ۰۷ بهمن ۱۳۹۴ ساعت ۷:۱۱ ق.ظ
