ایستی گون
بیلر بوغولاندا کیمسه بیلمهدی قورتاریجیسی کیم اولدو. اصلن نیه بوغولوب، نئجه قورتولدو؟ نه ایسه اونون بوغولوب قورتولماغینین باشقا اولایلارینان بؤیوک بیر اوخشامازلیغی وار. اونو قورتاران بیر آدام یوخ، بلکه بیر فرشتهایدی. نئجه کی اؤزو: “منیم آدیم فرشتهدی.” دئدی.
یایین قوراپیشیرن آییایدی. گونش بوتون گوجو ایله شاخماقداایدی. گؤز ایشلهدیکجه پالچیق دووارلارلا سیمان دووارلار، ائولری اؤز هؤروکلرینه توتموشدولار. یئره قیچ قویماق اولموردو. آددیم آتدیقجا آیاقلارین بیری یئرده بیری گؤیده ایستیدن اویناییردی. دئمک یئر ایله گؤی ال-اله وئرمیش، آدامی کوچهدن قاچاق سالسینلار. پالچیق دووارلارین چاتداغی گونشین آلتیندا یاییلیب اووولوردو. آیدینایدی چاتداق دووارلار،ائولره هؤروک اولماقدان اینیلتییه دوشوب، گؤیدن قورتولوشلارینی دینلهییرلر. کوچهده دام-دووارین دیله گلیب سو ایستهمهسی گؤرونوب ائشیدیلیردی.
بئله ایستینین شاخلووندا »جیغاتی«نین سویو چیمیب جانی سویا تاپشیرماغا جان دئییر.
***
…همهشه مدرسهلر باغلانیب یای دوشدوکده مدرسه اوشاقلاری ایشایله ماراقلانیردیلار. بو چاغدا الی بوش اوشاق گؤرمک اولمازدی. بیلرده قونشولاری حمید ایله بیرلیکده بامیه ساتیردی. ائله کی گوناورتانین شاخلووی اوشاقلارین باشینین اوستونده چادیر وورموشدو بوتون محلهنین اوشاقلاری چیممک اوچون جیغاتیا تؤکولوردولر.
***
ایستی گونلرین بیرینده، گونشین باش پیشیرن چاغلاریندا، بیلر هله بامیهلرینی ساتیب قورتارمامیشدی.
جیغاتیا آزجا قالان حمیدی گؤردو. تاوانی چئویریب باشینا کؤلگندیک ائلهمیشدی. کؤلگندیک اودا تاوادان! بامیهلرین ساتیلیب قورتولماغین گؤستریردی. یانیندا »آیدین« باشقا مدرسه یولداشلارینی گؤرنده، شاشقینجاسینا: “بو شهر تویوغونو سن گتدین جیغاتیا؟” حمیددن سوروشدو.
– “یوخ.گؤیدوم اؤزو تح باشینا بو ماتور تویوبونو آلیب الینه گلیر.” آیدین دانیشمادان باشینی آشاغی تیکیب، قوروموشدو.
-”بونون باشینا بیر ایش گلسه، من بیلمرم ها.ماماسینا کیم جاواب وئرهجاخ؟” حمیده دئدی.
-”من نه بیلیم. منیم نه ایشیم وار.اؤزو اؤز باشینا گلیب دا.”
-”کیم دئییر اؤز باشینا گلیب. ایه بیزینن قونشودولار، من بیلیرم ماماسی قویماز قاپیا چیخسین. او دا بو ایستیده. حمیددن جاواب چیخمادان،اوزونو آیدینا توتوب،”سنی کیم گتیریب بورا؟” سوروشدو.
آیدین دانیشمادان گؤزلرین یئره تیکمیشدی.
-”هله بابا، گل گئداخ. بیزینن چیمر. هئچ نه اولماز هئی.” حمید زارافاتلا دئدی.
بیلر،آیدینین ماماسیننان قورخوردو. گلیب ائوده دییه آیدینی سن آپارمیسان چیمماغا. هر ایشی اونون گؤزوندن گؤرهجاغیدی. ائودن ده بیلره بیر دس کؤتک قالاجاقایدی. اینانمازدیلار اؤزو تک باشینا گئدیب جیغاتیا. بو فیکیردهایکن حمیدین سؤزو قورتارمامیش:
-هر نه ایش وار سنین باشوندادیر. ایه بوینووا آلیسان سننن گلیب چیمماغا، عئیبی یوخ گئداغین چیماغین.
-من نیه بوینوما آلیرام؟ منه نه وار؟
-ائله ده سن چوخ قلت دارتیسان بونا دئییسن گل گئداخ چیماخ.
-هوی، آغزووونان دانیش ها، اؤزون قلت دارتیسان، بئش بارماق دا اوستونده، اصلاً منه نه وار. گلیر گلسین، گلمیر ده جهنمه تونهجاخ.
-یئکه دانیشما. ووررام بوردا میتیلین قالارها. دئییسن به من ده آیدینام؟
-آیدین اولماسان نه پوخ یییهجاخسان؟
تاوانی الیندهن یئره قویوب، حمیدین یاخاسیندان یاپیشدی: سفئه اوغلو سفئه. ووررام بوردا اؤلون قالار ها.
-هر نه دئسن اؤزونسان. وور گؤروم نئجه وورارسان؟
-نئجه ووررام؟
-هن، نئجه وورارسان؟
»بئله ووررام« دئییب یومراغینی باشینا قالدیراندا، حمید جیبیندن بیر زنجیر چاغاتدی. یاخاسین بوشلاییب دالی چکیلنده- به نیه قورخودان زنجیر چاغاردیسان؟- بیلر دئدی.
-یاخچی ائلیییهم. جانووو دا آلییام.
-ایه قوخموسان زنجیری قوی جیبووا گل قاباغا.
– قاش گئت گؤروم
داوالاری ووروشماغا چکمهدی. دئیینه-دئیینه یاماننان ال چکیب، دانیشمادان بیرلیکده سویا ساری گئتدیلر.
-گل بیزینن گئداخ، سن چیممه. بیلر، آیدینا دئدی. “اوتور پالتارلارین یانیندا، بامیهلردن صاحاب اول. ایستییهن ده اولسا ساتگینان.
سویا دوشرکن، سویون قیراغیننان چوخ آیریلمامیشدیلار “بیلر، بیلر”. آیدینین سسی ایدی. یانیندا ایکی اوغلان دایانمیشدی. حمید، بیلری سایمادان چیمیردی.
-”نه اولوب آیدین؟” بیلر سوروشدو. اوغلانلارین بیری قاباقلادی: “بامیهلرین اوچو بیر تومندی، بو بیزه ایکیسین وئریر. “بیلر، آیدینا باخدی. “آخی حمید اؤز بامیهلریندن منه ایکیسین بیر تومنه ساتدی.” آیدین دئدی.
اوغلانلارین بامیهلرینین اسگییینی وئریب یولا سالدی. یئنه آیدیننان سوروشدو: “هاچان حمید سنه بامیه ساتدی؟”
-”بو گونلریم صوب چاغی” -”قلت ائلیییر. صاباح بامیه گتیریب ساتاندا،او بیر دنه کسییینی آل بیلهسیننن.”
آیدیننان سس چیخمادان شکلنیب: “بورا باخ گؤروم” سوروشدو “سن نیه مننن بامیه آلمیسان گئدیب حمیددن آلیسان؟ یاخچی کی بیز سیزینن قونشویوخ.”
-”آخی حمید منه دئدی: ایه مننن بامیهنین ایکیسین بیر تومنه آلسان، سنی ماماننان گیزلین چیمماغا آپاررام.”
-”دئییرم آخی، سن تح باشووا بورا گلن دئییسن. بیلیردیم ها؛ قودوغون بیری قودوخ. ایندی اونونکون اونا وئررم.” دئییب سویا دوشدو.
***
اوشاقلار سویون درین یئرلرینه گئتمهدن، دایاز یئرلرینده چیمردیلر. حمیدین یانینا یئتیشدیکده آجیقدان بیر-بیرین دانیشدیرمادیلار. حمیدین یانیندا چیممهدن، سویون درین یئرینه گئتدی. حمید شاشیخیب، بیلره باخیردی. “بورا اوشاخ موشاخ یئری دهیی.” بیلر دئدی “سن گئت سویون قیراغیندا چیم. هله چوخ قالیر سن بوردا چیمهسن” گؤردو، حمید ده ایستهییر اونا ساری گلسین. بیلری اؤزو بیلمهدن، سو یاواش-یاواش »قودوخ بوغانا« چکیب آپاردی. قودوق بوغان سویون قیژووایدی. سو اوردا بورخانج اولوردو. بیر آن ایستهدی قاییتسین؛ قورخوردو. اورا بؤیوکلرین چیمماق یئریایدی. اوشاقلاری، اوردان قورخودوب قویمازدیلار اوردا چیمسینلر. هله تئزایدی. بؤیوکلردن گلیب چیمن یوخایدی. ایستهدی قاییتسین. حمیده باخدی. اؤزونو سیندیرمادان: “حمید بیلهمی محله اوشاقلارینین یانیندا لاغا قویوب قورخاق دییهر.” دئسه ده قاییتمادی.
جانینا قورخو دوشموشدو. بیردن چؤنوب آرخایا باخسین دییه، سو بوغازینا آتیلدی. اورهیی بولانیب، باشی گیجلدی.
نه ایش گؤردوغونو بیلمهدن، سو گؤزلرینه دولدو. الینی آتیب گؤزلرینی اووکالایا، سویون ترکینه جومدو. “حمید، حمید.” قیشقیردی. بوی دوروب قاییتسین دییه، سو بوی وئرمهدی. دهشتله سودا شاپبیلتی سالیب، ال-آیاق چالیردی. “بوغولدوم، حمید بوغولدوم…” چیغیریردی، سسی چیخمادان.
قودوق بوغاندایدی. اؤزو ده سویون قیژوو یئری. گؤزلرینده هر یئر سارالیب قیزاریردی. اومودسوز بوش یئره ال-آیاق چالدیقدا، داها چوخ سویون ترکینه باتیب جوموردو. نفسی گئری قاییتدیقدا اللری آغیرلاشیب سویون ترکینه جومدو.
…گؤزلری آچیلدی، سویون ایچینده یوخ، بلکه سویون قیراغی، قومساللیقدا؛ اوشاقلاردا هندهورینده. شاققاواتلی بیر ایگیدین اللرینین اوستونده. اؤزونه گلیب اؤزونو تاپمادان نفسی آغیر چیخیردی. یان-دؤورهسینه خاخولجاسینا باخیب، نهیه باشینا ییغیشدیقلارینی دوشوننمیردی. قارنینا دولموش سویو گئری قایتاردیقدا” بیلر،بیلر” حمیدین سسینی ائشیتدی. باشینا نه گلدیگینی آنلادی. سانکی یئنیدن آنادان اولا، گؤزلری ایشیقلانیب نفسی آچیلدی. اورهیی سیخیلیب، ایگیدین قوجاغیندا اورهکلنیب آغلادی.
-”نیه آغلییرسان؟ قوخما، هر زاد قوتولدو. من بوردئیهم. هاواخ بوغولاندا منی چاغیر”.
گؤزلری گؤزلریندهایکن، کیم اولدوغونو اؤیرنسین دییه، “من فرشتهیم.” ایگید گوله گوله دئدی. “منیم آدیم لطفاللهدی. سن هاواخ بوغولاندا منی چاغیرسان گلرم.” دایانمادان، سویا قاییتدی. اوزه-اوزه اوزاقلاشیب گؤزدن ایتدی.
***
…چاغ گونشین لاپ شاخلوو چاغیایدی. گونش گوجو اولدوقجا یئری چئورهلهمیشدی. کوچهلردن، خیاوانلاردان نفس چیخمیردی. ایستی آلوو چکیردی. سانکی گؤیدن یئره اود یاغمیش اولا. ایستیدن دووارلارین کؤلگهلرینده ده اوتورماق اولموردو.
قورا پیشیرن آییایدی. بامیهلرین ساتیب، ائوه قاییتماقدایدیلار. آزادلیق فلکهسینی رد اولوب بؤیوک خیاوانا کئچنده جاماهاتین ییغینتیسی های-کویو بیلهلرین ماراقلاندیردی.
جنگ زامانیایدی. سیفداهدا بئله آنلادیلار خستهخانایا یارالی زاد گتیریبلر.
جاماهاتا یاخینلاشیب قول-قیچلارینین آراسیندان، اوچ نفر باش-گؤزلری قانلی-یارالی »تویوتا« ماشینینین دالینا ایپینن باغلانمیش گؤردولر. ماشین یاواش-یاواش گئدرک، اونلاری خیاواندا)یئرین اوزونده( سوروتلهییردی.
-”بولار کیمدی؟” بیلر سورروشدو.
-”نه بیلیم.” حمید دئدی.
جاماهات بیر-بیرینه باخدیقدا، جنازهلرین اوستونه توپوروب؛ هر کیم بیر سؤز دانیشیردی. بعضیلری اونلاری قارقیش ائدیردیلر.
-”آللاه لحنهت ائلهسین. حیزبدیلر. بو لحنهته گلمیشلر آداملار اؤلدوروب قانلار تؤکوبلر…”
-یوخ، دئییرلر بو کؤپک اوغلانلاری جاللاد کیمی بیر شئیدیلر. یول کسیب آدام اؤلدورندیلر.
-موسلمان دئییللر کی. دینسیز کافیردن پیسدیلر…”
تویوتا فلکهیه چاتاندا دایاندی. سوروجو ایله ایکی نفر چیگنی توفنگلی دوشدولر جنازهلری ماشینین ایچینه آتسینلار.
بیلر، حمیدین قولوندان چکیب، جنازهلره داها یاخینلاشدیلار. اونلارین بیریسی ایگید بیر جاوانایدی. بیلر اوزونه باخیب، اورهیی چیرپیندی. “تانیدیم،تانیدیم.” دییه، دیلی بوغازینا یاپیشیب باغلاندی. رنگی آتیب قان دامارلاریندا برک آخدیقدا ایستهدی حمیدی چاغیرسین چاغیرانمادی. جنازهدن گؤزونو گؤتوره بیلمیردی. جنازهدن چیخان سسی ائشیدیردی. اورهیی اوندان نهسه سوروشسون دییه، سانکی جنازه آغزینی قولاغینا دایییب “هن، من فرشتهیم. منیم آدیم لطفاللهدی. هاواخ بوغولسان منی چاغیر.” دئدی.
نوشته شده توسط admin در دوشنبه, ۰۴ آذر ۱۳۹۲ ساعت ۹:۱۰ ق.ظ