اوچ معلم
عبدالصمد ملکی
شاگیردلرین بیری حیکمتلی موعلّیمیندن سوروشدو: اوستاد سنین موعلّیمین کیم اولوب؟
موعلیم جواب وئردی: بلکه دئنه یوزلرجه موعلّیم. ایستهسم اونلارین هامیسینین آدینی سایام, نئچه آی چکر اونلارین ساییب قورتارماسی, بلکه نئچه ایل و آخیرده گؤرهجاغام کی اونلارین چوخونو یاددان چیخارتمیشام.
شاگیرد: آما, اونلارین بعضیسینین تأثیری آیریلاریندان چوخ اولماییب؟؟
حیکمتلی موعلّیم فیکره گئتدی سونرا دئدی:
یاخشی, اوچ موعلیم وار کی اونلاردان موهوم ایشلر اؤرگشمیشم.
- او موعلّیملر کیملردیر؟
جواب وئردی: اونلارین بیرینجیسی »اوغرو«ایدی؛ حادیثه بئلهایدی کی بیر گون من چؤلده یولومو ایتیرمیشدیم و گئجه یاریسیندان تئز ائوه قاییدانمادیم. من ائویمین آچارینی قونشوما تاپیشیرمیشدیم و او گئج ساعتده اونو اذیّت ائلهماغا جورأت ائلهمهدیم. نهایتده بیر کیشی راست گلدی و من اوندان کؤمک ایستهدیم. او بیر گؤز قیرپیمیندا قاپینی آچدی !! بو منی چوخ موتعجّیب ائلهدی و من اوندان ایستهدیم بو ایشی نئجه گؤدویونو منه اؤرگتسین. او منه دئدی کی اوغرولوقدان کئچینر. آما من اوندان چوخ ممنون ایدیم پس اوندان ایستهدیم کی گئجهنی ائویمده قالسین.
بیر آی منیمله قالدی و هر گئجه ائشیگه چیخیردی. او دئییردی: من ایشه گئدیرم, آما سن دوشون و ناماز قیل. او قاییداندا من همیشه سوروشاردیم کی بیر شئی اله گتیره بیلیب یا یوخ, اونون همیشهلیک و دگیشمز جوابی بو اولاردی کی: بویون بیر شئی اله گتیرنمهدیم, آما صاباح بیر داها چالیشاجاغام انشاءالله.
موعلّیم دانیشیغینا ایدامه وئردی: خوشبخت کیشیایدی, اونو, الی بوش قاییتماسینا گؤره بیر گون مأیوس گؤرمهدیم.
اوندان سونرا و یاشاییشیمین بؤیوک قیسمینده, هر واخت گونلرجه دوشونجهدن سونرا آللاهین ویصالینه ال تاپانمایاندا, او اوغرونون سؤزلرینی یادیما سالارام »بویون بیر شئی اله گتیرنمهدیم, آما صاباح بیر داها چالیشاجاغام انشاءالله!« تا کی آللاهین ویصالینا ناییل اولام.
شاگیرد: موعلّیم ! ایکینجی موعلّیمین کیمیدی؟
موعلیم: بیر ایتایدی. حادیثه بئله اولدو کی من چایا طرف گئدیردیم کی بیر آز سو ایچم. بو حینده بو ایت ظاهیر اولدو. بیلیندی کی او چوخ سوسوزدور. آما او چایین قیراغینا یاخینلاشاندا اوردا آیری بیر ایت گؤروردو و بو اؤزونون سوداکی تصویریندن باشقا, آیری بیر شئی دئییلدی.
ایدامه وئردی: قورخو ایتی بورویوردو, دالی قاییدیر و هورماغا باشلیردی کی او بیری ایتی قورخودوب اوزاقلاتسین. آما فایدا وئرمیردی سوسوزلوق اونا غالیب گلیردی و نهایتده تصمیم توتدو وضعیتله اوزلشسین. اؤزونو سویا آتدی و بو دفعه تصویر گیزلندی.سون گونلرده, اوچونجو موعلّیمیم بالاجا بیر اوشاغیدی. اونو بیر دفعه گؤردوم کی الینده شمع, مسجیده طرف گئدیر. اوندان بیر سوآل سوروشدوم: بو شمعی اؤزون یاندیریبسان؟ اوشاق موثبت جواب وئردی. اوردان کی من اوشاقلارین اودلا تماسدا اولماقلاریندان نیگران ایدیم, چالیشدیم اونا ایخطار وئرم. اوغلان! منه قولاق آس؛ بیر زمان بو شمع خاموش ایدی, منه دئیه بیلرسن کی اونو یاندیران اود هاردان گلدی؟؟
اوغلان گولدو و شمعی خاموشلادی. سونرا مندن سوروشدو: منه دئیه بیلرسن کی بوردا یانان اود هارا گئتدی؟؟
موعلّیم ایدامه وئریب دئدی: من او لحظه بیلدیم کی نه قدر آخماغام, کیمدیر کی حیکمت اودونو یاندیریر و هارا گئدیر؟ بیلدیم کی اینسان او شمع کیمیدیر, اورگینده موعیَّن لحظهلر اوچون موقدس اود داشیییر, آما قطعی اولاراق بیلمیر کی اونو هاردا, نئجه و هاواخت یاندیرسین. اوغلوم ! عؤمروم بویوندا منیم مینلرجه موعلّیمیم اولوب, من یاشاییش شاگیردییم و ایندیده اونون شاگیردییم. و موطئینم کی حیکمت اودو اورگیمده یاناجاق و منیم بصیرتیمی ایشیقلاندیراجاق, او گونهدک کی من اونون گؤروشونه موشتاقام.
نوشته شده توسط admin در چهارشنبه, ۲۳ بهمن ۱۳۹۲ ساعت ۴:۴۷ ق.ظ