یازار: مارک کوْلمار
چئویرن: سوسن_نواده‌رضی
آنادیلیمیز: هر گونکو کیمی بوگون ده لئآ اوْرماندادیر.
لئآنین ائوی یوْخدور. بو اوزدن ده اوْ بوتون گونونو دوْستلاری ایله، اوْرمانین کیچیک حیوانلاری ایله گئچیریر. و آخشام چاغلاری، همین کیچیک دوْستلار اوْندان دعوت ائدیرلر کی گئجه‌نی اوْنلارین یانیندا قالسین.
آنجاق بو حکایه چوْخدانین حکایه‌سیدیر، لئآ ایندی بؤیویوپ. لئآ اوْ قدر بؤیویوپ که بعضاً بوتون کیچیک دوْستلار‌ی‌نین ائوینه گیرمَگه چوْخ بؤیوکدور ایندی. اوْ آرتیق هر قاپیدان گئچه بیلمیر. سیغماییر.
بو گئجه دوْستلاری، بالاجا قوشلارین یانیندا گرک یاتسین. اوْنلارین یوواسی چوْخ بؤیوک بیر آغاجین باشیندا، یوْغون بیر بوداغین اوستونده‌دیر. و اوْنون ایچون، اوْرا یئتیشمک چوْخ چتیندیر. لئآ سوْنوندا آغاجین باشینا یئتیشنده (لاپ اوجادا دگیل، کیچیک دوْستلاری‌نین عایله‌سی‌نین یوواسی اوْلان بوداقدا). آرخاداشلاری‌نین، کیچیک قوشلارین، آناسی اوْردایدی. اوْنو گؤزله‌ییردی.
-“لئآ، دئدی قوش آنا، من سنی گؤزله‌ییردیم. ایستیردیم سنینله دانیشام.”
لئآ قوش آنانی چوخ سئویر چونکی اوْ بالاجا قیزلا چوْخ مهرباندیر. و لئآ اوْنون بالالارینا یاخشی باخدیغی‌نین فرقینده ایدی. قوش آنا هر زمان ماهنی اوْخودوغونا گؤره بللیدیر بوتون ماهنیلاری باشاریر. و گؤردو?و بوتون ایشلرینه باخمایاراق، هر زمان لئآیا سلام وئرمک و اونا یاخشی داورانماغا دا وقت آییریر.
-“اوْتور اوْردا، دئدی قوش آنا، و تَرپشمه.”
لئآ اوْتوردو یووانین قیراغیندا. نفسینی ساخلادی. آنا قوش یاتاغین کناریندان یرپاقدان اوْلان بیر اؤرتو?و یاواشجا قوْوزادی. دؤرد بالاجا جوجه سسسیزجه راحت یاتمیشدیلار.
“نه قدر سئویملیدیرلر” دئدی لئآ. “چوْخ ایستَرم اوْنلاری قوجاغیما آلیپ باغریما باسام. اوْنلاری ییرغالاییپ، اوْنلارا گؤزل بیر ماهنی اوْخوماق ایسترم”.
“یوْخ، دئدی قوش آنا، سس سالمایاق گرک. گرک قوْیاق اوْنلار یاتسینلار. اوْنلار لاپ ایندی دنیایا گلیپلر. قابیقلاریندان چتینلیکله چیخدیلار. سنه دئمک ایسته‌دی?یم بو ایدی. اوْنلارین دینلَنم?ه و سسسیزلی?ه احتیاجلاری وار. سن گرک یاتماق ایچون آیری بیر یئر تاپاسان اؤزووه. گئجه‌نی گئچیرمک ایچون آیری بیر یووا. سن آرتیق بورادا یاتا بیلمه‌یه‌جکسن.”
کیچیک قیزین گؤزلری ایسلاندی. لئآ قوش آنانین سؤزلرینی ائشیدینجه آغلادی.
“بیزیم یووامیز ایندی چوخ کیچیکدیر. بیز اؤزوموز ده بو یووایا گؤره چوْخلوغوق. و سن، سن ایندی چوخ بؤیوکسن اونا. جوجه‌لری یارالیا بیلرسن یا حتّی اوْنلاری دوشوره بیلرسن. باشا دوشورسن‌می؟”.
لئآ جوجه‌لرین آناسی‌نین نه آچیقلادیغینی باشا دوشور. اوْ باشا دوشور اما گینه ده تئز سوْروشور:
“اما، من هردن گلیپ اوْنلاری گؤره بیلرم‌می؟ من ده اوْنلارلا اوْینایا بیلرم‌می؟”
“البته کی، دییر قوش آنا، قیسا بیر مدّتدن سوْنرا. بیر آز بویومک همن. بیلیرسن، قوشلار تئز بویویرلر!”
بؤیله‌جه، کیچیک قیز قوش آنانی اینجه‌لیکله و چوخ یاواش اؤپر. سوْنرا هیچ سس چیخارتمادان آغاجین گؤوده‌سیندن آشاغا دوشر. آشاغیدا اوْ تک دگیلدی. آرخاداشی بالاجا دووشان اوْردایدی. اوْردا گؤزلوردو لئآنی ائوینه دعوت ائیله‌سین.