- آراز آذربایجان – روزنامه خبری آذربایجان غربی - http://www.araznews.ir -
اولکه میزده کیتاب اوخومامازلیق
Posted By admin On تیر ۱۵, ۱۳۹۴ @ ۴:۳۷ ق.ظ In آنادیلیمیز | No Comments
حاضیرلایان :اکبرسعادت
آنا دیلیمیز: هامی اینسانلارکتاب اوخوماغین اهمیتلی اولدوغونو بیلیر. حقیقتده انسان، عمر بویو اویرندیکلرینین یوزده یئتمیش بئشینی ایکی یاشینا قدر اویرنمیش اولور.
عاغیل، استعداد و ذکاوت والدینین اوشاقلاردا تقویت ائلهمگینی آرزیلادیقلاری خاصیتلردندیلر. بوتون والدینلر اوشاقلارینین هوشلو و استعدادلی اولماقلارینی ایستیرلر و ائله بونا گوره اونلارا اَن یاخشی مدرسه و اَن یاخشی معلم تاپماغا چالیشیرلار. آما یادیزدا اولسون کی سیز والدین کیمی بو زمینهده اَن چوخ رول و قدرتیز وار کی اوشاغیزین اویرنمک قابلیتینی کتاب اوخوماقلا تقویت ائلیهسیز و کتاب اوخوماغی اونلارین حیاتینین آیریلماز بولومونه چئویرهسیز.اما سوز بوردادی کی بیز کیتاب اوخوماغی گرک آشاغی سن دن باشلایاق.و اوروموزه کیتاب اوخوماغی عادت وئره ک.همچنین یاخشی قولاق آسماغی.روانشناسلارین دئدیگینه گوره کیتاب و کیتاب اوخوماق اوشاقلاردا گوجلو تاثیری وار.او جمله دن دانیشیق دا…ایجتماعی رابطه لرده یا اوخول لاردا اونلارین دوستلارنان ارتباط قورماسی.والدین له دانیشیق لاری.یا گونده لیک ایش لرین ده منظم اولماق.بیر آیری مزیت اودا بو کی اینسانلارین اویرنمک استعدادلارینی تقویت ائلهمکدیر. مثلا بو قضیه بالاجا اوشاقلاردا یاخشی تاثیری وار اودا بو کی:دبستاندان اول اوخوماغی باشلایان اوشاقلار، تعلیم زمینهلرینده داها فعال و داها یاخشی اولورلار.یا بو کی اوشاقلار دبستان یاشلارینا قدر دیل و دانیشیق مهارتلرینی اویرنرلر. والدینین کتاب اوخوماغینا قولاق آسماقلا اوشاقلاردا، دیلی تشکیل وئرن اساس سسلر تقویت اولار. اوشاق کتاب صفحهلرینی های-کوی ایله چئویرنده سوادلانماقدان اؤنجهکی اَن مهم فعالیتینی تجربه ائلیر. اوشاقلارین کلمه و لغت دایرهسی بویویور.او اساس دان بیز بویوک لر ده گرک گونده لیک برنامه میزده بیر واختی دا کیتاب اوخوماق اوچون اختصاص وئره ک.تا بالاجا اوشاقلاردا بیزه باخیب بو یولی گئتسین لر.او اساس دان ایندیکی دوروم دا،اولکه میزده (ایران)کیتاب اوخوماغین جهانی جدی چوخ آشاغی دیر.وشاید دئمه لییم کی بو مقدار ساعات حسابینا گلمیر.یا حتی شاید دقیقه دئمک دیر.بو سوالین اولوندوغو زمان، مادی مشکللر و پولسوزلوق مسالهسی دئییلر آما دوزو بودور کی جماعت چاپ اولان کتابلاری فایدالی بیلمیرلر و اونلارا اولان اعتمادلارینی الدن وئریب کتابلارین تیراژ ساییسینین آزالماسینا سبب اولوبلار. انسانلارین اعتمادینی آرادان آپاران عامللرین بیریده سانسور و کتاب ممیزلیغی اولا بیلر.اولکهمیزین کتاب بازاری اوزون زمان اولار کی بحران ایچیندهدیر. بو بحرانی، کتاب تیراژینین آزالماسیندا عیانی گورمک اولار. کتاب تیراژی اونون نه قدر اوخونماسینا مستقیم علامتدیر و تیراژ هر نه قدر آشاغی اولورسا او کتابین او قدر آز اوخوندوغونا دلالت ائلیر.
تازا کتابلارا اینانماماق اوشاقلارا دا سرایت ائلهییب. بو ایلکی کتاب نمایشگاهیندا اوشاقلار کتاب ایستهینده اونلارین قدیم چاپینی ایستهیردیلر. علتینی سوروشاندا دئییردیلر: «آخی اونلار سانسور اولماییبلار».
کتاب تیراژینین آزلیغینین بیر عاملیده ایراندا کتاب داغیتما سیستمینین اولماماسی اولا بیلر. یعنی بیر کتاب چاپ اولاندان سونرا اونو اوخوجونون الینه نئجه چاتدیرماغا هئچ برنامه و سیستم یوخدور. بیر اکین یئری و مزرعهنین مختلف یئرلرینه سو چاتدیرماق اوچون مختلف کاناللارین لازم اولدوغو کیمی کتابیندا اوخوجولارین الینه چاتماسینا داغیتما سیستمی لازمدیر.کتاب اوخونماماغین اساس عامللریندن بیریده یاشاییش مسیرینده کتابین نقشینین اولماماسیدیر. یعنی بیری ایستهسه بو گونکی جامعهده موفق اولا و باشلار ایچینده باشی اولا بو هدفه چاتماق اوچون اصلا کتابا احتیاجی یوخدور یعنی جامعهده مختلف زمینهلرده مطرح اولماق اوچون کتاب کومک ائلهمیر کی هئچ بلکه مانع اولور.
عینی حالدا اولکه میزده چوخلی عامیل لر وار کی هامیسی ال اله وئریب و بیزی بو اساس دان(کیتاب اوخوماقدان)اوزاقلاندیریر.اجتماعی شبکه لرده اهمیت سیز ایش لره گوره گاهدان گوروسن وقت اولمور.بو آرادا دئمه لییم کی ایران کاذب و اجتماعی شبکه لرده دونیانین رکود داریدیر.بئله بیر جامعه ده اینسانلارین استعداد لاری گوزه گلمیر. و حتی بو کی فکری آسیب لر اونون دالیندا کمین یاتیب.بیر طرف قضیه ده آیری مسائل وار کی مسئولار اونا گرک جاوب وئرسین.اولکه میز ده چوخلی گورمکلی یئرلر وار.بیزیم جامعه ده بیر پارا هزینه لر گرک کیتاب اوچون اختصاص وئرله.اروپا اولکه لرین ده گوروروک کی اونلارین پارک لاریندا یا اتوبوس لاریندا ملت کیتاب اوخوماغا مشغول دور.اما اوچونجو دونیا اولکه لرینده بو موضوع هیچ گورونمور.آنجاق ایسته ییره م دیییم کی هئچ چتین دییل کی بیز پارک لاردا یا اتوبوس لاردا چوخ بالاجا بیر هزینه ینن ملته کیتاب و کیتاب اوخوماق فرهنگین تعلیم وئره ک.اولکه میزده یاخشی و گوزل درگی لر چاپ اولونور.بونلارین ایچینده اوز آنا دیلیمیزده یازیلان درگی لر ده وار.شاید اگر بیر گون مسئول لار رسانه لر ده بونلارین بیر پاراسین مطرح ائتسه لر،چوخ فایدالی اولموش اولا.اما تاسف له بونلارین هئچ بیر عملی اولمور.اومودوم وار بیر گون اولا کی اولکه میزده بو هنجار یئرینه گلیب و گونو گوندن اولکه میزین علمی سطحی چوخالسین.و بو کی هر نه قدر بیز اوشاقلاردا بو زمینه ده سرمایه گذاری ائله سه ک یئری وار.نئجه کی دئدیم بو مهارتی بیز گرک اوشاقلاردان باشلایاق
Article printed from آراز آذربایجان – روزنامه خبری آذربایجان غربی: http://www.araznews.ir
URL to article: http://www.araznews.ir/%d8%a7%d9%88%d9%84%da%a9%d9%87-%d9%85%d9%8a%d8%b2%d8%af%d9%87-%da%a9%d9%8a%d8%aa%d8%a7%d8%a8-%d8%a7%d9%88%d8%ae%d9%88%d9%85%d8%a7%d9%85%d8%a7%d8%b2%d9%84%d9%8a%d9%82/
Click here to print.
Copyright © 2013 آراز آذربایجان - روزنامه خبری آذربایجان غربی. All rights reserved.