- آراز آذربایجان – روزنامه خبری آذربایجان غربی - http://www.araznews.ir -

اوزگه سینه قویو قازان اوزو دوشر

Posted By admin On خرداد ۲, ۱۳۹۴ @ ۵:۴۶ ق.ظ In آنادیلیمیز | No Comments

حاضیرلایان: اکبرسعادت
آنا دیلیمیز: بئله روایت ائدیرلر کی قدیم اوزاق بیر کندده بیر آنا ایله اوغول بیرلیکده یاشاییرمیشلار. اونلارین دونیا مالیندان هئچ زادلاری یوخ ایمیش. اری اولن گوندن بری آرواد، اوغلونون لازم اولان احتیاجلارینی تامین ائتمک اوچون آغیر زحمتلره دوزوب، الیندن گلنی اسیرگه میردی. مثلا قونشولارین، قویونلارینی ساغیب، پالتارلارین یوماقلا باشلارینی دولاندیریردی.گونلر کئچیر، آی دولانیر. کیچیک احمد عمللی- باشلی بویویوب، جوان بیر اوغلان اولوب. آرواد دئییر: ای اوغول ایندی منیم قوجالیق و سنین ده ایشله مه لی وقتین دیر. اولماسا بیر ایش فکرینده اول، بلکه یاشاییشیمیزی دولاندیرا بیلک.
اوغلان آناسی نین سوزونه راضیلیق وئریرب سحر ایش دالینجا شهره گئده جگم- دئییر.اوزوزه خیرلی سحرلر آچیلسین. سحر آچیلیر،اوغلان گئدیر شهره. بیر چوخلاری کیمی اودا شهرین میدانچاسیندا دایانیر و گوزله ییرکی، بیر نفر گلیب اونو ایشه آپاراجاق. احمد نه قدر گوزه‌له ییر، گورور یوخ اونو هئچ دیندیره‌ن اولمادی، اوزوده ناهارا آز قالیر. احمد گورور یوخ اگر اون گون ده دایانسا ایش بئله قاباغا گئتمه یه جک. اونا گوره شهری دولانماغا باشلاییرتی، بلکه الینه بیر شئی دولاشسین. اوغلان خیابانلاری، کوچه‌لری گزدیکجه امید سیزلشیر. آخیردا گلیب، آیری ائولردن گوزه‌ل و جلاللی اولان بیر ائوین قاباغیندا دایانیر.
بیر نئچه دفعه ایسته‌ییرکی قاپینی دویسون، آنجاق جرات ائله‌ میر. نهایت اوره‌یی چیرپینا- چیرپینا آهسته‌جه قاپینی دویور.هاچاندان- هاچانا ائوین اربابی گلیب قاپینی آچاندا احمدی گوروب تعجبله سوروشور: هه اوغلوم کیمی ایسته ییرسن؟ سوزون نه دیر؟ احمد اوتانا- اوتانا باشینی آشاغی سالاراق. ((ایش دالینجا گزیرم- دئییر)ارباب دئییر: لاپ عجب ائله ییرسن، ائله من ده سنین کیمی بیر ایشچی آختاتاریردیم. همین گونده احمد، اربابین ایشچیسی اولاراق گوزله ییر کی، فلان شئیی گتیر. گورور یوخ، بیر گون کئچیر اما اربابدان خبر اولمورکی، اونا ایش گوردورسون. سحریسی ده بئله اولور. اوچونجو گون، دوردونجو گونه کئچنده احمد اربابین یانینا گئدیب، بو باره‌ده نگران اولدوغونو سوله ییر. ارباب دئییر: اوغول گئت ایش وقتی اوزوم دئیه‌رم.بونون اوستوندن بیر نئچه گون کئچیب، کئچمه میش ارباب احمدی چاغیریب، امر وئریر کی، بیر اینک کسیب، دریسینی دقتله سویسون. احمد اربابی نین امرینه باش اییب، تئز بیر اینک تاپیب، دریسینی سویاندان سونرا، دوه‌لری طویله‌دن چیخاریب، بوش چواللاری اونلارین اوستونه آتیب، اینک دریسینی ده گوتوروب، اربابلا بیرلیکده یولا دوشور. آز گئدیر، چوخ گئدیرلر، آخیردا اوجا بیر داغین اته گینده دوه‌لری دایاندیریرلار. ارباب احمده دئییر: تئز اول بو دری ییه بورون گوروم، نه اولوراو قدر دیمدیک له ییر لر کی، دری بیر نئچه یئردن دلیک- دلیک اولور. احمد قورخوسوندان دئشیک لری ییرتیب، اوزونو بیر تهر ائشیگه چیخاریر.
قیرغی لار اوندان قورخوب، اوچوب گئدیرلر.احمد باخیب گورور داغین، اوستو جواهرلرله دولودور. اوزوده مین ایل قالسا بوردان آشاغی ائنمک ممکن اولمایاجاق. احمد یان- یورویه گوز گزدیرنده گؤرور داغدا جواهر قدر آدام سومویوده، وار. اونلاری گوروب آرتیق قورخویا دوشن احمد بیرده آشاغی باخاندا گورور اوز اربابی داغین اتگینده دایانیب. احمد باغیریب، دئییر: ارباب من بوردان نئجه قورتارا بیلرم؟ارباب دئییر: اوردا کی جواهرلرین هامیسینی آشاغی توکندن سونرا دئیه‌رم نئجه گلرسن.یازیق احمد داغین کله‌سینده هر نه قدر جواهر وارایدی هامیسینی آشاغی توکندن سونرا دایاندی گورسون اربابی اونون آشاغی ائنمه سینه نئجه یول گوستره‌جک. اما گوزونه دوندویوم ارباب دوه‌لرینی یوکله یندن سونرا آرخایین- آرخایین شهره یوللانیب، گئتدی. احمد کور پشیمان دایانیب ایشین آخرینی گوزله‌ییردی کی، بیردن- بیره جثه‌لی بیر قیرغی اونون باشی اوستونده دایانیر، اونا بیر خطر یئتیرمک ایسته دیکده احمد اوزونو کنترل ائدیب، قیرغی‌نین آیاقلاریندان برک- برک یاپیشیب، آغیرلیغینی داغین آشاغی طرفینه سالیر.
قیرغی یوخارییا ساری قانادلانیر، احمد ده آغیرلیغینی آشاغییا سالیر. آخیردا احمدین آیاغی داغین اته گینده یئره ده‌یندن سونرا قیرغی نین آیاقلارینی بوشلاییر. قیرغی اوچوب گئدیر، احمد شهره قاییدیر.حمد توودابانا دئییب بیر باشا اربابین قاپیسینا گلیر گورور کی ارباب اونو تانیمیر، تانیسایدی دا احمدین اورادان سالم قاییتماسینا اینانمازدی. چونکی چوخ ایللردن بری بو حیله‌ایله داغین باشینا گونده ردیگی یوزلرجه جواندان بیری ایندییه کیمی ساغ قاییدا بیلمه میشدی. اربابین طرفیندن آرخایین اولان احمد قاباقکی کیمی ایش دالینجا گزدیگینی، بیلدیره‌ندن سونرا ارباب اونو ایشلتمه یی قبول ائله‌ییر. ارباب قاباقکی کیمی بیر گون بئله ایکی گون بئله احمده هئچ ایش بویورمور. احمدیئنه ده اونون علتینی سورشاندا، لازم اولان گون اوزوم دئیه‌رم، سؤیله‌یه‌رک اونوآرخایین ائله ییب، دئییرکی، گئت قیچلارینی بیر- بیرینین اوستونه آشیریب، راحت اوتور، هئچ نه‌یین ده فکرینی ائله‌مه.وقت تماما یئتندن سونرا ارباب احمدی چاغریب دئییر کی، تئز اول بیر اینک دریسی، بیر نئچه بوش چووال حاضرلا، بئش آلتی دوه‌ایله چوله چیخاجاییق. احمد تئز اربابی نین امرینی یئرینه یئتیریب. بیر اینک کسیب دریسینی سویاندان سونرا، بوش چواللاری گوتوروب دوه‌لرین اوستونه سالیب یولا چیخیرلار.آز گئدیرلر، چوخ گئدیرلر آخردا اوجا بیر داغین اته‌گینه چاتیرلار. اربابین امری ایله احمد اینک دریسینی یئره سریب، نه ایش گورجه یینی اربابدان سوروشاندا، ارباب دئییر، یات بو درینین ایچینده اونو اوزونه بورو، دئییر: باشارمیرام.
سیز اول منه اویره‌دین، سونرا نه دئسه‌ز اونو ائله‌رم. ارباب دری نین ایچینده اوزانیب، اونو عمللی- باشلی اوزونه بورویندن سونرا احمد وقتی تلف ائله‌مه‌ییب، درینی ایپ ایله برک- برک ساریییر.سونرا دوه‌لری قیراغا چکیب، ایری بیر داشین دالیندا گیزلنیر. بیر آز کئچیب، کئچمه میش بیر نئچه قیرغی گلیب، درینی چکیب داغین کله سینه آپارییر سونرا درینی دیمدیکله‌مه‌یه باشلاییرلار. قیرغی لار درینی ییرتاندان سونرا، اربابا قورخوال وئریر. اوزونه قوت وئریب درینی بیر تهر رد ائدیر. قیرغی لار اونو گوره‌ن کیمی قورخودان اوچوب گئدیرلر.
ارباب جواهرلری بیر- بیر توکندن سونرا، گوزله ییرکی، احمد اونون آشاغی ائنمه سینه کمک ائده‌جک. احمدده دوه‌لری جواهرله یوکله‌یندن سونرا، ایسته‌ییر یولونو توتوب گئتسین، داغین باشیندان اربابین سسی گلیر. احمد بس منی قویوب هارا گئدیرسن سنی الله منه ده اویره‌ت، گلیم آشاغی.احمد یولونو گئده- گئده چیغیریب دئییر:من گئتدیم، سن ده اورداکی، سوموکلردن اویرنیب، گلرسن. بئله لیکله ارباب اوز عملینه راست لاشیر. احمدده اوز زحمتی نین نتیجه سیندن همیشه لیک اولاراق یوخسوللوقدان قورتارییر.


Article printed from آراز آذربایجان – روزنامه خبری آذربایجان غربی: http://www.araznews.ir

URL to article: http://www.araznews.ir/%d8%a7%d9%88%d8%b2%da%af%d9%87-%d8%b3%d9%8a%d9%86%d9%87-%d9%82%d9%88%d9%8a%d9%88-%d9%82%d8%a7%d8%b2%d8%a7%d9%86-%d8%a7%d9%88%d8%b2%d9%88-%d8%af%d9%88%d8%b4%d8%b1/

Copyright © 2013 آراز آذربایجان - روزنامه خبری آذربایجان غربی. All rights reserved.