اوره ک لرین صفاسی
حاضیرلایان :اکبرسعادت
قیامت ده حسابی اولمایان لاردان دیراو غافل
کی فرق ایلر فراقین شامینی صبح قیامت دن
آنا دیلیمیز: یاشاماق بیر نفس آلماق قدر آساندیر، بیر او قدرده چتیندیر. آلدیغیمیز نفسلری سایا بیلمریک. آلا بیلمهدیگیمیز نفسلره ایسه هر کس دورت گؤزله باخار. لاکین اونوتمایین، بیز وار اولماق مجبوریّتیندییک. مومینلر اللهین یئروزونده کی، خلیفهلریدیر. اونلار هر شئیه الله اوچون باخارلار، دقت ائدرلر، سئوگیلرینی اللهلاریندان آلارلار. اونون نعمتی اولان قلب، بئله ایشلهمهلیدیر. او بیر ات پارچاسی دئییلدیر کی، سادهجه قانی ایداره ائتسین. او اورکدیر، سئوگیمیزی اونا دولدوروروق، اورا دوشر آلوولار و هوزونلر، اونونلا خوشبختلیگیمیزی باشا دوشریک. هیجان اونونلا گوزلدیر! موسلمان، سن گوزللییه گئدن یولو تیکمهیه طالب اولان، قالخ و اوزونه بیر باخ! حیات بیر آلداتما آلتی کیمی سنی سندن اوغورلاییر. زامان سنین لئهینه ایشلهمک یئرینه، علئیهینه ایشلهییر. ترصینه چئویرمک ائله آساندیر کی. بیراز گوزیاشینا بولانمیش کونلون اورگین اولسون، بسدیر…
الله-تعالی بیزی یارادیب یئر اوزونده یئرلشدیریب کی، بویوک بیر مسئولیتی حیاتا کئچیرک، معبودوموز اولانا اطاعت ائدک، تام اولاراق اونا تسلیم اولاق، اونون امرلرینه تابع اولاق، یالنیز اوندان ایستهیک، یالنیز اونا گوونک، توککول ائدک، یالنیز و صرف اونون ریزاسی اوچون ایش گورک، اونو سئوک، اونو اوستون توتاق، اونو راضی سالاق، بیر سوزله عبادتله مشغول اولاق. بونلارین اولماسی دا قلبیمیزین دیری قالماسی، قلبیمیزین حیاتی و اونون دونیا سئوگیسیندن، نفسین تضییقیندن قورتولماسی اوچوندور.
قلبیمیزین حیاتی و دیری قالماسی، معبودونا تام تابع اولا بیلمهسی اوچون ده الله-تعالی بیزلری دوغرو واسطهلره یونلندیرمیشدیر. الله-تعالی قورآنی-کریمده بیزه امر ائدهرک بویورور کی؛ “ائی اینسانلار! سیزی و سیزدن اولکیلری یاراتمیش رببینیزه عبادت ائدین کی، موتتقی اولاسینیز! (اللهدان قورخوب پیس عمللردن چکینهسینیز!).پیس عمللردن چکینهرک، تمامیله رببیمیزین امرلرینه تابع اولماق اوچون عبادت ائتمهلیییک. موختلیف جور عبادتلر نَیه گرکدیر، نه دیَرلری وار؟!
هر نه جور عبادت اولور-اولسون، اونا بیزی الله یونلندیریبسه، او بیزه بویوروبسا، او عبادت نوع بیر واسطهدیر، هانسی کی، بیزی اونه آپاراجاق، اللها طرف چکجک و اونا یاخینلاشدیراجاق. بونونلا دا بیز یارادیلیشیمیزین هدفینده دوران قایهنی حیاتا کئچیرمیش اولاریق. ائتدیگیمیز عبادتلرین هر بیر حرکتی بئله اللها یاخینلاشماق اوچون بیر واسطهدیر. عبادت ائدنلرین سایینا باخاق، گوندن-گونه چوخالیر، دین-ایمانا گلیرلر. لاکین اوروج توتان، صدقه وئرن، حجه گئدنلرین سایی آرتسا دا، نتیجهسینی گوره بیلمیریک. ناماز قیلان بیر بنده اوچون، اوز منفتینی الدن وئرمهمهسی نامینه یالان دانیشماق نئجه ده اوجوزلاشیب. هر گون قورآن اوخویان، قورآن ازبرلهین، قورآن علمینی آلان آداما باخیرسان، اخلاقیندا ذره قدر ده قورآنین دیقته ائتدیگی اخلاق و رفتاردان بیر شئی گورسنمیر.
قورآن اوخوماق، اونو تیلاوت ائتمک عظمتلی بیر عبادتدیر. بو عبادت قلبلره حیات بخش ائدیر، نورلاندیریر، شفا وئریر، ساغالدیر. ایندیکی گونوموزده ایسه قورآن آراشدیریلمادان، درک ائدیلمهدن، معناسینا گیریشمهدن سادهجه دیلله تلفوظ اولونان سوزلره چئوریلمیشدیر. قایمیز او اولوب کی، فاتیحهدن خطمه قدر ان قیسا زاماندا تیلاوتی نئجه بیتیرک. چوخلاری دا بونو ائتمهنین سببی اولاراق پئیغمبریمیزدن (س.آ.س) بو حدیثی سیتات گتیریرلر؛ “کیم اللهین کیتابیندان بیر حرف اوخویارسا، اونا ۱۰ حسنت (ثاواب) یازیلار…”
عبادتلر قلبین دیری قالماسی اوچون موختلیف واسطهلردیر. تمیز، دوغرو، دوزگون، دوروست، گؤزل و ساغلام عبادت اوره یه حیات و حیات دولوسو راحتلیق بخش ائده بیلر. بونون خاریجینده اولان عبادت ایسه شکیل، فورما، ریتوال و یا عادت کیمی قالیر. چوخ گومان کی، بئله عبادت ائدهنین ده داخیلی دئییل، خاریجی گؤرونوشو فرقلهنیر.
ناماز قیلارکن ان اؤنملی اولان قلبین حیسس ائتمهسی، قارشیسیندا دورولانین عظمتینی درک ائدهرک تیترهمهسی، اوخونولان آیهلری تفککور ائتمهسی، روکو و سجدهلرده تمکینلی اولماسی و تام اؤزونو نامازا حصر ائتمهسیدیر.
همچینین ذکر ائتمک ده، اللهی آنماق، گوناه و تقسیرلری خاتیرلایاراق خجالت و پئشمانچیلیق چکمک، باغیشلانما دیلهمک، مغفیرته احتیاج دویماق، مرحمت ایستهمک، اونون عظمتینی و شنینی تعریف ائتمک و قلبی بو ذکرلرده اریتمکدیر.
بونا اویغونلاشدیراراق اوروج، صدقه، یاردیم ائتمک، ایفتار وئرمک و سایره کیمی بوتون خئییر عمللری بو جور ائتمک گرکدیر.
هله ده نفس آلیرسینیزسا بیر دوشونون! هله نه قدر یاشایا بیلرسینیز؟ حیاتا گلیش سببینیزه نظر یئتیرین. هارداسینیز؟ کیملرلهسینیز؟ خوشبختسینیزمی؟ سیزی سیزدن بئله یاخشی تانییان ربّینیزی، نه قدر تانیییرسینیز؟ اؤزونوزه سوال وئرمکدن قورخمایین. یئنه بیر آیری فورصت گلیب چاتیب.مین شوکور اللها…رامازان آیی..!
بو فورصتدن لاییقینجه ایستیفاده ائدک!الله بیزی شکیل و فورمادان باشقا هئچ بیر شئی دیَیشمهین عبادتلردن قوروسون!
عبادتلر اخلاقیمیزی، نفسلریمیزی، فیکیر و دوشونجهلریمیزی، حالیمیزی و وضعیتیمیز، عمل و رفتارلاریمیزی موسبته دوغرو دیَیشدیرسین!الله بیزه ائله بیر عبادت نصیب ائتسین کی، اونون حقیقی حیکمت و مقصدلرینه نایل اولا بیلک!
آمین!
نوشته شده توسط admin در شنبه, ۱۳ تیر ۱۳۹۴ ساعت ۶:۱۱ ق.ظ