اورمودا دوغولموشام من
اکبرسعادت
ائلیمین گوز یاشی سان اورمو گولوم
بئله نیسگیل ائله مه دوزلو گولوم…
آنادیلیمیز: اورمودا دوغولموشام. بو توپراقدا اولمک ایسته ییرم. بو توپراقدا یاشاماقدا. آنجاق یقین کی سینیرلارین اوته سینده گونش باشقا جور ایشیق ساچیر. قونشولار باشقا جور انسانا یاناشیر. و انسانلار باشقا دیرلار.
او زامانلار من اوشاق ایدیم.اوشاقلیق عالمینده سنی چوخ بویوک بیر اوقیانوس ظن ائدردیم.
آما سندن هئچ زامان قورخمازدیم. چونکو سن هئچ کسی بوغمازیدین. سنی دنیز آدلاندیرارکن سنین قوینوندا بویودوک بیز سنین وارلیغیوا او قدر آلیشمیشیق کی سنین اولماماغین عاغلیمیزدا سیغا بیلمه ییر. بیزحایاتیمیزین سندن آختیغینی تازا بیلمیشیق. سنین بیزه آنا اولدوغونو تازا اویرنمیشیق. دئمک عومروموز سنه باغلییمیش. سن اولماسان بیزده یوخ اولاریق. ایندی ، اوز اوشاقلاریوین گوزلری اؤنونده سوزسوزلوقدان چابالایب جان وئرمکده سن!بونا نئجه دئزمک اولار. دوزه بیلمه دیم منده. نه الیمدن گله بیلر کی؟ سنه بیر بارداق سو گتیریردیم. یولومو کسدیلر، یولو باغلادیلار، سنه چاتا بیلمه دیم، بارداغی آلیب سیندیردیلار.
دئمک سنه سو وئرمک یاساق ایمیش. مگر بورا کربلایمیش دئمک! باغیشلا منی دنیزیم، گوز یاشلاریمدان باشقا بیر شئی سنه سونا بیلمه دیم!
چیغیریرام، باغیریرام امما سسیم بیر یانا یئتمیر. حسرتینن چکدییم هئی لر اوره ییمی گوینه دیر، قه هر دن بوغولورام چاره سیزلیییمه! دوشونورم بئله ال-آیاغسیزلیغی هاردان قازاندیم من. منیم آتا- بابالاریم حاق یولوندا قیلیبج قالدیران، دویوش میدانیندا داییم بایراق لاری دالغالانان، آت چاپان، دادا چاتان اولوب لار. آتیلا بابام آت اوسته دوغولوب، اولو بابکیم دوغرانانا قدر دویوشوب امما دوشمه نه باش ایمه یب؛من سه قانادسیز قوش کیمینم، آتالاریم قارتال اولدوغو حالدا. بو غیرت سیزلیک، سسسیزلیک، مظلوملیق، باش آشاغیلیقی هاردان قازاندیم من!
بئله کی من خاطیرلاییرام اورمو گولونون یام یاشیل چئوره سنیده بئله بیر تورن لر ، ایلنجه لر و ها بئله اونون شفاجیل خاصیت لریندن فایدالانماق ان چوخو ایکی آی زاماندان آرتیق ایره لی گلمیردی چونکو هاوالار سویوقلاشیب و پاییز فصلی آردیندایدی. بئله لیک له بو شنلی یین باشلانغیجی یاز فصلین سون آیی نین ۱۵ – جی گونو و قورتولوشودا یای فصلی نین اورتا آیی یعنی قورا بیشرن آیین ۱۵ – جی گونو ایله قارشیلاشیردی. ائله کی بو ایکی آی بیتیردی و هاوالار سرینله شیردی دییه ردیلر قویروق دونوب یا دولوب یا دوغوب دور. بوگوندن سونرا داها اورمو گولو ان آز یولچولارلا قارشیلاشاردی
بو نئچه ایلده اورمو گولونو قوروماقدان قورتارماق ایچین، موتخصیصلر، بیلیم آداملاری، آیدینلار، اویرنجیلر، ژورنالیستلر و خالق آراسیندا چوخلو دانیشمالار و یازیشمالار اولوب و بیر سایی چوزوم اونریلمیشدیر:
گوجلو یایینلار ایله عوموم میللتی میدانا چاغیریب اونلارا بو خطره گوره اویاری وئرمک. ایراندا بو ایش تکجه دوولت الیندن گلر …زاب یا آراز چایلاری و حتی خزر دنیزیندن اورمو گولونه عاجلی سو چکمهیه تلسمک.
آجی چایینین سویونو کمر ایله شوراکئت یئرلریندن گئچیردیب و گولون شورلوغونو دوغال میزانینا چاتدریماق…. سدلری آچماقلا اورمو گولونون سو حاقینی اودمک.اورمو گولونه آخان چایلارداکی بوتون سدلر آچیلاراق، سویون گوله آخیدیلماسی بیرینجی آددیمدیر. بو اراضیلردهکیاکینچیلرین اراضی اولچوسونه گوره قازاناجاقلاری گلیر حسابلانیب اونلارا اودنهرک، آلما و اوزوم باغلاریندان باشقا هئچ بیر اکینه سو وئریلممهلیدیر. بو مسئله ایکی ویا اوچ ایله قدر دوام ائدبیلر. بو کیمی تدبیرلر دونیانین بیر چوخ اولکهسینده تجروبه اولونوب و موثبت نتیجهلر وئرمیشدیر.
بو توپراغدا دوغولموشام. بو توپراقدا اولمک ایسته ییرم. بو توپراقدا یاشاماقدا. آنجاق یقین کی سینیرلارین اوته سینده گونش باشقا جور ایشیق ساچیر. قونشولار باشقا جور انسانا یاناشیر. و انسانلار باشقا دیرلار.
اینانماق یا ایناننماماق دئییل منیم مسئله م. سورون بودور کی من بورایا عایدم. بو کوکوم بورادادیر. پاییز دا آرانلیق یئرلرده کوک سوز بوتالاری یئل نئجه اویانا بویانا آپاریر. من اویله سی اولماق ایسته میرم. من بیر سویود آغاجی تک زینه بیر چای قیراغیندا سس سیز سمیر سیز بیرچول ده کولگه سالماق ایسته ییرم.
هر زمان ایکی دامجی یاغیش یاغیر گویه باخیب تانری درگاهینا شوکر ائدیرم. کی بلکه بو باشی بوش بولوتلارین بیزیم جانیمیز اورمو گولونه بیر فایداسی توخونسون.
بو جغرافیادا گوجلو بیر زیستیمحیطی چالیشقان جنبشی اولمادان، آذربایجان میللی اورمو گولون قوروماق ائتگیسین اوز گلهجک یاشامیندا دوشونهرک حیاتین بو اساسدا جیددی حالدا آرادان گئتمهگین بیلیب، دونیا میللتلریایله برابر اوز حاقیندا سوسماییب، اعتراضلارینی تام مدنی شکیلده گئچیرتمکدهدیر.
نوشته شده توسط admin در دوشنبه, ۲۱ دی ۱۳۹۴ ساعت ۷:۳۱ ق.ظ