- آراز آذربایجان – روزنامه خبری آذربایجان غربی - http://www.araznews.ir -
اوتلارین بحثی
Posted By admin On اسفند ۱۰, ۱۳۹۲ @ ۱۰:۵۸ ق.ظ In آنادیلیمیز | No Comments
کؤچورن: احمد اسدی
بیری وارایدی، بیری یوخ ایدی، بیر بالدیرغان واردی. بو بالدیرغان پاییز و قیش آیلاریندا یاتاردی،یاز و یای آیلاریندا یوکسک داغلارا سرین یایلاقلارا گئدردی. سرین سودان ایچردی، قایماقدان یئییب اوچ آرشین قول-بوداق آتاردی. هر گون اؤزونو اؤیوب دئیه¬ردی:
-گؤرهسن دونیادا منیم کیمی خوشبخت وارمی؟ دونیانین کئفی هامیسی منده، گلینلر قیزلار منی دریب یئیه¬ر. مجلسلر بزگی، اوتلار یاراشیغییام. منیم یانیمدا بال هئچ بیر شئیدیر.
گونلرین بیر گونونده بیر خیمی تورپاقدان باشینی قالدیریب دونیایا باخیردی، بالدیرغانین اؤزونو اؤیمهسینی ائشیتدی. برکدن گولوب دئدی:
-آی بالدیرغان، دئیهسن اؤزونو تک گؤرموسن؟ مجلسلر یاراشیغی منم، من اولان یئرده سنی حیوانلارین قاباغینا آتارلار.
بالدیرغان دئدی:
-آی زیرزیبیل یولداشی، سن ده باشینی باشلارا قاتمیسان؟ سنی هر اؤتن آیاقلار، سونرا “خالا خطرین قالماسین” یئیه¬رلر.
دومبالان بونلارین بحثینی ائشیتدی. برک غضبلندی. ائله بیر نعره چکدی کی، یئر آیریلدی. اوزونو اونلارا توتوب دئدی:
-من اولان یئرده سیز نه حدله اؤزونوزو اؤیورسونوز؟ من عؤمر اوزادیب، دردلر قووورام.
بالدیرغان گولوب دئدی:
-سن ده ائله خیمینین تاییسان، زیبیل یولداشیسان.
دومبالان دئدی:
-آی عاغلی توپوغوندا، من مجلسلرده گزیرم. کابابلا چیغیرتما، قایقاناق، بال و یاغ ایله بیر یئرده اوتورورام. آداملاری کؤکلدیرم، سن نه¬سن!؟
خیمی دئدی:
-سن ده دوز دئمیرسن. سن او قدر آران سویو ایچمیسن کی، قارنین شیشیب، قیزدیرما عاغلینی آپاریب، من ایکینیزدن ده باشام.
بالدیرغان دئدی:
-آی قارنی¬ شیشیک دومبالان، سنی توی مجلسینده دویماق اوچون، اما منی مزه اوچون یئیه¬رلر. سیزین ایکینیزینده منیم یانیمدا دیلینیز یوخدور.
کیشمیش کناردان باخیردی، بونلارین بحثینی ائشیدیب دئدی:
-من بوردایام ها… هئچ اؤزونوزو اؤیمه¬یین. من اولان یئرده سیزی زیبیللیگه آتارلار. منی آشا تؤکرلر، پیلوو اوستوندن یئیه¬رلر، من سانجینی کسرم.
دومبالان دئدی:
-سن هئچ دانیشما،یئییلمکدن باشقا هئچ شئیه دگمزسن. چوخ زامان حیوانلارا یئم اولورسان.
خیمی دئدی:
-اده، سن کی، قوردلار، جوجولر یئمیسن، نه دانیشیرسان؟
دومبالان دئدی:
-آی کیشمیش، من یاخشی یئملرین زولالینی چکیب، جئجه¬یینی وئریرم سنه. سن نیه دانیشیرسان؟
پوسلول بونلارین صحبتینه درین-درین قولاق آسدی. برکدن سیلکلنیب دئدی:
-من بورادایام ها….من تمیزلیک یولداشییام. هامینیزدان باشام. قیزلار، گلینلر الیندن دوشمورم.
برک گولوشوب، اونا دئدیلر:
-سن گئت، زیبیل سوپورمه¬یینه، آی سوپورگه! بورا سنین یئرین دگیل.
بیردن گندالاش سسلنیب دئدی:
-من اولان یئرده هئچ کس اؤزونو تعریفلهیه بیلمز. مسکنیم گؤزل سولار کناری، ایستی سولار ایچیدیر. هکیمم، حکیم! قان منیم قورخومدان آخماز، قاچیب گیزلنر. من ترسیمیش یارالاری ساغالدیرام. من شیشلری قایتارارام.
دئدیلر: -آی گندالاش، سنی هئچ حیوان دا یئمز. آداملارین آغزینی آجی ائله¬ییرسن. ایگیندن هامی یئددی آغاجلیق کنار قاچیر. سن بیزله بحثه گیره بیلمزسن.
گندالاش دئدی:
-من هامیدان باشام. قورخوسوندان هئچ کس منه ساری گله بیلمز. سیز قورخاقسینیز، هر یئتیشن سیزی یئیه¬ر.
آتقویروغو بونو ائشیدیب دئدی:
-آی گندالاش، دئیهسن اؤزوندن قوچاق بیلمیرسن؟ قولاق آس: -قورخوسوندان کیمسه منه دگمز. هر کسه بیر سیلله وورارامسا، قان قوسار.
اونا گولوب دئدیلر:
-دونیادا نه خئیره، نه ده شره یارارسان. سن اوتلوقدان چیخمیسان، نسلینی دگیشمیسن.
قوزوقولاغی (تورشنگ) آتقویروغونون دیبیندن باشینی قالدیریب دئدی:
-من هامینیزدان باشام. منی گلینلر، قیزلار اؤز اللریله دریب یئیه¬رلر. من یئمکلرین گولویم. منی قیسبهیه قاتارلار. آشا، شوربایا تؤکر، مجلسده مزه اوچون یئیه¬رلر.
گولوشوب اونا دئدیلر:
-آی آمان، بیزدن کنار گز، دیشلریمیز قاماشار.
قیرخبیغیم دانیشیغا قاریشیب دئدی:
-نه اؤزونوزو اؤیورسونوز؟ من پیلوولارین یئمکلرین لذتییم. یاخشی مجلسلرده من پیلوولا اورتایا گلرم، سیز کناردان باخیرسینیز. اؤسکورمنی، قارین آغریسینی کسرم، آدامی کؤکلدرم. من حکیمم، سیز نیه لازمسینیز؟
اوهلیک قیرخبیغیمین سسینی ائشیدیب دئدی:
-من بورادایام ها… بیر آز یاواش دانیش. من اولان یئرده سن نیه لازیمسان؟ من یئددی ایل قارنی آغریانلارین قارنینی یاخشی ائدرم. اؤسکورمنی قووارام. دؤش آغریسینی یاخشی ائلرم. بلغمله صفرانی قووارام.
Article printed from آراز آذربایجان – روزنامه خبری آذربایجان غربی: http://www.araznews.ir
URL to article: http://www.araznews.ir/%d8%a7%d9%88%d8%aa%d9%84%d8%a7%d8%b1%d9%8a%d9%86-%d8%a8%d8%ad%d8%ab%d9%8a/
Click here to print.
Copyright © 2013 آراز آذربایجان - روزنامه خبری آذربایجان غربی. All rights reserved.