انسانلیغا چالیشانین آدی جاویدان قالار

(آشیق بهمن صبوری ایله دانیشیق)
دانیشیق آپاران: احمد اسدی
آچیقلاما: آشیق بهمن صبوری ۱۳۵۰-جی گونش ایلینده قوشاچایین آتاخان کندینده دونیایا گؤز آچیبدیر. او ۱۳۵۹-جو ایلدن بیناب شهرینه کؤچوب بوگونه قدر ده ائله بو شهرده یاشاماقدادیر. اونون سازا و سؤزه علاقه¬سی اوشاقلیق ایللرینده باشلاییب، رحمتلیک اوستاد آشیق بهارعلی بالکانلیدان درس آلیبدیر. آشیق بهمنین سازی و سؤزو قایدالی و صنعتده¬کی گوجو آشیق¬سئورلره اثبات اولونموش بیر مسئله¬دیر. اونون مختلف فستیواللاردا و یاریشمالاردا الده ائتدیگی اوستون مقاملار بو سؤزو دوغرولاییر. آشیق صبور هم ده شاعردیر و آشیق شعرینین مختلف قالبلرینده دگرلی شعرلری واردیر. بو ائل آشیغیمیزلا بیر دانیشیق آپارمیشیق. سیزی بو دانیشیغی اوخوماغا دعوت ائدیرم.
*هر نه¬دن اؤنجه اؤزونوزو عزیز اوخوجولاریمیزا تانیتدیرین، لطفاً.
من بهمن صبوری ۱۳۵۰ گونش ایلینده قوشاچایدا دونیایا گؤز آچمیشام. آتام قاراداغلی، آنام قوشاچایلی اولوب.
*سازا علاقه¬نیزدن دانیشاق، هانسی ایلدن آشیق صنعتینین آردینی توتوب، بو یولدا چالیشیبسینیز؟
هله اوشاق ایکن منیم آشیقلیغا علاقه¬م باشلامیشدی و بو صنعتین سئوگیسی اوره¬گیمده یئر آلمیشدی. ۱۳۷۰-جی ایلدن ۱۳۷۶-جی ایله قدر رحمتلیک آشیق بهارعلی¬نین خدمتینده اولوب درسیمی اوندان آلمیشام.قاییداق اوشاقلیق ایللرینه، هر انسانین او دؤورلرده اولان خاطره¬لری سونکو ایللر یاشامیندا چوخ ائتگیلی اولور. سیز اوشاقلیق ایللرینده هانسی آشیقلاری تانیاردینیز و *هانسی آشیقلار سیزه تأثیر بوراخدی؟
گؤردوگوم بیرینجی آشیق، رحمتلیک آشیق میکاییل ایدی.
سونرالار ایسه آشیق دهقان و آشیق عبدالعلی¬نین سؤز-صحبتی ایله تانیش اولدوم.داها سونرالار ۱۳۶۸-جی ایلده آشیق بهارعلی ایله تانیش اولدوم و اونا علاقه بسله¬دیم.
*سؤزلرینیزده آشیق بهارا بؤیوک سئوگی و محبت ایله یاناشی مقدس بیر احترام و دویغونو حس ائتمک اولور. رحمتلیک آشیق بهاردان دا بیر دانیشاق. اوندان نه دئیه بیلرسینیز؟
آشیق بهار نئچه کلمه و یا نئچه جمله¬یه سیغمایان بیر اوستاد ایدی.
او اؤزو بیر دریا ایدی، اؤزو بیر دونیا ایدی. اونونلا آلتی ایل بیر یئرده اولدوم، ذره¬جه رفتاریندا و اخلاقیندا اگریلیک گؤرمه¬دیم. کمالدان، ادبدن بول بیریسی ایدی.
*بیلدیگیمیزه گؤره، شعر ده یازارسینیز، بویورون هانسی ایلدن شعر یازیرسینیز و شعرلرینیزدن بیرینی ده اوخوجولاریمیزا اوخویون؟
۱۳۶۹-جو ایلدن بری شعر ایله اوغراشیرام. آشیق قالبلرینده شعرلریم وار. ایندی ایسه بهمن وطن اوغلونون بیر شعرینه یازدیغیم نظیره¬نی سیزه اوخوماق ایسته¬ییرم.
درین یارالاری درمان ساغالدار
دردسیز انسانلارین چاراسی یوخدور
نه هجران آنلاییر، نه وصال دویور
بیر اوره¬ک کی اونون یاراسی یوخدور
***
صادق یولداش اولماز یولدان آزاندان
قوهوما قارداشا قویو قازاندان
حکیمله، رمدارلا، دوعا یازانلا
عشق خسته¬سینین چاراسی یوخدور
***
عؤمرون اوزونون یوخ یاشایاق ائنین
گؤز یاشی قوروماز فلک اگه¬نین
ائلده بیر مثل وار کؤنول سئونین
آشیق بهمن، آغی قاراسی یوخدور
بیر دنه ده دیوان شعری اوخویوم:
یئر اوزونه یاخشی یامان گلنلر امکان قالار
انسانلیغا چالیشانین آدی جاویدان قالار
دوه¬چی ایله دوست اولانین دروازاسی گن گرک
قورخاقدان بازرگان اولماز، ایگیددن آد سان قالار
قسمتینه دوشن عؤمرو غفلتده وئرمه بادا
حق یولچوسو باش اوجالدار قوهوم قارداش اولادا
انسان عؤمرو آز دا اولسا آزاد اولا دونیادا
ذلت بیر ایل بئش ایل اولار، تهمت هر زمان قالار
***
چوخ یئیه¬نلر تئز آجالار، حرام مالدان قیل حذر
یئمک ایله دویمایانا یالاماقدا یوخ اثر
واختین چاتسا ساغالدانماز، گلسه یوز لقمان اگر
یارانمیشلار گئتمه¬لیدیر، نه گدا نه خان قالار
***
دوز هدفه اوخ آتانلار پئشمان اولماز هئچ زمان
اگری یول یولچونو یورار، سؤزده یوخ شبهه اینان
دونیا مالی سنین دگیل، اولما موفته نگهبان
آشیق بهمن، ائل ایچینده یازدیغین دیوان قالار
*یئری گلمیشکن سورمالیام، هانسی شاعرلرین شعرلرینی مجلسلرینیزده چوخراق اوخویارسینیز؟
هانسی شعر اوره¬گیمه یاتسا و هاوالار اوسته گلسه سئورم اوخویام. آمّا شاعرلره گلینجه ده شجاعت ممدلی، بهمن وطن اوغلو، ستار گلمحمدی، بهرام اسدی، اسماعیل بهرامی، عوض احمدی کیمی شاعرلرین شعرلرینی اوخودوغوم هاوالاردا سسلندیره¬رم.
*سیز نئچه آشیق مکتبینین بیرلشدیگی بیر جغرافیادا یاشاییرسینیز(اورمو، تبریز-قاراداغ و هئشتری)، هانسی مکتبین هاوالارینی اؤیره¬نیب چالیرسینیز؟
من بو مکتبلرین اوچونون ده هاوالارین چالیب اوخویارام.
*هئشتری آشیق مکتبی بیر آز تانینمامیش قالیب، بو مکتبی هانسی شهرلرده گؤرمک اولار؟
رحمتلیک اوستادیم دئیه¬ردی، تیکان تپه¬دن بوستان¬آوایا قدر هئشتری حساب اولور. اؤزونوز حساب ائدین بو آرادا بیناب، قوشاچای، سایین قالا، ماراغا، هئشتری و بوستان آوا کیمی شهرلر یئرلشیر.هئشتری مکتبینین آشیقلاریندان سؤز آچاق، بو مکتبده کئچمیشلرده کیملر وار ایمیش؟هئشتری مکتبینین ان آدلیم و ان اسکی تاریخه دایانان آشیغی، آشیق آلی قولو ایمیش. اونون حیات یولداشی، جیران خانیم دا اوستاد آشیق ایمیش.
*هئشتری مکتبینده اولان هاوالارا گؤره نه دئیه بیلرسینیز؟ هانسی فرقلر گؤرسنیر بو مکتبده؟
هر مکتبین اؤز لهجه¬سی و قایداسینا گؤره بیر تعداد اؤزل هاوالاری وار. بونلاردان علاوه آیری مکتبلردن گلن هاوالار دا او مکتبده دگیشیملره معروض قالیب اورانین قایدالارینا گؤره منیمسه¬نیلیر و مختلف گوللر و اوخوماقدا بوغاز وورمالار و تحریرلر ایله بزه¬نیلیر.
*آشیق ناغیللارینا گؤره نه دئیه بیلرسینیز؟ هانسیلاری اؤیره¬نیبسینیز؟
ناغیللار آشیق صنعتینده اساس رول اویناییر و آشیقلاری داستانلار ایله بیر-بیرلری ایله آییرماق اولار. من اؤزوم ایندییه قدر اوچ سی دی اوخویوب ائشیگه وئرمیشم: والئح زرنیگار داستانی، کوراوغلو و امراهین داستانی.
*آشیق داستانلاریمیز نه موضوعلاردا و قونولاردا یارانیبلار و نه دئمک ایسته¬ییرلر؟
داستانلاردا قهرمانلیق و سئوگیدن علاوه اعتقاد و ایناملا باغلی موتیولره ده راست گلمک اولور. بونلاری یارادان آشیقلار، چوخ درین، یارادیجی و دوشونجه¬لی انسانلار اولوبلار. کئچمیشده رسانه¬لر و تحصیل سیستمی¬نین اولمادیغی بیر واختدا ، بو ناغیللار و داستانلار اؤزو بیر مکتب و دانشگاه یئرینده ایمیش.
*آشیق بهمن هانسی شهرلره و ماحاللارا تویلارا گئدیر؟
من سولدوز شهریندن قوما قدر مجلسلره دعوت اولورام.بینابدا اولان آشیقلاری دا یاد ائدک، کیملر وار ایمیشلار و ایندی کیملر واردیلار؟بینابدا آشیق بشیر وار ایمیش. ایندی ایسه آشیق بهارعلی آموس، آشیق اسدالله، آشیق نادر، آشیق ناصر، آشیق بهارعلی جنتی. البته بونو دا خاطرلاتمالیام بینابدا اولان آشیقلار قوشاچایلیدیلار و اورادان گلمه¬دیرلر. بیلدیگیمه گؤره بینابدا چوخ دا گوجلو و ائتگیلی آشیق فضاسی و محیطی اولماییب.
*بینابدا آشیق شعری یازان شاعرلری ده خاطرلایاق، کیملر وار؟
کریم طالبی، سجاد نیکزاد، امامعلی زاده، حسن ذاکری.کولتوروموز و موسیقیمیزین تهلوکه¬لی بیر دورومدا اولدوغو واختدا، نئچه مین ایللرین و نئچه اون مینلرین امگینین نتیجه¬سی اولان آشیق صنعتیمیزی دگر وئرمگه گؤره نه دئیه بیلرسینیز؟ یئنی نسله اؤیودونوز نه اولا بیلر؟هر نه¬دن اؤنجه گرک آشیقلاریمیزدا گنجلری بو موسیقییه جذب ائتمک قدرتی اولا. بیرینجی و اؤنملی مسئله بودور.سونرا دا ایندی اینترنت چاغیدیر و ارتباطات عصریدیر. هامینین هر نه¬دن خبری وار و یاخشینی پیسدن سئچه بیلیرلر. گرک بیلگیلندیرمه ایله اؤزلری اؤزلرینه قاضی اولالار، بیز هانسی سمته و هانسی طرفه گئدیریک؟ بو گئتدیگیمیز یول دوزدورمو؟
*دگرلی واختینیزی بیزیم اختیاریمیزا قویدوغونوزا گؤره تشکروموزو بیلدیریب آیدین و اوغورلو گله¬جکلر سیزه آرزیلاییرام. چوخ ساغ اولون.سیز ده ساغ اولون.