امر معروف و نهی منکر باره‌سینده اولان آیه و حدیث‌لر
ای مسلمان‌لار! ایچرینیزده (انسانلاری) یاخشیلیغا چاغیران، خئییرلی ایشلر گؤرمگی امر ائدن و پیس عمل‌لری قاداغان ائدن بیر دسته اولسون! بونلار (بو دسته) حقیقتاً نجات تاپمیش شخص‌لردیر.”
“اوغلوم! ناماز قیل، (انسان‌لارا) یاخشی ایشلر گؤرمگی امر ائت، پیس ایشلری قاداغان ائله. (بو یولدا) سنه اوز وئره‌جک مصیبت‌لره دؤز. حقیقتاً بو (دئدیک‌لریم) واجب عمل‌لردن‌دیر!”
“اؤزونوزو و عائله-اوشاق‌لارینیزی (یاخشی ایشلره امر ائدیب پیس ایشلردن چکیندیرمکله) ائله بیر اوددان قورویون کی، اونون یاناجاغی انسان‌لار و داش‌لاردیر.”
امر معروف و نهی منکر اللهین یاراتدیغی ایکی گؤزل شئی‌دیر؛ هر کس اونلارلا دوستلوق ائتسه (الله یانیندا) عزیز، هر کس اونلاری ترک ائتسه ذلیل اولار.
امام محمد باقر (ع)
اونلار (امر معروف و نهی منکر) قدرت صاحبی اولوب، اؤزونون، دوستلاری‌نین و یاخین‌لاری‌نین جانین‌دان قورخمایان هر بیر کسه واجبدیر.
امام جعفر صادق (ع)
الله یانیندا انسانلارین دونیا و آخرت ایشلرینی تکمیل‌لشدیرن امر معروف و نهی منکردیر. اونلار نه انسانین عؤمرونو قیسالدیر، نه ده روزینی آزالدیر.
امام جعفر صادق (ع)
منیم امّتیم امر معروف و نهی منکر ائتدیک‌لری مدتده خئیر و سعادت ایچینده اولارلار، عکس تقدیرده، املاک‌لاریندا اولان برکت چکیلر بعضی‌لری بعضی‌لرینه حکمرانلیق ائدر؛ بئله کی اونلار یئرده و گؤیده اؤزلرینه کؤمک ائده‌جک هئچ بیر کس تاپمازلار. وای اولسون او ملته کی امر معروف و نهی منکری اؤز دینی پروقراملاری‌نین ترکیب حصه‌سی حساب ائتمه‌سین‌لر.
امام محمد باقر (ع) و امام جعفر صادق (ع)
اگر اونلار (امر معروف و نهی منکر) اولماسا سیزین ان شر آدام‌لارینیز سیزه حکمرانلیق ائدر و ان خئییرلی آدام‌لارینیزین نفرینی قبول اولماز رسول اکرم (ص) بویوروب: “منیم امّتیم بو ایکی وظیفه‌نی بیر-بیرلری‌نین عهده‌سینه آتسا، ایلاهی عذابین گلمه‌سینه حاضر اولسون.”
امام رضا (ع)
اگر جماعت او ایکی وظیفه‌نی ترک ائتسه، الله تعالانین چوخ چتین عذابی ایله اوزلشه‌جک و الله یاخشی‌لاری دا پیس‌لرین آراسیندا هلاک ائده‌جک. کئچمیش زاماندا یاشایانلارین دا عذاب و هلاکی اونلارین گوناه آرخاسینجا گئتمه‌سی اوجباتیندان ایدی. عالیم‌لر و عابدلر ایسه بونون قارشی‌سینی آلمیردیلار.
حضرت علی (ع)
بیلین و آگاه اولون! مطلق سیزین آغ ساققال‌لارینیز و بیلیک‌لی‌لرینیز (اؤیود-نصیحت باخیمیندان) نادان و ریاست طلب ائدن‌لره دقت یئتیرسین، عکس تقدیرده منیم نفرینیم سیزین هامینیزی بورویه‌جک!
امام جعفر صادقین (ع) خبردارلیغی
هر کس موعظه ائتمک و ایلاهی عذابلا قورخوتماق اوچون ظالم بیر حؤکمدارین حضورونا گئتسه، انسانلارین و جین‌لرین خئییر عمل‌لری و گؤردوک‌لری ثواب ایشلر قدر ثواب اونا عطا اولونار.
امام محمد باقر (ع)
ضعیف انسانلارین حاقینی اونلارین گوجلولریندن آلینماسیندا سوستلوق گؤسترن ملت هئچ واخت پاک و عیب‌لردن اوزاق اولماز.
امام جعفر صادق (ع)
نئجه اولا‌جاق او ملتین حالی کی، قادینلاری فساد تؤره‌دن، جوان‌لاری فاسق اولدوقلاری حالدا امر معروف و نهی منکر ائتمیرلر؟
امام جعفر صادق (ع)
الله-تعالی دینی اولمایان، یعنی امر معروف و نهی منکر ائتمه‌ین مؤمنی اؤزونه دوشمن بیلیر.
امام جعفر صادق (ع)
هئچ بیر ایمان صاحبی اولان گؤزه اجازه وئریلمیر کی، انسانلارین گوناهلارینی مشاهده ائتدیگی حالدا بئله بیر وضعیتی دگیشدیرمه‌میش گؤز قاپاقلارینی بیر-بیری‌نین اوزرینه قویسون.
قلبی، دیلی و الی انسانلاری گوناهلاردان چکیندیرمه‌ین کس دیری‌لر آراسیندا حرکت ائدن اؤلو کیمی‌دیر.
حضرت علی (ع)
یا امر معروف و نهی منکر ائدین، یا دا پروردگارین عذابی هامینی بورویه‌جک.
انسانلارین گوناهلارینی مشاهده ائدن شخص قدرتی چاتیرسا الی ایله، اگر باجارمیرسا دیلی ایله بونون قارشی‌سینی آلسین. اگر بونلارین هئچ بیرینه قدرتی چاتمیرسا قلباً بونا راضی اولماییب نفرت ائتسین. عکس تقدیرده، قلبی دئوریلیب آلت-اوست اولار و بونونلا دا حاق یئرینه باطلی قبول ائدر و اونا راضی اولار.
اؤز جمعیتی آراسیندا پیس‌لیک‌لری گؤروب بونو آرا‌دان آپارمایان ملته آللاهین عذابی یاخینلاشار.گوناهی مشاهده ائدیب اوندان خوشو گلمه‌ین کس بو گوناهدان اوزاق و خبرسیز بیر شخص کیمی‌دیر، اما او کس کی، قبیح و پیس بیر ایش باره‌سینده ائشیدیب اونا راضی اولور، همین گوناهی یئرینه یئتیرن کس کیمی‌دیر.
امام جعفر صادق (ع)
رسول اکرم (ص) گؤستریش وئریب کی، گوناه صاحب‌لری ایله (پیس ایشلریندن ال گؤتوره‌جک‌لری اومیدی ایله) غضب‌لی طرزده رفتار ائدک.
اللهین دوست‌لاری او کس‌لردیر کی، اللهین حرام‌لارینی حلال حساب ائدن شخص‌لری مشاهده ائتدیک‌لری زامان یارا‌لی پلنگ کیمی غضبلنسینلر.
الله-تعالی عذاب ملک‌لرینه گؤستریش وئریب: “هئچ واخت الله‌دان اؤترو اؤز گؤرکمینی دگیشیب غضبلنمه‌ین عابدین عذابینی آرتیق ائتسین.
گوناهسیز انسانلاری دا گوناهکارلارلا اوتوروب-دوردوقلارینا و اونلاری گوناهدان چکیندیرمه‌دیک‌لرینه گؤره مذمت ائدیب تهمتلندیره‌جه‌یم.
امام جعفر صادق (ع)
نادانلارین گوناهی بیلیک‌لی‌لرین بوینونا یوکلنه‌جک. اونا گؤره کی، اونلار (بیلیک‌لی‌لر) گوناهکارلارا دوغرو گئتمکله اونلاری بو ایشدن چکیندیرمه‌لی، اونلارا تأثیر گؤستره‌جک عقل‌لی سؤزلر دئمه‌لی و قبول ائتمه‌دیک‌لری تقدیرده اونلارین مجلس‌لریندن اوزاقلاشما‌لی ایدی‌لر.
امام جعفر صادق (ع)
نه‌یه گؤره اونلار دئمیرلر: “یا بیزدن اوزاق اولون، یا دا پیس ایشلرینیزدن چکینین!”
امام جعفر صادق (ع)
الله-تعالی جبرئیله گؤستریش وئردی: “فلان عابد و زاهد کیشینی گوناهکار و کافر جماعات‌دان تئز یئره باتیر. چونکی اونا دانیشماقدان اؤترو قدرت و باجاریق وئردیک، اما او، امر معروف و نهی منکر ائتمه‌دی.
امام حسن عسگری (ع)
الله-تعالی بنی-اسرائیل پیغمبرلریندن بیرینه بویوردو: “بنی-اسرائیل ملتینه اؤز مسکن سالدیقلاری شهرلریندن بیر نفری حاکم ائده‌جگم کی، قانلارینی تؤکسون، مال-دؤولت‌لرینی غارت ائتسین؛ من اونلارین گؤز یاشلارینا رحم ائتمه‌یه‌جک، دعا‌لارینی قبول ائتمه‌یه‌جگم. بوندان علاوه بیت المقدسی خارابایا چئویریب یوز ایل بو وضعیتده ساخلایا‌جاق، بو عذابی اونلارین گوناهسیز عالیملرینه ده شامل ائده‌جگم. چونکی اونلار (عالیم‌لر) باشقا‌لارینین پیس و چیرکین ایشلرینی گؤردولر، لاکن بونون قاباغینی آلمادیلار.
تفسیر عیاشی
الله-تعالی شعیب پیغمبره (ع) وحی ائتدی: سنین جماعتیندن اولان یاخشی انسانلارین آلتمیش مین نفرینه عذاب وئره‌جگم. اونا گؤره کی، گوناهکارلارلا هم‌رأی اولدولار و منه گؤره اونلارا غضبلنمه‌دیلر.
امام محمد باقر (ع)
الله-تعالی اسلام دینی‌نین بوتون آردیجیل‌لارینی اؤز دینی و اجتماعی وظیفه‌لرینی معین ائدیب اونلارا عمل ائتمکده موفق ائتسین اونلارا ابدی خوشبخت‌لیک و سعادت عنایت بویورسون.
نوشته شده توسط admin در دوشنبه, ۲۰ آبان ۱۳۹۲ ساعت ۶:۱۷ ق.ظ
