- آراز آذربایجان – روزنامه خبری آذربایجان غربی - http://www.araznews.ir -
ادبیات و ادبی نقدی
Posted By admin On دی ۲۲, ۱۳۹۹ @ ۱۰:۳۹ ق.ظ In آنادیلیمیز | No Comments
آنادیلیمیز: اصلینده ادبیات، اؤنجهلیکله انسان توپلولوقلارینین ائنیشلی- یوخوشلو یاشام سورهجیدیر.
البته کی بو سورهج، عادی بیر سورهج دئییلدیر. ادبیات، یاشاییش سورهجینی دیل قالیبیندا اولان یارادیجیلیقلار و آماجلارلا بیزه گؤسترمکدهدیر.
ادبی نقدین ادبیاتین اؤزو قدر اؤنملی اولدوغونو ادعا ائدرسک، دوغروسو هئچ ده آبارتمامیشیق. ادبی نقدین یارانیب گلیشمه تاریخی ایسه، ایلک ادبی اثرلرین یارانماسی ایله چاغداش ساییلیر.
یونان، روم، چین، ایران و…. کیمی اؤلکهلرین ادبیات تاریخینه گؤز گزدیرینجه بو ادعانی قانیتلاماق اولار. اؤرنهیین، ادبیات و شعر تئوریلشدیریلمهسینده دهیرلی اثرلری اولان ایلک فیلسوف اولاراق افلاطوندان آد آپارماق اولار.
یونان شاعیرلرینین شعر و اثرلرینی بیلیمسل بیچیمده ادبی تنقید ائدن ایلک دوشونور ایسه ارسطودان آد چکمک اولار.
هوراس و لانگنیوس دا اؤز اثرلرینده یونان شاعیرلرینین اثرلرینی اینجهلمیش، تنقید ائتمیش و شعر ایله شاعرلیک قونوسونا گیریشمیش اولان اسکی روم دوشونورلریندندیرلر.
بو بیلگینلرین اثرلر و نظرلرینین تاریخ بویونجا، ادبی مکتبلر و ادبی سبکلرده بوراخدیقلاری تاثیردانیلمازدیر.
نئجه کی، رونئسانس دؤرونون بیر چوخ ادبی نقد ایلکهلری، بو عالیم لرین دوشونجهسی اساسیندا قورولموشدور.
ادبی نقدین گرکلیلییی بو اوزدندیر کی، شاعیر و یازارلار اؤز یاپیتلارینین یانلیشلیقلارینا واریر، اونلاری دوغرولدوب یا دا گئدهریرلر.
دیگر یاندان ایسه، اوخویوجولارا اثرین گیزلی یؤنلری و کؤلگهده قالمیش بوجاقلارینی آچیقلایاجاق اولان آیدین و نئت بیر قاورانیم سونولور.ادبی نقدین اولماماسی هرج-مرجلییه یول آچار، شعر ایله ادبیاتین گؤبهلک کیمی قورالسیز و دنگهسیز گلیشمهسینه زمینه یارادار.
بعضا ایسه، زامانین بیر بؤلومونده شعرین ایچی بوش قابارماغینا یول آچاراق قویوق کیمی شیشیردر، آنجاق قویوق، اؤنونده- سونودا پارتلایاجاق.
جیددی و یارادیجی ادبیاتیمیزین اولماسینی ایسترسک، ادبی نقدی ده جیددی توتمالی، اوزمانجا و بیلیمسلجهسینه اونا یاخینلاشمالیییق.
یوخسا هر گون ادبیات آلانیمیزدا هر هانسی بیر خستهلییین سالقینینی گؤزلمهلیییک؛ بو خستهلیکلر مزمنلشیب ایللرجه سوره بیلر، ایللرجه درمان اولمایا بیلر، یوکسک بیلینجسل اورونلرین مرکزینی بیله ایشدن سالا بیلر و سونوندا ایسه ادبیاتین آخیمینی دورغونلوغا تسلیم ائده بیلر.
اصلینده ادبیات، اؤنجهلیکله انسان توپلولوقلارینین ائنیشلی- یوخوشلو یاشام سورهجیدیر.
ادبیاتین یارانیب گلیشمهسی نه دنلی اؤنملی و گرکلیدیرسه، منطق و بیلیمسل ایلکهلره دایانان نقد ده گرکلیدیر.
Article printed from آراز آذربایجان – روزنامه خبری آذربایجان غربی: http://www.araznews.ir
URL to article: http://www.araznews.ir/%d8%a7%d8%af%d8%a8%d9%8a%d8%a7%d8%aa-%d9%88-%d8%a7%d8%af%d8%a8%d9%8a-%d9%86%d9%82%d8%af%db%8c/
Click here to print.
Copyright © 2013 آراز آذربایجان - روزنامه خبری آذربایجان غربی. All rights reserved.