ائلین اونودولماز عاشیقی
حسین واحدی
ائلین اونودولماز عاشیقی حسین واحدی
توز باسیب ائشیتمیر صدفلی سازین
گلمیر قولاغیما او خوش آوازین
قاریشدی تورپاغا صؤحبتین سؤزون
یانیرام سنده کی کامالا درویش
آنا دیلمیز: اورمیه‌نین آدلیملاری کیتابیندان رحمتلیک عاشیق »درویش«-ین یاشامینی اوخویوب قورتولاندان سونرا اوره‌ییمی غم باسیب اوره‌کدن آه چکدیم. ندن بئلنچی بیر اینسانلاریمیز اونودولوبلار؟!! بونا گؤره ماراقلاندیم عاشیقین کندینه گئدیب، قبرینی زیارت ائدم. یولداشلاریمین بیریله بو قونویو آرایا قویوب اونون کندینه گئتمه‌یی قرارا گتیردیک.
قراریمیز جومه گونونه‌ایدی و زامانین اوچدوغونا گؤره بو گون تئزلیکله گلیب چاتدی گون اورتادان سونرا »کوردلر« کندینه ساری یوللاندیق. کند اورمیه‌نین چیچست یولونون ۵ کیلومترلییینده‌ایدی. کنده یئتیشیب، اورادا یاشایانلاردان قبیرسانلیغین یولونو سوروشدوق. نئچه دقیقه‌دن سونرا کنددن آزجا ائشیکده اولان قبیرسانلیغا یئتیشدیق. تورپاقلی بیر یول و سسسیز بیر آخیرت ائولری.. آخیرته قاووشانلارا بیر فاتیحه وئرندن سونرا، تله‌سه‌رک تئز قبیرلری بیر بیر آختاریب یازیلارینا دقت ائدیردیک، آما رحمتلیک درویش-ین قبیرینی تاپا بیلمه‌دیک. اورالاردان کئچن بیر چوباندان عاشیقین قبیرینی سوروشدوق و کاشکی سوروشماسایدیق!چوبان او کندین یاشایانلاریندان اولاراق عاشیقین قبیرینی تانیمیردی!!
نئیله‌مک دئمه عاشیق ائله اؤز کندینده‌ده غریب‌ایمیش. گؤی‌ده بو غریبلییه دؤزه بیلمه‌ییردی و آغلاماق ایسته‌ییردی.. اومودلریمیزی پوزمایاراق، بیرینین یولدان کئچمه‌سینی گؤزله‌ییردیک. او آندا بیر پیکان قبیرسانلیغا ساری گلدی. دئمه تانری یئتیردی! بیزیم یانیمیزا یئتیشنده اوندان عاشیقین قبیرینی سوروشدوق و شوکورلر اولسون سوروجو قبیری تانییرمیش و اونو بیزه گؤسته ره رک اؤزوده بیزیمله قبیرین یانینا گلدی، اللی یاشیندا اولان او معرفتلی بی بیزه حؤرمتله یاناشیب، عاشیقا فاتیحه گؤندرندن سونرا آزجا اونون یاشامینی بیزیم اوچون آچیقلادی و سورولاریما جاواب وئردی.
رحمتلیک عاشیق درویشین قیساجا یاشامیندان بئله دئمک اولار:عاشیق درویش فرهاد اوغلو ۱۳۰۹ – نجو گونش (شمسی) ایلینده اورمیه‌نین »کوردلر« کندینده دونیایا گؤز آچمیشدیر. او ده‌یرلی اوستاد عاشیق فرهاد کیمی آذربایجانین سنتی موسیقی‌سینین آدلیملاریندان ساییلیر.
عاشیق درویشین گؤزل، ایستی و صمیمی سسینه گؤره عاشیق فرهادین شاگیردی اولموشدور. درویش چالان ساز سسی جانلارا کئچیب و گؤزل سسیله اونودولموش اثرلره جان باغیشلاییردی. بو اونودولماز اوستاد ۱۳۷۲ ـ نجی ایلین قویروق دوغان(مورداد) آیینین دوققوزوندا گؤزلرین دونیایا یوموب، اؤز دوغوم یئری اولان »کوردلر« کندینده تورپاغا تاپشیریلدی. عاشیقین تشییع جنازه‌سینده ایینه سالماغا یئر یوخویموش و بو اونون خالق ایچینده نه قده‌ر سئویملی اولدوغونو گؤستریردی.عاشیق درویش یاشام بویو (همیشه‌لیک) آذربایجانین سنتی موسیقی‌سینی سئورلرین اوره‌یینده قالاجاقدیر و بو سس اورمیه اوچون قالارگی بیر سس اولوبدور. رحمتلیک درویش ایرانین بوتون میللی موسیقی فئستیواللارینا قاتیلب و یوکسک یئرلره ال تاپیب، اؤدول لر قازانیب‌دیر. او نئچه ایللرده اورمیه رادیو، تلویزیونویلادا ایش بیرلیگی آپاریبدیر.
او ده‌یرلی اوستاد چوخلو شاگیردلرده موسیقی دونیامیزا تربیه ائدیبدیر. اونلاردان، عاشیق اسمعلی (اورمیه – اونون بیرینجی شاگیردی) عاشیق صبور شریفی (اورمیه)، عاشیق عبدالله اشرفی (قورد تپه)، عاشیق ذکریا ملکی(قولونجو) عاشیق رضا پوینده (سولدوز) و …آد آپارماق اولار.
عاشیق درویش، متین، ویقارلی و عاریف بیر کیشی ایدی، دئمک اولار او خصلت ایله صنعت ده، اصیل و نمونه بیر عاشیق و اوزان‌دیر. رحمتلیک درویش عاشیق صنعتینده اؤزونه مخصوص اولان نئچه هاوا یادیگار قویوب. اونلاردان »شکر یازی هاواسی« و »غربتی هاواسی«- نی آد آپارماق اولار. بو هاوالار ایندیده اورمو عاشیقلارینین آراسیندا چالینماقدادیر.
سونوندا دئمه‌لییم بئلنچی اینسانلاریمیزا سایغی گؤسترملی‌ییک و اونون شانینده اولان بیر مزارلیق تیکیب، هئچ اولماسا آدینا بیر خییاوان یارادیب هئیکلین پارکلارا قویمالییق.
نوشته شده توسط admin در چهارشنبه, ۳۱ شهریور ۱۳۹۵ ساعت ۵:۱۷ ق.ظ
