آچار

بیراینجی بولوم
میترا داور
آنادیلیمیز: ایره لی کی گئتدیم بیر بساط گؤردوم کی آچار و قیفیل لار دوزولموشدولر آچار و قیفیل لار کی قارا و پاس کسمیش ایدیلر . پاس باسمیش قیفیل لاردان بیرینی گؤتوردوم . ساتیجی قیفیلی اَلیم دن آلدی .
دئدیم : بوقیفیل هارا مالی دی ؟ دئدی : نه ایشین وار ؟
نئچه مئتیر او طرفده بیر بؤیوک آچار دوورادان آسیلی ایدی و اونون یانیندا بیر بؤیوک ویترین وار ایدی کی ایچی دولو ایدی قاپی یا تاخیلان گؤزلر و چئشیدلی آچارلارینان . بیر قیفیل قاپی یا ، بیر قیفیل دا اطمینان اوچون اونون اوستوندن و قاپی گؤزو بیر زنجیری نن بیرلیک ده .زنجیرلرین چوخو ساری یا آغ ایدیلار و ییرمی اوتوز سانت ایدیلار .نئچه زنجیر ده قاپی نین آغزیندان آسیلمیشدی . یوغون و انلی زنجیرلر . آما منجه اونلارین هئچ بیری ائوین امنیتی اوچون کفایت دئییل دیلر .
بیر اوجا بوی کیشی اوزبه ازومده دورموشدو کی دئدی : بویورون !
دئدیم : ایستیره م آپارتمانیمین قیفیلین دَییشه م .
آریق بیر کیشی باتمیش اُووت لاری لا آچارلارا تیراش وئریردی . قووارا سسی کی آچارا دستگاه دا قووارا ویریردی قولاغا چاتیردی . آریق کیشی بلوچیان جنابلارینا چوخ اوخشوردی . گئتدیم قاباغا و سلام وئردیم . ائله بیله مه باخدی کی یعنی سنی تانیمیرام . بلوچیان جنابلارینا چوخ بنزی ییردی . خصوصن اللری . دونن گئجه کی آچار قیفیل دا سیندی دئدیم گئدیره م قیفیل دوزه لدن گتیره م . دئدی یوخ خانیم نییه اؤزونوزو یوروسوز .
بیر توربا آچاری وار ایدی . آچار لاری بیر بیر توربادان چیخاردیب ایمتحان ائدیردی . سونوندا آچار لارین بیری قاپینی آچدی . .. شاید ده یانلیش ائدیره م …
دئدیم : باغیشلایین ! سیز بیزیم قونشولارین بیرینه چوخ بنزیر سیز…
سسیم تیراش دستگاهی نین سس کویونده ایتمیشدی . اوجا سسی نن باغیردیم : سیز بنزیر سیز …
اوجا بوی کیشی آیا ق قابی مین قیراغینا ویردی : اؤزونوزو یورمایین خانیم ! بو کیشی بیرزاد ائشیدمیر … بویورون بورا ! بیزیم قیفیل و آچار سرگی میز وار .
هر نه قَدَر قاباغا گئدیردیم پاس کسمیش دمیر بوروشون قوخوسو چوخالیردی . گیریش قاپی سینا ساری قاییتدیم . تکجه قارانلیق گؤروردوم . دئدیم : چیخیش قاپیسی !
اوجا بوی کیشی دئدی : قورخمایین خانیم ! بورا معتبر بیر قیفیل ساز توکانی دی .
دئدیم : آخیری هارادی ؟دئدی : بیر شئی قالماییب . بیر یئره یئتیردیک کی دولویْدی آچارینان . بعضی آچارلارین مین ایل لیک سابیقه لری وار ایدی . سویوق بیر یئل آچارلاری تیتره دیردی . آچار لارین بیر بیرینه توخونما سسی دالاندان ائشیدیلیردی . دئدیم : بو آچارلارین بیری …دئدی : هانسی ؟دئدیم : بیر سوئیچی آچار … قیفیلی دا …
گؤزله ییردی کی بونلارین بیرینی من سئچه م . الیمی قاباغا آپاریب آچارلارین بیرینی گؤستردیم .دئدی : بیرین گؤتور ، قبیستانلیق آچاری دئییل کی !
الیمی ایره لی آپاردیم . ساری بیر آچار گؤتوردوم .
دئدی : چوخ یاخشی . بیرلیکده قاییداق سیزین آپارتمانا . بیر قیفیل دا بیله ن حاضیر لارام .
آدرسین هارادیر ؟
دئدیم : زحمت چکمه یین !دئدی : زحمت دئییل . دئدیم : اؤزوم دوزه لده رم .
دئدی : قیفیل ساز کی دئییل سن ، شاید ده اولاسان ! هن !
قاپینین آغزینا یئتیره رک ، اوجا بوی کیشی اوزون قیفیل ساز کیشی یه توتدو و دئدی : اوقَدَر قورخموشدو کی سانکی ایستیرم قبیستانلیق قیفیلین اونا وئره م .
قیفیل ساز کیشی باشینی یوخاری توتدی .
دئدیم : بو آغا !
قیفیل ساز کیشی گؤزلریمه باخدی و گولدی .
– بویورون خانیم !
دئدیم : سیز زحمت چکمه یین !
دئدی : پس ندن بوردا ویرنی خیرسان ؟ بیر دقیقه یه بیلن دوزه لده رم!
قیفیل لار ،آچارلار و قاپی دالینا سالینان کُلون لارین بساطیندان رد اولدوق . یئنه گؤزوم دوشدو پاس باسمیش قیفیلا .
قیفیل ساز کیشی دئدی :عتیقه ایشینده سن ؟
دئدیم : یوخ .دئدی : گؤزلرین اسکی قیفیل لارین دالیجا دی . .
نئچه لحظه بساطین یانیندا دوردوم .
دئدی : عتیقه متیقه نَمَنه واریندی ؟
– هئش زاد !
توکاندان چیخدیم دیشاری . آیاقی نین سسینی ائشیدیردیم کی دالیمجا گلیردی . دئدی : ائوده نه یین واردی کی ایستیرسن آپارتمانین قیفیلین دییشه سن .
دئدیم : آچاری سینمیشدی . دئدی : ائله یه بیلرسن آچارینی عوض له یه سن . دئمه دین نه یین واردی ؟
– هئش زاد ! . دؤرد قلم لازیم اولان وساییل : ایکی قازانچا ، بیر ایکی دست یورقان دؤشک ، بیر فرش و نئچه دنه کیتاب .
– ائله بو ؟– ائله بو .– حتمن فرشین قییمتلی دی !
– یوخ . باهالی فرش دئییل . تکجه اؤزوم توخوموشام .
– کیتابلار نئجه ؟
– فرش لرین نقشه و طرح لری خصوصوندادی .
– اصلن نیگران اولما ! . بیر قیفیل بیله ن دوزه لده رم کی …
بلوچیان جنابلاری دا دوستلوق لا داورانیردی . البته هئچ واخت گؤرمه دیم وساییلیم دن بیر شئی آزالا . تکجه فرشه اولان باخیشی فرق لی ایدی . شاید فرشین بیر ارزیشی یوخ ایدی . اگر سیمسار گلسه ایدی اون مین تومن دن یوخاری اونا پول وئرمه زدی . بیر یول کی گلمیشدی سینیق کُمُد و تختیمی گؤتوره ، سوروشدو بو فرش نئچه ؟ بئله سینه دئدیم اون مین تومن . .. فیکرینده ائله یه بیلمیردیم . فرش جانیما باغلی ایدی . هر دفعه کی حالیم پیس ایدی ، فرشی یوخودا رنگسیز روفسوز گؤرردیم . هردفعه ده حالیم خوش اولایدی فرشی رنگلی روفلو گؤرردیم . دؤشه ییمی سالاردیم فرشین اوستونه . تختیمی ده ساتدیم کی ائله بو فرشین اوستونده یاتام .
پیلّه لردن یوخاری چیخدیق و او واخت کی قاپی یا یاخین لاشدی بیله مه دئدی : گئت قیراغا گؤروم نئیلیره م .
قیفیلین دؤرد طرفینی آچدی . یئنی قیفیلی وصل ائله دی . نئچه یول آچاری ایچینده دولاندیردی . قاپی آچیلدی . من ده ائله بئله سینه قاپی نین آغزیندا دورموشدوم .
دئدیم : چوخ منت دارام . قاپی نین قاباغیندا کی آینا دا اؤزونه باخیردی . سونرا گلدی ایچری . فرشه باخدی و دئدی : بو فرشه نیگران ایدین ؟
دونن گئجه گؤردویوم یوخونون یادینا دوشدوم: آپارتمانیمین قاپیسی آچیق ایدی . نظریمه بیر قوناق ایدی . بیر قوجا کیشی فرشی ییغیشدیریردی و من قاپینی برکدن قیفیل لیردیم کی فرشی آپارماسین .
دئدی : نه دیر! قورخدون ؟ عزرائیل کی گؤرمه ییب سن ؟
دئدیم : نئچه اولدو ؟دئدی : ائله بیر قایبلی یوخدی .
دئدیم : مگر اولار بیه ؟ائله بئله سینه کی فرشین اوستونده آیاق قابی لاقدم ویریردی دئدی : البته نقشه سی چوخ گؤزل دی . من ایندی یه جان هئچ فرشین اوستونده بیر قادین سیماسینی گؤرمه میشه م کی .
قیفیل ساز کیشی کی صندلین اوستونده اوتوروموشدو سانکی ایل لر ایدی کی منی تانی ییری . نییه مندن بوقدر سورغو سوآل ائدیردی و بوکی او ائده بیلردی منیم آچاریمدان بیرینده اؤزونه دوزلده .
دئدیم : نئچه اولدو ؟
– قابیلی یوخدو . فقط اگر بیر چای وئرسن .
سونرا قاه قاه گولدی . بنزیردی او کیشی یه کی کئچن هفته گیزلیجه بیزیم آپارتمانین پیلّه لریندن یوخاری چیخیردی . چرشنبه سوری گئجه سیدی . قونشو لار بیر اود یاندیرمیشدیلار گل گؤره سن . الکتریک لر ده کسیک ایدی . بیلردیم کی اوغورلوقلارین چوخو ائله بو گئجه لر اولار . تکجه بیر لحظه ائشی یه چیخماغیم گؤره ر دی . قارانلیق دا کیم کیمه ایدی … هر حالدا آشاغی گئتمه دیم .
ایکی قاشیقی بیر بیرینه چالیب دئییردی : نه یین واردی تؤکه سن منیم تورباما ؟
اونو ندا باخیشی ائله فرشه تیکیلمیشدی .
دئدی : دوغرودان هئش فیکیرلش می سن کی بیری ایشین گوجون بوراحت لیق دا نییه بوراخایر کی گله مثلن بیری نین ایشین …
دئدیم : ایشین بودوردا ائله ، همده کی اؤزون ایصرار ائتدین .
– ایشیم آچار قیفیل ساتماق دی . بوراحاتلیق دا کی دوشمه رم کوچه باجایا .
– زحمت چکیب سن . نئچه اولدو .
– هله منی آنلاماییب سان . بیله مه یاخشی باخگینا . شاید یادان گله ! البته سنده یانلیش بیر ایش گؤروب سن .! بیلیرسن آدام گرک قاپیسینی غریبه بیر کیشی نین اوزونه آچمایا . البته من غریبه دئییلم ها ! یاخشی کی باخسان منی خاطیرلارسان .اوزونه باخیب تومدوم .دئدی : یادان گلمه دی ؟
دئدیم : کیشی لر هامیسی بیر بیرینه اوخشورلار .دئدی : دوغرودان ؟دئدیم : نئچه اولدی ؟
– قابیلی یوخدی . .. دوغرودان ! او پاس کسمیش قیفیلی نان آچاری نئنیردین ؟
– بئله سینه ائله گؤزوم دوشدو .