آی قوجا دنیز!

فرمان فرضی مولان
قانینی شوشه یه توتارسیز اونون
کوورک اوره یینی قیرا بیلیرسیز
الیندن بیر تیکه چوره یین آلیب
باشینا بیر قاپاز وورا بیلیرسیز
قیچیندان آسلانیب، قولوندان توتوب
یولونا داش دوزوب یورا بیلیرسیز
قیرماقدا، وورماقدا، یورماقدا اولار
اوزو اولن لری اولدورمک اولماز
اوز اوزونه اولر اوزو اولن لر
هاچان اوزو سئوسه، اوزو ایسته سه
هاچان اوره یینین گوزو ایسته سه
سانکی چورک یئییر، سانکی سو ایچیر
سانکی اوزو اوچون بیر پالتار سئچیر
بو قدر صمیمی، بو قدر راحات
بو قدر باغیمسیز، بو قدر آزاد
نه سندن چکینر نه مندن قورخار
نه بو قدر گلندن گئدندن قورخار
نه ده میندیگی او بدن دن قورخار
بول یئییب بول ایچن ایگیدلر کیمی
حیات سوفره سی نین باشیندان دورار
سون ایلمه گی ووران ایلمک چی لر تک
یوماغی ساری ییب، ایشیندن دورار
سلقه لی سویونار اوستو باشینی
گوزگوده دویونجا اوزونه باخار
باخار سیماسینا، باخار اوزونه
بیر سینیق قفسه قوش باخان کیمی
بیر الوان پاییزا قیش باخان کیمی
نه اوتن خاطره کوورلده ر اونو
نه آیریلیق غمی وئجینه گلر
نه مبهم گله جک سیخار جانینی
فقط کئچه کئچه بیردن دوروخوب
بیر آن، تکجه بیر آن، باخیب دایانار
اوز دلی کونلونو ییخیب دایانار
اوردا بیر شکیل وار
کئچنمز اوندان
اوپر،
بیر ده اوپر،
بیرده اوپر او
آما نهایت ده اوندان دا کئچر
او اوز جانیندا کی جاندان دا کئچر
آتار بیر طرفه ال تلفونونو
گئیر لاپ سئودیگی ایپک دونونو
آزاد بیر قوش کیمی ائویندن چیخار
اولدوقجا کونول لو، اولدوقجا آزاد
ائله کی قفس دن قوش چیخان کیمی
ائله کی، یاز گلیب، قیش چیخان کیمی
ایلاهی بو نئجه آزادلیق دیر بس؟
نئجه ده گوزل دیر گوردویوم شهر
نئجه ده شیرین دیر چکدیگیم نفس
ایلاهی بو یاشیل آغاجلارا باخ
ال چالیب اوینایان یارپاقلارا باخ
یوخ!
اونو دوندرمز یاشیل آغاجلار
یوخ!
اونو دوندرمز اوخویان قوشلار
دونمز اوجالیغی، دونمز غورورو
اوچار بیر قوش کیمی دنیزه دوغرو
اوتورار ساحیل ده بیر آخشام چاغی
اوتورار اینساندان زاماندان اوزاق
اوتورار کوسندن اوماندان اوزان
اوتورار قیچینا بیر داش باغلایار
قیچینا ابدی یولداش باغلایار
یئری یر، یورویر، اوزو دنیزه
دونر آستا آستا اوزو دنیزه
بو دوشگون حیاتین سون نغمه سینی
آهسته پیچیلدار اوزو دنیزه
آهسته پیچیلدار، آی قوجا دنیز!
سنین مساحتین کونلومدن کیچیک
سنین دالغالارین دالغامدان اینجه
سنین درینلیگین بویومدان دایاز
بیرده کی آی دنیز
قوربانین اولوم
اوزو اولن لری اولدورمک اولماز