آلدادیجی اوخشارلیق
یازار: مارک توئن
کوچورن:حسین واحدی
بیر نئچه ایل اول قاطارلا نیویورک شتاتین‌داکی[ایالت‌‌ینده‌کی] سالامانکا واغزالینا[دوراغینا] گلمیشدیم. اورا‌دان باشقا بیر قاطارلا اوزاق سفره گئتمه‌لییدیم. پلاتفورمادا چوخ‌لو آدام واردی و هامی‌سی تامامیله دولو اولان همین قاطارا مینمه‌یه جهد ائدیردی‌لر. کاسسا‌داکی گنج‌دن منه بیر بیلئت وئرمه‌سینی خاهیش ائتدیم، او ایسه “یوخ‌دور”، – دئیه جاواب وئردی. اورا‌دان آرالاندیم و قعرشیدان گلن بیر یئرلی ماموردان او قاطاردا بیر بیلئت الده ائتمه‌ییمه کؤمک گؤسترمه‌سینی خاهیش ائتدیکده او، منیم سؤزومو کسه‌رک غضبله دئدی: “مومکون دئییل هر کونج-بوجاغی دولودور، بیر ده منی ناراحات ائتمه”. او، آرخاسینی منه طرف چئویریب چیخیب گئتدی. من اؤزومو ائله تحقیر اولونموش حساب ائتدیم کی، یول یولداشیما دئدیم: “منیم کیم اولدوغومو بیلسه‌یدی‌لر بون‌لار…”. لاکین یولداشیم درحال سؤزومو کسدی: “جفنگییات دانیشما، وضعیتله باریشمالی‌ییق”، – دئدی، “اگر اونلار سنین کیم اولدوغونو بیلسه‌یدی‌لر، تامامیله دولو بیر قطاردا بیلئت تاپماغا سنه نئجه کؤمک ائدردی‌لر؟”.
بو چیخیلماز وضعیته چاره تاپیلمادی کی تاپیلمادی. بیردن حس ائتدیم کی، واقون‌لاردان بیری‌نین بلدچی‌سی دؤنوب دقتله منه باخدی. گؤردوم کی، اونون اوزونون ایفاده‌سی درحال دییشدی. او، منی موندیرلی[پالتار آدی] بیر مامورا گؤستریب اونا نه ایسه پیچیلدادی و من آنلادیم کی، منیم باره‌مده دانیشیرلار. بیر آن سونرا همین واقون بلدچی‌سی اوز-گؤزون‌دن نزاکت یاغا یاغا منه یاناشدی.
“سیزه بیر قوللوق گؤستره بیلرممی؟”، – دئیه سوروشدو. “سیزه بو قاطاردا یئر لازیمدیرمی؟”.
“بلی” دئدیم. “اگر منه بیر یئر دوزلده بیلسه‌نیز سیزه میننتدار اولارام. هر نه جور یئر اولور اولسون”.
“بیزده بؤیوک عائله کوپه‌سیندن باشقا هئچ نه قالماییب”. او، سؤزونه داوام ائتدی، “ایکی یاتاق‌لی‌دیر و ایچینده ایکی کرئسلو[صندلی] وار لاکین کوپه تامامیله سیزین سرنجامینیزدا‌دیر. توم تئز بو چاما‌دان‌لاری واقونا قالدیر”.
سونرا او، الینی قالدیریب شئلیاپاسینا[حصیرلی بؤرکونه[ توخوندوردو و یولداشیملا من ایره‌لی جومدوق. یولداشیما بیر-ایکی سؤز دئمه‌یه جان آتیردیم، لاکین فیکریمی دییشدیم. بلدچی بیزی کوپه‌ده راحت یئر وئریب، سونرا دؤنه-دؤنه تعظیم ائده‌رک گولومسوندو:
"هه، جناب، باشقا بیر شئی ایسته‌میرسینیز کی؟ چونکی هر نه بویورسانیز، قوللوغونوزدا حاضیریق".
"بیر قدر ایستی سو اولار؟"، - دئیه سوروشدوم.
"البته، جناب، بو دقیقه گتیررم".
"یاخشی! بو لامپا یاتاق‌دان چوخ یوخاری‌دان آسیلیب. داها یاخشی بیر لامپا اولارمی کی، منیم یاتاغیمین اوستون‌دن آسیلسین و من راحت کیتاب اوخویا بیلیم؟".
"بلی، جناب. سیزین ایسته‌دیگینیز لامپا قونشو کوپه‌‌دن آسیلیب. من اونو اورا‌دان چیخاریب دئدیگینیز یئردن آساجاغام. او بوتون گئجه‌نی یانا‌جاق. بلی، جناب، سیز ایسته‌دیگینیز هر بیر شئیی بویورا بیلرسینیز و سیزی راضی سالماق اوچون بوتون دمیریولونو دا آلت-اوست ائدریک".
بونو دئیه‌رک او، چیخیب گئتدی. من اؤز یولداشیما گولومسونوب دئدیم: "هه، ایندی سؤزون نه‌دیر؟ منیم مارک توئن اولدوغومو بیلن کیمی گؤردونمو موناسیبت‌لری نئجه دییشدی؟ نتیجه گؤز قاباغیندا‌دیر، ائله دئییل؟". یولداشیم سوسوردو. من ایسه علاوه ائتدیم: "سنه گؤستریلن خیدمت‌دن ناراضیلیغین یوخ‌دور کی؟ بونلارین هامی‌سینی علاوه خرجله دئییل، یالنیز بیلئت پولو حسابینا ائدیرلر".
من بئله دئیه‌رکن بلدچی‌نین گولومسر چؤهره‌سی کوپه‌نین قاپی‌سی آغزیندا گؤرسندی و دئدی:"هه، جناب، من پلاتفورمادا سیزه باخان کیمی تانیدیم. بیزیم رییسه ده سیزی من گؤستردیم".
"ائله‌می، عزیزیم؟" - دئیه‌رک اونا یاخشیجا چای پولو وئردیم. "من کیمم؟".
" ماک کلئللان جنابلاری - نیو-یورکون مئری[بلدیه باشقانی]“، – دئیه‌رک تئز چیخیب گئتدی.
Mark Tvenتورکجه: ,Mark Twainاینگیلیسجه:
نوشته شده توسط admin در چهارشنبه, ۲۹ آبان ۱۳۹۲ ساعت ۷:۴۵ ق.ظ
