- آراز آذربایجان – روزنامه خبری آذربایجان غربی - http://www.araznews.ir -
آزادلیق
Posted By admin On خرداد ۶, ۱۳۹۴ @ ۵:۱۶ ق.ظ In آنادیلیمیز | 1 Comment
حاضیرلایان: اکبرسعادت
دنیز سویله سوزون هر کس ائشیتسین
قلم آزاد یازسین سوزلر دئیلسین
هرکس سوزون دئسین هرکس ائشیتسین
سوز آلیب سوز وئریب انسان دوشونسون
آنادیلیمیز: آزادلیقین اولسا هر زاد اولاجاق .حال بو کی آزادلیق سوزده اولسون یادا کی رفتاردا و عمل ده.
آزاد اولسان اوزون اوزا سو تاپارسان آزاد اولسان اوزون چورک قازانارسان. باغلی اولسان ایسته سه لر سو وررلر ایسته سه لر چورک وررلر.آمان نجه؟!
باغلی اولسان سنین ایسته دیغین اولماز . باغلی اولسان هئش کیم سنه یولداش اولماز باغلی اولسان… آنجاق…
اوستادیم سوز آشدین سودان چورکدن ددین اولماسالار هئش نه اولاماز. آمان من دییرم بیر زاددا وار کی اولسا او هر زاد اولاجاق .
هه آزادلیغین اولسا چورک تاپارسان آزادلیغین اولسا سودا تاپارسان. بیر اینسان چالیشسا آزادلیغینا اولوب گدندن سونرا. هامی ائللر اونا دیر وره جک. نیه کی او اوزون تانیییب نیه کی بیلیبدیر نه دیر آزادلیق.
اسلام دینی، زماندان و مکاندان یوخاری و حد مرزی اولمایان بیر دیندیر. بو دین، سوز آزادلیغینی احترام و اکرام چرچیوهسینده قبول ائلیر و انسانی، دوشونجه و ایدئولوژی سئچمگینده مختار بیلیر.بعضی مسلمانلار سوز آزادلیغینا دا قایل اولماسالار، اسلام دینی سوز آزادلیغینی و هر هانسی یولو سئچمک آزادلیغینی انسانین اوزونه بوراخیر. اسلام بویوران آزادلیقدا هر انسان؛ اقلیتده اولا و یا اکثریتده بیر نفر اولا و یا چوخ اولا، اوز حقلرینه نایل اولماغا طبیعی حقی وار. اسلام انسانلارا ائله مهربانلیق، ائله کرامت اویردیر کی انسان عمیسینین قاتلینی باغیشلایا بیلیر. ابوسفیانین آروادی هند، هرچند مسلمان اولمامیشدان اول حضرت حمزهنین شهادتینه سبب اولوب اونون جیگرینی چیخاردیب یئمیشدی، آما مسلمان اولماقلا اسلامین رافتی سایهسینده باغیشلانیر. بیر حالدا کی دموکراسی، مزیتلرینه رغما بیر بویوک عیبی وار: دموکراسی سیستمینده آزلیغین حقی یوخدور. بیر نفرین حقی یوخدور. بیر جامعهده اقلیتده یاشایان انسانلارین حقلری اکثریتده اولانلارین یولونا قربان گئدیر.
قرآن کریم سوز آزادلیغینی جامعهدهکی ناب و درین دوشونجهلرین کشفینه بیر وسیله کیمی ساییر و یئر به یئر انسانلاری دوشونمگه و تفکّره چاغیریر و البته کی دوشونن انسان دوشوندویونو دیله گتیرمهلیدیر یوخسا تورپاقدان باش قالدیرمامیش آغاجین نه فایداسی وار.انسانلار تاریخ بویو سوز آزادلیغی، عقیده آزادلیغی کیمی آزادلیقلار دالیسیجان اولوبلار. اسلام دینی انسانین بو عطشینه جواب وئریب و انسانا لازم اولان کرامتی و آزادلیغی وئریب:» . . . اونلارین چتینلیکلرینی و زنجیرلرینی آچار«.
حضرت علی (ع) نهج البلاغهنین ۳۱-جی نامهسینده بویورور: »لا تکن عبد غیرک و قد جعلک الله حرا» «الله سنی آزاد یارایب آیرسینا قول اولما«.
البته کی سوز و دوشونجه آزادلیغینین اهمیتی جسم آزادلیغیندان چوخ یوخاریدیر.آما آزادلیغی ایستر جسمی و یا ایستر سوز آزادلیغینین تعریفی نهدیر؟ هر سوزو هر یئرده دئیه بیلمگه آژادلیق دئمک اولارمی؟ گئدیب بیرینین پنجرهسینه داش آتماق و یا قاپیسینی آچیب اونا یامان دئمگین آدینی آزادلیق قویماق اولارمی؟ هر عاغیللی انسان بو مسالهنی رد ائلر و بونا اوخشار ایشلری آزادلیق تعریفی ایچینده سیغدیرا بیلمز. اولکهمیزده پارلمانی سیستمینین باشلانیش ایللرینده (مشروطهنین باشلانیش گونلرینده) بیر عده جاهل آزادلیغین نه اولدوغونو آنلامادان، اللرینه کئچن تریبونلار واسطهسی ایله (مجلس تریبونو و مطبوعات) اونا بونا حتی مملکت بویوکلرینه یامان یازیب توهین ائلهمگه باشلادیلار و نتیجهده مشروطه حرکتی انحرافا چکیلدی.
سوز آزادلیغی، آغیزا گلن هر سوزو دانیشماق آنلامیندا دئییل. البته هر دانیشیقدا آیری انسانلارین کرامتی انسانلیق قایدالاری و جامعه قایدالاری نظرده توتولمالیدیر. اجازه بویورون بیر مثال ضمنینده بئله عرض ائلهییم:
جناب منتقد بیر شخصین گئیدیگی پالتارین عیبلی اولدغونو دوشونور. ایندی گئدیب هر یئرده »فلانی بئله عیبلی پالتار گئییب« دئمکله جار سالیرسا، بونا سوز آزادلیغی دئمکق اولماز، آما گلیب اوز نظرینی او شخصین اوزونه دئسه بونا سوز آزادلیغی دئمک اولار.
قرآن کریم سوز آزادلیغینین چرچیوهسینی آیری انسانلارین حقلری ساییب اسراء سورهسینین ۳۶-جو آیهسینده بویورور: »بیلمهدیگین شئیین دالیسینجا گئتمه، البته سنین قولاغین، گوزون و اورگین مسئولدور«.
نور سورهسینین دوردونجو آیهسینده بویورور: »مومنه خانیملارا افترا آتانلار، دنیا وآخرتده لعنته گلرلر و اونلار اوچون بویوک عذاب وار».و یا حجرات سورهسینین ۱۱-جی آیهسینده بویورور: «ائی ایمان گتیرنلر! بیر دسته آیری دستهنی اله سالماسین، بلکه اونلاردان داها یاخشیدیلار، و آروادلار آیری آروادلاریدا. بلکه اونلاردان داها یاخشیدیلار. بیر بیریزین عیبلرینی آختارمایین و بیر بیریزی پیس لقبلرله خطاب ائلهمهیین«.
الله تعالی مسلمانلارا آیری انسانلارین ایناندیقلارینا پوچدا اولسا بئله، توهین ائتمگی اجازه وئرمیر. قرآن کریم انعام سورهسینین ۱۰۸-جی آیهسینده بویورور:»اللها اینانمایانلارین ایناندیقلارینا یامان دئمهیین کی اونلار دا جهالت اوزو ایله اللها اهانت ائلرلر . . «.
بیر قانادلی قوشو سالسان قفسه چورک سو ورسن سن یییب ایچه جک. اوره گی دولاندا باغلی لیغیندان یارالی سسیله بیر اوخویاجاق. باغلی لیقدان اوخور بولبول قفسده بیز دییریک کفی سازدی اخویور. یوخ یوخ بله اولماییب اولمایاجاقدیر . بیری باغلی اولسون کفی ساز اولسون. اله بو قوش کی اوخور قفسده بوراخسان بیر داها گری قاییتماز. چورک سو قویساندا اول قفسینه ائشده قالمیش اولسا سویوقدا قاردا. بوراخیلمیش بولبول آزادلیغینی ساتیب چورک سویا گری قاییتماز.
عاشورا گونونده کربلادا بیر یاندا سو چوره ک بیر یان آزادلیق. گور امام هانکی سین سئچدی. بیزده گرک اونو سئچه ک. سو چوره ک یاپیشیربدنه اولسم ارییه ر آمان آزادلیق روحوندیر . بیتیب توکه نمز . بله لیقدا گرکدیر آزاد یاشییام آزاد قالام من مندن تره ننلر گووه نسینلر منیم آزادلیغیما آزاد یاشاسینلار بیر ایگیت کیمین.یوخسا قارینا ایشله مه یین گووه نماقی یوخدیر. گرک آزاد گرک آزاد گرک آزاد یاشییام.
ایندی گور آزادلیق نه دی اونو دوشون اونو به یه ن اونو سئچ منه آزادلیق اودی کی دیلیمه داغ باسیلماسین. یوردوندان کیمسه سوز آشسا باشی داردان آسیلماسین.
Article printed from آراز آذربایجان – روزنامه خبری آذربایجان غربی: http://www.araznews.ir
URL to article: http://www.araznews.ir/%d8%a2%d8%b2%d8%a7%d8%af%d9%84%d9%8a%d9%82/
Click here to print.
Copyright © 2013 آراز آذربایجان - روزنامه خبری آذربایجان غربی. All rights reserved.