آرازآذربایجان درگیمیز
یازار:اکبر سعادت
درک ائتمه دیییم مین جوره حالت وار ایچیمده،
عشقیمله یاشید بیر یئنی فطرت وار ایچیمده،
اوز بورجوم ایله حاققیمین ایللر ساواشیندان،
مردانه چیخان حاکم عدالت وار ایچیمده…
آنادیلیمیز:بیزه دئسه‌لر اولکه نی تانیتدیرین. ذهنیمیزه گلن، آذربایجانین، هاواسیندان(هاواسی‌نین یاخشی‌لیغیندان)، گورمه‌لی یئرلریندن، قدیمی بینالاریندان، یئمک‌لریندن، دب‌لریندن، موسیقی‌سیندن، اویناماق‌لاریندان، دوشونجه طرزیندن، تانینمیش آدام‌لاریندان دانیشاریق.اولکه نین چاپ اولدوغو درگی لریندن سوروشسالار، چوخ‌لاری قیزارا بیلرلر. اولکه نی تانیت‌دیرماغا هئچ اولماسا اوزوموزون تانیماغیمیز گرک‌لی‌دیر.لاقل چاپ اولونان درگی لریمیزدن بیر نئچه سین ائلیه بیله ک سایاق و اونلارا دئیه ر وئره ک.هامی میز بیلریک کی هونرین دیلی اولماز، سوزونو چوخ ائشیت‌میشک. دیلی اولماز دئدیک‌ده، هونر هونر اولسا، هانسی دیلده یازیلدیغینا باخمایاراق، هر یئرده آلینار.
بو سوزون سوزو یوخدور. بو سوز هردن فرقلی بیر گوروش‌لر اوچون دئییلیر. درگی‌لرین یایینلانماسی، درگی‌ده ایشله‌ین‌لر اوچون، هئچ اولماسا بیزیم توپلوم‌دا چورک سالماز. اونونلا بئله، درگی‌سوروملولاری، گویوللو اولاراق، درگی‌لرین یایینلادارلار.
ژورنالیست اولمایان، ژورنالیست دونو گئییب، ژورنالیست باجاریغیندا اولان‌لار درگی‌لرده یازار حاققی آلمادان مقاله چاپا یئتیرسه‌لر بویوک ایش گورموش اولارلار.
آراز آذربایجان درگی سی استان دا، گونده لیک چاپ اولان درگیمیزدیر و اونولا برابر هئچ بیر درگی یوخدو کی گونده لیک صورتده چاپ اولونا و اوز آنا دیلیمیزده یازی نشر ائت سین…(دئمه لییم که بیر نئچه هفته لیک چاپ اولان درگی لریمیز ده اوز یئرلرینده آنا دیلیمیز اوچون یوخاری صورتده چالیشب لار.او جمله دن وارلیق، جووالدوز، یول، زنجان اومودو، آذربایجان نویدی، سینا، یارپاق، یاشماق، دیلماج، آذربایجان گونشی، بایرام، چیراق، آغری، ها بئله بیر چوخ بوردا آدی گلمه‌ین درگی‌لریمیز، تکجه بویون‌باغیمیز یوخ؛ وارلیق سیمگه‌میز‌له دوشونجه سرگی‌میز‌دیرلر.
*اما اولکه میزده آرتیق صورتده یایینلامالار ایکی ندن‌له اولار :
بیرینجی‌سی یازماغی اونمسه‌مه‌ین‌لر اولار. اونلار اوز چیخارلارینی دوشونرلر. سوز ده دانیشمازلار، تکجه بیر قودرت قایناغی کیمی فایدالانارلار. فایدالانماق بیتسه، یایینلامالار دا بیتر.ایکینجی ندن بیر سؤز چاتدیرماق اوچون اولار. داها دوغروسو دوشونجه‌لرینی چاتدیرماق اوچون بو ایشه گیریشرلر.
یازار یوخسول‌لوغو، (یازارلار یاشاییش‌لارینی ، یازماق‌لا دولاندیرا بیلمیرلر)، یازی یوخسول‌لوغونا ندن اولوب، هردن یازی آزلیغی سیخیجی اولور. اوخوجو کوتله‌سی قازانماق(کوتله بیر درگی‌یه آلیشیب، گووه‌نمه‌یی چوخ چکیر)، یان-یووره‌دن گلن تاپشیریق‌لاری آتلاتما و بیر چوخ باشقا سورون‌لاری چوزمک اوچون اوره‌یی گئنیش‌لندیرمک گرک‌لی اولور. بونلارلا بئله درگی‌نی، باجاردیق‌لاری قدر یاییملاییب، اوخوجو قازانیب، اوزلرینی دولاندیران درگی‌لر، اولومسوز ایشی اولوملویا چئویریریب، گورولتولو دامغالارینی، تاریخه سیلینمزجه‌سینه وورورلار.
آراز آذربایجان درگی سینده باشقا قونولاردا آرا-سیرا اوز دیلیمیزده یازیلار دا اولور،بیلیرم کی بو یازیلار گئنل اوخوجو طرفیندن چتین‌لیک‌له اوخونولور، هردن ده ترسه ائتگی‌سی اولور. آنجاق اوزل اوخوجولار طرفیندن آلینا بیلینیر. بو یازیلاری ایکی فورمادا( گئنل اوخوجولار اوچون سادالاشدیریب، اوزل اوخوجولار اوچون ایسه اوز فورموندا یازیلسین) یازماغین فایدالی اولدوغونو دوشونورم. لازیم دیر کی اوزوم اوچون ده بیر پارا قایدا قانولاری خاطیرلادام…هردن ده یازیلارین ایچینده موناسیبت‌له‌ره گؤره، یازیلار گئدیر.
موناسیبت‌لره یازیلان یازیلارین دا چوخو فارسجا یازیلیر. نه یاخشی اولار، آز سایی‌دا یازیلان اورجینال یازیلاریمیز هئچ اولماسا تورکو یازیلیب، سونرا باشقا دیل‌لره چئوریله.منسه بو بارده چوخ سئوینه رم اما دئدییم کیمی بو یازیلار گئنیل اوخوجو طرفیندن قورخورام چتین لیکجه اوخونسون…
بیر دیلی یاشاییب-دانیشیب و یازان لار هر کسدن یاخشی هانسی دیلده دانیشدیق‌لارینی و کیم اولدوق‌لارینی بیلرلر.
قیراقدان باخان‌لار ایسه، هانسی یئردن باخدیق‌لاریندان آسیلی اولاراق، ایسته‌دیک‌لری آدی باشقالارینا وئررلر. اوزون زامان‌لاردان بری بو دیل بورالاردا دانیشیلیر و یازیلیر… بو دیل تکجه بئله دئییل… بلکه اؤز کیملی‌ییینی هر نه‌یه وئریب‌دیر. تورپاق، سو، چای، داغ، دره، تپه، گول، دریا، اوروش، یئر، آغاج، طایفا، یایلاق، قیشلاق، دب‌لر، توی، بایرام، یاس، گون‌لرین آدلاری و سایا گلمه‌ین هر نه واردیر بو دیلدن پایینی آلیب‌دیر. اولکه میز تکجه تورکونون یاشاندیغی یئر یوخ، یارانیب-یاشاتدیغی یئردیر.
اونوتمایاق کی: بو دیل بیر زامان لار داغ‌لارا، داش‌لارا یازیلیب. بو دیلین طالئعیندن بوتون یازی فورمالاریندا گوروروک. دونیایا یاییلماق وارایمیش.
هئچ بیر دیل تاریخ بویو بو قدر الیفبا ده‌ییشمه‌ییب‌دیر. یازیلان بلگه‌لر ایتیب، آرادان گؤتورولسه‌لر ده، تورکو-نون آغیز لوحه‌لری دیلین دونوندا بو گونه گلیب چاتیب. تورکو، تکجه دربار(شاه‌لارین سارای‌لارینین) دیلی اولمویوب، بلکه خالقین دیلی اولوب. خالقین دیلی اولدوغو اوچون، حاکیم دیل اولوب.
بیز دونیادا بیر چوخ شئی‌لری بیلیریک، بیر چوخ شئی‌لری ده بیلمیریک. بیلدیک‌لریمیزی دانیشیب، بیلمه‌دیک‌لریمیزی ائشیدیریک. بیلگی‌لر ده فرقلی اولور. بعضی بیلگی‌لرین سونو بللی دیر. آنجاق بیر چوخ بیلگی‌لر سونسوزدولار. بیلگی‌لردن دانیشیق‌دا، بیلدیک‌لریمیزین اؤلچوسونده دانیشیریق.
*منسه بئله دوشونورم کی:
هر یئردن یازیریق یازاق، هر نه‌دن یازیریق یازاق، اوخوجوموز اولور اولسون اولمور اولماسین یازمالی‌ییق. یازمادیقجا، یازیلمایاجاق. قالدیقجا دا قالاجاق. دئییرلر قالان ایشین اوستونه قار یاغار. دوز دئییرلر. او قدر بو دیلده یازمادیق، بو دیلده یازان‌لاری، اؤز دیلیمیزین آدام‌لاری ساییلان‌لار بئله قینا‌ییرلار. ایندی یئری دیر دئیک بو قیناماغا ندن یازاق. نه‌دن یازماق ایسته‌ییریک بو دا نه‌دن!
بیزیم ایچیمیزده بیر چوخ‌لارینین دانیشماغا سوزلری واردیر. بیزیم ایچیمزده ائله‌لری وار ایسته‌سه‌لر بئیین‌لرینده اولان‌لارینی باشقالارینا چاتدیرا بیله‌لر، دونیایا دانیشا بیله‌جک‌لری قدر چاتدیراجاق‌لاری واردیر. بئیین‌لرینده‌کی‌لرین اوستونه هر زامان دا آرتیریلیر. بیزلردن نییه یازمیرلار، باشارمادیق‌لاری اوچون یوخ، بلکه باشلامادیق‌لاری اوچون اولور. هردن ده یازماقدان، باشقالارینین پولچوک قوشدوق‌لاری اوچون قورخورلار. یازماقدا قورخولاجاق بیر شئی یوخ‌دیر.
پولچوک قوشانین ایشی پولچوک قوشماق دیر. یازانین دا ایشی یازماق. بئینیزده اولان‌لاری پایلاشماق اوچون، گلدیک‌لری واقت یازین. قویمایین اوچوب گئده. یازدیغینیزدا دا یازیداکی آخساق‌لیق‌لاریزی بیلیب زامان سوره‌سینده آرادان قالدیراجاقسیز.
بونو دا یاددان چیخارمایاق، یازماق اوچون یازا-یازا یازی قایدالارینی دا اؤیرنمه‌لی اؤز دیلیمیزی تاپمالی‌ییق.بیزلر اوچون بیزی دانیشا بیلن درگی‌لر، وارلیق سیمگه‌سی دیرلر. وارلیق سیمگه‌لری، بیر-بیرینه باغلانیب میرواری بویون‌باغی یارادیرلار. “بویون‌باغ”لاریمیز، زامان سوره‌سینده نئچه قات بوینوموزا دولانیب، بیزی گوزل‌لندیریرلر.
نوشته شده توسط admin در شنبه, ۲۱ اسفند ۱۳۹۵ ساعت ۱۱:۵۳ ق.ظ
