وسواس

وسواس

جلال آل احمد
آنادیلیمیز: غلامعلی خان ساللانا- ساللانا حامامین پیل‌له‌‌لریندن یوخاری قالخدی. آزجا دوروخدی. نفسین تزه‌له‌دی و یئنه تکرار یولادوشدو.
آمما ایکی آددیم آتمامیش ندنسه یئنی دن دایانماق ایسته‌دی. بارماغین آلنینا قویدی، گیجگاه لارین اهمالجا سیخدی و قاش- قاباغین تؤکه‌رکن نئچه یول شیطانی لعن ائیله‌دی. دوز فیکر ائله‌میشدی. یادینا گلیردی کی غسل ائتمک ایسته‌ینده استبراءنی اونوتموشدو. ایندی اؤزوکی پاک دئییل هئچ غسلی‌دا باطل‌دیر. لاپ چتینی‌ده پالتارلاری‌نین مردالیقی و اونلاری کیرلن‌مه میش دگیشمک ایدی.
بیر نئچه آن شبهه لندی. »شاید سهو ائدیرم…« دئیه ایسته‌دی اینانمایا. آمما یوخ، مطلق اینانمالی ایدی. ایسته‌دی قاییدا و بیر داهادا حاماما گیره. آمما تنبل‌لندی و قاییتمادی. نییه کی هم اوتاندی و هم ده ناهار نامازین واختیندا قیلدیغی ایچون ، آخشام نامازیناجان تجدید غسل ائتمگه وقت چوخ ایدی. بیر داها دا شیطانی لعنت له‌دی. حامام بوخچاسینی قولتوغو آلتیندا یئر به یئر ائده‌رکن، عباسی‌نان اونون اوستونو اؤرتدی و یئنه ساللانا- ساللانا یولادوشدو.
گونش، حامامین سقفی‌نین شیشه‌لرین یامانجا قیزارتمیشدی کی‌ غلامعلی خان خزنه ایچینده، بارماقلارین قولاغینا تیخیب قُربه‌تن‌ ‌الی‌الله غسل ائدیردی. چالیشیردی اصل‌دن فرع دن هئچ بیرین اونوتماسین. بونا گؤره ایسه قولاقلاری‌نین دلمه- دئشیگیندن توتدو گؤبه‌یی ‌نین ایچینه‌جان باش چکدی. استبراء ائتدی. و سونرا نیت، داها سونرا دا باشلادی بیریول ساغ طرفین نیتی ایله، بیر یول سول طرفین نیتی ایله… کی لعنت شیطانا …. بورنوندان قان آچیلدی.
ألین آتدی بورنونا، خزنه‌نین سویونو قاریشدیردی و قانین رنگی ایتدی، و سونرا ترسه- تله‌سیگ خزنه دن چیخدی و بیر گوشه‌د حالدان گئتدی.
ائوی یاخین ایدی. اوغلونا خبر وئردیلر و اونو اؤز فیطه – قدیفه سیله قورولادیلار. بورنونون قان آخماسینی بیر تهر کسدیلر و حامامدان چیخارتدیلار.
گئجه‌دن ایکی ساعات کئچمیشیدی کی حالا گلدی. قالخیب اوتوردو و آروادیندان احوالاتی سوروشدو. آمما او دینمه میش اؤزی هر بیر زادی خاطیرلادی. آروادین یوللادی تا حامام بوخچاسین حاضیرلاسین. و اؤزو تئز پالتار گئییب یولادوشدی.
شبهه‌سیز یول استونده کی حامام ایندی‌یه جان باغلامیشدی. باغلی‌دا اولماسایدی اونون اوزوندن بیر داها داگلمزدی‌کی اورا یاگئتسین. بوگون یازیق حامامچی نین بساطینی بوسبوتون قاناچکمیشدی. ناچار یولادوشدو. ایکی- اوچ کوچه کئچه رکن قارانلیق بیز بازارچادان باش چیخارتدی. بازارچادا یئرله‌شن حامامین دالانیندا، بیر قوقوچیراغی پیل‌له‌لرین دیبیندن ایشلدیردی و دام- دوواری اولدوغوندان داها کاس و توتقون گؤستریردی.
غلامعلی خان، حامامین ایندی‌یه جان باغلانماماسیندان سئوینه‌رک، پله‌لردن ائندی.
حامامین لاپ آخیرا قالمیش دللکی، بساطینی ییغیشدیرماقدایدی. یاش فیطه‌لری بیر- بیرینه دوگون ویریب قاپ باجادان آسیردی.
ایشله‌نمیش قدیفه‌لری قاتلاییردی. ألده گئیی‌لن باشماقلاری کنارا دوزوب چراغ‌لاری بیر- بیر سؤندورروردی.
غلامعلی خان هله ایچری گیرمه میش دی کی اونون سسین ائشیتدی:
آغاجان حامام تعطیل اولوب!
–سلام علیکم … منیم بیر اوقدر ایشیم یوخدور. سویا باتیب چیخیرام.
آغاجان! دئدیم حامام تعطیل اولوب… آخی قویاجاقسیز بیز جماعتده بیر راحت اولاق یایوخ؟! هرزادین بیر واختی واردا، ییرمی دؤرد ساعات کی حامام اولماز.
نییه حیرص‌له نیرسن داداش؟ سن بیر چوبوق دمله‌یه نه من چیخمیشام … دئیه پالتارلارین سویوندو. اؤزونه بیر فیطه باغلاییب یوللاندی.
حامامین ایچی قارانلیق ایدی. چراغ ایسته‌دی. دللک تنبل‌لندی و یاخینداکی قاپی‌نین یوخاری‌سیندان حامامین بیر جه دانا پیه‌سوزونو یاندیریب اوناوئردی.
غلامعلی‌خان، یویونان یئرین قاپی‌سی نی آچدی. بیر بسم‌الله دئدی و ایچری گیردی. قورخا- قورخا گؤزلرینی باشی‌نین زیرپی و تیتره‌ک کؤلگه‌سینه کی، سقفین اورتا گومبذلرینه جان بوی آتیب اوزانمیش‌دی زیلله‌دی و فیکره جومدی. بیرداها یئنه اوجادان بسم‌الله دئدی و اؤزونو خزنه‌نین پیل‌له‌لرینه چاتدیردی. پیه‌سوزی پله‌‌لرین اوستونه، دوز خزنه داشی نین اتگینه قویدی. بیر اوووج سو مزمزه ائتدی و بیر اوووج دا اوزونه ویردی. سونرا آیاقلارینی یودو و خزنه‌یه باتدی. خزنه انگینه جان دولوایدی.
سویودا یامان داغ ایدی. جانینی ماراقلاسورتوردی و دوغروردان کی کئف ائدیردی. سو داشارکن خزنه‌نین داشین ایسلادیردی و پیه سوز اهمالجا تکان یئیردی. پیه سوزون آلاوی أییلیب بوزولوردی و قره‌لتی لر اوزانیب گوده‌لیردیلر. غلامعلی‌خان بونو بیلیب آنلایارکن، ندنسه یئنه گمان ائدیردی کی جین‌لردیر کی گلیب کئچیرلر و هاوانی ترپه دیب آلاوی بورجودورلار.
بونا گؤره‌ایسه آزجا دؤزدوی. جین‌لرین سس- صدا سینی ائشیدمه‌دن، اوجا بیر بسم‌الله دئدی … و پیه سوزون ایشیقی سؤندی. فیکرینی باشینا ییغدی و قورخونان قارانیلقی بیر آن اولورسادا یاددان چیخارتدی. ایکی- اوچ یول دا ألینی بدنینه سورتدو و باتدی سویون ترکینه. آیاقلارینی یئره قویوب بیرنئچه آن اؤزونو اهمالجا و یونگول سویون آلتیندا ساخلادی و سونورا باشی نی سودان چیخارتدی. هریان قارانلیق‌ایدی. گؤزلرین اووکالادی. اهه! ندنسه هریان یاغلی‌ایدی. دیکسه‌ندی و قورخدی. و قورخولو بیر قیشقیرتی‌نان نئچه یول دللکی سسله‌دی.
دللک هؤله سک ایچری گیردی. هر ایکیسی دوزبیر آندا تعجب له بیر- بیرلریندن سوروشدولار: »پس چراغ نئج اولدی؟!« و هر ایکسی جوابدا سوسدولار. دللک گئتدی و باشقابیر چراغ لاقایتیدی.
پیه‌سوز یوخ اولموشدی آمما خزنه‌نین سویو اوزه رینده، چراغ یاغی دالغالانیردی. غلامعلی خان دا باشدان آیاغا، بولانمیشدی یاغا. دللک آغزین آچمیشدی یامان- یوغوزا کی غلامعلی‌خان اؤزونه آلمادان بیر گؤز یومونجا لاالاه‌ا‌لا‌الله دئییب دیشاری چیخدی. جانیندان یاغلاری بیر تهر سیلدی و پالتارلارین گئییب میریلدایا- میریلدایا گئتدی.
سحر چاغی اذان دان قاباق ایدی کی غلامعلی خان بوخچاسین قولتوغونا ویریب عباسینی باشینا چکمیشدی و کوچه‌نین کناری‌نان ساللانار- ساللانا حاماما گئدیردی. اؤز- اؤزونه دانیشیردی و بللی ده دئییل‌دی که نه دئییر.
شیطانی لعن ائدیر یا آللاهی مدح؟!
اوهله‌ ائله‌یه بیلمه میشدی بوینونداکی واجب غسلی، قربه‌تن‌ الی الله دئییب یئیرینه یئتیره.
[email protected]

نوشته شده توسط admin در شنبه, ۰۶ بهمن ۱۳۹۷ ساعت ۱۲:۴۰ ب.ظ

دیدگاه


هشت + 6 =