نارنجی باشماق اولماز….

نارنجی باشماق اولماز….

»نارینجی باشماق اولماز….لای-لای….نارینجی باشماق اولماز….آخ نئجه اولماز-اولماز…نئجه اولماز اولماز… اولماز…نئجه‌کی اولدو . هله نه یاخشی فریبادان قاباق گئتدیم آلدیم ها! یوخسا ایندی الیمدن چیخمیشدی. نارینجی اسپورت بلوزومو اوغورلاماسایدیلار، ایندی باشماقلاریملا سئت اولموشدو. اونوندا آغ لئژی وار ایدی. کاشکی قارا لئژلی باشماق آلاردیم. چیراق کیمی ایشیلداییردی. امّا یوووو…آغ لئژ نارینجی‌نین ایشیلتی‌سینی بیرآز بوغور. قره لئژلی‌سین آلسایدم خؤزئیین‌لر بادالاق آتاردیلار. یا دا دیب-بوجاقدان ائله سوزولوب گئده‌سن کی، آیاقلارینا باخماسینلار. دئدی گئیمه!، قورتولدو دا… اؤزو ده بو قدر چتین‌لیکله آلدیغیم باشماقلار! نه زحمتینن، آیدا بئش‌مینه نیسیه آلدیم! نئجه فریبا بو گون سالونا گلمه‌دی! یوخسا حیرص‌دن پاتلایاجاق‌دی.« اووجونو شامپویلا دولدوردو. .ساچلارینا یاییب اووکه‌له‌دی.»نه یاخشی تیتانیوم اوزویومو چیخاردیم هااا. بارماغیمدا گؤرسه‌یدی، نیسیه آلا بیلمزدیم! گؤزلریمی ائله اوزونه زیلله‌دیم کی، بئچارا کیریخدی. بیرآزدان دونو آچیلدی. مگر دانیشماقدان باش آچیردی. بیلسه‌یدیم بو قدر انگی بوشدو، نارینجی رنگلی “پوما “بلوزو دا آلاردیم. امّا یووو…، اونون دا پولونو چاتدیرا بیلمزدیم. کیشی‌نین اوره‌ییندن گلمیردی نیسیه وئرسین. نئجه اولدو، بیلمه‌دیم. بیردن دئدی اولسون، آیدا بیر دفعه باشماقلارین بورجونو گتیرنده سیزی زیارت ائله‌یم! من گلدیم، سن ده زیارت ائله‌دین هاااا…!! نه گونه قالمیشام کی،گلیم ایکی ساعات سندن دنگ وئریب دنگ آلیم . بئش مینی میز اوسته قویوب، آرادان چیخاجام. سن بونون ترکیبینه باخ!!! چوخ دا بیر گؤزل اولا!اوچ جوت-بیر تک ساچی واردی. هله بورونو دا کی، نه دئییم..!!!، مین رحمت پینوکیونون بورنونا. قولاقلاری- ائله‌بیل اتوبوس آیناسی‌دیر. هوش ائله‌میر‌کی آدامین اوزونه بیر دفعه گولنده، اؤزوندن چیخماز. گؤزوم او باشماقلاری توتماسایدی، مگر اونون دوکانینا آیاق باساردیم! قاش-گؤزونه وورولمامیشدیم کی…! اؤز یانیندا دئییر بس کی، او تونبول قارنییلا چوخ گؤزل-گؤیچک‌دی! هله پیس-پیس ده ایدمان پار-پالتاری ساتیر. امّا حاققا دورسان، باشماقلار دا کئچمه‌لی دئییلدی ها!، نه یاخشی کی آلدیم.«دوشدان تؤکولن سودان بیر اوووج توتوب بوغلانمیش آینانین اوزه‌رینه سپدی. آینا قاباغیندا یئنه ساچلارین اووکه‌له‌دی.اؤلوره‌م کؤپوک‌دن اؤترو. نئجه بو حامامدا وان یوخدو! کؤپویونن دولدوروب، زویولدویوم ایچینه، لاپ ائله فیلیم‌لرده اولدوغو کیمی!یئنه‌ده اووجونو سو ایله دولدوروب، ساچلارینا توکدو. ساچلاریندان سوزه‌ن کؤپویو بوینونا، دؤش‌لرینه، قارنینا یایدی. اللری بودلارینا ساری زویولده‌دی. ایکی اللی ساغ بودونو اوووشدوردو. داها عضله‌م تیتره‌میر. بال کیمی بالدیردی.
اللرینی بودونون دؤره‌سینده حالقا لا‌دی. بارماقلاری‌نین اوجو، آز قالیردی بیر-بیرینه چاتسین.هله گؤر پوما باشماقلاریملا نه ائیله‌یه‌جه‌یم! لاپ مانکن اولاجام.گئنه اوز-اوزونه میزیلداندی: یانیرام عشق اودونا گل …یانیرام عشق اودونا گل…سوروشکن اللرینی یوخاری، قارنینا ساری چکدی. جولو بارماغی ایله کؤپویو گؤبه‌یینه دولدوردو. بارماغینی گؤبه‌یینده اویناتدی. اوزون دیرناقلاری‌نین آلتی کوپوکلو ایدی. تیتانیوم اوزوک، بارماغیندا پاریلداییردی.هه نازلی! ننه دئمیشکن، دوغرودان بو اوزون دیرناقلی بارماقلارین، قارتال قییناغینا اوخشاییر هاااا. گؤره‌سن منی اوولایان قارتال، کیم اولاجاق!؟ تکی من دئین اولسون، یوز دفعه‌ده چاغیرسا- نازلی!، اونا، جانیم دئیه‌رم. آنجاق من دئین کیمی آدیمی سسله‌سین ! نازلی …نازلی …نازلی… !
نه فرق ائله‌ییر، بو آدی آنام سئچیب، یوخسا آتام!؟ مین ایل‌ده بیر-بیریله دارتیشسالار،آنام دئیه‌ر من سئچدیم، آتام ایسه دئییر من! آنجاق من نازلی‌یام. نازلی دئین‌ده، ائله‌بیل کلمه‌لر ساچلاریمی تومارلاییر. اؤپور! آغیزدان نه ده گؤزل چیخیر. نازلی! نازلی …نازلی یاریم سان…لای لای…حامامین قاپیسی چالیندی. مشجّر شوشه‌نین آرخاسیندا بیر کؤلگه گؤروندو. چکیلیب قیراقدا دوروب، باشینی قاپی‌دان ائشیگه اوزالتدی.یئنه بو قادین‌دی . هارا گئدیرم منه توش اولور.
قاپینی باغلادی. بیر آددیم دوشا دوغرو گئدیب، سونرا گئری دؤندو. بیر دفعه‌ده قاپینی آچیب، آسمادا اسپور کیفیینه، بیر ده پلاستیک‌ ایچینده‌کی باشماقلارا باخدی. قاپینی اؤرتوب، دوشون آلتینا گیردی. ساچلاریندان آشاغی آخا‌ن کؤپوکلر یئره سوزوب، کانالا آخدی. ساچلارینی اوووجلاریلا اووکه‌له‌دی.آرواد، لووغالیقدان آز قالیردی پارتلاسین. اونا دئیه‌ن یوخدور کی، بو سالوندا، سن جا آدام تاپیلمیر!!! واه-واه! اسپرئیی نئجه‌ده اوستومه فیسیلداتدی. نه اولسون کی! بیرآز تر قوخویوردوم دااا….بیرینجی دفعه‌دیر کی یادیمدا اولماییب پالتارلاریمی یویویوم ائله بو اوزدن ده چانتامدا قالیب تر قوخوسو توتموشلار. من اؤزوم چوخ حسّ ائله‌میشم، بو سالوندا، هامی‌دان تر قوخوسو گلیر. اوتانماز-اوتانماز، گؤزوم باخا-باخا اسپرئیین هامیسینی اوستومه فیسیلداتدی. اسپرئی کی نه دئییم! مین رحمت مشهد عطرینه. هله دئینده نه خبردی؟ منیم آلرژیم وار، مندن اجازه‌‌سیز نییه منیم اوستومه فیسیلدادیرسان، دئییر: یاخشی ائله‌ییرم، تر ایی‌سیندن اؤلدوم! امّا یاخشی دئدیم ها…ایی‌دن ناراحات‌سان، اؤز اوست-باشینا، قولتوغونا فیسیلدات. آرواد باخا-باخا قالدی. داها بیر سؤز تاپا بیلمه‌دی دئسین. دئییرم آخی یئکه آروادسان ! آخی منیم کیمی یارلی-یاراشیقلی بیر خانیم مگر تر قوخویار! منیم نه‌‌ییم‌دیرکی!؟ باخ گؤر کیم نه گئییب؛ نه رنگ گئییب، ائله ایت کیمی قوخلاییر. مدلارا باخ، باشماقلارا باخ …! توتالیم کی، تر قوخوسو گلیر. خوشون گلمیر گئت ویبراتوردا او قدر اؤزونو تیتره‌ت کی، او تونبول قارنینین یاغی، پییی اریسین… بیر ده قاپی چالیندی. کیمسه قاپی دالیندان سس‌لندی:
-خانیم تئز اول.! بو دوش آنجاق تر آلماق اوچوندور. یویونماغی ائوینیزه ساخلا.
قاپینی بیر آزجا آچیب باغیردی: او بیریسی دوشلارا باخ. من ایندی‌جه گیردیم.
قاپی‌نین آچیغیندان بیر ده آسقی‌دا پلاستیک ایچینده‌کی نارینجی باشماقلارینا باخیب،گولدو. دوشا ساری گئتدی.یئنه لیف یادیمدان چیخیب. نه اولاجاق، ائله اؤز پالتاریم‌دی دا؛ بو دا لیف…
شامپونو تونوکه‌سینه جالادی. اووکه‌له‌ییب جانینا چکدی. قوللارینا، بوینونا، دؤش‌لرینه، قارنینا، بودلارینا، دیزلرینه چاتاندا، ائله محکم چکدی کی، دریسی آجیشدی.آیاقلارینا چکرکن،گؤزو-چیرک‌لی، چاتلاق دابانلارینا ساتاشدی.
ائوده یویونارکن یادیمدا اولسون دابانلاریمی آیاق‌داشی ایله سورتوم.حامامین مشجّر شوشه‌سی‌نین دالیسیندا بیر کؤلگه گؤروندو. قاپینی آچیب باخماق ایسته‌دی. الینی دستگیره‌یه آپاردی، امّا نه‌سه گئری قایتاردی.بوش وئر. یقین یئنه او قادین‌دیر؛ قاپینی آچسام، تئز اول دئیه‌جک. قویمورلار کی آدام بیر جانا‌سینَر یویونسون.دوش آلتیندا دوروب، گؤزلرینی یومدو. اللرینی یوخاری قالدیردی. بارماقلاری دوشا دَیدی. سو، بارماقلاریندان آخیب، دؤشلری‌نین اوجوندان،گوموشو قایالاردان آخان شلاله کیمی آیاقلارینا آخدی.کئف ائله نازلی! ننه‌نین یئری بوش. بوردا اولسایدی، دئیردی: قیز! آز جانینا لیف چک؛ یوخسا درین نازیک‌له‌شر، دئین یوخ کی آی ننه! آخی دری پالتاردی، یودوقجا نازیک‌له‌شسین!گؤزلرین آچدی. مشجّر شوشه‌نین دالینداکی کؤلگه گؤرونموردو. قوللارینی آچیب، قوش کیمی، سویون آلتیندا قانادلاندی.گؤره‌ن من ده قو قوشو کیمی رقص ائده بیله‌رم! نئجه بالئت‌ده سو ایچینده اؤز دؤره‌سینه هرله‌نیردی …! ایچیمدن کئچیر، نه اولاردی او قانادلارین اوستونده اوزاناردیم….! قوللارین ساغا-سولا آچدی. سویون آلتیندا اؤز دؤره‌سینه هرله‌ندی.
نازلی خانیم بس دی! سو قوشو اولماق یئتر. یئنه ده قاپی چالینار. بس‌دی. اوزونه، بوندان آرتیق سؤز گلمه‌دن دوشدان چیخسان یاخشی اولار.
بارماقلاری‌نین اوجویلا ساچلارینی بوروب، سیخدی. شیری باغلادی. سو کسیلدی. گوزگو یانینداکی آسقی‌دان قتفه‌نی گؤتوروب، چیینینه سالدی. الینی بوخارلانمیش گوزگویه چکدی. اؤزونه باخدی. قاپینی آچیب چانتاسی‌نین یانیندا‌کی آسقی‌یا باخاندا، ببک‌لرینه ایلدیرم چاخدی سانکی. آسقی بوم‌بوش ایدی. یئره دوشن قتفه سویو جانینا چکدی. قاپی‌نین قاباغیندا قورویوب، داش هئیکله دؤندو. ساچلاری‌نین سویو داملا-داملا چیینینه، دؤش‌لرینه دامجیلاییردی. اسپرئی فیسیلدادان قادین اوزاقدا دورموشدو، او بیری قادینلارلا دانیشیردی….

نوشته شده توسط admin در یکشنبه, ۰۲ شهریور ۱۳۹۳ ساعت ۵:۰۳ ق.ظ

دیدگاه


چهار − 1 =