معمار حنیفه

معمار حنیفه

یازار:حسین واحدی
آنادیلیمیز: معمارلیق آدی ایله آد چیخاردان رحمتلیک حنیفه امیری ۱۳۰۷/۰۹/۰۳ ده تبریزده دونیایا گؤز آچسادا گنج چاغلاریندا اورمویا کؤچوب بو شهرده چالیشماغا باشلاییب‌دیر. دایانمادان چالیشان حنیفه عؤمرونون اوشاقلیق چاغلاریندا اوروسون ایشغالیندا تجروبه ائتمیش‌دیر. اؤزونون اوشاقلارینا سؤیله‌دیگینه گؤره روس‌لار ایران آذربایجانینا قوشون چکدیکلری زامان, حنیفه آدینی چتینلیک چکرک قانیفه سسله‌یرمیش‌لر. اونون اتاسی قیشین سویوغوندا کولکده اؤلندن سونرا باجی-قارداشلاری ساخلاماق ایسه بونلا بؤیوک قارداشینین بویونونا دوشر.
حنیفه, اورمویا گلدیکدن سونرا، چکدیگی زحمت‌لردن نتیجه آلاراق آدلی-سانلی معمار اولوب مالی دورومو ایسه یاخشی‌لاشیر. اؤز ایشچی‌لرینه زامانیندان آرتیق حاق وئرن حنیفه، بوتون ایشچی‌لرین اوره‌یینی اله گتیریر.
ایشچی‌لره خدمت ائتمه‌نین یانیندا, چوخ واختلار, اؤزللیکله, بایرام قاباغیندا اولان گونلر، یوخسول اینسانلارین الیندن توتماق همیشه اونون ایشی ایدی. دئمک اولار رحمتلیگین قاپیسیندان هئچ کیم, الی بوش قاییتمازدی.
معمار حنیفه، اورمو شهرینده بیر چوخ قه‌در تیکینتی‌لرین معماری اولموشدور. اونلاردان ایندیکی تختی استادیومونون سالونو، عزیز عیدی مدرسه‌سی، مختلف مسجدلر و… . او سونرالار قوشچو شهرینده ایکی واحید, ۷۲ کیلاسلی مدرسه‌نینی معمارلیغین اله آلیر. او مدرسه‌لری توتان ایل، ایسلامی انقلاب اولوب, ایکی- اوچ ایل او پروژه یاتیب قالیر. ۱۳۶۱ ده نئچه ایل بوندان قاباقکی مقاوله (قرارداد) ایله مدرسه‌له‌رین ایشین یئنی‌دن باشلاییر. انقلابدان قاباق مدرسه‌لرین یئرینه تؤکدویو مصالحین هامیسی یوخ اولموشدو. بو اوزان وئردیگی سؤزو توتاراق ائوین, باغین و ماشینین ساتیب او پروژه‌نی باشا چاتدیریب دؤولته تحویل وئریر. آنجاق او پروژه اونو دالا سالیب عؤمرونون سونونادک جبران ائده بیلمه‌ییر. معمار حنیفه‌دن بئله بیر خاطیره ذهن‌لرده یادیگار قالیب‌دیر:
“گونلرین بیرینده, حنیفه معمار ایله ایشیچی‌لری, ایشدن چیخیب اورمو قهوه‌خانالارینین بیرینه گئدرلر. چای‌لاری ایچر-ایچمز, عسگر نجار آدلی بیریسی توکاندان ایچری گیرر, اوراداکیلارین بیری تئز آیاغا دوروب عسگر نجار گلدی دئیه هامیدان دعوت ائدر اونا زور سایغیسی قویوب, آیاغا قالخسین‌لار, اورادا اولان هرکیمسه اونون قورخوسوندان آیاغا قالخار, حنیفه اؤزو اوتورسادا ایشچی‌لر آیاغا قالخماق ایسته‌ینده حنیفه قارشی چیخیب دئیه‌ر:-‌ سیزه کیمسه بیر سؤز دئیه بیلمز, یئرینیزده اوتورون.
ایشچیلر یئرلرینده اوتورار. لاتلیق ائدن, عسگر نجار ایچه‌ری کئچر اورادا یالنیز حنیفه معمار گیل اوتوران یئری اوتورموش گؤرر. قاباغا کئچیب دئیر:-‌ اولان ائله‌بیل بیلمیسیز کیم گلیب؟ … آیاغا قالخین… منه دئیرلر عسگر نجار… حنیفه ایسه جاوابدا دئیر:-‌ سن هرکیمسن اؤزونه‌سن… بیز زور ایله کیمسه‌نین آیاغینا قالخماریق…اورادا بونلارین سؤزو ووروشماغا چکر, قهوه‌خانادان ائشیکده حنیفه معمار عسگری ووراراق, آرخا سالار, عسگر نجار ایسه آبیرسیز اولوب نوچه‌لری ایله بیرگه اورادان قاچارلار.
نئچه گون بو اولای‌دان سونرا یئنه حنیفه گیل قهوه‌خانایا گلیب دینجه‌لیب چای ایچه‌نده, قهوه‌چی حنیفه‌نین یانینا گلیب بیری اونونلا ائشیکده گؤروشمک ایسته‌ییر, دئیه‌ر. حنیفه تک باشینا ائشیگه چیخیب بیر یاشلی کیشی ایله قارشیلاشار.
-‌ حنیفه به‌ی سیزسینیز؟-‌ اؤزومم بویورون…-‌ عسگر نجاری سیز ووروبسونوزمو؟
-‌ بلی… نئجه؟بلی سؤزونو ائشیدن کیشی, حنیفه‌نی باغرینا باساراق دئیه‌ر:-‌ آی سنین قادانی آلیم, من عسگر نجارین آتاسییام… او قانمازا دفعه‌لرله دئمیشدیم بیری بیرگون سنین بورونونو اوواجاق. اوگون من او آداما کت-شالوار آلاجاغام. نه قه‌در دئیردیم ال چک خالقی آزار-اذیت ائتمه‌دن سؤزه قولاق وئرمزدی, و بوگون او آدام سن اولدون. عسگر, داها دوغروسو آدام اولوب و قاییدیب ایش-گوجونه!حنیفه ایسه بیرآز دانیشاندان سونرا کیشی‌نینی تکلیفینی قبول ائتمه‌ییب, اورادا ساغوللاشارلار.
“رحمتلیک حنیفه امیری, سونونودا ۱۳۷۱ ده, بیرایل اؤزوندن اؤنجه دونیاسین ده‌ییشن خانیمی “فرخنده‌ غفارزاده‌”نین یوخلوغونا دؤزه بیلمه‌ییب اودا دونیاسین دیشییب ابدی یاشاما آیاق قویار. اونون مزاری ایندی ایسه اورمونون رضوان باغیندادیر.

نوشته شده توسط admin در شنبه, ۳۱ مرداد ۱۳۹۴ ساعت ۹:۲۰ ق.ظ

۱ نظر

نظر -49 - 0 از 1اولین« قبل بعد  » آخرین 
  1. 0

    رحمتلیغ حنیفه امیری شهریمیزین بویوک وافتخارلی معمارلارینانیمیش وچوغلی آثار معماری شهریمیزده او معماردان قالیبدی معمار حنیفه علاوه بر معماری چوخ ثواب و چوخلی اللردن یاپیشیب وچوخلی اداملاری ائو صاحابه ائلمیش روحو شاد.قارداشیمیز حسین واحدیدن تشکرالیب بو گوزل مطالبلرینه

نظر -49 - 0 از 1اولین« قبل بعد  » آخرین 

دیدگاه


+ 8 = یازده