محمد احمدي‌زاده
آناديليميز: حيطين بير گوشه‌سينده قهوه رنگده‌کي قويون مؤحکم بير ايپ‌له ديوار ديبينه باغلانميشدي. طالعيندن خبرسيز بئچارا قويون، قاباغينا تؤکولموش يونجادان يئييردي. معصوم باخيشلاريلا دا هردن بير باشيني قالخيزيب اطرافا باخيب مله‌ييردي.
او گون حيطده عجايب بير جوشغو و حرکت واريدي. هر کس اؤز ايشي‌له مشقوليدي. نابات ننه پنجره‌نين يانينداکي تنديرين باشيندايدي. کريم، من و بهرام سيرا اوستونده چکيش بکيش ائله‌ييرديک.بهرام، »ايندي سيرا منيمدي« دئدي و بير دسته يونجاني اوراغين آلتينا اؤتوردو.
اوجا بويلو عوض بابا اوستوموزه بير دئييندي و سونرا اوراغين دسته‌سيني آشاغي ائنديردي.
رحمتليک بؤيوک باباميز ائله دئيينگن بير قوجايدي. مهربانيدي، آمما تئزـ تئز حيرصلنردي.
حيرص دوزو دا آرتسايدي بيرـ ايکي يامان ياووز ائشيتمه‌يي اوندان گؤزله‌ملي‌ديک.
ائوين گيريش قاپيسي يانيندا کيچيک بير باققال توکاني واريدي. چوخ شئي ساتمازدي بيسکيويت، شيرني، دوز، قند، فاب و ريکا هاميسي بو قده‌ر.
دئيردي: »محمد بالام! گئت قوربان عمي‌دن منه بير دنه ايشملي آل. ساريسيني آل، قره آلما ها آماندي!«
نئچه بينا اوزاقليقدا قوربان عمي‌نين توکانينا گئدرديم و »بابام ايشملي ايستير« دئيرديم. او دا سوروشاردي: »کانادا يوخسا کوکا؟«
عوض بابا عؤمرونون سونونا قده‌ر هئچ کوکاکولا و کانادا آدلاريني اؤيرنمه‌دي. کئشکه بيز ده اؤيرنمه‌سئيديک کؤکوندن.
حياتيميزدا چوخلو بوش شيئلر اؤيرنديک، زهر کيمي شئيلر، هئچ ده ايشه يارامايان او اوجوز شئيلر، و اؤيرنديکجه، بير او قده‌ر ده ديرلريميزي قوربان ائتديک، طالعيميزدن خبرسيز بئچارا بيزلر.
اوراغين خيرچ – خيرچ دوغراما سسي، قويونون مله‌مسي، بيز اوشاقلارين قيشقير- باغيريشي نابات ننه‌نين تندير باشيندا اؤزـ اؤزونه اوخويوب ميزيلداماسي و بابانين سوره‌کلي دئيينمه‌لري حيطده يوکسک سسلي بير سيمفوني ياراتميشدي. سانيرام او سسلري موللاحسن کوچه‌سينده هامي ائشيديردي.
يقين او سيمفونينين سسي، کوچه‌ده داها دا ايره‌ليله‌ييب و چاي ايچينده دلي‌خانيمين قولاغينا بئله چاتيردي.
دلي‌خانيم آريق، جيلاز بير خانيميدي. گوللو -گوللو چاديراسينين ايکي اوجونو بوينونون آرخاسيندا دويونله‌ييب باغلاردي و چوخ زامان چاي ايچينده گزردي.
دلي‌خانيمين هئچ کيمسه‌يه آزاري کئچمزايدي، آمما ندنسه بيز اوشاقلار اوندان يامان قورخارديق. اوزونده درين بير کدر واريدي. گؤزلريندن غم ياغاردي.
بلکه‌ده او بيزيم گله‌جه‌ييميزدن نيگرانيدي. دلي‌خانيم آخشام چاغي يازيق قويونون باشي کسيله‌جه‌ييندن خبري واريدي.
هر زمان عصبلي بير خانيميدي، او بيليردي گئت ـ گئده چوخ شئيلريميز قوربان اولاجاق.
کانادادراي شيشه‌‌سيني وئررديم بابايا، او دا منه ان سئوديگيمدن، بير دنه کاکوولو باليق شيرنيسي وئرردي.
او باليق شيرني‌لري چينه‌ييب ده اصلا تئز يئمزديم. ائوه يئتيشنه قده‌ر آغزيمدا ساخلارديم و کاکوونون داديني چيخاردارديم.
او باليقلار ياواش- ياواش اريييب و گونون اورتاسيندا کوچه‌نين باشينا گئدرديلر دلي‌خانيمدان گيزلي چاي ايچيني رد اولارديلار و قوروچايا دوشوب اوزمک اوچون جان آتارديلار. دلي‌خانيم اونلاري گؤرونجه دئيردي:
– قوربانيز اولوم، اورا گيرمه‌يين. او چاي قوروياجاق.
چايين جوشغولو سسي باتاجاق. نابات ننه‌نين تنديري سؤنه‌جک، خيطاب يئمه‌گينين نه اولدوغو آرتيق اونودولاجاق.
نابات ننه خيطابلاري پيشيريردي و بيرـ بير آلمينيوم مئژمه‌يي‌نين ايچينه دوزوردو.
تنديردن چيخان چؤرک قوخوسو، پيشميش تره اييسي هاميني مست ائله‌ييب کئفلنديرميشدي. و…بيردن، کريمين قيشقيريق سسي هر کسي اويانديردي.
ساغ اليندن قان آخيردي. اورتا بارماغي‌نين ياريسي کرديده دوغرانميش يونجالارين ايچينده‌ايدي.
حسن داييمين خانيميسي گوهرين »ياحسين!« سسي حيطده کي بوتون سسلري باسديردي. اونون ناله‌سيندن قويونون مله‌مه سسي بئله ائشيديلميردي، يئره دوشن بارماق تيکه‌سيني گؤتوروب کسيلن بارماغين اوجونا سيخيشديردي.
بلکه ده اوميد ائديردي تکراردان ياپيشسين او کسيلن بارماق…
دلي خانيم کاکوولو باليقلارا دئدي:
– دايي خانيمي گوهرين ناله‌لريني دينله‌يين. قوربان ائتديينيز بارماقلار بيرداها ياپيشمازلار. قاييدين قالان بارماقلارا صاحاب چيخين!
.Arazazarbaiijan.farhangi@gmail.com
بلاي تثبيت قيمت بنزين بر سر اقتصاد ايران و معيشت
احياي بمب نمکي درياچه اروميه شبه‌علم نيست مشکل مديريت پروژه است
منشور کوروش روايت نخستين بيانيه انسانيت در تاريخ
کؤچري کاروان دير سانکي
ظرفيت هاي علمي براي احياي درياچه اروميه استفاده مي شود
پروژه‌هاي عمراني فراموش‌شده در آذربايجان غربي خاک‌خوردگي به جاي بهره‌برداري
معطلي کاميون‌هاي ايران پشت مرزها
آيا درياچه اروميه قبلا هم خشک شده بود
کتابخانه فراتر از جاي امانت گرفتن
قوربانليق سيمفونيسي
درباره آراز آذربایجان