غريبه يولداش

 سسيميز چيخمادان ساکتجه‌سينه اوزانميشديق. سانکي هئچ ايشيميز- گوجوموز يوخدور. هردن آشيب، قارشي- قارشي‌يا اولوردوق، هردن دؤنوب دالبادال ياتيرديق. آلوو کيمي نفس‌لريميزي ده ائشيديب، سايا بيليرديک. ياري توخ قارنيميزدان داها چوخ موقايات اولوردوق. دئييرديک انساندير دا، بلکه بيردن بير خطا- مطا ياپديق. اؤز اؤزومه دئييرم تخت‌لر بير آز فاصله‌لي قويولسايدي، بلکه جانيميزدان قالخان ايستي- حرارت آزادجاسينا اوتاق‌دا داغيلايدي.
دوروب پاسلي دمير پنجره‌ني آچيرام. ائشيگه باخيرام. هله هئچ خبر- اَتر يوخ. نه گل وار، نه گئت. هاوا اوزاق‌لاردا ايستيني بير قاينار بولود کيمي بللنديرير. قوملو جادانين او تاييندا بير اوجا راجي آغاجي وار. کؤلگه‌سي جادادان گئچيب، قهوه‌خانانين ياخينليغينا قده‌ر اوزانيبدير.
غريب يولداشيمي نظر آلتينا آلميشام. هارادان گليب، هارا گئتمه‌سيني بيله بيلميرم. بير ماوي رنگ کيفي وار. بوزومتول جوراب‌لاريني باسيب، گؤن آياق‌قابي ايچينه و اونو دا قويوب آغاج قاپي‌نين آغزينا.
او گلنده مني اصلاً اويانماديم. او دا مني اوياتمادان ساکيتجهسينه اوزانيب ياتدي. البته‌‌ من ايستي‌دن ياتماميشديم. او مني ياتميش گؤروب يوخلادي. هردن اليني آتيب، يوغون- يومورو بدني ايله دولدورولموش ماوي کؤينگيني يئللمه‌گه باشلاييردي. قارني ساللاق کيمين نظره گليردي. بلکه ده کمرلريني گؤبک‌دن آشاغي باغلايان توختاق جاوان‌لار کيمي، آستاجا گولوب، آستاجا دانيشانلاردان ايدي.
گئديب تليسه بورونموش و قاتما ايله تيکيلميش سو کولمن‌يندن بير ليوان، سرين سو تؤکوب ايچيرم. قوجا قهوه‌چي او ياندا باغچاسيني آلاق ائدير. باشيندا دؤيره بؤرکو وار. اوزونو گؤرمورم، آمّا تصوّر ائديرم ايستي‌دن کلافه اولموش.
آلا- قارانليق اوتاغا قاييديرام. غريبه يولداشيم هله خيمير- خيمير ياتميش. آيري بير ايش- پئشه تاپا بيلميرم. گئنه تخت اوستونده اوزانماغا مجبور قاليرام. يانيمداکي ساک‌دان جيبي کتابيمي چيخارديرام. »ميني‌ماللار«کتابي‌دير. اوخوماغا باشلاييرام:»سماوي موجودلار يئر کوره‌سيني تسخير ائتمک اوچون، يئره گليرلر. پنتاگون و ناسا جماعت‌دن بو خبرين جدّي توتماسيني ايسته‌ييرلر... گؤزو گؤي قوجا کيشي، شهرين اَن اردحاملي کافي شاپي‌نين صاحبي‌ ايدي. او کونتُرولو گؤتوروب، اوزاق‌دان تلويزيونو سؤندوردو. سورا گوله- گوله دئدي: بيز چوخدان بورداييق!«
ائشيکدن بير سس گلير. قوجا قهوه‌چي‌نين سسي‌دير. بيزي چاغيرير. ساکيمي يونگول‌دن گؤتوروب ائشييه چيخيرام. بير ميني‌بوس دايانميش. من گئدن استقامته گئدير. سولغون، ماوي رنگلي و خار- خار ايشلهين بير بنز ميني بوس.قهوه‌چي مني سسله‌نيب دئيير:- او يولداشيوي دا اويات گلسين. اونون دا ماشيني ايندي يئتيشر. اوتاغا دؤنورم. کيشي هله ده ياتميش.- آي يولداش، ماشين گلير. سن ده دور گل!
کيشي ياواشجا اويانيب، قويون رنگي گؤزلريني اؤوکه‌له‌يير. او حالدا دوروب تخت اوستونده اوتوروب، جوراب‌لاريني گئيمه‌گه باشلايير.
من ماوي ماشينا ساري گئديرم. قهوه‌چي ميني‌بوسون آلاياش و بيغلي سوروجوسو ايله دانيشير. بو آندا اويان طرف‌دن بيزيم استقامتين عکسينه بير قيرميزي ميني‌بوس دا گلير. کيشي قهوه‌خانادان چيخير گلير. عجيبه‌‌ بير يئريمه‌سي وار. اوخودوغوم ميني‌مال حکايه گؤزومون اؤنونده جانلانير. آدام کيمي يئريميردي. بير لحظه فيکيرلشديم کانگورو کيمي آتيلا- آتيلا گلير. گؤزومون اوستونده دايانان شور ترلري سيليرم. واقعاً فکر ائله‌ديم او کيشي کانگورودور. قارني ساللاق و قيللي ايدي. قارني‌نين اوستونده‌کي کؤينک پارتلاماق عرفه‌سينده ايدي. آغ- قارا دوگمه‌لري قوپان کيمي دايانميشدي.
باشيما ايستي چؤکموشدو. بير داها اوز- گؤزومون تريني سيليرم. غريبه يولداش گله- گله منه ال قووزايير. ساکيني آچير:-گؤرورم کتاب اوخويانسان، آپار بونو دا اوخو!
رُقعي قطعينده بير اوزو ماوي بير اوزو قيرميزي کتابدير. کتابي آليرام. تشکّرلر دئييرم. او دا قويون رنگي گؤزلري ايله منه باخير. قيرميزي ميني‌بوسا مينير. باشيني پنجره‌دن چيخارديب دئيير:- قهوه‌چي‌نين پولونو من وئرديم. ايستي هاوا چوخ اذيّت ائله‌سه، بير گون گل معدنه. اورا داغليق و سرينليک‌دي. معدنين هاواسي سپ- سرين اولار. کتاب اوخويوب، اولدوزلارا باخاريق.
قهوه‌چي گاه بيزيم دانيشيغيميزا قولاق آسير، گاه بيغلي سوروجو ايله دانيشير.
- عنوانيمي دا او کتابين اوّلينده يازميشام... .
قيرميزي ميني‌بوس حرکت ائلير. من هئچ بير شئي دئيه بيلميرم. ماوي ميني‌بوسا ساري گئديرم. قيرميزي کتاب اليمده ال قووزاييرام و بئله‌ليک‌له منه بير کتاب پاي وئرن غريبه يولداش‌لا وداع‌لاشيرام.
Arazazarbaijzn.anadilimiz@gmail.com