توفارقانلی عاباس

توفارقانلی عاباس

کوچوره ن:اکبرسعادت
آنا دیلیمیز:آذربایجان(تبریز) آشیق موحیطی تاریخن بو بولگه‌لردن چیخان ایستئعدادلی صنعتکارلارلا شوهرتلنمیشدیر. توفارقانلی عاباسین، خسته قاسیمین بوردا یئتیشمه‌سی، قوربانی‌نین ساری آشیغین اصلن قاراداغلی اولماسی، بیر چوخ کلاسیک خالق داستانلارینین (خسته قاسیم، عابباس-گولگز، نجف-پری‌زاد، آشیق قریب و …) یورد یئرینین قاراداغا باغلانماسی تبریز-قاراداغ آشیق موحیطینده ساز-سوز صنعتکارلیغینین تاریخ بویونداکی یوکسک سویه‌سیندن سوراق وئریر.
آذربایجان آشیق صنعتینین اساس حاقق آشیقلارینی یئتیشدیرمیش تبریز-قاراداغ موحیطی تشککول‌دن بری هم ایفاچی، هم ده یارادیجی موحیط کیمی فعالیت گورسدمیشدیر. اوتن چاغلاردا اولدوغو کیمی ایگیرمینجی یوزایلده ده بو موحیطده قودرتلی صنعتکارلار اورتایا چیخمیشدیر.
آذربایجان دئدیکده، خیال دونیاسیندا یئددی مین ایللیک یازیلی مدنیت تاریخی جانلانیر. آزلاردان قالمیش اسطوره‌لر و سومر تورکجه‌سیله حک اولونموش داش یازیتلاری گوز اونونه گلیر.
ان اسکی مدنیت قایناغی اولان یوردوموزدا، معنوی ارث و مدنی آبیده‌لرین یارادیجیلاری، ائل ـ اولوسو موزون ان سئچگین دوشونجه قهرمانلاری و فیکیر باهادیرلاری اولان معلملرین اللریله یارادیلان مدنیت آثارینین یازیلی اؤرنه کلرینده » اوزان« دئییله‌‌ن، ائلجه بیله‌ن، آغ ساققاللی، آغزی دوعالی و دیلی سازلی ـ سؤزلو روحانی ـ پیرانی ایلک عاشیقلاریمیزین دوروشلارینی گورور، دئییشله‌رینی ائشیدیر و معنوی ووروشلارینی حس ائدیریک.
ان اسکی سومر تورکجه‌سیله حک اولونموش بیر نئچه یازیتدا، کوکسونه سازی سیخیب آیاق اوستونده دوران ایلک اوزان هئیکلی و » آزیق « ماغارالارینین دیوارلایندا نقراولونموش ایلاهی بیر حال ـ هوادا رقص ائدن اوزانلار توپلولوغو رسیم و چیزگیلرینه راست گلمک اولار. سوز یوخ کی سونرالار » عاشیق « آدلانان بو اوزانلاری، بشریت تاریخینده مدنیت آثاری‌نین ایلک یارادیجیلاری و ایلکین معنوی رهبری آدلاندیرماق اولار. ائللرین جیسمانی و روحانی طبیب‌لری ساییلان اوزانلار بیر طرفدن شفا وئریجی بیتگیلر یولو ایله داوا ـ درمان دوزه‌لدیب، ائل ایچینده حکیملیک ائدیر و باشقا طرفدن گله‌جک نسیللری اویغون بیر یاشاییشا حاضیرلاماق اوچون سازلی ـ سوزلو ایلاهی و ملکوتی آیه‌لر قوشوب ائل ایچینده یاییردیلار.
عاشیق مدنیتی تاریخی‌نین ایلک اورنه کلری ساییلان بو ده‌یرلی اسطوره‌وی آیه‌لر و » قوشغو« لارین ایزلری، سونرالار یازیلی مدنیّت اثرلری یاردان باشقا ملت‌لرین تاریخلرینه‌ده نفوذ ائتمیش و درین ایزلر بوراخمیشدیر. اسکی یونان میتولوگییاسینداکی» آکینا « اسطوره‌سی‌نین بیزیم » آق آنا « قوشغو موزدان آلیندیغی کیمی اوزانلاریمیزین دا هر گون منتشر ائتدیکلری » تور یاز «کتیبه‌لری، سونرالار روم دوولتی طرفیندن گونده‌لیک آنلامیندا ایشله‌نن و هرگون نشر اولان آدی ایله دوام ائتمیشدیر. همین سوز جوک ایندی ژورنالیسم فورماسینا گلیب چاتمیشدیر. ایلک دفعه ایکی مین ایکی یوز ایل بوندان اونجه ژولیوس سزار الیله نشر اولان اورنه کلری، ائلجه بیله‌ن اوزانلارین سومر کتیبه‌لرینده آدلانان » توریاز« ـ لاری‌نین دوامی حساب اولونور.
ان اسکی تورکجه‌میزین بیر قولوندا » سایا « و باشقا قولوندا » قاسا « آدلانان ایلکین روحانی قوشغولاردا، سوز یوخ کی اوزان مدنی ارثی تاریخینه داخیل اولورلار.اسلامیتدن سونرا، اوزانلار، اوز بدیعی یارادیجیلیقلارینی اسلام حکمتی و فلسفه‌سی ایله اینانیلماز درجه‌ده غنیله‌شدیریب، تایسیز بیر عاشیق ادبیاتی مجموعه‌سی یارادا بیلدیلر.
اوزانلارین میراثدارلاری ساییلان عاشیقلاریمیز، اولوسوموزون تاریخی ـ نین هر بیر دونه‌مینده، ائل وجدانی کیمی سسله‌نمیشلر. باریش زامانی سئوینجله یاشاماغی ائل‌ اولوسوموزا اویره‌دن عاشیقلار، ساواش واختیندادا یاراقلارنیب جبهه‌لری یارمیشلار. بیر طرفدن شعر یازان، نغمه یارادان، آهنگ و ریتم قوشان، اینجه دویغولارا مالیک عاشیقلار، باشقا طرفدنده قهر‌مانلیقلاری وصف ائدن، همده اوزلری ائل قهرمانلاری یانیندا، ملی منافع اوغروندا ساواشان ارلر و ارنلره چئوریلمیشلر.بو، ارن عاشیقلاریمیزدان بیریسیده » عاشیق عاباس توفار قانلی « دیر.
اسکندرین ظولوماتدان آتلانماسیندان و خضرین آب حیاتیندا ن دانیشان عاشیق عباس، گنجلریمیزه جان بازاریندان سلامت قورتارماغی اویره‌دیر، بو دونیادان او دونیا یا کوچمه‌گی یاداسالیر، سوز بیرلیگی و ائل بیرلیگیندن دانیشیر، وطنیمیزین گوزه‌لیک‌لرینی وصف ائدیر، جانلی بیر لیریسم و تغزل نغمه‌کاری کیمی ظهور ائدیر و عاشیق شعری‌نین ان گوزه‌ل نمونه‌لرینی یارادیر. عاشیق عاباس، همده شاه اسماعیل ختایی دووروندن جانلانما و یئنی لنمه‌یه باشلایان و ساواش مئیدانلاری‌نین گورولتولو طبلینه دونه‌ن عاشیق شعریمیزین ان قیزغین مبارزه هیمنلرینی قوشموشدور.
عاشیق عاباس توفار قانلی‌نین بدیعی یارادیجیلیغی و ادبی ارثی‌نین توپلانیب نشر اولونماسی، بیر جدی علمی ایش کیمی، بیر چوخ تدقیقاتچی و ادبیات هوسکارلاریمیزین قارشیسیندا دورموشدور.

نوشته شده توسط admin در چهارشنبه, ۲۳ دی ۱۳۹۴ ساعت ۶:۲۴ ق.ظ

دیدگاه


9 − = سه